“Im A-Go Mek Unu Aat Chrang”​—Bot Ou Im A-Go Dwi’it?

1. A wa did mek som a dem man de we did a sorv Jeuova bak iina dem taim de so chrang?

SOM a di taim wen di Baibl tel wi bout som man we did a sorv Jeuova, it tel wi se dem av nof powa. Bot aal di wan dem we did chrangga dan di res a dem did fiil laik se dem no so chrang som a di taim. Laik yu did av man laik Dievid we se im did fiil chrang laik wan mountn, bot wan neda taim im se im fiil friedi-friedi. (Sa. 30:7) An wi nuo se Samsn did chrang bad, bot im did nuo se a Gad gi im Im spirit mek im so chrang ar els im wuda wiik jos laik eni ada man. (Joj. 14:5, 6; 16:17) Dem man ya we did a sorv Jeuova did chrang onggl kaa Jeuova mek dem chrang.

2. Wa mek Paal did se im chrang wen im wiik? (2 Korintiyan 12:9, 10)

² Di apasl Paal did nuo se im did niid Jeuova fi mek im chrang. (Riid 2 Korintiyan 12:9, 10.) An jos laik nof a wi, im did av wan siknis we im did afi liv wid. (Gya. 4:13, 14) An som a di taim im did fain it aad fi du wa rait. (Ruo. 7:18, 19) An som a di taim im did a wori an fret kaa im neehn nuo wa mait-a apm tu im. (2 Kor. 1:8, 9) Bot wi si se wen im did wiik, a da taim de im chrang kaa Jeuova mek im chrang.

3. Wa a di kwestiyan dem we wi a-go get di ansa fa iina da lesn ya?

³ Jeuova pramis wi se im a-go mek wi chrang. (1 Pii. 5:10) Bot wi afi du sitn fi im mek wi chrang. Laik wan injin de iina wan kyaar fi mek it muuv, bot it kyaahn go muuv ef di jraiva no pres pan di gyas. A siem so Jeuova powa de de fi elp wi, bot wi afi du sitn fi it elp wi. Bot a wa a som a di sitn dem we Jeuova gi wi fi mek wi chrang? An a wa wi fi du so dat wi kyan get im powa? Wi a-go get di ansa fi dem kwestiyan ya wen wi luk pan ou Jeuova did mek di prafit we niem Juona, an Jiizas mada Mieri, an di apasl Paal get chrang. An wi a-go luk pan ou Jeuova mek di piipl dem we a sorv im tide get chrang tu.

WEN YU PRIE TU JEUOVA AN STODI IM WOD, IT KYAN MEK YU CHRANG

4. Wa wi fi du so dat Jeuova kyan mek wi chrang?

⁴ Wan a di ting dem we wi kyan du fi get Jeuova powa a prie tu im. Wen wi prie tu Jeuova, ‘im gi wi di powa we wi niid fi du wa wi fi du.’ (2 Kor. 4:7) An it kyan mek wi chrang wen wi riid di Baibl an tingk bout wa wi riid. (Sa. 86:11) Di sitn dem we wi riid iina Gad Wod “av powa an kyan du tingz.” (Iib. 4:12) So wen yu prie tu Jeuova an riid yu Baibl, yu kyan get di chrent we yu niid fi eng aan go chuu yu prablem dem an stil api. An it kyan elp yu fi du sitn we yu get fi du fi Jeuova we yu tingk se yu kudn du. Mek wi luk pan ou Jeuova did mek di prafit we niem Juona chrang.

5. Wa mek Juona did niid di chrent we kom fram Jeuova?

⁵ Juona did get wan wok fram Jeuova fi du we im tingk se im kudn du, so im ron we. An kaaz a dat, im nieli ded iina wan wikid staam an nieli mek ada piipl ded tu. Bot wen dem chuo im iina di sii, im en op iina wan big fish beli. Bot ou yu tingk im did fiil? Yu tingk se im tingk se im wuda ded iina di fish beli? Ar im did fiil se Jeuova wuda don wid im ya nou? Wi no nuo ou im did fiil, bot wi nuo se im mos did a fret. So a nou im wuda niid di chrent we kom fram Jeuova.

