LESN 42
Wa Di Baibl Av Fi Se Bout Piipl We Marid An Piipl We No Marid?
Iina som plies, piipl biliiv se ef yu no marid yu kyaahn api. Bot a no evribadi we marid api, an som piipl we no marid api. Di Baibl mek wi nuo se weda wi marid ar wi no marid, di tuu a dem a sitn gud we Jeuova gi wi.
1. Wa a som gud sitn we sumadi kyan du kaa dem no marid?
Di Baibl tel wi se: “Di wan we marid . . . du di rait sitn, bot di wan we no get marid—im du sitn iivn beta.” (Riid 1 Korintiyan 7:32, 33, 38.) Ou di wan dem we no marid “du sitn iivn beta” dan di wan dem we marid? Dis a kaa di wan dem we no marid no afi a spen no taim a tek kier a no ozban ar waif. So dem wuda av muor taim fi du ada tingz. So dem kyan du muor fi Jeuova, laik fi go a wan neda konchri fi go elp out wid di priichin wok de. An pan tap a dat, dem kyan spen muor taim a jraa nier tu Jeuova Gad.
2. Wen sumadi marid azkaadn tu di laa iina dem konchri, wa a som gud tingz we kyan gwaan fi dem?
Jos laik ou gud tingz kyan gwaan fi di piipl dem we no marid, a siem so gud tingz kyan gwaan fi di piipl dem we marid tu. Di Baibl tel wi se “wen tuu sumadi wok tugeda, it beta dan wan.” (Iikliiziyastiiz 4:9) Di wan dem we a du wa di Baibl se dem fi du iina dem marid laif fain out se dis a chuu. An di wan dem we marid azkaadn tu wa di laa iina dem konchri se pramis fi lov dem wan aneda an fi rispek, an tek kier a dem wan aneda. Dem fiil beta kaaz it naa go iizi fi di neks sumadi dis git op an lef dem. An ef dem av no pikni, it a-go beta fi di pikni dem tu.
3. Ou Jeuova fiil bout it wen wan man an wan uman marid?
Wen Jeuova a marid di fos man an uman, im se: “Wan man a-go lef im faada an im mada an jain op wid im waif.” (Jenisiz 2:24) Jeuova waahn wan ozban an wan waif fi lov dem wan aneda an stik tu dem wan aneda fi di wol a dem laif. Im onggl lou dem fi divuos ef wan a dem sliip wid sumadi els. Di wan we neehn sliip wid nobadi els, a dem av di rait fi mek op dem main ef dem waahn divuos ar dem no waahn divuos.a (Matyu 19:9) Jeuova no waahn nobadi fi marid tu muor dan wan sumadi siem taim.—1 Timoti 3:2.
LORN SOM MUO
Fain out som a di sitn dem we kyan mek yu api iina fi yu laif an wa yu kyan du fi mek Jeuova api tu—weda yu marid ar yu no marid.
4. Mek yuus a di taim we yu av wen yu no marid
Jiizas did get fi du nof gud sitn kaaz im neehn marid. (Matyu 19:11, 12) Riid Matyu 4:23, an den wi a-go taak bout da kwestiyan ya:
Kaaz Jiizas neehn marid, wa a som a di gud sitn dem we im get fi du fi im Faada Jeuova an fi ada piipl?
Di Kristiyan dem we no marid kyan yuuz dem taim fi du som gud sitn laik wa Jiizas did du we a-go mek dem api. Plie di VIDIYO, an den wi a-go taak bout di neks kwestiyan.
Wa a som tingz we som a di Kristiyan dem we no marid kyan du we a-go mek dem api?
Yu did nuo se?
Di Baibl no gi wi di iej wen sumadi fi marid. Bot it tel wi se “wan man fi marid wan uman.” Dat miin se dem a no likl pikni, so dem a-go nuo ou fi kanchuol demself wen it kom aan tu seks.—1 Korintiyan 7:36.
5. No dis git op an marid eni an enibadi so
Fi pik di sumadi we yu a-go marid tu a wan a di bigis ting yu afi go mek op yu main fi du. Riid Matyu 19:4-6, 9, an den wi a-go taak bout da kwestiyan ya:
Wa mek wan Kristiyan no fi dis git op an ron go marid so?
