-
Gad Kindom—A Wa Dat?Yu Kyan Bi Api Nou An Fi Eva!—Wan Baibl Stodi We Yu A-Go Lov Fi Du
-
-
LESN 31
Gad Kindom—A Wa Dat?
Di mien ting we di Baibl taak bout a Gad Kindom. A da Kindom de Jeuova Gad a-go yuuz fi mek wa im did waahn fi apm pan ort apm. Di Kindom—a wa it bi? Ou wi nuo se it a ruul rait ya nou? Wa a som a di sitn dem we it du aredi? An wa it a-go du iina di fyuucha? Da lesn ya an di neda tuu lesn dem afta dis a-go ansa dem kwestiyan ya.
1. Gad Kindom—a wa it bi? An uu a di King iina it?
Di Kindom a Gad govament. An di King we im mek a ruul iina it a Jiizas Krais, an a evn im de a ruul. (Matyu 4:17; Jan 18:36) Di Baibl se: “[Jiizas] aalwiez a-go ruul . . . fi eva an eva.” (Luuk 1:32, 33) So Jiizas a-go ruul uova evribadi we de pan di ort.
2. A uu a-go ruul wid Jiizas?
A no Jiizas wan a-go ruul. Di wan dem we a-go ruul wid im kom fram “evri chraib an langwij an piipl an konchri.” An dem a-go ruul uova di piipl dem we de pan di ort. (Revilieshan 5:9, 10) A umoch piipl a-go ruul wid Jiizas Krais? Fram di taim Jiizas did kom a ort, a wol iip a miliyan a piipl ton im falara. Bot a onggl 144,000 a dem a-go ruul wid Jiizas iina evn. (Riid Revilieshan 14:1-4.) So aal a di ada falara dem we Jiizas av a-go liv pan di ort wen di Kindom a ruul.—Saam 37:29.
3. Wa mek wi nuo se Gad Kindom govament beta dan evri ada govament?
Aal wen di wan dem we a ruul waahn du sitn gud, dem na’av di powa fi dwi’it. An sumadi els mait-a tek uova an staat fi ruul, bot dem wan de mait-a no kier so moch bout di piipl dem we dem a ruul uova. Bot Jiizas, we a ruul iina Gad Kindom, nobadi naa go tek uova fram im. Gad “set op fi’im King fi ruul fi’im govament we naa go eva mash op.” (Daniyel 2:44) Jiizas a-go ruul uova di wol ort. An im naa go chriit som piipl beta dan som. Im lov evribadi, an im fier an kain. An im a-go tiich evribadi fi du siem laik im.—Riid Aizaiya 11:9.
LORN SOM MUO
Luk pan wa mek wi nuo se Gad Kindom beta dan aal di ada govament dem.
4. Wan govament we big an powaful a-go ruul uova aal a di ort
Jiizas Krais av muor powa dan enibadi els we eva ruul. Riid Matyu 28:18, an den wi a-go taak bout da kwestiyan ya:
Ou di powa we Jiizas av fi ruul muor dan di powa we eni ada ruula eva av?
Di govament dem ruul uova difrant difrant paat a di ort, an dem chienj di sumadi we a ruul iina dem govament aafn. Bot yu tingk a di siem ting gwaan iina Gad govament? Riid Daniyel 7:14, an den wi a-go taak bout dem kwestiyan ya:
Wa mek a wan gud sitn se Gad govament “naa go get mash op”?
Wa mek a wan gud sitn se it a-go ruul uova evribadi we de pan di ort?
5. Gad govament afi tek uova
Wa mek Gad govament afi tek uova fram di govament dem we a ruul? Plie di VIDIYO, an den wi a-go taak bout di neks kwestiyan.
Kaaz a di govament dem we a ruul ya nou, wa a som a di sitn dem we a apm?
Riid Iikliiziyastiiz 8:9, an den wi a-go taak bout dem kwestiyan ya:
Yu tingk se Gad govament fi tek uova fram di govament dem we a ruul ya nou? Wa mek yu se so?
