Wen Gad did a ruul, evriting we im mek did a liv iina piis an evriting did aarait

Wa Mek Wi Niid Gad Kindom Fi Kom?

Wen Jeuova mek di fos man an uman, a im a did di onggl wan we did a ruul uova dem. An di wie ou im ruul dem did shuo se im lov an kier bout dem. Di plies we im put dem fi liv did av evriting nais we dem wuda waahn. It did priti laik wan gyaadn an it did niem Iidn. Im did mek shuor se dem did av uol iip a fuud fi nyam an di wok we im did gi dem fi du did mek dem api. (Jenisiz 1:28, 29; 2:8, 15) Ef dem did gwaan du wa Jeuova se, evribadi wudaana liv iina piis ya nou.

Adam av di fruut we dem neehn fi nyam we Iiv gi im iina im an. — Di fos man an uman neehn waahn Gad fi ruul uova dem

So a wa mek tingz get so bad ya nou? Di Baibl tel wi se wan a Jeuova gud gud ienjel dem ton bad an staat fait gens im. Pan tap a dat, da wikid ienjel de we niem Sietan mek Adam an Iiv, di fos tuu piipl dem, fiil se dem kyan ruul demself beta dan Gad. So dem fala Sietan an ton dem bak pan Gad tu.—Jenisiz 3:1-6; Revilieshan 12:9.

Kaaz Adam an Iiv ton dem bak pan Gad, Gad ron dem outa di gyaadn a Iidn an dem luuz out pan di chaans fi liv fi eva. (Jenisiz 3:17-19) So di pikni dem we dem av en op a ded tu. Iina Ruoman 5:12, di Baibl mek wi nuo se: “A wan man kaaz sin fi kom iina di worl, an a da man de sin kaaz im fi ded.” Kaaz a wa Adam did du, sin an det kom dong tu wi. An wan neda prablem we Adam sin kaaz fi wi a dat wen man a ruul dem wan aneda, a bier prablem dat bring. Iikliiziyastiiz 8:9 se: “Piipl onggl a chrai fi kanchuol ada piipl an en op a du som wikid sitn tu dem.” So wi si se a bier sofarieshan dem bring dong pan dem wan aneda.

MAN STAAT FI RUUL

Nimrad tan op an im luk ful a imself. Som piipl de baka im a bil op wan taal bildin. — Nimrad neehn waahn Jeuova fi ruul uova piipl

Yu nuo uu a di fos man we did staat fi ruul uova ada piipl? Di Baibl tel wi se im did niem Nimrad. Im did fiil se Jeuova no fi ruul uova piipl. Bout 3,000 ier ago King Salaman did rait se: “Mi si di wan dem we a sofa a baal, an nobadi neva de de fi elp dem an osh dem. An di wan dem we did a ruul uova dem did av aal a di powa an did a presha dem aad aad.”—Iikliiziyastiiz 4:1.

Fram Nimrad taim, a siem wie so it a go. Man we av powa an a ruul mek laif aad fi di piipl dem we dem a ruul uova. A di siem ting a gwaan tide an a das wai iina 2009 di Yuunaitid Nieshan did rait sitn we se “wan a di mien riizn wa mek so moch wikidnis ful op di worl” a kaa di wan dem we a ruul naa ruul rait.

A TAIM NOU FI TINGZ CHIENJ!

Wid aal a di wikidnis we a gwaan roun wi, wi kyan si se wi niid Sumadi beta fi ruul uova wi, an wi niid beta govament. An a dat Jeuova pramis wi!

Som picha: Wa gwaan wen man a ruul. 1. Wan uman we kom fram Iezha sidong pan wan doti ruod an av ar likl pikni we a baal iina ar an. 2. Wan man we op iina iej sik an iina aspital. 3. Som suoja de a waar a shuut gon. 4. Som piipl we beks bad a uol op sain an a demanschriet. 5. Wan uman an ar gyal pikni tan op a dem front duor an si se sumadi brok iina di ous. 6. Wan siti wid uol iip a smuok an lait waiya. — Aal wen di govament dem du som gud sitn, dem kyaahn get rid a di big prablem dem we piipl av

Memba di Kindom we wi se uol iip a piipl a prie fa? (Matyu 6:9, 10) Da Kindom de a wan govament. A Gad govament. Iina Daniyel 2: 44, it tel wi se Gad govament a-go get rid a aal a di ada govament dem “an it wan gweehn ruul fi eva.” An a no onggl dat, Gad pik uu im waahn fi bi di Ruula fi da govament de aredi. A uu yu tingk im pik?