Yu Niem Rait Dong Iina “Di Buk We Gad A Rait Dong Di Niem A Di Piipl Dem We A-Go Get Fi Liv Fi Eva” Iina?

1. Azkaadn tu Malikai 3:16, wa iina di buk we Jeuova a rait iina fram lang taim til nou?

UOL iip a ier nou, Jeuova a rait dong som niem iina wan speshal buk, an di fos niem we im rait iina it a Iebl kaaz Iebl did chos iina im.b (Luuk 11:50, 51) An fi aal a dem ierz de til nou, Jeuova no tap rait dong piipl niem iina im buk. A uol iip a miliyan a piipl niem iina it. An di Baibl kaal da buk de “di buk wid di niem a di wan dem we Jeuova waahn fi memba,” an “di buk we Gad rait dong di niem a di piipl dem we a-go get fi liv fi eva,” an “di buk we di Biebi Shiip av.” So iina da lesn ya wen wi a taak bout da buk ya, wi a-go kaal it “di buk we Gad rait dong di niem a di piipl dem we a-go get fi liv fi eva.”​—Riid Malikai 3:16; Rev. 3:5; 17:8.

2. A uu an uufa niem de iina di buk we Gad rait dong di niem a di piipl dem we a-go get fi liv fi eva iina, an wa wi fi du fi get fi wi niem fi rait dong iin de tu?

² Da speshal buk ya av di niem dem a aal a di piipl dem we av nof rispek fi Jeuova an we lov im rait dong iina it. A dem a di wan dem we a-go kyan liv fi eva. Kaa Jeuova sen im Son kom ded fi wi a dat mek wi an Jeuova kyan get kluos kluos, an a so kom wi niem kyan go get rait dong iina da buk de. (Jan 3:16, 36) No mata wich paat wi a-go liv​—weda iina evn ar pan di ort​—aal a wi waahn wi niem fi get rait dong iina da buk de.

3-4. (a) Ef wi niem rait dong iina da buk de nou, dat miin tu se wi a-go liv fi eva? Tel wi wa mek yu se so. (b) Wa wi a-go luk pan iina da lesn ya an iina di neda wan?

³ So yu tingk dis miin se evribadi niem we rait dong iina da buk ya a-go liv fi eva? Eksidos 32:33 gi wi di ansa kaa iin de-so Jeuova tel Muoziz se: “Enibadi we no du wa mi se, fi dem niem we mi did rait dong iina mi buk, mi a-go rob it out.” So dat miin tu se eni niem we iina da buk de ya nou, Jeuova kyan rob it out. It wuda komiin laik se a pensl im did yuuz fi rait di niem dem. (Rev. 3:5) So wi fi mek shuor se wi wok aad so dat wi niem kyan tan iina da buk de fi eva laik se a pen it rait wid we kyaahn go rob out.

⁴ Bot som a di tingz we wi wuda waahn fi nuo a: Wa di Baibl se bout di wan dem we dem niem de iina di buk we Gad rait dong di niem a di piipl dem we a-go get fi liv fi eva an di wan dem we no av dem niem iin de? Di wan dem we av dem niem rait dong iina it, a wen dem a-go kyan get fi liv fi eva? Wa bout di wan dem we ded an neehn get fi nuo notn bout Jeuova? Fi dem niem a-go rait dong iina da buk de tu? Wi a-go get di ansa fi dem kwestiyan ya iina da lesn ya an di neda wan.

A UU AN UUFA NIEM IINA DA BUK YA?

5-6. (a) Azkaadn tu Filipiyan 4:3, a uufa niem rait dong iina da buk de? b) A wen dem niem a-go rait dong iina da buk de fi gud?

⁵ Fi fain out uu an uufa niem rait dong iina da buk ya wi a-go luk pan faiv gruup a piipl. Som a dem gruup a piipl ya av dem niem rait dong iina di buk an som a dem gruup a piipl ya niem no iina it.