6. Bies pan Juona 2:1, 2, 7, wa did gi Juona di chrent wen im did de iina di fish beli?

⁶ Wan a di ting dem we Juona did du wen im did iina di fish beli fi get chrent fram Jeuova a prie. (Riid Juona 2:1, 2, 7.) Aalduo Juona neehn du wa Jeuova did se im fi du, im did nuo se Jeuova wuda lisn tu im ef im ombl imself an prie tu Jeuova an mek im nuo se im sari fi wa im du. Wan neda ting we Juona du, a dat im tingk bout wa Gad Wod se. Wa mek wi se so? Di prieya we Juona prie de iina Juona chapta 2. An yu kyan fain nof a di ting dem we im se iina da prieya de iina di buk a Saamz. (Laik yu kyan luk pan Juona 2:2, 5 an Saam 69:1; 86:7.) So wi si se Juona did nuo dem paat de a di Baibl gud gud. An kaa im did a tingk bout dem vors de, im did nuo se Jeuova wuda elp im. Likl afta dat wen di fish vamit im out pan jrai lan, im did redi fi du di wok we Jeuova did gi im fi du.​—Juona 2:10–3:4.

7-8. Wich paat wan breda we kom fram Taiwan did get di chrent fram fi go chuu im prablem dem?

⁷ Wen wi luk pan wa Juona did go chuu, it kyan elp wi wen wi a go chuu fi wi prablem dem. Laik wan breda we niem Chungb we kom fram Taiwan, did av som difrant difrant kain-a siknis. An pan tap a dat, im uona fambili did a biit im op an a mek tingz aad fi im kaaz im a sorv Jeuova. Bot wa did elp im a dat im stodi im Baibl an prie tu Jeuova. Im se, “Som a di taim wen di prablem dem kom op an mi a wori op miself, it mek it aad fi mi du mi uona Baibl stodi.” Aal wen aal a dis a gwaan, Chung no tap chrai. Im se, “Di fos ting mi du a prie tu Jeuova, an den mi wuda put aan mi ierfuon an lisn tu wi sang dem. An som a di taim, mi aal sing dem iina wan luo vais til mi kaam dong, an den mi staat fi stodi afta dat.”

⁸ Kaa Chung neehn tap du im uona Baibl stodi, it mek im tan op chrang iina som wie we im neehn nuo im kuda tan op chrang. Laik afta im du wan aparieshan, wan nors tel im se im na’av nof red blod sel so im wuda afi tek blod. Bot di nait bifuo im du di aparieshan, Chung riid bout wan sista we du da siem kain-a aparieshan de an fi ar red blod sel did luowa dan fi’im. Bot shi stil neehn tek di blod an shi stil get beta. Dat mek Chung si se im kyan tan op chrang tu laik da sista de an du wa Jeuova waahn im fi du.

9. Ef yu a go chuu sitn we mek it aad fi yu du sortn tingz, wa yu kyan du? (Luk pan di picha dem tu.)

⁹ Wen yu a go chuu som prablem, yu eva fiil laik yu a wori wori op yuself so moch dat yu kyaahn prie tu Jeuova gud? Ar yu fiil laik se yu na’av di chrent fi stodi? Ef a so yu fiil, memba se Jeuova nuo wa yu a go chuu. Bot iivn ef a dis wan likl prieya yu prie, Jeuova a-go gi yu wa yu niid. (Ifii. 3:20) Ef a kaa yu fiil sik, ar kaaz a wa de pan yu main we mek it aad fi yu riid an stodi, wa kyan elp yu a ef yu lisn tu di Baibl rekaadin dem ar di buk an pamplet rekaadin dem. Sitn els we yu kyan lisn tu a wan a wi sang dem ar yu kyan wach wan a wi vidiyo dem pan wi jw.org websait. An wen yu prie tu Jeuova an luk fi si ou im a-go ansa yu iina wi buk an pamplet dem an dem ting de, a da taim de yu a mek im gi yu di chrent fi go aan.

MEK YU BREDA AN SISTA DEM ELP YU FI CHRANG

10. Ou wi breda an sista dem kyan elp wi?

¹⁰ Jeuova kyan yuuz wi breda an sista dem fi ‘elp push wi’ wen wi a go chuu wi prablem dem ar wen wi fain it aad fi du sitn we wi get fi du fi Jeuova. (Kol. 4:10, 11) Wen yu a go chuu wan aad taim, a dem taim de yu riili niid som gud fren. (Pr. 17:17) Wen wi fiil laik se wi kyaahn go aan no muor, a dem taim de wi breda an wi sista dem kyan du tingz fi elp wi fi mek wi fiil beta iina wiself. An dem kyan elp wi fi get kluosa tu Jeuova tu. Mek wi luk pan ou Jiizas mada Mieri did get elp fram ada piipl.

11. Wa Mieri did niid di chrent fi du?

¹¹ Tingk bout ou Mieri mos did fiil afta di ienjel we niem Giebrel tel ar bout wa a-go apm tu ar, kaa im did tel ar se shi a-go get pregnant an shi neehn marid. Plos shi neehn av no pikni bifuo fi tek kier a, so shi neehn nuo ou fi tek kier a wan pikni. Bot im stil tel ar se shi wuda afi go tek kier a di pikni we wuda ton di Mesaiya. An pan tap a dat, shi neva sliip wid no man yet, so ou shi kuda go tel Juozif, we shi did fi go marid tu, bout aal a dis. So Mieri wuda riili niid di chrent fi du aal a dis.​—Luuk 1:26-33.

