Sitn We Sumadi Go Chuu

Du Tingz Fi Shuo Se Yu Fiil It Fi Evribadi

Wan sista we liv iina Nyuu Ziilan wach di vidiyo we niem “Have . . . Concern for One Another,” we mek wi si se Jeuova no onggl fiil it fi piipl bot im du sitn fi elp dem tu. (Aiz. 63:7-9) An so shi mek op ar main se shi a-go du wa shi kyan du fi elp ada piipl tu. Da siem die de wen shi de a shap a bai gruosri, shi si wan uman we no liv no we an tel ar se shi a-go bai ar sitn fi iit. Wen di sista kom bak wid di fuud shi priich likl tu di uman an gi ar di liiflet we niem Yu Tingk Pien an Sofarin A-go Don wan Die?

Di uman staat fi baal. Shi mek di sista nuo se shi did gruo az wan Jeuova Witnis bot a wol iip a ier nou shi tap go a miitn an dem ting de. Bot a no tuu lang a-go shi did prie tu Jeuova fi elp ar fi staat sorv im agen. Di sista gi di uman wan Baibl an plan fi staat stodi wid ar.a

Wi kyan du laik Jeuova an du tingz fi shuo se wi fiil it fi piipl laik im. An wi fi du dis fi wi fambili an di breda an sista dem iina di kanggrigieshan tu. An wen wi priich tu piipl evri chaans wi get, wi a du sitn fi shuo se wi fiil it fi dem tu.