Yu Kyan Go Get Fi Du Di Sitn Dem We Yu Plan Fi Du Fi Worship Jeuova Beta

1. Wa nof a wi fain it aad fi du?

YU EVA plan fi du muor fi worship Jeuova beta bot yu fain it aad fi du it? Laik fi riid di Baibl evridie, ar fi du yu uona Baibl stodi, ar fi priich an tiich beta, ar fi du sitn we a-go mek yu av som beta wiez. Ef dat eva apm tu yu a no yu wan dat eva apm tu. Wan breda we niem Filip did waahn fi prie muor an fi mek im prieya dem beta, bot im did a fain it aad fi fain taim fi prie. An Erika did waahn fi riich a di miitn fi fiil sorvis orli bot shi fain se shi aalwiez riich liet. An den yu av Tomáš. A nof taim im chrai fi riid aaf di Baibl. Im se: “Bot mi stil neehn laik fi riid it. A chrii taim mi chrai, an evritaim we mi chrai, mi en op tap a Livitikos.”

2. Wa mek wi na’afi fiil a wie ef wi no get fi du sitn we wi did plan fi du fi Jeuova?

² Yu plan fi du sitn fi Jeuova we yu no get fi du yet? Ef yu no get fi du it yet dat no miin tu se yu woklis, kaa iivn ef a wan likl sitn yu waahn fi du fi Jeuova yu stil afi wok aad fi dwi’it. An kaa yu a chrai fi du muor, it a shuo se yu lov Jeuova an yu waahn fi du aal a wa yu kyan du fi’im. An yu kyan nuo fi shuor se Jeuova lov yu fi dat an aal im waahn a fi yu du wa yu kyan du. (Sa. 103:14; Mai. 6:8) So yu afi mek shuor se di sitn dem we yu waahn fi du fi Jeuova a sitn we yu kyan riili du fi’im. So ef yu plan fi du sitn we yu nuo yu kyan du, mek wi luk pan som sitn we kyan elp yu fi dwi’it.

YU AFI WAAHN FI DWI’IT

3. Wen yu plan fi du sitn, wa mek yu fi wel waahn dwi’it?

³ Wen yu plan fi du sitn an yu wel waahn fi dwi’it, a dat a-go push yu fi dwi’it jos laik ou briiz wuda push wan siel buot fi go somwe. So ef di briiz gwaan bluo, yu nuo se di sumadi a-go riich we dem a go. An di chrangga di briiz bi a di kwika im a-go riich. A siem so wen wi wel waahn fi du sitn, a dat a-go mek wi dwi’it. Dievid, wan breda we kom fram El Salvaduor, se: “Wen yu wel waahn fi du sitn yu a-go chrai aad aad fi dwi’it, yu naa go mek notn tap yu fram du wa yu waahn fi du.” So wa yu kyan du fi mek shuor se notn no tap yu fram du wa yu waahn fi du fi Jeuova?

4. Wa wi kyan prie fa? (Filipiyan 2:13) (Luk pan di picha tu.)

⁴ Prie fi waahn fi du muor fi Jeuova. Jeuova kyan yuuz im uoli spirit fi elp yu fi du wa yu waahn fi du fi’im. (Riid Filipiyan 2:13.) Somtaim wi mait-a plan fi du sitn fi Jeuova, an dat gud! Bot iivn duo wi du dat, wi mait no riili waahn fi du it. An a dat did apm wid wan sista iina Yuganda we niem Norina. Shi neva riili fiil laik shi av di push fi stodi di Baibl wid sumadi kaa shi did fiil laik se shi neehn a wan gud tiicha. Shi tel wi wa elp ar, shi se: “Evridie mi prie tu Jeuova an aks im fi mek mi waahn fi stodi di Baibl wid sumadi. An den afta mi prie, mi staat fi chrai lorn ou fi tiich beta. Afta kopl mont, mi si se mi did waahn fi stodi di Baibl wid sumadi. So da siem ier de mi en op staat tuu Baibl stodi.”

5. Wa a som a di sitn dem wi kyan sidong an tingk bout we a-go mek wi waahn fi du muor fi Jeuova?

⁵ Tingk bout aal a wa Jeuova du fi yu aredi. (Sa. 143:5) Di apasl Paal did tingk bout aal a wa Jeuova did du fi’im aredi, an dis push im fi du aal a wa im kyan du fi Jeuova. (1 Kor. 15:9, 10; 1 Tim. 1:12-14) A siem so wen wi sidong an tingk bout aal a wa Jeuova du fi wi aredi, it a-go push wi fi du wa wi plan fi du. (Sa. 116:12) Luk pan wa did elp wan sista iina Andyuuras we did waahn fi regila paiyanier. Shi se: “Mi tingk bout ou Jeuova did mek mi bi wan a im piipl dem an umoch im lov mi an a tek kier a mi. Wen mi tingk bout aal a dem sitn ya, it push mi fi lov im muor an fi waahn fi du aal a wa mi kyan du fi’im.”

