Yu Tingk Jeuova Aarait Wid Aal A Di Ting Dem We Piipl Selibriet An Kip Op?

Jeuova waahn wi fi du tingz fi enjai laif an fi mek wiself api. Bot yu tingk im aarait wid aal a di paati dem we piipl kip an di alidie dem we dem selibriet? Wen it kom aan tu dem sitn ya, ou wi kyan shuo Jeuova se wi lov im?

1. Wa mek Jeuova no aarait wid som a di ting dem we piipl selibriet?

Yu mait-a fraitn fi nuo se nof a dem sitn ya we piipl a selibriet, a no sitn we di Baibl se wi fi du, ar di piipl dem we fos yuus tu selibriet dem sitn ya, a piipl we neehn a sorv Gad. Som a dem sitn ya av fi du wid di rilijan dem we naa worship Gad di rait wie. Som a dem av fi du wid tingz we piipl biliiv bout se wen sumadi ded dem suol no ded, an som a dem av fi du wid uobiya tu. An som a di ting dem we piipl selibriet av fi du wid tingz we dem biliiv iina we no go so ar tingz we mek dem fiil laik se dem loki. (Aizaiya 65:11) Jeuova tel di piipl dem we a worship im se: “Mek shuor se piipl kyan si se unu an dem difrant. No av notn fi du wid no kain-a sin.”​—2 Korintiyan 6:17.a

2. Ou Jeuova fiil bout di paati dem an ada tingz we piipl selibriet an kip we big op ada piipl tu moch?

Jeuova tel wi se wi fi wach out se wi no “chos iina piipl we kyaahn iivn elp demself.” (Riid Jerimaiya 17:5.) Som a di alidie dem we dem kip a fi big op piipl we a ruul ar di suoja dem. An som ada ting we dem selibriet a fi big op tingz we av fi du wid di konchri laik di flag an di alidie we dem kaal Indipendens Die. (1 Jan 5:21) An som ada ting we dem selibriet a fi push palitiks, an som ada alidie av fi du wid wen piipl a fait fi tingz we dem fiil se rait. Ef yu big op sumadi fram wan aaganaizieshan tu moch, ou yu tingk Jeuova wuda fiil bout it, wos ef dem naa mek piipl du di sitn dem we Jeuova waahn dem fi du?

3. Wa a som a di sitn dem we piipl du wen dem a selibriet an ada tingz we dem kip we Jeuova no laik?

Di Baibl tel wi se wi no fi av “wail paati an jringk an galang wid aal kain-a naasinis.” (1 Piita 4:3) Som a di mien ting dem we dem du a di paati dem an di ting dem we dem kip a dat dem galang bad an gwaan wid aal kain-a naasinis an seks sin. Ef wi waahn fi aalwiez bi Jeuova fren, wi afi kip we fram aal a dem sitn ya.

LORN SOM MUO

4. No av notn fi du wid di paati dem an di ting dem we piipl selibriet we mek Jeuova luk bad

Riid Ifiijan 5:10, an den wi a-go taak bout dem kwestiyan ya:

• Wa wi fi fain out fos bifuo wi mek op wi main fi selibriet wan alidie?

• Wich wan a di alidie dem piipl lov di muos wich paat yu liv?

• Yu tingk dem kain-a alidie de mek Jeuova api?

Mek wi luk pan di bortdie paati dem we piipl kip. Yu tingk Gad aarait wid dem? Di Baibl neva tel wi bout nobadi we a sorv Jeuova we selibriet bortdie. Bot di onggl tuu bortdie we it tel wi bout a bortdie fi piipl uu neehn a sorv Jeuova. Riid Jenisiz 40:20-22 an Matyu 14:6-10. An den wi a-go taak bout dem kwestiyan ya:

• Wa a di siem ting wi si gwaan a dem tuu bortdie paati ya?

• Wen yu luk pan dem ting ya we di Baibl se apm, ou yu tingk Jeuova fiil bout bortdie?

Bot yu stil mait-a aks yuself se, ‘A wan big ting tu Jeuova ef mi selibriet bortdie ar selibriet notn els we go gens wa di Baibl se?’ Riid Eksidos 32:1-8. Den, plie di VIDIYO an den wi a-go taak bout di neks kwestiyan dem.

VIDIYO: Di Alidie Dem An Di Ting Dem We Piipl Selibriet We Mek Gad Fiil Bad (5:07)

• Wa mek wi fi fain out bout di ting dem we Jeuova riili waahn wi fi du bifuo wi du notn?

