LESN 32

A Gad Kindom A Ruul Ya Nou!

Di Wan We Print

A iina 1914 Gad Kindom staat fi ruul iina evn. A da taim de di laas die dem fi dem govament ya did staat. Ou wi nuo dat? Wi a-go luk pan wa di Baibl se wuda apm iina di worl sins 1914, an ou piipl de gwaan ya nou fi si ef wa di Baibl se a-go apm, a it a apm nou.

1. A wen di Baibl se Gad Kindom wuda staat fi ruul?

Iina di Baibl buk we niem Daniyel, wi get fi si se Gad Kindom wuda staat ruul wen wan lent a taim we dem kaal “sevn ier” don. (Daniyel 4:16, 17) Kopl onjrid ier afta dat, Jiizas kaal da lent a taim de “fi dem taim” kaa dem ruula de, a neehn Gad put dem de fi ruul. So im mek wi nuo se da lent a taim de neehn don yet. (Luuk 21:24) An wi a-go si se di sevn ier dem did don iina 1914.

2. Wa a som a di sitn dem we wi si a gwaan iina di worl sins 1914?

Jiizas falara dem did aks im se: “A wa kain-a sain a-go shuo se yu a kom bak an di worl suun don?” (Matyu 24:3) Jiizas tel dem di sitn dem we wuda apm pan ort wen im staat fi ruul iina evn. Som a di sitn dem we im se wuda apm, a dat nof konchri gweehn fait gens dem wan aneda, an piipl a-go a ded kaa dem kyaahn get inof fuud fi nyam. Pan tap a dat, wol iip a ortkwiek a-go a gwaan. (Riid Matyu 24:7.) An di Baibl mek wi nuo se di wiez dem we piipl wuda av iina “di laas die dem” wuda mek laif “aad aad.” (2 Timoti 3:1-5) Dem sitn ya get wos sins 1914.

3. Wa mek tingz get wos sins Gad govament staat fi ruul?

Likl afta Jiizas ton King, di fos ting im go du a fait Sietan an im diiman dem. An Sietan luuz di waar. Di Baibl mek wi nuo se “[Sietan] an im ienjel dem get fling dong a ort.” (Revilieshan 12:9, 10, 12) Sietan beks bad kaa im nuo se Jiizas suun get rid a im. So im mek piipl a sofa nou. An a dat mek tingz so bad iina di worl ya nou! Gad govament a-go get rid a aal a dem prablem ya.

LORN SOM MUO

Luk pan wa mek wi nuo se Gad govament did staat fi ruul iina 1914 an wa dis av fi du wid wi.

4. Di Baibl mek wi nuo se a iina 1914 Gad govament wuda staat fi ruul

Plie di VIDIYO.

VIDIYO: Gad Kindom Staat Fi Ruul Iina 1914 (5:02)

Gad mek Nebikadneza, wan king we did a ruul iina Babilan bak iina di die, jriim bout wa a-go apm iina di fyuucha. Bies pan wa Daniyel did se da jriim de miin, mek wi nuo se it did a taak bout wen Nebikadneza did a ruul. An it did a tel wi bout wen Gad govament a-go staat ruul tu.—Riid Daniyel 4:17.a

Riid Daniyel 4:20-26, an den yuuz di paat we niem “Di Chrii We Nebikadneza Did Jriim Bout—Wa It Av Fi Du Wid Gad Govament?” fi ansa dem kwestiyan ya:

(A) Wa Nebikadneza did jriim bout?—Luk pan vors 20 an 21.
(B) A wa wuda apm tu di chrii?—Luk pan vors 23.
(C) Wa wuda apm wen di “sevn ier” dem don?—Luk pan vors 26.

Di Chrii We Nebikadneza Did Jriim Bout—Wa It Av Fi Du Wid Gad Govament?

WA JEUOVA DID SE A-GO APM (Daniyel 4:20-36)

King a ruul

(A) Wan big chrii

King tap ruul

(B) “Chap dong di chrii,” an mek di “sevn ier” dem paas

Wan chrii stomp wid aiyan an kapa roun it.

King a ruul agen

(C) “Yu gweehn get fi ruul agen”

Di Fos Taim Wen Da Jriim Ya Did Kom Chuu . . .

(D) Di chrii did av fi du wid uu?—Luk pan vors 22.
(E) Wa mek im did afi tap ruul?—Riid Daniyel 4:29-33.
(F) Wen di “sevn ier” dem did don, a wa did apm tu Nebikadneza?—Riid Daniyel 4:34-36.

DI FOS TAIM WEN DA JRIIM YA DID KOM CHUU

King a ruul

(D) Nebikadneza, di King a Babilan

King Nebikadneza tan op wel ful a imself.

King tap ruul

(E) Afta 606 B.C.E., Nebikadneza ton mad man fi sevn ier, so im kudn ruul

Nebikadneza lie dong pan di grong a nyam graas laka animal.

King a ruul agen

(F) Nebikadneza neehn mad agen, so im staat fi ruul agen

King Nebikadneza chrech out im an, an a luk op iina di skai.

