Juozif a did Jiekob sekan tu laas bwai pikni. An im big breda dem kuda si se dem faada did lov Juozif di muos. So ou yu tingk dem did fiil bout Juozif? Yu waahn nuo se dem neehn laik a buon iina im. Juozif did staat jriim bout som tingz an im tel im breda dem bout it. Wen dem ier wa im did a se, dem did tingk se it miin se wan die di wol a dem wuda afi bou dong infronta im. A nou dem did iet im laik a duos a paizn!

Wan die Juozif breda dem did de a wan plies niem Shiikem a luk aafa som shiip. An Jiekob sen Juozif fi fain out ef dem aarait. Wen Juozif did de a gud wie fram we dem de, dem si im a kom. Ier wa dem se tu dem wan aneda no: ‘Luk uu a kom. No di wan Jriimi-Jriimi!’ So dem grab im op an dash im iina wan diip uol. Bot dem breda we niem Juuda beg fi im an se: ‘No bada kil im! Mek wi sel im tu di piipl dem we bai sliev.’ Wen dem si som man fram Midiyan we bai an sel tingz we did a go a Iijip, dem sel Juozif tu dem fi 20 silva kain.

Afta dat, Juozif breda dem tek im ruob an dip it iina som guot blod an dem sen di ruob go gi im faada an se: ‘A no yu bwai ruob dis?’ Jiekob did tingk se wan wail animal did kil Juozif an it pien im aat so til. Im did so sad dat nobadi kudn se notn fi mek im fiil beta.

Wen dem kech a Iijip, di man dem sel Juozif tu wan tap man we niem Patifa. Bot Jeuova did de de wid Juozif. Patifa did si se Juozif did du im wok gud an im kuda chos im . So im put Juozif inchaaj a evriting we im av.

Patifa waif did staat fi luk pan Juozif an si se im chrang an im luk gud an ting. So evridie shi wuda aks Juozif fi kom sliip wid ar. A wa Juozif did du? Im tel ar se: ‘Dat wudn rait! Mi maasta chos mi, an yu a im waif. So ef mi sliip wid yu, a sin mi wudaana sin gens Gad!’

Wan die Patifa waif chrai fi fuos Juozif fi sliip wid ar. An ges wa apm? Shi grab aan pan im kluoz, bot im ron we fram ar. Wen Patifa kom a im yaad, shi tel im se Juozif du sitn bad tu ar. Bot a lai shi did a tel. Patifa did beks bad, so im dash Juozif iina prizn. Bot Jeuova neehn figet bout Juozif.

Wen Juozif did de iina prizn, di king a Iijip we niem Fiero did av som jriim an nobadi kudn tel im wa dem miin. So wan a im sorvant dem tel im se Juozif kuda tel im wa di jriim dem miin. An sed taim Fiero sen go kaal im.

Wen im kom im aks im se: ‘Yu kyan tel mi wa mi jriim dem miin?’ Juozif se tu im se: ‘Fi sevn ier Iijip a-go av wol iip a fuud. Bot fi sevn ier afta dat, yu a-go av wan bad bad staavieshan. Pik sumadi we nuo wa dem a du, an mek dem stuor op fuud so dat di piipl dem no staav.’ Den ier wa Fiero se: ‘A yu mi waahn fi dwi’it! Mi a di tap man iina Iijip an yu a-go bi mi sekan!’ Yu nuo ou Juozif did nuo wa Fiero jriim dem miin? A kaa Jeuova did a elp im.

Juozif stuor op fuud iina Iijip fi di neks sevn ier. Den wan bad bad staavieshan tek uova di wol ort, so wa Juozif se wuda apm did apm fi chuu. An piipl kom fram aal bout kom bai fuud fram Juozif. Im faada Jiekob did ier se dem did av fuud iina Iijip, so im sen ten a im bwai pikni dem fi gu dong de fi bai som.

Jiekob bwai dem go tu Juozif an wen im si dem, im did nuo se a im breda dem. Bot dem neehn nuo se a im. An jos laik we im did jriim bout wen im did yong, im breda dem bou dong infronta im. Juozif did waahn fi nuo ef im breda dem did chienj dem doti wiez. So im se tu dem se: ‘A spai unu kom ya fi spai. Unu kom ya fi kom si ou wi konchri tan so unu kyan kom rosh wi.’ Bot dem se: ‘Nuo man! A 12 breda a wi an wi kom fram Kienan. Wan a wi breda dem ded, an di liklis wan de de wid wi faada.’ Juozif ansa dem an se: ‘Kya unu likl breda kom mek mi si im wid mi uona tuu yai dem an mi wi biliiv unu.’ So dem go bak uom tu dem faada.

Wen Jiekob fambili neehn av no muor fuud fi nyam, im sen im bwai dem gu bak dong a Iijip. Da taim ya, dem kya dem likl breda Benjamin wid dem. Kaa im did waahn fi si ef im breda dem chienj fi chuu, Juozif aid wan silva kop iina di bag a grien we Benjamin did a kyari, an den se a dem tiif it. Im breda dem nieli jrap dong wen Juozif sorvant dem fain di kop iina Benjamin bag. Bot dem beg fi Benjamin an tel im fi ponish dem insted-a im.

Nou Juozif did si se im breda dem chienj fi chuu. Dat did riili toch im aat, so im staat fi baal an se: ‘A mi man, Juozif, unu breda. Dadi stil alaiv?’ Im breda dem did shak bad. Bot im tel dem se: ‘No fiil no wie bout wa apm. Kaaz a Gad sen mi ya fi siev unu. Nou mikies an kya mi faada kom mek mi si im.’

So dem go uom go tel dem faada wa apm an kya im dong a Iijip. Afta dem neehn si dem wan aneda fi so lang, Juozif an im faada did get fi si dem wan aneda agen.