Aalduo Mi Did Shai Bad, Mi En Op Ton Wan Mishineri

Mi did baan iina Viena we de iina Aschriya iina 1951, an mi fambili did a Kyatalik. Mi did shai bad, bot mi did biliiv iina Gad an mi yuus tu prie aal di wail. Wen mi did a nain ier uol, mi faada staat fi stodi di Baibl wid di Jeuova Witnis dem. An likl afta dat, mi mada did staat fi stodi tu.

No tuu lang afta dat, wi did jain di Duublin Kanggrigieshan we did de iina Viena. An wi fambili yuus tu du nof tingz tugeda. Laik wi yuus tu riid an stodi di Baibl, go a di miitn dem a di Kindom Aal, an elp out wid difrant difrant wok a di sorkit miitn dem. Wen mi did a likl pikni, mi faada elp mi fi lov Jeuova wid aal a mi aat. Az a matarafak, mi faada yuus tu aalwiez prie se mi an mi sista wuda ton paiyanier, bot dem taim de a neehn dat mi did waahn fi du.

OU MI DID STAAT FI SPEN MUOS A MI TAIM A DU JEUOVA WOK

Mi did baptaiz iina 1965 wen mi did a 14 ier uol. Bot mi did fain it aad fi priich tu piipl we mi no nuo. An mi yuus tu fiil laik di ada yong piipl dem did beta dan mi an mi did waahn dem fi laik mi. So likl afta mi baptaiz, mi did staat fi kip kompni wid som a di yong piipl dem we neehn a sorv Jeuova. Aalduo mi did laik dem kompni, mi did fiil bad kaa mi nuo se mi shudn a spen so moch taim wid piipl we no lov Jeuova. Bot it did aad fi mi tap kip kompni wid dem. Bot we yu tingk elp mi fi chienj?

Roun bout dem taim de, wan 16-ier-uol gorl we niem Dorothée did kom iina wi kanggrigieshan. Shi did lov fi priich an mi did riet ar fi dat. Mi did likl biga dan ar, bot mi neehn did a gwaan wid notn iina sorvis. Mi se tu miself se: ‘Fi mi mada an faada a Jeuova Witnis, bot Dorothée a di onggl Witnis iina fi ar fambili. Shi liv wid ar mada we sik, bot shi aalwiez de out iina sorvis!’ So shi gi mi a push fi du muor fi Jeuova. Likl afta dat, mi an Dorothée staat fi paiyanier tugeda. Wi ton agzilari paiyanier, an den afta dat wi ton regila paiyanier. Kaa Dorothée did lov fi priich, mi did staat fi lov fi priich tu, an shi elp mi fi staat mi fos Baibl stodi. So afta a wail, it did get likl iiziya fi mi staat priich tu piipl a dem yaad, an pan di ruod, an ada plies tu.

Iina di fos ier wen mi did ton wan regila paiyanier, wan breda we niem Heinz, we kom fram Aschriya, did kom a wi kanggrigieshan. Im did lorn di chuut iina Kyanada wen im did a spen taim wid im breda we a did wan Jeuova Witnis. Dem did sen im fi kom a wi kanggrigieshan we de iina Viena az wan speshal paiyanier. Fram mi miit im mi did laik im. Bot im did waahn ton wan mishineri, an mi neehn waahn ton no mishineri, so mi neehn mek im nuo se mi laik im. Bot likl afta dat, wi staat fi taak, an den lietaraan wi get marid an wi staat fi paiyanier tugeda iina Aschriya.

