Wi Kyan Liv Fi Eva

1. Wen wi sidong an tingk bout se Jeuova pramis wi se im a-go mek wi liv fi eva, ou dat mek yu fiil?

JEUOVA pramis di wan dem we du wa im se dem fi du, se dem a-go “liv fi eva an eva.” (Ruo. 6:23) Wen wi sidong an tingk bout wa Jeuova a-go du fi wi, it mek wi lov im muor an muor. Tingk bout it: Wi Faada Jeuova we iina evn lov wi so moch das im naa go lef wi.

2. Kaa wi nuo se Jeuova pramis wi se wi a-go kyan liv fi eva, ou dat a elp wi?

² Kaa Gad pramis wi se wi kyan go liv fi eva, a dat elp wi fi eng aan an go chuu wi prablem dem. So aal wen wi enimi dem tel wi se dem a-go kil wi ef wi no tap sorv Jeuova, wi naa go tap sorv im. Wa mek wi naa go tap? Wan a di riizn dem wa mek wi naa go tap a kaa wi nuo se ef wi ded Jeuova a-go mek wi kyan kom bak alaiv agen, an wi a-go kyan liv fi eva. (Jan 5:28, 29; 1 Kor. 15:55-58; Iib. 2:15) Wa mek wi nuo se wi a-go kyan liv fi eva? Si som riizn ya wa mek wi se so.

JEUOVA A LIV FI EVA AN EVA

3. Wa mek wi nuo se Jeuova kyan mek wi liv fi eva? (Saam 102:12, 24, 27)

³ Wi nuo se Jeuova a-go kyan mek wi liv fi eva kaa a im gi laif an im a liv fi eva an eva tu. (Sa. 36:9) Dem ya a som a di skripcha dem we de iina di Baibl we mek wi nuo se Jeuova aalwiez de bout an im a-go aalwiez de bout. Saam 90:2 mek wi nuo se Jeuova de bout fram eva sins an im aalwiez a-go de bout. An Saam 102 se sitn laik dat tu. (Riid Saam 102:12, 24, 27.) Di prafit we niem Abakok rait dis bout wi Faada Jeuova we de iina evn, im se: “Mi Gad Jeuova, no yu a di wan we de bout fram bifuo taim staat? Yu a fi mi Gad, fi mi Gad we Uoli, yu kyaahn ded.”​—Aba. 1:12.

4. Tel wi wa mek wi no fi wori ef wi kyaahn get it se Gad de bout fi eva.

⁴ Yu fain it aad fi biliiv se Jeuova aalwiez “de bout fi eva”? (Aiz. 40:28) Notn no rang wid dat. A no yu wan fain it aad. Ilaiyuu did se wi kyaahn andastan umoch ier Gad de bout fa. (Juob 36:26) Bot kaa wi no andastan sitn, it no miin se it no go so. Laik wi mait no andastan evriting bout ou lait wok, bot kaa wi no nuo ou lait wok dat no miin tu se it no de fi chuu. A siem so, wen wi tingk bout ou fram eva sins Gad aalwiez de bout, a no evriting wi gweehn andastan bout dat. Bot dat no miin se Gad no de bout fi eva. Weda wi andastan dis ar wi no andastan it, dat no miin se Gad no de bout fi eva fi chuu. (Ruo. 11:33-36) An im did de bout bifuo eniting els laik di son, an di muun, an di ort, an di staar dem an dem sitn de. Wi nuo fi shuor se Jeuova a di wan we yuuz im powa fi mek di ort. Ye man, im did de bout bifuo im mek di evn dem. (Jer. 51:15; Aks 17:24) Wa a wan neda riizn wa mek wi nuo se wi kyan go liv fi eva?

JEUOVA DID MEK WI FI LIV FI EVA

5. Wa di fos man an uman we Jeuova mek kuda luk faawod tu?

⁵ Evriting we Jeuova did mek im did mek it fi liv fi a taim; a onggl piipl im did mek fi liv fi eva. Bot Jeuova did tel Adam se: “Yu si di chrii a di nalij a gud an bad, no iit fram aafa it, kaaz enidie yu iit fram aafa it, yu shuor fi ded.” (Jen. 2:17) Ef Adam an Iiv did du wa Jeuova se, dem wudn ded. It wuda aal mek sens fi se Jeuova wuda lou dem fi go nyam fram di chrii a laif. An dat wuda mek dem nuo se ye, nou Jeuova a se dem kyan go get fi liv fi eva.b​—Jen. 3:22

6-7. (a) Wa els mek wi nuo se Jeuova neehn mek wi fi ded? (b) Wa a som a di sitn dem we yu a-go waahn fi du wen yu a liv fi eva? (Luk pan di picha dem.)

⁶ A wan big ting fi nuo se saiyantis fain out se wi brien kyan memba uol iip a sitn an kip it iina it fi langga dan di mount a taim we wi a liv fa nou. Iina 2010 wan likl buk we niem Scientific American Mind se it komiin laik se yu brien kyan uol bout 3 miliyan owa a tingz iina it. Dat wuda komiin laik yu tiep 300 ier a wa a gwaan pan di TV. An wi brien guda kyan uol wol iip muor dan dat. Bot wa dat du a mek wi nuo se di wie ou Jeuova mek di brien, it kyan uol wol iip muor tingz iina it dan jos we wi get fi nuo iina di 70 ar 80 ier we wi mait-a liv fa.​—Sa. 90:10.