⁶ Di fos gruup a piipl a di wan dem we get pik fi ruul iina evn wid Jiizas. Fi dem niem iina di buk we Gad rait dong di niem a di piipl dem we a-go get fi liv fi eva? Ye man, fi dem niem iin de. An wi nuo dis kaaz a wa di apasl Paal did se tu im ‘gud gud fren dem we aalwiez elp im iina di wok fi di Laad’ we did dong a Filipai. Im mek dem nuo se di wan dem we get pik fi ga’a evn fi ruul wid Jiizas, fi dem niem de iina di buk we Gad rait dong di niem a di piipl dem we a-go get fi liv fi eva. (Riid Filipiyan 4:3.) Bot fi dem niem tan iina da buk de, dem afi gwaan du di sitn dem we Gad waahn dem fi du. Weda dem get di maak se dem bilang tu Gad bifuo dem ded ar bifuo di wos sofarieshan we di worl eva si gwaan, dem niem a-go rait dong iina da buk de laik se a pen dem yuuz fi rait it we kyaahn go rob out.​—Rev. 7:3.

7. Azkaadn tu Revilieshan 7:16, 17, wa it mek wi nuo se di big kroud a piipl afi du so dat dem niem rait dong iina da buk de fi eva?

⁷ Di sekan gruup a piipl a wa di Baibl kaal di big kroud a piipl. Yu tingk se fi dem niem de iina di buk we Gad rait dong di niem a di piipl dem we a-go get fi liv fi eva? Ye man, fi dem niem iin de tu. Yu tingk dem wan ya we neehn ded iina di Aamagedan waar a-go stil av dem niem rait dong iina da buk de? Iihn-yihn. Dem niem a-go stil de iin de. (Rev. 7:14) Jiizas se dem wan ya we komiin laik shiip “a-go get fi liv fi eva.” (Mat. 25:46, NWT ) Bot it wuda komiin laik se dem wan ya niem rait wid pensl iina di buk kaa afta Aamagedan a no laik se dem kyaahn go ded. Iina di Touzn Ier Wen Jiizas A Ruul, im “a-go tek kier a dem jos laik ou wan shepad tek kier a im shiip dem. Im a-go liid dem go a wan plies we fresh kliin waata eva a ron.” Di wan dem we du wa Jiizas Krais tel dem fi du an we a chos iina Jeuova, a dem a di wan dem we Jeuova a-go joj an si se im fi put dem niem iina di buk we im rait dong di niem a di piipl dem we a-go get fi liv fi eva, an da taim de dem niem naa go kyan rob outa da buk de.​—Riid Revilieshan 7:16, 17.

8. Uu an uufa niem naa go get rait dong iina da buk de, an wa a-go apm tu dem?

⁸ Di tord gruup a piipl a di wan dem we komiin laik guot, an dem a-go get mash op iina Aamagedan. Dem wan ya niem no iina di buk we Gad rait dong di niem a di piipl dem we a-go get fi liv fi eva. Di Baibl mek wi nuo se dem piipl ya “a-go get mash dong fi eva.” (Mat. 25:46, NWT ) Gad did mek Paal rait se dem wikid piipl de “Gad a-go ponish dem” an im a-go get rid a dem fi eva. (2 Tes. 2:12) An a di siem ting a-go apm tu di wan dem we fram dem taim de til nou a chat bad bout di uoli spirit an nuo se a dat dem a du. Gad a-go get rid a dem wan ya fi eva tu. An Gad naa go mek dem kom bak alaiv.(Mat. 12:32; Maak 3:28, 29; Iib. 6:4-6) Wi a-go luk pan tuu gruup a piipl we Gad a-go mek kom bak alaiv pan di ort.

DI WAN DEM WE A-GO KOM BAK ALAIV

9. Bies pan Aks 24:15, a wich tuu gruup a piipl a-go get fi kom bak alaiv pan di ort an wa a di difrens bitwiin dem?

⁹ Di Baibl tel wi bout tuu gruup a piipl we Gad a-go mek kom bak alaiv we a-go kyan liv fi eva pan di ort. An dem tuu gruup de a ‘di wan dem we did du gud’ an ‘di wan dem we did du bad sitn.’ (Riid Aks 24:15.) So ‘di wan dem we gud’ a di wan dem we did chos iina Jeuova an du wa im waahn dem fi du wen dem did alaiv. Bot ‘di wan dem we bad’ a di wan dem we neehn du wa Jeuova waahn dem fi du wen dem did alaiv. Muor taim a bie bad sitn dem wan de did a du. Bot sins dem tuu gruup a piipl ya a-go kom bak alaiv, yu tingk wi kyan se dem niem a-go iina di buk we Gad rait dong di niem a di piipl dem we a-go get fi liv fi eva? Fi get di ansa mek wi fain out som muor bout dem tuu gruup a piipl ya.