MI DID STAAT FI FIIL LAIK MI WAAHN TON WAN MISHINERI

Evri nou an den Heinz wuda taak bout ou im waahn fi ton wan mishineri. Mi laik se im neva presha mi, bot im wuda aks mi som kwestiyan laik: “Sins wi no av no pikni, yu tingk wi kuda du muor fi Jeuova?” Bot kaaz mi did shai bad, mi did fried fi ton wan mishineri. Ye, mi did a wan paiyanier, bot wen mi tingk bout fi ton wan mishineri, it did jos soun laik it wuda tu moch fi mi. Bot Heinz neva tap taak bout ou it wuda nais fi ton mishineri, an im elp mi fi no tingk tu moch bout miself bot fi tingk bout di piipl dem we mi wuda a elp, an dat did riili elp mi.

Afta a wail, mi did fiil laik mi waahn fi ton mishineri, so di tuu a wi did sain op fi go a Gilead School. Bot di breda we inchaaj a di branch afis tel mi se it wuda gud ef wi kyan wok pan fi chat Ingglish beta. Mi du wa im tel mi fi du an chrai fi du mi bes fi chat Ingglish beta. Bot afta chrii ier, mi did shak wen dem sen mi an Heinz go a wan kanggrigieshan we chat di Sorbo-Kroiezhan langwij we de iina Salzbog iina Aschriya. Wi did stie de-so fi sevn ier, an wan a dem ier de wi did de iina di sorkit wok. Fi chat Sorbo-Kroiezhan did aad bad, bot wi did av uol iip a Baibl stodi.

Den iina 1979 dem aks wi fi “spen taim” iina Bolgieriya. Di priichin wok did anda lakdong dong de, so wi neva priich wen wi did dong de, bot wi did aid an kya iin som a wi buk an pamplet dem we print pan som likl piepa fi faiv sista we did liv iina Suofiya we a did di kyapital fi Bolgieriya. Mi se mi did fried bad, bot Jeuova did elp mi fi du di wok we im gi mi fi du. Wen mi si ou dem sista de did briev, an ou dem did api aalduo dem kuda get lak op fi we dem did a du, it push mi fi du eniting we Jeuova aaganaizieshan tel mi fi du.

Afta a wail, wi sain op fi go a Gilead agen, an dis ya taim ya wi get chuu. Wi did tingk se wi wuda go a Merika we dem wuda tiich wi iina Ingglish, bot insted-a dat, iina Novemba 1981, dem sen wi go a di Gilead Extension School we dem did staat op a di branch afis iina Viizbaadn we de iina Jormani. So a di Jorman langwij di skuul did gwaan iina we did iiziya fi mi fi andastan. Bot wen wi don, a we dem wuda sen wi go?

WEN WI DID A PRIICH IINA WAN KONCHRI WE BIE WAAR DE

Di breda dem did sen wi go a Kenya! Bot wen wi go de, di breda dem a di Kenya branch afis aks wi ef wi wuda waahn fi go du di priichin wok a Yuganda we a wan konchri we nier dem. Bot bout 10 ier bifuo dat wan aami afisa we niem Idi Amin did tek uova di govament we de iina Yuganda. An afta dat, im kil aaf nof piipl an mek uol iip muor sofa. Den iina 1979 som ada piipl fait gens Idi Amin an tek uova fram im. Yu don nuo se mi neehn waahn fi go a wan konchri we bier waar de, bot Gilead School did elp wi fi chos iina Jeuova, so wi se yes wi a-go go.

Tingz did aad bad iina Yuganda kaa di govament kudn gi di piipl dem lait, an waata, an ada sitn we dem did niid fi liv. An di fuon dem neehn de wok niida. An yu did av uol iip a gon man an tiif tu. An a nait taim tingz did riili bad, so wen nait a kom dong, piipl wuda mek shuor se dem no kom outa dem yaad. An dem wuda di de a prie an uop se nobadi no kom fi rab dem ar kom kil dem. Bot iivn duo tingz did so aad, di breda dem we did liv de did a du aal we dem kuda du fi kip kluos tu Jeuova.