6. Wa els kyan elp yu fi du wa yu plan fi du?

⁶ Tingk bout aal a di blesn dem we yu a-go get wen yu get fi du wa yu plan fi du. Memba Erika we did waahn fi riich a di miitn fi fiil sorvis pan taim. Shi se: “Mi si se a nof tingz mi did a mis out pan kaa mi riich liet. Ef mi did riich orli, mi wuda get fi spen muor taim wid di breda an sista dem we de de. An mi wuda get fi ier wa di breda dem se wi kyan du so dat mi kyan get fi enjai mi sorvis muor an du beta.” Kaa Erika did tingk bout aal a di ting dem we wuda apm, dis mek ar get fi du wa shi did waahn fi du. Wen yu tingk bout it, wa a som a di gud sitn dem we yu wuda get ef yu get fi du wa yu plan fi du? Ef wa yu plan fi du av notn fi du wid ou yu prie ar fi riid yu Baibl, yu kyan tingk bout ou it a-go mek yu an Jeuova get kluosa. (Sa. 145:18, 19) Bot wa ef yu waahn fi chienj op som a yu wiez dem? Yu kyan tingk bout ou it a-go elp yu fi liv gud wid ada piipl. (Kol. 3:14) So wa yu kyan du a rait dong aal a di sitn dem we mek yu waahn fi du wa yu plan fi du, an aalwiez luk bak pan it muor taim. Tomáš, we wi did taak bout aredi, se: “Di muor mi waahn fi du sitn, a dat a-go mek mi chrai aad fi dwi’it an no tap.”

7. Wa did elp Julio an im waif fi du wa dem did plan fi du?

⁷ Spen taim wid di wan dem we a-go push yu fi du wa yu plan fi du. (Pr. 13:20) Luk pan wa did elp Julio an im waif fi du wa dem plan fi du. Dem did waahn fi du muor iina di priichin wok. Im se: “Di fren dem we wi kip a di wan dem we wi nuo se wuda aarait wid wa wi plan fi du, an wi wuda taak tu dem bout it, an uol iip a dem did du di sitn dem we wi plan fi du aredi so dem kuda tel wi di bes ting fi du. An muor taim dem wuda aks wi ou tingz a gwaan, an dem push wi fi gwaan du wa wi av fi du.”

WEN YU NO FIIL FI DU WA YU PLAN FI DU

8. Wa yu tingk wuda apm ef yu onggl du wa yu plan fi du wen yu fiil fi dwi’it? (Luk pan di picha tu.)

⁸ Aal a wi av dem diez de we wi no fiil fi du wa wi plan fi du. Bot dat no miin se wi kyaahn du wa wi did plan fi du. Tingk bout wan chrang chrang briiz, it kyan push wan siel buot go wich paat sumadi waahn it fi go. Bot a no aal di taim di briiz a-go chrang, som a di taim it naa go so chrang. Bot dis no miin tu se di buot stil naa go muuv, kaa som a di buot dem av injin iina it an som av tuu sitn iina it we yu kyan ruo di buot wid. Di sumadi kyan yuuz dem tuu sitn ya fi go we dem a go ef dem na’av no chrang briiz. A siem so som die wi mait-a fiil se wi na’av no push fi du wa wi plan fi du. Bot ef wi onggl du wa wi plan fi du wen wi get di push fi dwi’it, wi mait en op no dwi’it non at aal. So jos laik ou di sumadi we siel di buot yuuz difrant difrant tingz fi go we dem a go aal wen dem na’av no chrang briiz, a siem so aal ef wi afi wok aad fi du wa wi plan fi du, wi stil kyan dwi’it. Wi a-go taak bout ou wi kyan du dat. Bot bifuo wi taak bout dat, mek wi taak bout sitn els we yu mait-a waahn fi nuo bout.

9. Yu tingk notn rang ef wi push wiself fi du sitn we wi plan fi du aal wen wi no fiil laik fi dwi’it? Tel wi wa mek yu se so.