10. Wa mek Gad a-go mek di wan dem we du gud kom bak alaiv an wa kain-a wok som a dem a-go a du? (Luk iina da Wachtowa ya pan di paat we niem “Kwestiyan We Piipl Aks” we tel wi bout di wan dem we Gad a-go mek kom bak alaiv pan di ort.)

¹⁰ Di fuot gruup a piipl a di gud wan dem. Bifuo dem ded fi dem niem did iina di buk we Gad rait dong di niem a di piipl dem we a-go get fi liv fi eva. Yu tingk afta dem ded Gad did rob out dem niem outa da buk de? Nuo sa, kaa tu ou Gad memba dem it komiin laik dem stil “alaiv.” Jeuova “a no Gad fi di ded, bot fi uu a liv; kaaz fi Gad, di uol a dem alaiv.” (Luuk 20:38) Dis miin tu se wen di piipl dem we du wa rait kom bak alaiv dem niem a-go de iina di buk we Gad rait dong di niem a di piipl dem we a-go get fi liv fi eva. Bot wen dem kom bak, it a-go komiin laka se “a pensl” Gad yuuz fi rait dem niem. (Luuk 14:14) An som a di piipl dem we a-go kom bak alaiv a-go “ruul aal uova di ort, an dem a-go ruul di wie ou wan king bwai pikni wuda ruul.”​—Sa. 45:16.

11. Di wan dem we yuus tu du wa bad bifuo dem kom bak alaiv, wa kain-a elp dem afi go get so dat dem niem kyan go rait dong iina da buk de?

¹¹ Di laas gruup a piipl we wi a-go a luk pan ya nou a di wan dem we du wa bad. Som a dem piipl ya mait-a did a du wa bad kaa dem neehn nuo wa Jeuova waahn dem fi du. Dem neehn a liv di wie ou Gad waahn dem fi liv bifuo dem ded so fi dem niem naa go de iina di buk we Gad rait dong di niem a di piipl dem we a-go get fi liv fi eva. Bot yu si kaa Gad mek dem kom bak alaiv, im gi dem di chaans fi du tingz fi im wie so dat dem niem kyan rait dong iina da buk de. Dem piipl ya we yuus tu du wa bad afi go get uol iip a elp fi dem staat du wa Gad waahn dem fi du. Kaa som a dem yuus tu du som wikid sitn wen dem did alaiv, wi afi go tiich dem fi liv di wie ou Jeuova waahn dem fi liv. An fi elp dem wan ya uol iip muor priichin an tiichin a-go a gwaan dan wa eva gwaan pan di ort, an a di wan dem we a ruul iina Gad Kindom govament a-go inchaaj a da wok de.

12. (a) A uu a-go tiich di wan dem we yuus tu du wa bad bifuo dem ded? (b) Wa a-go apm tu di wan dem we no waahn fi du wa Gad waahn dem fi du?

¹² Bot a uu a-go a tiich di wan dem we did du wa bad bifuo dem ded? A di big kroud a piipl an di wan dem we du gud we Jeuova mek kom bak alaiv a-go tiich dem. So di wan dem we yuus tu du wa bad dem afi get kluos kluos tu Jeuova an gi dem laif tu im bifuo dem niem kyan go iina di buk we Gad rait dong di niem a di piipl dem we a-go get fi liv fi eva. Jiizas Krais an di wan dem we a ruul wid im iina evn a-go a luk fi si ef dem wan ya a chienj dem wiez. (Rev. 20:4) Enibadi we naa du wa Gad waahn dem fi du, aal ef dem a jos 100, dem stil a-go ded. (Aiz. 65:20) Jeuova an Jiizas kyan nuo wa a gwaan iina sumadi aat an dem a-go mek shuor se nobadi naa kaaz no prablem iina Gad nyuu worl.​—Aiz. 11:9; 60:18; 65:25; Jan 2:25.