Iina 1982, mi an Heinz did riich a Kampaala, we a di kyapital a Yuganda. Iina di fos faiv mont we wi did de de, wi did stie wid Sam an Christina Waiswa. Dem did av faiv pikni an fuor ada piipl iina dem fambili we did a liv wid dem. Nof taim a onggl wan taim Breda Waiswa an im fambili dem did get fi iit fi di die, so wen dem put wi op, it did riili nais fi si ou dem tek kier a wi iivn duo dem neehn av uol iip fi shier wid wi. Wen wi did liv wid Breda an Sista Waiswa, mi an Heinz did lorn som uol iip a tingz we did elp wi. Laik wi lorn ou fi bied wid likl bit a waata an fi yuuz di waata we wi rins aaf wid fi flosh di tailit. Iina 1983, mi an Heinz did fain wan ous iina wan paat a Kampaala we did likl bit siefa dan di ada plies dem de.

Wi did lov fi priich iina Kampaala. Mi memba wan a di taim dem wi did gi piipl uova 4,000 magaziin iina wan mont! Wa wi did lov di muos a di piipl dem. Dem did av nof rispek fi Gad an dem did waahn fi taak bout di Baibl. A mont taim mi did stodi di Baibl wid 10 tu aal 15 piipl, an Heinz did av di siem mount a piipl a stodi wid tu. An wi did lorn uol iip fram di piipl dem we wi stodi wid. Laik aalduo dem did afi waak kom a miitn an waak go bak uom, wi neva ier dem a grombl grombl bout dat, bot dem aalwiez did api fi kom.

Iina 1985 an 1986, yu did av tuu muor waar we did brok out iina Yuganda. Nof a di taim wi wuda si som likl pikni we dem yuuz fi ton suoja an dem wuda de kya som big gon pan dem, an a dem dem wuda yuuz fi tan op an chek evribadi we a paas chuu da plies de. So dem taim de wi did afi prie tu Jeuova fi elp wi fi nuo wa fi du an fi iizi wiself an chos iina im, an dat did elp wi fi gwaan luk fi di piipl dem iina fiil sorvis. An Jeuova did ansa wi prieya dem kaa nof a di taim wen wi fain sumadi we waahn fi ier bout di chuut, wi neehn memba bout aal a di sitn dem we did mek wi fried wen wi did a sorch fi dem.

Mi an Heinz did lov priich tu di piipl dem we did muuv kom a Yuganda. Laik wi did get fi miit an stodi wid wan ozban an waif we niem Murat an Dilbar Ibatullin. Dem did kom fram Tatarstan we de iina Senchral Rosha. Murat did a wan dakta. Di tuu a dem did lorn di chuut, an fram dem de taim de dem no tap lov Jeuova an du wa im waahn dem fi du. Afta dat wi did miit wan uman we niem Tatjana Vileyska we kom fram Yuukrien. Di ting wid Tatjana a dat shi did waahn fi kil arself, bot shi lorn di chuut an shi did get baptaiz, an afta dat shi did go baka Yuukrien. An wen shi go bak de, shi did get di chaans fi elp chransiliet di buk an pamplet dem iina di Yuukrienian langwij.a

SOM NYUU SITN WE WI DID AV FI DIIL WID

Iina 1991 wen mi an Heinz did a spen likl taim iina Aschriya, di breda dem a di branch afis iina Aschriya did rait an tel wi se wi a-go get wan nyuu wok fi du. Dem did a-go sen wi go a Bolgieriya go priich. Fi uol iip a ier di priichin wok did anda lakdong iina nof a di konchri dem iina Yuurop, an Bolgieriya a did wan a dem konchri de tu. Bot tingz iina dem konchri de did staat fi chienj op an di Jeuova Witnis dem kuda priich agen. An mi did tel unu aredi se wen di wok did anda lakdong iina Bolgieriya, wan a di taim mi an Heinz did kya iin som buk an pamplet anda di kwaiyat wen wi did get fi spen som taim de. Bot nou dem did a-go sen wi fi go priich a Bolgieriya.

