Gad Mek Evn An Di Ort

Yu si di ting dem roun wi laik di chrii dem an so, a Jeuova mek dem kom bout ino. Bot im mek som tingz we wi kyaahn si tu. Laik di ienjel dem. Wa yu nuo bout di ienjel dem? Jeuova mek di ienjel dem bifuo im mek di sitn dem we wi kyan si. Im mek dem fi stie jos laik ou im stie, an a dat mek wi kyaahn si dem. Di fos ienjel we Jeuova mek a di wan we elp im fi mek ada tingz. Im elp Jeuova fi mek di staar dem, di planet dem an da priti ort ya we wi liv pan.

Afta Jeuova mek di ort, im fiks it op nais fi piipl an animal liv pan it. Im mek di lait fram di son shain pan di ort. Den im mek di mountn dem, di sii dem, an di riva dem.

So wa apm afta dat? Jeuova se: ‘Mi a-go mek graas, som plaant, an som chrii gruo nou.’ So uol iip a difrant difrant vejitebl, flowaz, an fruut chrii staat fi gruo. Den Jeuova mek aal a di animal dem. Im mek animal we flai, swim, kraal, an we kriip. Im mek som likl animal, laik di rabit dem, an som big wan, laik di elifant dem. A wich animal yu laik?

Den Jeuova se tu di fos ienjel we im mek se: “Kom mek wi mek man.” Gad mek piipl difrant fram di animal dem. Dem kyan mek tingz, dem kyan taak, laaf, an prie. An dem wuda tek kier a di ort an di animal dem. Yu nuo a uu a di fos man we Gad did mek? Kom mek wi si no.