12. Azkaadn tu Luuk 1:39-45, a ou Mieri did get di chrent we shi did niid?

¹² Mieri did mek ada piipl elp ar so dat shi kuda du da wok ya we shi get fi du. Laik shi aks di ienjel Giebrel fi tel ar muor bout di wok we shi get fi du. (Luuk 1:34) Likl afta dat, shi go aal di wie go a “wan toun iina di ili paat a Juuda” fi go luk fi wan a ar fambili we niem Ilizibet. An dat did ton out gud fi ar kaa Ilizibet big op Mieri, an Jeuova mek Ilizibet tel ar bout wa a-go apm wid ar bwai pikni we iina ar beli. (Riid Luuk 1:39-45.) Mieri se Jeuova “tek [Jiizas] an du som powaful sitn.” (Luuk 1:46-51) So Jeuova yuuz Giebrel an Ilizibet fi gi Mieri di chrent we shi did niid.

13. A ou it did wok out gud fi wan sista we de iina Boliviya we did aks fi elp?

¹³ Jos laik Mieri, wi kyan get di chrent we wi niid fi go aan fram wi breda an sista dem. Laik wan sista we niem Dasuri, we kom fram Boliviya, did niid ar breda an sista dem fi elp ar tu wen ar faada did get sik bad an did afi iina aspital, an a shi did a tek kier a im. (1 Tim. 5:4) Bot dat neehn aalwiez iizi fi shi du. Shi se, “Wol iip a taim mi did fiil laik se mi kudn go aan no muor.” Wen it did dis staat, shi neehn aks nobadi fi elp ar. Shi se, “Mi neva waahn fi bada di breda an sista dem. Mi did a se tu miself se, ‘A Jeuova a-go gi mi di elp we mi niid.’ Bot den mi memba se mi no fi kip we fram piipl kaa mi riyalaiz se ef mi kip we fram piipl, dat wuda miin tu se mi a chrai diil wid di prablem dem pan mi uon.” (Pr. 18:1) So shi rait som a ar fren dem an mek dem nuo wa a gwaan. Shi se, “Mi kyaahn tel yu umoch mi breda an sista dem elp mi. Dem kya fuud kom a di aspital kom gi wi, an dem tel mi bout som Baibl vors we kuda elp mi. It nais fi nuo se wi av wi breda an sista dem de we redi fi elp wi. Di wol a wi a paat a Jeuova big big fambili, an da fambili de redi fi elp yu an fi baal wid yu an fi go chuu yu prablem dem wid yu.”

14. Wa mek wi fi tek di elp we di elda dem a gi wi?

¹⁴ Jeuova yuuz di elda dem tu fi gi wi di chrent we wi niid. Di Baibl mek wi nuo se di elda dem komiin laik wan gif fram Jeuova. (Aiz. 32:1, 2) So wen yu a wori an fret bout notn, taak tu di elda dem bout it. An wen dem a chrai fi elp yu, tek di elp we dem a gi yu kaa Jeuova kyan yuuz dem fi mek yu chrang.

MEK DI SITN DEM WE YU A LUK FAAWOD FI GET IINA DI FYUUCHA MEK YU CHRANG

15. Wa wi a luk faawod fi get?

¹⁵ Kaa wi biliiv se di sitn dem we di Baibl se a-go apm a-go apm fi chuu, it gi wi di chrent fi go aan. (Ruo. 4:3, 18-20) Wi we a Kristiyan kyan go liv fi eva pan ort wen it ton iina wan paradais ar fi go ruul iina Gad Kindom govament iina evn. Bikaa wi av sitn a luk faawod fi get, it a-go elp wi fi go chuu wi prablem dem, priich di gud nyuuz, an fi du eni wok we wi get fi du iina di kanggrigieshan. (1 Tes. 1:3) An a di sitn dem we Paal did a luk faawod fi get did mek im chrang tu.

16. Wa a som a di sitn dem we did apm tu Paal we mek im did niid chrent?

¹⁶ Wi si se Paal did niid elp fi get chrang kaa iina im leta we im rait tu di Korintiyan dem im se im komiin laik wan pat we mek outa klie we iizi fi mash op. Im se ‘evriwe im ton chobl lik im,’ an ‘im no nuo wa fi du,’ an ‘nof taim piipl mek im sofa,’ an ‘nof taim dem lik im dong.’ Wi si se im did riili niid elp. (2 Kor. 4:8-10) Dis a di tord taim Paal did a go roun an a priich tu di breda an sista dem an di piipl dem. An da taim de, im mait-a neehn nuo se tingz wuda get wos fi im, kaa wol iip a piipl wuda biit im op an du im som bad tingz. Laik dem wuda lak im op iina jiel, an ship wuda mash op wid im iina it, an dem wuda lak im op iina prizn tu.