Dem did tel wi se wi no fi go baka Yuganda, so wi neva bada go baka di mishineri ous fi pak op wi sitn dem, an wi no get fi se ba-bai tu wi fren dem niida. So wi go a di Betel we de a Jormani, an wi get wan kyaar, an den wi jraiv go a Bolgieriya. Iina Suofiya, dem did mek wi jain wan gruup we av 20 poblisha.

Tingz neva so iizi fi wi dong a Bolgieriya, kaa fi wan, wi neva nuo di langwij. An pan tap a dat, yu neva av nof buk an pamplet iina di Bolgieriyan langwij. Yu did jos av The Truth That Leads to Eternal Life an My Book of Bible Stories. An it did aad fi wi fi staat Baibl stodi tu. Bot iivn duo wi did av aal a dem sitn ya a diil wid, wi likl gruup did a priich aad an did a gwaan gud tu. Bot yu no nuo wa? Di Aatadaks Choch did nuotis evriting we a gwaan, an a dem taim de tingz did get aada fi wi.

Iina 1994, di govament neva si di Jeuova Witnis rilijan az wan rilijan agen iina di konchri. An nof a di piipl dem iina Bolgieriya did fiil se di Jeuova Witnis dem a som bad piipl. So dem did ares som a di breda dem an dem did staat fi tel lai pan TV an riediyo an dem ting de an kliem se di Jeuova Witnis dem no onggl kil dem pikni, bot dem tel ada Jeuova Witnis fi kil demself tu. So it did aad fi mi an Heinz priich tu piipl. Nof taim wi miit som at ed piipl we baal aaf a wi, an kaal poliis pan wi, an dem aal chuo tingz aafa wi tu. An it did aad fi get di buk an pamplet dem iina di konchri an fi rent plies fi wi kip wi miitn dem. Di poliis dem aal kom mash op wan a wi kanvenshan dem wan ier. Bwai, mi an Heinz neehn yuus tu dem kain-a chriitment ya. Wi did mis Yuganda we yu did av som nais piipl we did waahn fi lisn tu wi wen wi a priich tu dem. Bot wa yu tingk did elp wi fi diil wid dem prablem ya?

Mi si se wi api wen wi spen taim wid di breda an sista dem. Dem did api fi fain di chuut, an dem did glad fi ou wi elp dem tu. An aal a dem did stie kluos tu dem wan aneda an elp dem wan aneda. An wen wi si aal a wa gwaan, wi si se wi kyan api wid eni wok we Jeuova gi wi az lang az wi tingk bout ada piipl an no aalwiez a tingk bout wi prablem dem.

Afta kopl ier, it did get iiziya fi wi fi priich, kaa iina 1998 di govament did si di Jeuova Witnis rilijan az wan rilijan agen an nof muor buk an pamplet did chransiliet iina di Bolgieriyan langwij. Den iina 2004 wi get wan nyuu branch afis. Rait ya nou, wi av 57 kanggrigieshan iina Bolgieriya, wid 2,953 poblisha. An iina di laas sorvis ier, a 6,475 piipl did kom a di Laad Sopa. Yu kyan imajin? A onggl 5 sista wi did av iina Suofiya ino, an nou wi av 9 kanggrigieshan. Ye man! Mi an Heinz kyan se wi si se wa di Baibl se apm fi chuu kaa wan likl gruup a piipl iina Bolgieriya ton wan big big gruup.​—Aiz. 60:22.

WI DID AFI DIIL WID WI UONA PRABLEM DEM TU

Mi did sik bad kaa mi did av sitn we dem kaal tyuuma, an wan a dem did aal de iina mi ed. Mi did du riedieshan chriitment, an den mi go a Indiya we dem du wan aparieshan pan mi we did tek bout 12 owa fi tek out muos a it. Afta mi get bak beta, mi did go baka Bolgieriya fi gwaan du Jeuova wok.

