LESN 38
Shuo Se Yu Tangk Gad Fi Di Laif We Im Gi Wi
Laif ful op a wol iip a nais sitn. Iivn wen wi a go chuu wol iip a prablem, wi kyan stil enjai som tingz iina laif. Wa wi kyan du fi mek Gad si se wi tangk im fi laif? An wa a di bigis riizn wa mek wi fi du dat?
1. Wa mek wi fi tangk Gad fi laif?
A wi Faada Jeuova we lov wi gi wi laif, an so wi fi tangk im fi it. A im “gi laif”—a im mek evriting. (Saam 36:9) “A im gi evribadi laif an aal di sitn dem we dem niid.” (Aks 17:25, 28) Jeuova gi wi evriting we wi niid fi liv. Bot a no onggl dat, im gi wi di sitn dem we im nuo se a-go mek wi api iina laif.—Riid Aks 14:17.
2. Wa wi kyan du fi mek Jeuova si se wi tangk im fi di laif we im gi wi?
Jeuova si yu an kier bout yu fram yu mada jos get pregnant wid yu. Dievid, we did a worship Gad, did prie tu im an se: “Yu si mi fram mi mada jos get pregnant wid mi.” (Saam 139:16) Laif wot nof tu Jeuova. (Riid Matyu 10:29-31.) Ef sumadi kil sumadi ar kil demself, it ort Jeuova bad.a (Eksidos 20:13) An it ort im tu wen sitn we wi du ar no du kyan kaaz wi ar sumadi els fi ded. Wi mek Jeuova si se wi tangk im fi di laif we im gi wi wen wi du tingz fi tek kier a wi laif, an du tingz fi shuo se wi rispek ada piipl laif tu.
LORN SOM MUO
Luk pan som sitn we yu kyan du fi mek Jeuova si se yu tangk im fi laif.
3. Tek kier a yuself
Piipl we a Kristiyan yuuz dem laif iina evri wie fi sorv Jeuova. It wuda komiin laik se dem gi op dem laif tu Gad laik wan sakrifais. Riid Ruoman 12:1, 2, an den wi a-go taak bout dem kwestiyan ya:
Wa shuda mek yu waahn fi tek kier a yuself?
Wa a som sitn yu kyan du fi tek kier a yuself?
4. Du tingz fi no ort ar kil aaf yuself ar ada piipl
Di Baibl mek wi nuo se wi no fi du notn we no sief. Plie di VIDIYO fi si som sitn we yu kyan du fi kip sief.
Riid Pravorbz 22:3, an den wi a-go taak bout ou yu an ada piipl kyan du tingz fi kip sief . . .
iina yu yaad.
wen yu de a wok.
wen yu a plie spuot.
wen yu a jraiv ar sumadi els a jraiv.
5. Du tingz fi shuo se di biebi we iina beli laif wot nof tu yu
Iina wan nais wie, Dievid did mek wi nuo ou Jeuova fiil bout wan biebi we no baan yet. Riid Saam 139:13-17, an den wi a-go taak bout da kwestiyan ya:
Ou Jeuova luk pan it? Sumadi laif staat wen dem baan ar wen dem mada jos get pregnant?
Di laa dem we Jeuova did gi im piipl dem iina Izrel did mek fi protek di mada dem an di biebi dem we de iina dem beli. Riid Eksidos 21:22, 23, an den wi a-go taak bout dem kwestiyan ya:
Ou Jeuova fiil bout sumadi we en op kil wan biebi we de iina dem mada beli aalduo dem neehn miin fi dwi’it?
Ou im wuda fiil ef sumadi plan fi dwi’it an go dwi’it?b
Di wie ou Gad fiil bout aal a dis, wa yu tingk bout it?
Laif mait-a wot nof tu wan uman bot somtaim kaaz a wa a gwaan, shi mait-a fiil se di onggl ting shi kyan du a fi get rid a ar biebi bifuo it baan. Riid Aizaiya 41:10, an den wi a-go taak bout dem kwestiyan ya:
Ef wan uman a get presha fi get rid a ar biebi bifuo it baan, a uu shi fi aks fi elp? An wa mek?
SUMADI MAIT-A SE: “Wan uman kyan dash we beli ef shi waahn kaa a fi ar badi.”
Wa mek yu nuo se di mada laif an di laif a di biebi we no baan yet wot nof tu Jeuova?
DIS A WA YU FI MEMBA
Gad Wod mek wi nuo se wi fi lov an rispek an protek di laif we Jeuova gi wi an ada piipl laif tu.
Wa yu did lorn iina da lesn ya?
Wa mek wi laif wot nof tu Jeuova?
Ou Jeuova fiil wen sumadi kil sumadi?
Wa mek yu api se Jeuova gi wi laif?
CHEK OUT SOM MUO SITN
Wa wi kyan du fi mek Jeuova si se wi tangk im fi laif?
Fain out ef Gad wuda paadn wan uman we dash we beli aredi?
“Wa Di Baibl Av Fi Se Bout Dash We Beli?” (Sitn we yu kyan get pan di websait)
Fain out wa mek di sitn dem we wi du fi enjai wiself fi shuo se laif wot nof tu wi laik ou it wot nof tu Gad.
Wa ef sumadi aalwiez a tingk bout fi kil demself? Luk ou di sitn dem we iina di Baibl kyan elp dem.
a Jeuova kier nof nof bout di wan dem we sad bad kaaz a wa dem a go chuu. (Saam 34:18) Jeuova andastan di pien we sumadi mait-a a go chuu we kyan mek dem fiil laik se dem waahn fi kil demself, an im waahn fi elp dem. Fi si se im kyan riili elp wi, luk pan di paat we niem “Mi Waahn Fi Ded—Wen Mi Fiil Laik Se Mi Waahn Fi Kil Miself, Notn De Iina Di Baibl We Kyan Elp Mi?” we de iina di Chek Out Som Muo Sitn paat a da lesn ya.
b Di sumadi we dash we beli aredi no afi wori tu moch bout it kaa Jeuova kyan paadn dem fi it. Fi fain out muo bout dis, luk iina di paat we niem “Wa Di Baibl Av Fi Se Bout Dash We Beli?” we de iina di Chek Out Som Muo Sitn paat a da lesn ya.