17. Azkaadn tu 2 Korintiyan 4:16-18, wa a wan neda sitn we gi Paal di chrent fi go chuu im prablem dem?

¹⁷ Paal get di chrent fi go chuu wen im tingk bout di nais sitn dem we im a-go get iina di fyuucha. (Riid 2 Korintiyan 4:16-18.) Im tel di breda an sista dem iina Korint se iivn duo ‘im a get uol an im badi bata-bata fram aal we im a go chuu,’ im no mek dat mek im fiil bad, an im tingk bout di sitn dem we a-go apm iina di fyuucha. Kaa im did a luk faawod fi liv iina evn, im se di sitn dem we im did a go chuu “a no notn wen [im] tingk bout di nais nais sitn dem we Gad a-go gi [im].” Kaa Paal did a tingk bout di nais sitn dem we a-go apm tu im iina di fyuucha, “evridie Gad mek [im] spirit chrangga an chrangga an gi [im] di chrent fi gwaan du [Im] wok.”

18. Kaa Vasil an im fambili did a tingk bout wa a-go apm iina di fyuucha, ou dat did gi dem di chrent fi go aan?

¹⁸ Wan breda iina Bolgieriya we niem Vasil fain se it gi im chrent wen im tingk bout di nais sitn dem we a-go gwaan iina di fyuucha, kaa kopl ier ago im likl breda we niem Nikolay did ded iina wan kyaar aksident. An dis did mek Vasil sad bad fi wan lang taim. Bot wen im an im fambili tingk bout di taim wen ded piipl a-go kom bak alaiv, it elp dem. Im se, “Laik wi taak bout wich paat wi a-go miit Nikolay, an di kain-a fuud we wi a-go luk bout fi im, an uu wi a-go invait fi kom a di fos paati we wi a-go kip fi im, an wa wi a-go tel im bout wa did apm iina di laas die dem.” Vasil se wen im an im fambili tingk bout di nais sitn dem we a-go apm iina di fyuucha, it mek dem chrang so dat dem kyan eng aan an gwaan wiet fi di taim wen Jeuova a-go mek im breda kom bak alaiv.

19. Wa kyan elp wi fi gwaan tingk bout di nais sitn dem we wi a-go get? (Luk pan di picha tu.)

¹⁹ Wa kyan elp yu fi gwaan tingk bout di nais sitn dem we wi a-go get? Ef yu a wan a di wan dem we a-go liv fi eva pan di ort, yu kyan riid bout wa di Baibl se bout Paradais an tingk bout it. (Aiz. 25:8; 32:16-18) So gwaan tingk bout wa laif a-go komiin laik iina di nyuu worl. Tingk bout yuself laik se yu di de. A uu yu si de? Wa a som a di sitn dem we yu a ier? Ou yu fiil? Fi elp yu fi tingk bout dem ting de yu kyan luk pan di picha dem iina wi buk an pamplet dem we a shuo wi wa Paradais a-go komiin laik. Ar yu kyan wach di myuuzik vidiyo dem laik di wan we niem The New World to Come, ar Just Around the Corner, ar Jos Tingk Bout Di Taim. Ef yu gwaan tingk bout dem sitn ya, yu a-go memba se “di likl chobl an di sofarieshan we wi a go chuu nou, naa go laas fi eva.” (2 Kor. 4:17) So wi si se di gud sitn dem we Jeuova a mek wi luk faawod fi get kyan mek wi chrang.

20. Wa kyan elp wi fi get chrang wen wi fiil wiik?

²⁰ Aal wen wi fiil wiik som a di taim, Jeuova kyan gi wi di chrent fi go aan. (Sa. 108:13) Jeuova gi wi nof sitn aredi we kyan mek wi fiil chrang, so wen yu get sitn fi du fi im we yu kyaahn manij, ar yu a go chuu no prablem, ar yu no fiil so api agen, yu fi prie tu Jeuova an tek di elp we im gi yu wen yu du yu uona Baibl stodi. An tek di elp we yu a get fram di breda an sista dem, an gwaan tingk bout di sitn dem we yu a luk faawod fi get. Den a so “Gad wi tek fi im powa an mek [yu] wel chrang, so [yu] kyan uol aan no mata wa, an no grombl grombl, bot a sing sang iina [yu] aat.”​—Kol. 1:11.