⁷ Jeuova mek wi fi waahn fi liv fi eva. Di Baibl se: “Im mek piipl so dat dem wuda waahn fi liv fi eva.” (Iik. 3:11) A das wai wi fiil se det a wan enimi. (1 Kor. 15:26) Se yu get sik bad, yu a-go jos gi op so? Nuo sa, a no dat yu a-go du. Yu a-go go dakta an yu a-go tek di medisn im gi yu fi get beta. Matarafak, wi a-go du evriting wi kyan du so dat wi no ded. A no chuu se wen sumadi fi yu ded, aal ef dem uol, yu stil fiil it bad wen dem ded? (Jan 11:32, 33) Wi Gad Jeuova we lov wi so wudn mek wi so dat wi waahn fi liv fi eva ef im neehn did a-go du sopm so dat wi kyan liv fi eva. Bot a no onggl dat, wi av ada riizn we mek wi se wi kyan go liv fi eva. So mek wi luk pan som sitn we Jeuova du aredi an wa im a du nou wa mek wi nuo se im stil waahn wi fi liv fi eva.

JEUOVA STIL A-GO DU WA IM DID WAAHN FI DU

8. Ou Aizaiya 55:11 mek wi nuo se wa Jeuova waahn fi apm a-go apm?

⁸ Aalduo Adam an Iiv did sin an mek aal a wi en op a ded, Jeuova stil waahn wi fi liv fi eva. (Riid Aizaiya 55:11.) So im stil waahn di wan dem we a du wa im waahn dem fi du fi liv fi eva. Wen wi luk pan di ting dem we Jeuova se an du fi mek wa im waahn fi apm apm, dem mek wi nuo se im stil waahn wi fi liv fi eva.

9. A wa Jeuova pramis wi se? (Daniyel 12:2, 13)

⁹ Jeuova did pramis wi se im a-go mek ded piipl kom bak alaiv agen an im a-go mek dem kyan liv fi eva. (Aks 24:15; Taitos 1:1, 2) Juob, wan man we did a stik tu Jeuova an a du wa im waahn im fi du, nuo se Jeuova did wel waahn fi mek piipl we ded kom bak alaiv. (Juob 14:14, 15) Di prafit we niem Daniyel did nuo se piipl we ded kuda kom bak alaiv an get fi liv fi eva. (Sa. 37:29; riid Daniyel 12:2, 13.) Aal di Juu piipl dem we did a liv wen Jiizas di de bout did nuo se Jiizas kuda mek di wan dem we a du wa im se dem fi du get “fi liv fi eva.” (Luuk 10:25; 18:18) An a nof taim Jiizas did taak bout dis, an afta im ded im Faada did mek im kom bak alaiv tu.​—Mat. 19:29; 22:31, 32; Luuk 18:30; Jan 11:25.

10. Di fak se piipl we ded kom bak alaiv aredi, wa dat a tel wi se? (Luk pan di picha.)

¹⁰ A Jeuova gi laif an im av di powa fi mek piipl we ded kom bak alaiv. Wan uman we ozban did ded, we did liv iina Zarifat, did av wan bwai pikni we ded tu, an Jeuova gi di prafit we niem Ilaija di powa fi mek im kom bak alaiv. (1 Ki. 17:21-23) Afta dat, Jeuova gi di prafit we niem Ilaisha di powa fi mek di Shunamait bwai pikni we did ded kom bak alaiv. (2 Ki. 4:18-20, 34-37) Wen wi riid bout dem tuori ya, bout ou Jeuova mek ded piipl kom bak alaiv an som ada wan, it mek wi nuo se Jeuova av di powa fi mek ded piipl kom bak alaiv. An wen Jiizas did de pan di ort, im did du tingz we mek wi nuo se Jeuova did gi’im di powa fi mek ded piipl kom bak alaiv. (Jan 11:23-25, 43, 44) Jiizas de iina evn ya nou an di Baibl mek wi nuo se Jeuova gi im di “powa uova evriting we a liv iina evn an pan ort.” So Jeuova a-go yuuz Jiizas fi du wa im pramis se im a-go du kaa di Baibl se “aal uu ded an de iina di griev a-go ier Gad Bwai Pikni vais, kaa Gad memba dem.” An wen dem kom bak alaiv dem a-go kyan get fi liv fi eva.​—Mat. 28:18; Jan 5:25-29, New World Translation.

