Di Towa Iina Biebl

Afta di Flod, Nowa son dem an dem waif did av wol iip a pikni. So dem fambili did staat fi get biga an biga an dem staat fi liv aal bout pan di ort, jos laik wa Jeuova did tel dem fi du.

Bot som a dem piipl de neehn du wa Jeuova tel dem fi du. Dem se: ‘Kom mek wi bil wan siti an tan ya so. Wi a-go bil wan towa we ai so til di tap a it kech klier a evn. Den evribadi a-go nuo bout wi.’

Jeuova neehn api at aal wid wa dem a du, so im se im a-go tap dem. Yu nuo wa im did du? Aal av a sodn Jeuova mek dem staat taak difrant difrant langwij. An yu si kaa dem kudn andastan dem wan aneda no muo, dem kudn don bil di towa. Di Baibl se da siti de we dem did a bil did niem Biebl, an da wod de miin “Kanfyuuzhan.” So piipl staat lef fram de-so an go liv aal uova di ort. Bot eniwe dem go, dem did stil a du bier badnis. Bot yu tingk nobadi did de bout we did stil lov Jeuova? Kom mek wi riid di neks lesn an si no.