⁹ Jeuova waahn wi fi api wen wi a sorv im, an im no waahn wi sorv im kaa nobadi a fuos wi fi dwi’it. (Sa. 100:2; 2 Kor. 9:7) So ef yu did plan fi du sitn muor fi Jeuova an yu no fiil fi du it agen, yu tingk yu fi push yuself fi dwi’it stil? Luk pan di apasl Paal. Im se: “Mi no mek mi badi kanchuol mi, mi kanchuol mi badi an mek it du wa mi waahn it fi du.” (1 Kor. 9:25-27) Aal wen Paal neehn fiil laik fi du sitn, im push imself fi du it stil. Yu tingk Jeuova did aarait wid dat? Ye man! Im did aarait wid it, an im bles im fi’it tu.​—2 Tim. 4:7, 8.

10. Wen yu wok aad fi du sitn we yu plan fi du aalduo yu no fiil laik fi dwi’it, ou it kyan elp yu?

¹⁰ A siem so wen wi wok aad fi du wa wi plan fi du, aal wen wi no fiil laik fi du it, Jeuova a-go api wid wi. An im api wid wi kaaz im nuo se wi naa dwi’it kaaz a sitn we wi lov fi du bot wi a du it kaaz a im wi lov. An jos laik ou im did bles Paal, a so im a-go bles wi kaaz a wa wi a chrai fi du. (Sa. 126:5) An wen wi si se Jeuova a bles wi, a dat a-go gi wi di likl push we wi niid fi du wa wi plan fi du. Wan sista we kom fram Puolan we niem Lucyna se: “Somtaim mi no fiil laik fi go a fiil sorvis, wos wen mi taiyad. Bot evritaim mi go mi dis fiil api so. Mi fiil laik a di likl push dat we mi get fram Jeuova.” So wen wi fiil laik se wi no waahn fi du sitn we wi plan fi du, mek wi luk pan wa kyan elp wi fi dwi’it.

11. Ou Jeuova kyan elp wi fi kanchuol wiself muor?

¹¹ Prie fi kanchuol yuself. Wen yu kanchuol yuself yu kyan go kanchuol di sitn dem we yu du an ou yu fiil bout tingz. So wen yu a kanchuol yuself, it no onggl miin se yu tap yuself fram du sitn bad bot it miin tu se yu kyan push yuself fi du sitn gud, wos wen di sitn we yu fi du aad ar yu no fiil laik fi dwi’it. Memba ino, a Jeuova spirit mek wi kyan kanchuol wiself so wi fi aks im fi im spirit fi elp wi fi kanchuol wiself. (Luuk 11:13; Gya. 5:22, 23) Dievid, we wi taak bout aredi, did tel wi ou it elp im wen im prie. Im did waahn fi du im uona Baibl stodi muor. Im se: “Mi wuda prie tu Jeuova an aks im fi elp mi fi kanchuol miself, an im elp mi so dat mi kuda du mi uona Baibl stodi aafn.”

12. Ou wa Iikliiziyastiiz 11:4 tel wi se kyan elp wi wen wi plan fi du muor sitn fi Jeuova?

¹² No tingk se yu a-go av di porfek taim fi du sitn. Kaa iina dis ya worl ya wi naa go eva av di porfek taim fi du notn. So ef a di porfek taim wi a wiet pan fi du wa wi plan fi du, wi naa go dwi’it. (Riid Iikliiziyastiiz 11:4.) Wan breda we niem Dayniel se: “Yu na’av no porfek taim fi du notn, so aal yu afi du a staat du wa yu afi du.” Wan ada breda we kom fram Yuganda we niem Paal mek wi nuo wa mek wi no fi put aaf sitn we wi plan fi du. Im se: “Wen wi staat fi du sitn aal wen a no di bes taim fi wi dwi’it, kaa a Jeuova wi a du it fa, wi gi Jeuova sitn fi bles.”​—Mal. 3:10.

13. Ou it kyan elp wi wen wi staat fi du wa wi plan fi du likl likl?

¹³ Staat likl likl. Wi mait-a no av di push fi du sitn we wi plan fi du kaaz it mait-a luk tuu aad. Wa yu mait-a afi du a du wa yu plan fi du likl likl. Se yu waahn fi av som gud wiez, laik fi kain tu piipl. Wa yu kyan staat du a gi piipl likl likl tingz, yu na’afi du sitn big wan taim. Se wan neda ting we yu waahn fi du a fi riid aaf di Baibl. No tingk se yu afi riid uol iip wan taim, jos riid likl likl evridie. Tomáš, we did waahn fi riid aaf di Baibl iina wan ier, did fain it aad fi du. Im se: “Mi si se mi kudn riid nof chapta wan taim. So wa mi staat fi du a riid wan an tuu vors evridie an tingk bout wa mi riid. An kaa mi du dat, mi staat fi lov fi riid di Baibl.” An kaaz im staat fi lov fi riid di Baibl, im staat fi riid muor wan taim an so im get fi riid aaf di uol a di Baibl.b