6. Di wan dem we a ruul iina Gad Kindom nuo wa wi a go chuu
Kaaz Jiizas did liv dong ya pan di ort an a im a-go ruul iina Gad Kindom, wi nuo se im kyan andastan wa wi a go chuu. An im “nuo se wi no so chrang wen wi fies notn we wi kaaz wi fi sin.” (Iibruu 4:15) Jeuova tek 144,000 man an uman, we a du wa im waahn dem fi du fram outa “evri chraib an langwij an piipl an konchri” fi ruul wid Jiizas.—Revilieshan 5:9.
It mek yu fiil gud fi nuo se Jiizas an di wan dem we a ruul wid im nuo wa it komiin laik fi liv laik sumadi pan di ort? Wa mek yu se so?
Jeuova pik man an uman we kom fram aal bout fi ruul wid Jiizas
7. Di laa dem we Gad govament av beta dan evri ada laa
Di laa dem we di govament dem av tide supuoz fi elp di piipl dem we liv iina dem konchri. A siem so, Gad govament av laa tu we di piipl dem fi fala. Riid 1 Korintiyan 6:9-11, an den wi a-go taak bout dem kwestiyan ya:
Wa yu tingk di worl wuda komiin laik ef evribadi a du wa Gad waahn dem fi du?a
Yu tingk it fier fi Jeuova ekspek se di wan dem we a liv wen im govament a ruul fi du wa im se? Wa mek yu se so?
Wa mek wi nuo se piipl we naa du wa Jeuova waahn dem fi du kyan chienj an staat fi dwi’it?—Luk pan vors 11.
Di laa dem we di govament dem av tide supuoz fi elp di piipl dem we liv iina dem konchri, bot di laa dem we Gad govament av beta dan evri ada laa
SUMADI MAIT-A AKS: “Gad Kindom—a wa dat?”
Wa yu wuda ansa dem se?
DIS A WA YU FI MEMBA
Gad Kindom a wan govament we de iina evn, an it a-go ruul uova di wol ort.
Wa yu did lorn iina da lesn ya?
Di wan dem we a-go ruul iina Gad Kindom, a uu dem bi?
Ou wi nuo se Gad Kindom govament beta dan evri ada govament?
Wa a som a di sitn dem we Jeuova ekspek di wan dem we a liv wen im Kindom a ruul fi du?
CHEK OUT SOM MUO SITN
Luk pan wich paat Jiizas se Gad Kindom de.
“Yu Tingk Gad Kindom De Iina Yu Aat?” (Sitn we yu kyan get pan di websait)
Wa mek a Gad govament di Jeuova Witnis dem se, an dem aalwiez a-go chuuz fi du wa it se uova no ada govament?
Luk pan wa di Baibl se bout di 144,000 piipl we Jeuova pik fi go ruul wid Jiizas.
“A Uu An Uu A-Go Go A Evn?” (Sitn we yu kyan get pan di websait)
Da uman ya we did de a prizn, wa did mek ar si se a onggl Gad kyan gi wi jostis?
“Mi Get Fi Fain Out Bout Di Govament We A-Go Chriit Evribadi Fier” (Wiek Op!, Novemba 2011)
-
-
A Gad Kindom A Ruul Ya Nou!Yu Kyan Bi Api Nou An Fi Eva!—Wan Baibl Stodi We Yu A-Go Lov Fi Du
-
-
LESN 32
A Gad Kindom A Ruul Ya Nou!
A iina 1914 Gad Kindom staat fi ruul iina evn. A da taim de di laas die dem fi dem govament ya did staat. Ou wi nuo dat? Wi a-go luk pan wa di Baibl se wuda apm iina di worl sins 1914, an ou piipl de gwaan ya nou fi si ef wa di Baibl se a-go apm, a it a apm nou.