Di Baibl kyan mek yu nuo som a di wiez dem we yu fi luk fa iina di sumadi we yu waahn fi marid tu. Luk fi sumadi we lov Jeuova. Dat a wan a di bigis ting yu fi luk out fa.b Riid 1 Korintiyan 7:39 an 2 Korintiyan 6:14. An den wi a-go taak bout dem kwestiyan ya:
Wa mek a onggl sumadi we a sorv Jeuova wi fi marid tu?
Ou yu tingk Jeuova wuda fiil ef wi go marid tu sumadi we no lov im?
Ef dem put tuu animal fi wok tugeda we no chrang di siem wie an dem a no di siem saiz, dem a-go sofa. A siem so ef sumadi we a sorv Jeuova go marid tu sumadi uu naa sorv Jeuova, dem a-go av uol iip a prablem
6. Luk pan marid laif di wie ou Jeuova luk pan it
Bak iina di taim wen di Baibl did a rait, som a di man dem we did de a Izrel did a divuos dem waif an lef dem kaa dem onggl did a tingk bout demself. Riid Malikai 2:13, 14, 16, an den wi a-go taak bout da kwestiyan ya:
Wa mek Jeuova iet it wen sumadi divuos an dem na’av no rait riizn fi dwi’it?
Ef sumadi go gi dem ozban ar waif bon ar ef sumadi get divuos, it a-go ort di pikni dem an di ozban ar waif we neehn du notn rang
Plie di VIDIYO, an den wi a-go taak bout di neks kwestiyan.
Ef yu marid tu sumadi we naa sorv Jeuova, wa yu kyan du fi mek yu marid laif api?
7. Du di sitn dem we Jeuova se yu fi du iina yu marid laif
Sumadi mait-a afi wok aad fi du di sitn dem we Jeuova se dem fi du iina dem marid laif.c Bot Jeuova a-go bles dem ef dem dwi’it. Plie di VIDIYO.
Riid Iibruu 13:4, an den wi a-go taak bout dem kwestiyan ya:
Yu tingk wa Jeuova waahn wi fi du wen it kom aan tu marid laif fier? Wa mek yu se so?
Jeuova waahn yu fi marid azkaadn tu di laa dem we de iina yu konchri. An ef yu a-go divuos it afi bi azkaadn tu di laa tu. Riid Taitos 3:1, an den wi a-go taak bout da kwestiyan ya:
Ef yu marid, yu shuor se yu marid azkaadn tu di laa dem iina yu konchri?
SUMADI MAIT-A AKS: “Wa mek piipl afi marid? Yu kyaahn jos de wid sumadi an liv wid dem?”
Ou yu wuda ansa?
DIS A WA YU FI MEMBA
Weda yu marid ar yu no marid, di tuu a dem a sitn gud we Jeuova gi wi. Eni wan a dem kyan mek yu api ef yu dwi’it di wie ou Jeuova waahn yu fi dwi’it.
Wa yu did lorn iina da lesn ya?
Ou sumadi kyan mek yuus a dem taim wen dem no marid?
Wa mek di Baibl se a onggl sumadi we a sorv Jeuova yu fi marid tu?
Azkaadn tu di Baibl, wa a di onggl riizn wa mek sumadi kyan divuos?
CHEK OUT SOM MUO SITN
Wa it miin fi marid tu “wan a Gad pikni”?
Wach da vidiyo ya we kyan elp yu fi mek op yu main bout wa fi du wen yu laik sumadi an waahn fi marid dem an wen ya’a tingk bout fi marid.
Fain out wa mek wan breda fiil laik se wa Jeuova gi’im wot muo dan we im did gi op.
Wa a som sitn fi sumadi tingk bout bifuo dem plan fi divuos ar lef dem waif ar ozban?
a Luk pan di paat we niem Riid Som Muor 4 fi fain out som riizn wa mek wan ozban an wan waif kyan lef dem wan aneda wen nobadi neehn gi nobadi bon.
b Iina som plies, a di mada an faada dem pik di sumadi we dem pikni fi marid tu. Wen dem a pik sumadi fi dem pikni marid tu, kaa dem lov dem pikni, dem a-go pik sumadi we lov Jeuova. Dem no dis a-go pik sumadi kaa dem av moni ar kaa dem ai iina sosaiyati.
c Ef yu a liv wid sumadi an unu no marid, it op tu yu ef yu a-go lef dem ar yu a-go marid tu dem.