EF SITN KOM OP IINA YU WIE, NO TAP CHRAI

14. Wa a som sitn we kyan mek it aad fi wi du wa wi plan fi du?

¹⁴ An memba ino, no mata umoch wi waahn fi du wa wi plan fi du, ar umoch wi a kanchuol wiself, sitn kyan stil kom op iina wi wie, kaa “tingz we [wi] neehn tingk wuda apm, apm” an mek wi no av di taim fi du wa wi did plan fi du. (Iik. 9:11) An sitn mait-a kom op we mek wi fiil a wie an mek wi na’av di chrent fi du wa wi plan fi du. (Pr. 24:10) An kaa wi no porfek wi mait-a en op du sitn we mek wi no get fi du wa wi plan fi du. (Ruo. 7:23) Ar wi mait-a jos fiil taiyad. (Mat. 26:43) Wen sitn apm, wa kyan elp wi fi stil du wa wi did plan fi du?

15. Wen sitn apm we yu neehn plan fa, yu tingk se dat miin tu se yu kyaahn du wa yu did plan fi du? Tel wi wa mek yu se so. (Saam 145:14)

¹⁵ Memba se wen sitn apm we yu no tingk wuda apm, dat no miin se yu kyaahn du wa yu plan fi du agen. Di Baibl mek wi nuo se wi mait-a aalwiez av prablem an schres iina wi laif, bot it mek wi nuo tu se Jeuova wi elp wi fi du wa wi did plan fi du fi’im. (Riid Saam 145:14.) Wan breda, we wi did taak bout aredi, we niem Filip se: “Wa mi yuuz fi nuo ef sitn ton out gud a no umoch taim it no wok out, bot mi luk pan umoch taim mi chrai agen fi du wa mi plan fi du.” Di breda we niem Dievid, we wi taak bout aredi, se: “Wen sitn kom iina di wie we mek it aad fi du wa mi did plan fi du, mi luk pan it laik sitn we mi kyan yuuz fi mek Jeuova si se mi lov im.” Wen yu wok aad fi du wa yu plan fi du fi Jeuova aal wen tingz aad fi yu, yu mek im si se yu waahn fi du wa im waahn yu fi du, an it a-go mek im api.

16. Wen sitn mek it aad fi wi du wa wi did plan fi du, wa wi kyan lorn fram it?

¹⁶ Wen sitn apm we yu neehn plan fa, si wa yu kyan lorn fram it. Tingk bout wa mait-a mek it apm an aks yuself, ‘Mi kuda du sitn difrant fi mek sitn laka dis no apm agen?’ (Pr. 27:12) Somtaim wen sitn apm a kaa wa wi did plan fi du neehn iizi laik we wi did tingk. Ef a dis apm, sidong an tingk bout wa yu did plan fi du an si ef a sitn we yu riili kyan du.c An memba se ef yu no get fi du sitn we yu plan fi du kaa a sitn we yu riili kyaahn du, Jeuova naa go fiil se yu woklis.​—2 Kor. 8:12.

17. Wa mek wi fi memba di sitn dem we wi du fi Jeuova aredi?

¹⁷ Memba aal a wa yu get fi du aredi. Di Baibl mek wi nuo se “Gad fier yu nuo. Im naa go figet wa unu du.” (Iib. 6:10) So yu no fi figet it niida. Tingk bout wa yu du aredi, laik wa yu du fi yu an Jeuova ton gud fren, ar fi tel ada piipl bout im, ar so dat yu kuda baptaiz. Jos laik ou yu get fi du dem sitn de we yu did plan fi du, yu kyan stil get fi du di ada ting dem we yu did plan fi du fi’im.​—Fil. 3:16.

18. Wen wi a du wa wi plan fi du, wa wi fi memba se? (Luk pan di picha tu.)

¹⁸ Jos laik di sumadi we siel wan buot an api fi riich we im a go, a siem so Jeuova kyan elp yu fi du wa yu plan fi du fi’im. An memba se di wan dem we siel di buot yuuzhuwali lov di buot raid. A siem so wen yu gwaan du wa yu plan fi du, luk an si ou Jeuova a bles yu an a elp yu, an dat a-go mek yu api. (2 Kor. 4:7) An ef yu no tap chrai an du wa yu plan fi du, yu a-go get nof nof muor blesn.​—Gya. 6:9.