1. A wen di Baibl se Gad Kindom wuda staat fi ruul?
Iina di Baibl buk we niem Daniyel, wi get fi si se Gad Kindom wuda staat ruul wen wan lent a taim we dem kaal “sevn ier” don. (Daniyel 4:16, 17) Kopl onjrid ier afta dat, Jiizas kaal da lent a taim de “fi dem taim” kaa dem ruula de, a neehn Gad put dem de fi ruul. So im mek wi nuo se da lent a taim de neehn don yet. (Luuk 21:24) An wi a-go si se di sevn ier dem did don iina 1914.
2. Wa a som a di sitn dem we wi si a gwaan iina di worl sins 1914?
Jiizas falara dem did aks im se: “A wa kain-a sain a-go shuo se yu a kom bak an di worl suun don?” (Matyu 24:3) Jiizas tel dem di sitn dem we wuda apm pan ort wen im staat fi ruul iina evn. Som a di sitn dem we im se wuda apm, a dat nof konchri gweehn fait gens dem wan aneda, an piipl a-go a ded kaa dem kyaahn get inof fuud fi nyam. Pan tap a dat, wol iip a ortkwiek a-go a gwaan. (Riid Matyu 24:7.) An di Baibl mek wi nuo se di wiez dem we piipl wuda av iina “di laas die dem” wuda mek laif “aad aad.” (2 Timoti 3:1-5) Dem sitn ya get wos sins 1914.
3. Wa mek tingz get wos sins Gad govament staat fi ruul?
Likl afta Jiizas ton King, di fos ting im go du a fait Sietan an im diiman dem. An Sietan luuz di waar. Di Baibl mek wi nuo se “[Sietan] an im ienjel dem get fling dong a ort.” (Revilieshan 12:9, 10, 12) Sietan beks bad kaa im nuo se Jiizas suun get rid a im. So im mek piipl a sofa nou. An a dat mek tingz so bad iina di worl ya nou! Gad govament a-go get rid a aal a dem prablem ya.
LORN SOM MUO
Luk pan wa mek wi nuo se Gad govament did staat fi ruul iina 1914 an wa dis av fi du wid wi.
4. Di Baibl mek wi nuo se a iina 1914 Gad govament wuda staat fi ruul
Gad mek Nebikadneza, wan king we did a ruul iina Babilan bak iina di die, jriim bout wa a-go apm iina di fyuucha. Bies pan wa Daniyel did se da jriim de miin, mek wi nuo se it did a taak bout wen Nebikadneza did a ruul. An it did a tel wi bout wen Gad govament a-go staat ruul tu.—Riid Daniyel 4:17.a
Riid Daniyel 4:20-26, an den yuuz di paat we niem “Di Chrii We Nebikadneza Did Jriim Bout—Wa It Av Fi Du Wid Gad Govament?” fi ansa dem kwestiyan ya:
(A) Wa Nebikadneza did jriim bout?—Luk pan vors 20 an 21.
(B) A wa wuda apm tu di chrii?—Luk pan vors 23.
(C) Wa wuda apm wen di “sevn ier” dem don?—Luk pan vors 26.
Di Chrii We Nebikadneza Did Jriim Bout—Wa It Av Fi Du Wid Gad Govament?
WA JEUOVA DID SE A-GO APM (Daniyel 4:20-36)
King a ruul
(A) Wan big chrii
King tap ruul
(B) “Chap dong di chrii,” an mek di “sevn ier” dem paas
King a ruul agen
(C) “Yu gweehn get fi ruul agen”
Di Fos Taim Wen Da Jriim Ya Did Kom Chuu . . .
(D) Di chrii did av fi du wid uu?—Luk pan vors 22.
(E) Wa mek im did afi tap ruul?—Riid Daniyel 4:29-33.
(F) Wen di “sevn ier” dem did don, a wa did apm tu Nebikadneza?—Riid Daniyel 4:34-36.
DI FOS TAIM WEN DA JRIIM YA DID KOM CHUU
King a ruul
(D) Nebikadneza, di King a Babilan
King tap ruul
(E) Afta 606 B.C.E., Nebikadneza ton mad man fi sevn ier, so im kudn ruul
King a ruul agen
(F) Nebikadneza neehn mad agen, so im staat fi ruul agen
Di Sekan Taim Wen Da Jriim Ya Did Kom Chuu . . .