Wen aal a dat did a gwaan wid mi, Heinz did get wan diziiz we piipl aadli get we niem Ontingtanz diziiz. An kaaz a dat, it did aad fi im waak, taak, an muuv im an an fut dem gud. Kaa di diziiz did a get wos an wosa, mi did afi du muor tingz fi im. Som a di taim, mi did jos fiil taiyad an schres out bout ou tingz did a gwaan, an mi did a wori se mi wudn iebl fi gwaan tek kier a im. Bot yu did av wan yong breda we niem Bobi we wuda kom an go sorvis wid Heinz. Bobi neehn shiem fi go sorvis wid Heinz iivn duo Heinz kudn taak gud, ar waak, ar muuv im an an fut gud niida. Bobi did aalwiez di de fi elp mi, an kaaz a dat, it did tek som a di schres aafa mi. Aalduo mi an Heinz neehn plan fi av no pikni iina dis ya sistim ya, mi did fiil laik Bobi a wi bwai pikni we Jeuova gi wi.​—Maak 10:29, 30.

Heinz did av kyansa tu. Sad fi se, mi ozban we mi did lov so moch ded iina 2015. Mi mis mi ozban uol iip. Im a di wan we wuda aalwiez elp mi fi no wori wori op miself bout tingz. It aad fi nuo se im no de ya wid mi agen. Nof taim mi tingk bout im an so it komiin laik se im stil de ya wid mi. (Luuk 20:38) Nof taim mi memba di nais ting dem we im yuus tu tel mi an di gud sitn dem we im aalwiez tel mi fi du. Mi riili api fi di uol iip a ier we di tuu a wi did get fi sorv Jeuova tugeda.

MI TANGK JEUOVA FI OU IM ELP MI

Jeuova elp mi fi go chuu aal a mi prablem dem. Im elp mi fi bi wan mishineri we lov piipl iivn duo mi did shai bad. (2 Tim. 1:7) An mi tangk Jeuova se mi an mi likl sista a yuuz muos a wi taim fi wok fi im. Rait ya nou, shi an ar ozban de a Yuurop iina di sorkit wok, an dem a go a di difrant difrant kanggrigieshan dem we piipl chat di Sorbiyan langwij. Ye man, Jeuova ansa mi faada prieya dem we im did prie bout mi an mi sista!

Wen mi stodi di Baibl, it mek mi fiil piis iina mi aat an main. An wen tingz get aad fi mi, mi jos “prie aada” jos laik we Jiizas did du. (Luuk 22:44) Wan a di wie dem we Jeuova ansa mi prieya a wen im yuuz di breda an sista dem iina mi kanggrigieshan fi shuo mi se dem lov mi. Dem wuda invait mi fi spen taim wid dem an dem aalwiez tel mi ou dem lov mi, an dat mek mi api bad.

Nof taim mi sidong an tingk bout di taim wen ded piipl a-go kom bak alaiv. Laik mi wuda tingk bout ou mi mada an faada a tan op infronta wi ous, an dem luk yong an nais jos laik wen dem get marid. An mi si mi sista a kuk sopm, an den mi wuda si Heinz a tan op saida im aas. Yu si wen mi tingk buot aal a dis, it mek mi fiil api an it elp mi fi eng aan an go chuu, an mi jos afi tangk Jeuova fi aal a wa im du fi mi.

Wen mi tingk bout aal a di gud sitn dem we Jeuova gi mi iina mi laif, an wen mi tingk bout di gud sitn dem we im stil a gi mi, mi fiil laik Dievid we se: “So langks mi alaiv, mi nuo se mi a-go si ou gud Jeuova bi. A wa wuda apm tu mi ef mi neehn shuor bout dis? Wiet pan Jeuova an shuo se yu chos iina im; briev op yuself an no friedi-friedi. Ye man, wiet pan Jeuova an shuo se yu chos iina im.”​—Saam 27:13, 14.