SOM A-GO KOM BAK REDI FI LIV FI EVA AN SOM A-GO KOM BAK FI GET JOJ

13-14. (a) Wa wi yuus tu biliiv se Jiizas a se iina Jan 5:29? (b) Wa wi fi memba wen wi a tingk bout wa Jiizas did se iina da vors ya?

¹³ Jiizas did aal tel wi bout di wan dem we wuda kom bak alaiv fi liv pan di ort. Im se: “No bada mek dis wa mi a se fraitn unu. Kaa di taim a kom wen aal uu ded an de iina di griev a-go ier Gad Bwai Pikni vais, kaa Gad memba dem, an dem a-go kom bak alaiv​—di wan dem we did du gud a-go kom bak redi fi liv fi eva, an di wan dem we did du wikidnis a-go kom bak fi get joj.” (Jan 5:28, 29, NWT ) Wa yu tingk Jiizas did miin wen im did se dis?

¹⁴ Wi yuus tu biliiv se wa Jiizas se iina dem vors ya im did a taak bout wa di piipl dem we a-go kom bak alaiv a-go du afta dem kom bak alaiv. Laik wi did biliiv se som a dem we kom bak alaiv a-go a du gud tingz, bot som we kom bak a-go a du bie wikid sitn. Bot wen yu tingk bout it, Jiizas neehn se wen evribadi we ded kom outa dem griev dem a-go du gud sitn ar dem a-go du wikidnis. Jiizas did a taak bout wa dem du bifuo dem ded. Wa mek wi se so? Kaa im se dem we “did du gud” a-go kom bak an dem we “did du wikidnis” a-go kom bak tu. So wen wi luk pan da skripcha ya wi si se Jiizas did a taak bout di sitn dem we dem did a du bifuo dem ded. Dis mek sens, no chuu? Kaa wen yu tingk bout it, iina Gad nyuu worl, Gad naa go lou nobadi fi a du bier wikidnis. So di bad wan dem we di Baibl taak bout mos did a du dem bad sitn de bifuo dem ded. So wa Jiizas did riili a taak bout wen im se piipl “a-go kom bak redi fi liv fi eva” an piipl “a-go kom bak fi get joj”?

15. A uu “a-go kom bak redi fi liv fi eva,” an wa mek?

¹⁵ Di gud wan dem we did du gud sitn bifuo dem ded dem “a-go kom bak redi fi liv fi eva” kaa fi dem niem don de iina di buk we Gad rait dong di niem a di piipl dem we a-go get fi liv fi eva. Dis miin se di wan dem we did du gud sitn we Jan 5:29 taak bout a di siem gud wan dem Aks 24:15 taak bout. An a dis Ruoman 6:7 did a taak bout wen it se: “Wen sumadi ded, dem frii; sin kyaahn kanchuol dem no muor.” Di sin we di gud wan dem yuus tu sin, wen dem ded Gad paadn dem fi’it. Bot im a-go memba aal a di gud sitn dem we dem did du wen dem did alaiv. (Iib. 6:10) Bot wi nuo se fi dem piipl ya we did a du wa gud niem tan iina di buk we Gad rait dong di niem a di piipl dem we a-go get fi liv fi eva, dem afi gwaan chos iina Gad an gwaan du wa im waahn dem fi du.