Di Sekan Taim Wen Da Jriim Ya Did Kom Chuu . . .

(G) Di chrii did av fi du wid uu?—Riid 1 Kranikl 29:23.
(H) Wa mek dem did tap ruul? An ou wi nuo se dem stil neehn a ruul iivn wen Jiizas did de pan di ort?—Riid Luuk 21:24.
(I) A wen di King we Gad pik did staat ruul agen? An wich paat im de a ruul?

DI SEKAN TAIM WEN DA JRIIM YA DID KOM CHUU

King a ruul

(G) Di king dem iina Izrel we Gad did pik fi ruul uova im piipl dem

Di king dem we ruul afta dem wan aneda iina Izrel a sidong pan dem chuon. Lait a shain dong pan dem.

King tap ruul

(H) Jeruusilem get mash dong, so di king dem we did a ruul fi Gad neehn a ruul fi 2,520 ier

Jeruusilem wen it did a bon dong iina 607 B.C.E., den 2,520 ier paas.

King a ruul agen

(I) Jiizas staat fi ruul iina Gad govament we de iina evn

Jiizas sidong pan im chuon iina evn wen im staat fi ruul uova di ort iina 1914 C.E. Lait a shain fram im.

Di sevn ier dem—A umoch ier dat riili miin?

Wen Daniyel did rait dong bout di sevn ier dem, im riili did a taak bout 2,520 ier. Wi nuo dat kaa iina di buk a Revilieshan, it mek wi nuo se chrii an a aaf ier a 1,260 die. (Revilieshan 12:6, 14) So tuu a dat wuda gi wi di sevn ier dem, ar 2,520 die. Kaa wen di Baibl a taak bout wa a-go apm iina di fyuucha, wen it se wan ier it a taak bout 360 die. So den, sins wi a taak bout 2,520 die ya-so, ou di 2,520 ier kom iin? Somtaim wen di Baibl taak bout wan die, it riili miin wan ier. (Iziikel 4:6) An a so it go iina di buk a Daniyel. Di sevn ier we a 2,520 die a riili 2,520 ier.

5. Fram 1914 til nou, di worl a no di siem

Plie di VIDIYO.

VIDIYO: Fram 1914 Til Nou, Di Worl A No Di Siem (1:10)

Jiizas did tel wi di sitn dem we wudaana gwaan iina di worl wen im ton King iina evn. Riid Luuk 21:9-11, an den wi a-go taak bout da kwestiyan ya:

Wich wan a dem sitn ya yu si a gwaan? Ar wich wan a dem yu ier se a gwaan?

Di apasl Paal did tel wi wa piipl a-go tan laik iina di laas die dem. Riid 2 Timoti 3:1-5, an den wi a-go taak bout da kwestiyan ya:

A wich wan a dem sitn ya yu si piipl a du tide?

Som picha: Difrant difrant picha we a shuo wa a gwaan iina di worl iina di laas die dem. 1. Wan aami liida tan op an av im an dem op iina di ier a baal out. 2. Som plies we mash op afta wan ortkwiek. 3. Som waar plien. 4. Som piipl we av aan maas a waak outa duor. 5. Di Twin Towa dem we de iina Nyuu Yaak we di bad man dem did mash op a bon dong. 6. Wan man a tek jogz. 7. Wan man a tomp aafa im waif an a shout aafa ar. 8. Uol iip a jogz an lika. 9. Tuu uman at out iina fansi kluoz an uol iip a fandanggl a tek picha a demself. 10. Wan silekta a du im ting a wan daans. 11. Wan man a fling wan bakl taach.

6. Nou dat wi nuo se Gad Kindom a ruul, wa dat fi push wi fi du?

Riid Matyu 24:3, 14, an den wi a-go taak bout dem kwestiyan ya:

Wa kain-a wok a gwaan we mek wi si se Gad Kindom a ruul?
Wa yu kyan du fi du da wok de tu?

Gad Kindom a ruul ya nou, an di taim suun kom wen it a-go tek uova fram di govament dem we a ruul ya nou. Riid Iibruu 10:24, 25, an den wi a-go taak bout da kwestiyan ya:

Wa di wol a wi fi a du nou wos laka ou taim shaat?

Som picha: 1. Sumadi we a stodi di Baibl go a wan Jeuova Witnis miitn. 2. Di siem sumadi a priich tu sumadi we shi nuo. — Ef yu ier bout sitn we kyan elp sumadi we iina prablem an siev dem, wa yu wuda du?

SUMADI MAIT-A AKS: “Wa mek di Jeuova Witnis dem chat so moch bout 1914?”

Wa yu wuda ansa dem se?

DIS A WA YU FI MEMBA

Wi nuo se Gad Kindom govament a ruul ya nou, kaa wa di Baibl did se a-go apm, di taim wen it apm, an di sitn dem we wi si a gwaan ya nou shuo se a so it go fi chuu. So wen wi priich an go a wi miitn dem, wi shuo se wi biliiv aal a dis.