11. Kaa Jiizas kom ded fi wi, ou dat mek wi kyan liv fi eva?

¹¹ Wa mek Jeuova mek im son we im lov so moch ded da wikid kain-a wie de? Jiizas tel wi wa mek wen im se: “Gad lov di worl so moch dat im gi op im wan dege-dege Bwai Pikni, so enibadi we chos iina im naa go ded bot a-go liv fi eva.” (Jan 3:16) Kaa Jeuova sen im Son fi kom ded fi wi so dat wi kyan get frii fram wi sin dem, a dat a-go mek wi kyan get fi liv fi eva. (Mat. 20:28) Di apasl Paal mek wi nuo wa dat did miin wen im se: “Jos laik ou piipl ded siek-a wa wan man did du a siem so piipl a-go kom bak alaiv siek-a wa wan neda man did du. Piipl afi ded siek-a wa Adam did du, bot piipl we biliiv iina Gad a-go kom bak alaiv siek-a wa Jiizas Krais did du.”​—1 Kor. 15:21, 22.

12. Ou Gad a-go yuuz im Kindom govament fi mek wa im waahn fi apm, apm?

¹² Jiizas did tiich im falara dem fi prie fi di taim kom wen Gad Kindom a ruul iina evri wie an fi mek wa Gad waahn fi apm pan ort apm. (Mat. 6:9, 10) Wan a di sitn dem we Gad waahn fi apm a fi piipl liv pan di ort fi eva. Fi mek dat apm Jeuova pik im Son fi bi di King we a ruul iina im Kindom govament. Gad pik 144,000 piipl fi ruul wid Jiizas so dat wa im waahn fi apm, apm.​—Rev. 5:9, 10.

13. Wa Jeuova a du nou, an wa wi niid fi du?

¹³ Jeuova a gyada “wan big kroud a piipl” an im a tiich dem ou fi liv wen fi’im Kindom a ruul. (Rev. 7:9, 10; Jmz. 2:8) Aalduo dem piipl ya liv iina wan worl we plit op plit op an piipl iet dem wan aneda, dem piipl ya wok aad fi lov dem wan aneda no mata wich paat dem kom fram ar uu dem bi. It komiin laik se rait ya nou ya, dem a ton dem suod iina sitn we dem yuuz fi plou op lan. (Mai. 4:3) So insted-a fait iina waar an kil aaf piipl, dem a tiich piipl bout Gad an wa im waahn fi wi so dat piipl kyan go get “di laif we Gad pramis” wi. (1 Tim. 6:19) Wen dem du dat, dem fambili mait-a staat fi fait gens dem ar dem mait-a naa mek moni laik wa dem yuus tu mek kaa dem a du wa Gad Kindom waahn dem fi du, bot Jeuova a mek shuor se dem a get di sitn dem we dem niid fi liv. (Mat. 6:25, 30-33; Luuk 18:29, 30) Aal a dis mek wi nuo se Gad Kindom govament riil an it a-go gwaan du di sitn dem we Jeuova waahn fi apm.

SOM NAIS TINGZ A-GO APM IINA DI FYUUCHA

14-15. Wa Jeuova a-go du fi get rid a det?

¹⁴ Jiizas iina evn ya nou a ruul iina Gad Kindom govament, so im a-go du evriting we Jeuova did pramis se im did a-go du fi wi. (2 Kor. 1:20) A fram 1914 Jiizas a fait im enimi dem. (Sa. 110:1, 2) An im an di wan dem we a ruul wid im a-go get rid a im enimi dem an aal a di wikid piipl dem.​—Rev. 6:2.

¹⁵ Wen Jiizas a ruul fi di Touzn Ier ded piipl a-go kom bak alaiv an di piipl dem we du wa Gad waahn dem fi du a-go get porfek. Wen di laas tes don, di wan dem we Jeuova se a du wa rait, “a dem a-go de pan di ort, an liv pan it fi eva.” (Sa. 37:10, 11, 29) An wi api fi nuo se “di laas enimi we im a-go get rid a, a det.”​—1 Kor. 15:26.

16. Wa a di mien riizn wa mek wi fi a sorv Jeuova?

¹⁶ Da lesn ya mek wi nuo se wi kyan luk faawod fi liv fi eva kaa a di Baibl mek wi nuo se wi kyan go liv fi eva. Kaa wi av sitn a luk faawod tu, it elp wi fi stik tu Jeuova aal iina dem laas die ya wen tingz aad. Bot fi mek Jeuova api, wi no fi jos a sorv im kaa wi no waahn fi ded. Wi fi sorv im an stik tu im an Jiizas kaa wi lov dem. (2 Kor. 5:14, 15) An a kaa wi lov dem mek wi waahn fi du tingz laik dem an fi tel ada piipl bout aal a di gud sitn dem we wi a luk faawod fi get. (Ruo. 10:13-15) Wen wi lorn se wi no fi onggl a tingk bout wiself an wi kain tu ada piipl, wi a-go bi di kain-a sumadi we Jeuova waahn fi bi im fren fi eva.​—Iib. 13:16.

17. Wa evri singgl wan a wi fi a du ya nou? (Matyu 7:13, 14)

¹⁷ Yu tingk wi a-go de mongks di piipl dem we a-go get fi liv fi eva? Jeuova kyan mek dat apm fi wi. Bot rait ya nou ya, a wi fi du wa wi fi du so dat wi kyan get fi liv fi eva. (Riid Matyu 7:13, 14.) Wen wi a liv fi eva, a wa laif a-go komiin laik? Wi a-go get di ansa fi da kwestiyan ya iina di neks lesn.