16. Wa mek di piipl dem we did du wikidnis a-go kom bak alaiv?

¹⁶ Wa bout di piipl dem we did a du bie wikid sitn bifuo dem ded? Aalduo Gad did paadn dem fi di wikid sitn dem we dem did du bifuo dem ded, dem neehn a du notn gud so dem neehn did a du notn gud fi Gad memba dem fa. Fi dem niem no iina di buk we Gad rait dong di niem a di piipl dem we a-go get fi liv fi eva. So di piipl dem we “did du wikidnis” a di siem bad piipl dem we Aks 24:15 did a taak bout. Dem wan de “a-go kom bak fi get joj.”c So Jiizas a-go a luk fi si ef dem piipl ya we yuus tu a du wa bad staat fi du wa Jeuova waahn dem fi du. (Luuk 22:30) Afta Jiizas wach an si wa dem a gwaan wid fi a taim, im a-go nuo ef dem niem fi go iina di buk we Gad rait dong di niem a di piipl dem we a-go get fi liv fi eva. A onggl ef dem piipl ya we did a du wa bad ton we fram di bad sitn dem we dem yuus tu du an gi dem laif tu Jeuova, a so dem niem kyan go go iina di buk we Gad rait dong di niem a di piipl dem we a-go get fi liv fi eva.

17-18. Evribadi we a-go kom bak alaiv pan di ort wa dem afi go du, an wa Revilieshan 20:12, 13 se dem a-go get joj fa?

¹⁷ No mata ef sumadi yuus tu du gud ar bad sitn, wen dem kom bak alaiv dem afi go du di sitn dem we rait dong iina di nyuu ruol op buk dem we Gad a-go yuuz iina di 1,000 ier we Jiizas a-go a ruul fa. Di apasl Jan tel wi wa im did si iina im vijan. Im se: “An mi si ded piipl tan op infronta di chuon​—som a did impuotant piipl an som a did aadineri piipl, an som buk did uopm op. An mi si wan neda buk we did uopm op tu, dat a di buk we Gad rait dong di niem a di piipl dem we a-go get fi liv fi eva. Di ded piipl dem get joj bies pan wa dem du an bies pan wa did rait dong iina di buk dem.”​—Rev. 20:12, 13, NWT.

¹⁸ Di piipl dem we a-go kom bak alaiv wa dem a-go get joj fa? Yu tingk dem a-go get joj fi di sitn dem we dem yuus tu du bifuo dem ded? Nuo sa! Memba se Gad did paadn dem fi di sitn dem we dem did du bifuo dem ded. So di sitn dem we dem a-go get joj fa a di sitn dem we dem a-go du afta dem kom bak alaiv an dem lorn bout wa Jeuova waahn dem fi du iina di nyuu worl. So aal man laik Nowa, Samwel, Dievid, an Daniyel we did chos iina Gad afi go lorn bout Jiizas Krais an chos iina wa im kom du fi wi fi kom gi op im laif fi wi. So ef dem man ya we did a chos iina Gad av so moch sitn fi lorn, yu kyan imajin di wan dem we did a du wa bad?

19. Wa yu tingk a-go apm tu di wan dem we get di chaans fi liv fi eva an dem no du wa dem fi du fi get it?

¹⁹ So di wan dem we get di chaans fi liv fi eva an dem no du wa dem fi du fi get it, wa yu tingk a-go apm tu dem? Revilieshan 20:15 tel wi. It se: “Enibadi uufa niem no rait dong iina di buk we Gad rait di niem a di piipl dem we a-go liv fi eva an eva, dem a-go get fling dong iina di liek a faiya tu.” Ye man, dem a-go don fa fi eva. Yu si wa mek a wan big ting fi mek shuor se wi niem de iina di buk we Gad rait dong di niem a di piipl dem we a-go get fi liv fi eva an it no get rob out?

20. Wen Jiizas a ruul iina di Touzn Ier wa a di nais nais wok we a-go a gwaan? (Luk pan di picha pan di kova.)

²⁰ Di Touzn Ier we Jiizas a-go a ruul fa a-go bi wan nais nais taim. Iina da taim ya uol iip muor priichin an tiichin a-go a gwaan dan wa eva gwaan pan di ort, an Jiizas dem a-go a luk pan wa evribadi a du weda dem did du gud ar dem did du wa bad. (Aiz. 26:9; Aks 17:31) Bot ou wi a-go du da wol iip a priichin an tiichin de we a-go a gwaan? Wi a-go get di ansa fi da kwestiyan ya iina di neks lesn, an it a-go elp wi fi si se a sitn we wi fi tangk Jeuova fa.