Ou Gad Fiil Bout Blod?

Blod a wan impuotant ting. Wi kyaahn liv widout it. Sins a Gad mek wi, im av di rait fi tel wi wa fi du wid blod. Wa im av fi se bout blod? Yu tingk wi fi nyam it ar put it iina wi badi som ada wie? An ou yu kyan nuo wa a di bes ting fi du wen it kom aan tu blod?

1. Ou Jeuova fiil bout blod?

Jeuova did tel im piipl dem iina Baibl taim se: “Evriting we mek outa flesh, dem laif a di blod we de iina dem.” (Livitikos 17:14) Fi Jeuova, blod miin laif. Sins laif a wan speshal ting fram Jeuova, dat miin se blod speshal tu im tu.

2. Wa an wa Gad no waahn wi fi du wid blod?

Bifuo Jiizas did kom pan di ort, Jeuova did tel im piipl dem se dem no fi nyam no blod. (Riid Jenisiz 9:4 an Livitikos 17:10.) Afta Jiizas did kom pan di ort, Jeuova yuuz di wan dem we did a liid im piipl dem fi tel Jiizas falara dem se dem ‘no fi nyam ar jringk no blod.’​—Riid Aks 15:28, 29.

Wen di Baibl se wi no fi nyam ar jringk no blod, wa it miin fi wi? Tingk bout dis: Ef yu go a aspital an yu kyaahn nyam ar jringk notn, dem fiid yu chuu yu vien, no chuu? So ef di Baibl se wi no fi nyam ar jringk blod, dat miin se Gad wudn waahn wi fi tek it chuu wi vien niida. A siem so, wi no fi nyam no miit we di blod no jrien outa it gud. An wi no fi nyam no fuud we dem put blod iina it niida.

Wa bout di wie ou di dakta dem yuuz blod? Blod mek op a fuor mien paat we niem red blod sel, wait blod sel, plietlet an plazma. Ef wi tek blod, wi a go gens Gad laa. Ef wi tek non a di fuor mien paat dem, wi a go gens Gad laa tu. Evri wan a dem fuor mien paat ya mek op a difrant difrant paat we niem frakshan. Bot wen it kom aan tu weda wi fi yuuz frakshan ar du som ada tingz we av fi du wid wi uona blod, a no laik se di Baibl a-go tel wi egzakli wa fi du. Wen it kom aan tu dem sitn ya, evribadi afi yuuz dem uona kanchens fi mek op dem main bout wa dem a-go du.a​—Gyalieshan 6:5.

LORN SOM MUO

3. Mek Jeuova api wid wa yu du wen yu sik

Ou yu kyan du wa Gad waahn yu fi du wen yu sik an go a dakta? Plie di VIDIYO, an den wi a-go taak bout som difrant tingz we wi kyan du wen wi a mek op wi main bout wa fi du.

VIDIYO: Wa Kyan Elp Yu Fi Mek Op Yu Main Bout Blod Wen Yu Sik? (5:47)

• Prie tu Gad mek im elp yu fi nuo wa fi du.​—Jiemz 1:5.

• Luk iina wi buk an pamplet dem fi si tingz iina di Baibl we yu kyan riizn pan we kyan elp yu fi nuo wa fi du.​—Pravorbz 13:16.

• Chek out wa an wa di dakta dem iina fi yu ieriya kyan du.

• Mek shuor se yu nuo di sitn dem we yu naa go du non at aal.

• Mek shuor se eniting we yu mek op yu main fi du naa go bada yu kanchens.​—Aks 24:16.b

• Wen it kom aan tu tingz we av fi du wid yu kanchens, a yu afi mek op yu uona main. Nobadi no fi dwi’it fi yu​—nat iivn yu ozban ar yu waif, ar wan elda, ar di sumadi we stodi di Baibl wid yu.​—Ruoman 14:12.

• Rait dong wa yu mek op yu main fi du.

4. Di Jeuova Witnis dem luk fi di bes wie fi tek kier a demself wen dem sik

Wi kyan du wa Gad se wi fi du wen it kom aan tu blod an stil tek kier a wiself gud gud wen wi sik. Plie di VIDIYO.

VIDIYO: Wan Dakta We Tiich Ada Dakta We Niem Massimo P. Franchi A Taak Bout Blod (1:36)

Riid Taitos 3:2, an den wi a-go taak bout da kwestiyan ya:

• Wa mek wen wi a taak tu di dakta dem wi fi tek wi taim wid dem an shuo dem nof rispek?

Wa wi no fi tek	Wa wi kyan tek ef wi waahn
A. Blod plazma	Frakshan fram plazma
B. Wait blod sel	Frakshan fram di wait blod sel dem
C. Plietlet	Frakshan fram plietlet
D. Red blod sel	Frakshan fram di red blod sel dem

5. Wen yu afi mek op yu main ef yu a-go tek non a di blod frakshan dem

Blod mek op a fuor mien paat we niem red blod sel, wait blod sel, plietlet an plazma. Evri wan a dem fuor mien paat ya mek op a difrant difrant paat we niem frakshan.c An dem yuuz som a dem frakshan ya fi mek medisn we elp piipl wen dem sik bad ar elp piipl wen dem kyaahn tap bliid.

Wen it kom aan tu di blod frakshan dem, evri Kristiyan afi mek op dem uona main bies pan wa dem lorn fram di Baibl an mek shuor se wa dem du naa bada fi dem kanchens. Som piipl mait-a aarait wid som a di blod frakshan dem an ada piipl mait-a no waahn it non at aal.

So wen yu a mek op yu main bout wa fi du, tingk bout da kwestiyan ya:

• Wa mi wuda se fi mek mi dakta nuo wa mek mi naa tek non a di blod frakshan dem, ar wa mi wuda tel dem fi mek dem nuo se yu av som a dem we mi wuda tek?

DIS A WA YU FI MEMBA

Jeuova no waahn wi yuuz blod iina eni an eni wie kaaz a sitn speshal tu im.

Wa yu did lorn iina da lesn ya?

• Wa mek blod so speshal tu Jeuova?

• Wen di Baibl se wi no fi nyam ar jringk blod, dat av notn fi du wid weda wi tek it iina wi vien ar nat?

• Wa kyan elp yu fi mek op yu main bout blod wen yu sik?

CHEK OUT SOM MUO SITN

Wa an wa yu fi tingk bout wen yu a mek op yu main bout wa dakta kyan du wid fi yu blod wen yu sik?

“Kwestiyan We Piipl Aks” (Di Wachtowa, Aktuoba 15, 2000)

Wa yu fi tingk bout wen yu a mek op yu main bout ef yu a-go tek non a di blod frakshan dem?

“Kwestiyan We Piipl Aks” (Di Wachtowa, Juun 15, 2004)

Wa did elp wan dakta fi si se di wie ou Jeuova fiil bout blod mek sens?

“Mi Get Fi Luk Pan Blod Di Siem Wie Ou Gad Luk Pan It” (Wiek Op!, Disemba 8, 2003)

Fain out ou Di Elda Dem We Dem Pik Fi Elp Wi Wen Dem Waahn Wi Fi Tek Blod elp di breda an sista dem.

Jeuova Elp Di Wan Dem We Sik (10:23)