(G) Di chrii did av fi du wid uu?—Riid 1 Kranikl 29:23.
(H) Wa mek dem did tap ruul? An ou wi nuo se dem stil neehn a ruul iivn wen Jiizas did de pan di ort?—Riid Luuk 21:24.
(I) A wen di King we Gad pik did staat ruul agen? An wich paat im de a ruul?
DI SEKAN TAIM WEN DA JRIIM YA DID KOM CHUU
King a ruul
(G) Di king dem iina Izrel we Gad did pik fi ruul uova im piipl dem
King tap ruul
(H) Jeruusilem get mash dong, so di king dem we did a ruul fi Gad neehn a ruul fi 2,520 ier
King a ruul agen
(I) Jiizas staat fi ruul iina Gad govament we de iina evn
Di sevn ier dem—A umoch ier dat riili miin?
Wen Daniyel did rait dong bout di sevn ier dem, im riili did a taak bout 2,520 ier. Wi nuo dat kaa iina di buk a Revilieshan, it mek wi nuo se chrii an a aaf ier a 1,260 die. (Revilieshan 12:6, 14) So tuu a dat wuda gi wi di sevn ier dem, ar 2,520 die. Kaa wen di Baibl a taak bout wa a-go apm iina di fyuucha, wen it se wan ier it a taak bout 360 die. So den, sins wi a taak bout 2,520 die ya-so, ou di 2,520 ier kom iin? Somtaim wen di Baibl taak bout wan die, it riili miin wan ier. (Iziikel 4:6) An a so it go iina di buk a Daniyel. Di sevn ier we a 2,520 die a riili 2,520 ier.
5. Fram 1914 til nou, di worl a no di siem
Jiizas did tel wi di sitn dem we wudaana gwaan iina di worl wen im ton King iina evn. Riid Luuk 21:9-11, an den wi a-go taak bout da kwestiyan ya:
Wich wan a dem sitn ya yu si a gwaan? Ar wich wan a dem yu ier se a gwaan?
Di apasl Paal did tel wi wa piipl a-go tan laik iina di laas die dem. Riid 2 Timoti 3:1-5, an den wi a-go taak bout da kwestiyan ya:
A wich wan a dem sitn ya yu si piipl a du tide?
6. Nou dat wi nuo se Gad Kindom a ruul, wa dat fi push wi fi du?
Riid Matyu 24:3, 14, an den wi a-go taak bout dem kwestiyan ya:
Wa kain-a wok a gwaan we mek wi si se Gad Kindom a ruul?
Wa yu kyan du fi du da wok de tu?
Gad Kindom a ruul ya nou, an di taim suun kom wen it a-go tek uova fram di govament dem we a ruul ya nou. Riid Iibruu 10:24, 25, an den wi a-go taak bout da kwestiyan ya:
Wa di wol a wi fi a du nou wos laka ou taim shaat?
Ef yu ier bout sitn we kyan elp sumadi we iina prablem an siev dem, wa yu wuda du?
SUMADI MAIT-A AKS: “Wa mek di Jeuova Witnis dem chat so moch bout 1914?”
Wa yu wuda ansa dem se?
DIS A WA YU FI MEMBA
Wi nuo se Gad Kindom govament a ruul ya nou, kaa wa di Baibl did se a-go apm, di taim wen it apm, an di sitn dem we wi si a gwaan ya nou shuo se a so it go fi chuu. So wen wi priich an go a wi miitn dem, wi shuo se wi biliiv aal a dis.
Wa yu did lorn iina da lesn ya?
Di sevn ier we Daniyel did taak bout, wa apm wen dem did don?
Wa mek yu shuor se Gad Kindom did staat fi ruul iina 1914?
Wa yu kyan du fi shuo se yu biliiv se Gad Kindom a ruul rait ya nou?
CHEK OUT SOM MUO SITN
Luk pan wa som piipl we rait bout tingz we apm iina uol taim diez, an wa som ada piipl se bout ou tingz chienj op iina di worl fram 1914.