• Ou wi kyan fain out wa Jeuova waahn wi fi du?

Wa wi kyan du fi fain out ef Gad aarait wid sitn we piipl selibriet?

• Wa dem a selibriet, it go gens wa di Baibl se? Fi ansa da kwestiyan de, luk pan uu fos did staat du dem ting de.

• Dem paati an dem ting de we dem kip, dem big op piipl tu moch, ar dem a big op di flag an dem ting de iina wan konchri, ar som aaganaizieshan? A Jeuova a di wan we wi fi big op di muos an a im a-go get rid a aal a di prablem dem we iina di worl.

• Di sitn dem we a paat a di alidie dem we piipl selibriet, ar di sitn dem we dem du wen dem a selibriet it, dem go gens wa di Baibl se? Wi afi kip we fram aal kain-a naasinis an seks sin.

5. Elp ada piipl fi si wa mek yu biliiv di sitn dem we yu biliiv iina

VIDIYO: Tek Yu Taim Wid Piipl Wen Yu A Mek Dem Nuo Wa Yu Biliiv Iina (2:01)

Riid Matyu 7:12, an den wi a-go taak bout dem kwestiyan ya:

• Bies pan da skripcha ya, yu tingk yu fi tel yu fambili memba dem we naa sorv Jeuova se dem no fi selibriet bortdie ar Krismos an dem ting de?

• Wa yu kyan du fi mek yu fambili memba dem nuo se aalduo yu naa selibriet bortdie an Krismos an dem ting de wid dem, yu stil lov dem kyaahn don?

6. Jeuova waahn wi fi api

Jeuova waahn wi fi enjai som nais taim wid wi fambili an wi fren dem. Riid Iikliiziyastiiz 8:15, an den wi a-go taak bout da kwestiyan ya:

• Ou da skripcha ya mek wi si se Jeuova waahn wi fi api?

Jeuova waahn im piipl dem fi du tingz fi enjai demself wid dem wan aneda. Plie di VIDIYO fi si ou wi enjai wiself a di big kanvenshan dem we wi kip wid piipl fram aal uova di worl.

VIDIYO: Wi No Tap Elp Chrienja A Di Big Kanvenshan Dem We Wi Kip Wid Piipl Fram Aal Uova Di Worl (5:40)

Riid Gyalieshan 6:10, an den wi a-go taak bout dem kwestiyan ya:

• Wi afi selibriet di alidie dem we piipl selibriet fi “du gud” tu ada piipl?

• Wich wan a dem sitn ya wuda mek yu fiil beta​—wen yu gi sumadi sitn jos kaa a alidie ar so, ar wen yu gi dem sitn kaa yu riili waahn fi gi dem it?

• Wol iip a Jeuova Witnis gi dem pikni prezent wen dem neehn tingk dem wuda get it. Wa a som nais tingz we yu kyan du fi yu pikni dem fi mek dem fiil gud?

DIS A WA YU FI MEMBA

Jeuova waahn wi fi enjai wiself wid wi fambili an fren dem, bot im no waahn wi fi av notn fi du wid no alidie we a-go mek wi du tingz we im no waahn wi fi du.

Wa yu did lorn iina da lesn ya?

• Wa a som kwestiyan we wi kyan aks wiself fi si ef wan alidie ar sitn we piipl kip a mek Jeuova api?

• Wa wi kyan du fi mek wi fambili an wi fren dem si wa mek wi no biliiv iina bortdie an Krismos an dem ting de?

• Ou yu nuo se Jeuova waahn wi fi api an enjai wiself?

CHEK OUT SOM MUO SITN

Luk pan som a di alidie dem we chuu Kristiyan no biliiv iina.

“Wa Mek Di Jeuova Witnis Dem No Biliiv Iina Som A Di Alidie Dem?” (Sitn we yu kyan get pan di websait)

Si fuor riizn ya wa mek wi nuo se Gad no waahn wi fi selibriet bortdie.

“Wa Mek Di Jeuova Witnis Dem No Selibriet Bortdie?” (Sitn we yu kyan get pan di websait)

Luk pan ou di pikni dem we lov Jeuova kyan mek im api wen ada piipl a selibriet Krismosan dem ting de.

Jeuova Lov Yu Bad (11:35)

Wol iip a Kristiyan no biliiv iina Krismos. Dem fiil no wie bout it?

“Dem Fain Sitn Beta” (Di Wachtowa, Disemba 1, 2012)