Luk pan ou wa Matyu 24:14 se wuda apm mek wan man chienj op im laif.
“Mi Neva Lov Notn Laik Ou Mi Did Lov Biesbaal!” (Di Wachtowa No. 3 2017)
Ou wi nuo se wa di Baibl se iina Daniyel chapta 4 a taak bout Gad Kindom?
“A Wen Gad Kindom Did Staat Ruul? (Paat 1)” (Di Wachtowa, Aktuoba 1, 2014)
Ou wi nuo se di “sevn ier” dem we di Baibl taak bout iina Daniyel chapta 4 did don iina 1914?
“A Wen Gad Kindom Did Staat Ruul? (Paat 2)” (Di Wachtowa, Novemba 1, 2014)
a Luk pan di laas tuu ting dem iina di paat we se Chek Out Som Muo Sitn iina da lesn ya.
-
-
Wa Gad Govament A-Go Du?Yu Kyan Bi Api Nou An Fi Eva!—Wan Baibl Stodi We Yu A-Go Lov Fi Du
-
-
LESN 33
Wa Gad Govament A-Go Du?
Gad govament a ruul aredi. An likl bit afta dis, it a-go chienj op nof tingz pan di ort. Mek wi luk pan som a di sitn dem we Gad govament suun mek apm.
1. Wa Gad Kindom a-go du fi mek shuor se evribadi get jostis an liv iina piis?
Iina di waar we di Baibl kaal Aamagedan, Jiizas, di King fi Gad govament, a-go get rid a aal a di wikid piipl dem an dem govament ya. (Revilieshan 16:14, 16) Dem taim de, wa da skripcha ya a tel wi se a-go apm, a-go apm fi chuu. It se: “Likl fram dis, no muo wikid piipl naa go de bout agen.” (Saam 37:10) Jiizas a-go yuuz im govament fi mek shuor se evribadi get jostis, an im a-go mek shuor se evribadi a liv iina piis.—Riid Aizaiya 11:4.
2. Wa laif a-go komiin laik wen Gad mek wa im waahn fi apm pan ort apm?
Wen Gad govament a ruul, “di piipl dem we du wa Gad se rait, a dem a-go de pan di ort, an liv pan it fi eva.” (Saam 37:29) Jos tingk se ya’a liv iina wan worl we evribadi lov Jeuova an dem wan aneda, an dem a du wa im waahn dem fi du! Nobadi naa go sik agen, an evribadi a-go a liv fi eva.
3. Afta Jiizas get rid a aal a di wikid piipl dem, wa els im a-go du?
Afta Jiizas get rid a aal a di wikid piipl dem, im a-go ruul fi 1,000 ier. Iina dem taim de, im an di 144,000 we a ruul wid im a-go elp di piipl dem we de pan di ort fi ton porfek. Bai dem taim de fi don, di ort a-go ton iina wan priti paradais, an it a-go ful op a bier api piipl kaa dem a du wa Jeuova se dem fi du. An den Jiizas a-go gi bak im Faada, Jeuova, di Kindom. An dem taim de, piipl a-go “av nof rispek” fi Jeuova niem. (Matyu 6:9, 10) Dem taim de, evribadi wuda si se Jeuova a di bes Ruula we kier bout im piipl dem. Den Jeuova a-go get rid a Sietan an im diiman dem, an enibadi els we ton gens Jeuova tu. (Revilieshan 20:7-10) Aal a di gud sitn dem we Gad govament mek apm a-go di de fi eva.
LORN SOM MUO
Luk pan wa mek wi kyan biliiv se Gad a-go yuuz im govament fi du evriting we im pramis wi se iina di Baibl.
4. Gad Kindom a-go get rid a evri ada govament
“Piipl onggl a chrai fi kanchuol ada piipl an en op a du som wikid sitn tu dem.” (Iikliiziyastiiz 8:9) Jeuova a-go yuuz im Kindom govament fi get rid a aal a di prablem dem we piipl kaaz fi a gwaan.
Riid Daniyel 2:44 an 2 Tesaluoniyan 1:6-8, an den wi a-go taak bout dem kwestiyan ya:
Wa Jeuova an Jiizas a-go du tu dem govament ya an di piipl dem we a bak dem?
Di ting dem we yu lorn bout Jeuova an Jiizas, ou dem mek yu shuor se dem a-go chriit piipl fier an mek shuor se evribadi get jostis?
5. Jiizas a di bes King fi ruul wi
Wen Jiizas a ruul, im gweehn du tingz fi elp piipl. Plie di VIDIYO fi si ou Jiizas don shuo wi se im no onggl waahn fi elp piipl, bot Gad gi im di powa fi dwi’it tu.
Wen Jiizas did de pan di ort, im gi wi wan likl prips a wa di Kindom gweehn du. Wich wan a dem sitn ya we Jiizas a-go du fi wi yu wel waahn fi si apm? Riid dem skripcha ya fi si som a di sitn dem we Jiizas a-go du fi wi.
WEN JIIZAS DID DE PAN ORT, IM . . .
JIIZAS A-GO STIE A EVN AN . . .
kanchuol di briiz an dem ting de.—Maak 4:36-41.
im a-go fiks di ort.—Aizaiya 35:1, 2.
wok wan mirikl fi fiid uol iip a piipl.—Matyu 14:17-21.
mek shuor se nobadi naa ded fi onggri agen.—Saam 72:16.
wok mirikl fi mek uol iip a piipl we sik get beta.—Luuk 18:35-43.
mek shuor se nobadi no get sik.—Aizaiya 33:24.
mek ded piipl kom bak alaiv agen.—Luuk 8:49-55.
mek shuor se ded piipl kom bak alaiv, an mek shuor se nobadi naa ded agen.—Revilieshan 21:3, 4.
6. Gad govament a-go gi wi wan nais nais fyuucha
Gad govament gweehn mek wa im did waahn fi apm pan ort apm. Im a-go mek piipl liv fi eva pan di ort wen it ton iina wan paradais. Plie di VIDIYO fi si ou Jeuova gweehn yuuz Jiizas fi mek wa Im waahn fi apm pan ort apm.
Riid Saam 145:16, an den wi a-go taak bout da kwestiyan ya:
Ou it mek yu fiil fi nuo se Jeuova a-go “gi evriting we a liv wa dem waahn”?
SUMADI MAIT-A SE: “Ef aal a wi dis wok tugeda, wi kyan mek di worl wan beta plies.”
Wa a som a di prablem dem we Gad govament a-go get rid a we dem ya govament ya kyaahn get rid a?
DIS A WA YU FI MEMBA
Gad govament a-go du wa im waahn fi du. It a-go ton di ort iina wan priti paradais we ful op a piipl we naa go eva tap worship Jeuova.
Wa yu did lorn iina da lesn ya?
Wa Gad govament a-go du fi mek piipl av nof rispek fi Jeuova niem?
Wa mek wi kyan biliiv se Gad govament a-go du evriting we im pramis wi?
Wich wan a di sitn dem we Gad govament a-go du fi wi yu wel waahn fi si apm?
CHEK OUT SOM MUO SITN
Fain out wa a Aamagedan.
“Di Aamagedan Waar—A Wa Dat?” (Sitn we yu kyan get pan di websait)
Fain out bout wa a-go gwaan iina di wos “sofarieshan” we Jiizas did taak bout.—Matyu 24:21.
“Di Wos Sofarieshan—A Wa Dat?” (Sitn we yu kyan get pan di websait
Luk pan ou di fambili dem kyan sidong an tingk bout di blesn dem we wi gweehn get fram Gad govament.
Chek out di tuori we niem “Mi Did Av Uol Iip A Kwestiyan We Mi Waahn Di Ansa Fa.” Luk pan ou wan man we did a fait gens di govament fain sitn gud fi luk faawod tu.
“Di Baibl Chienj Piipl Laif Fi Di Beta” (Di Wachtowa, Janiweri 1, 2012)
-