Kwestiyan We Piipl Aks
A wen di priichin wok we wi a du ya nou a-go don?
Iina Matyu 24:14, Jiizas se: ‘Da gud nyuuz ya bout Gad Kindom afi go priich aal uova di worl. So evribadi wi get di chaans fi ier di chuut. A onggl afta dat, di worl a-go don.’ Iina da vors ya an iina vors 6 tu, di Griik wod we di Baibl yuuz fi “don” a teʹlos. An da wod de a taak bout wen Jeuova yuuz Aamagedan fi don Sietan worl. Da siem Griik wod de yuuz iina vors 13 tu. (Rev. 16:14, 16) So wi naa tap priich til wi go rait dong tu di en a Sietan worl. Dis chienj op ou wi did andastan dis bifuo.
Bifuo nou wi did andastan se wi wuda tap priich di gud nyuuz wen di wos sofarieshan staat an Powaful Babilan get mash dong. (Rev. 17:3, 5, 15, 16) Di Baibl tel wi bout di ‘taim wen Jeuova gi piipl di chaans fi get siev.’ (Aiz. 61:2) Wi did fiil se da taim de wuda don wen Powaful Babilan get mash dong. Wi did a tingk tu se fi sumadi mek it chuu di wos sofarieshan, dem wuda afi staat sorv Jeuova an pruuv dem lov fi im bifuo it staat, kaa wa wi did a du a dat wi did a mach op dem wan ya wid di Juu piipl dem we did mek it chuu di taim wen Jeruusilem did mash dong iina 607 B.C.E. Dem Juu piipl de kuda onggl mek it ef dem did staat sorv Jeuova an du wa im se dem fi du bifuo dem staat mash dong Jeruusilem. (Izii. 5:11; 9:4) Bot wen wi luk pan Matyu 24:14, it mek wi si se wa a-go apm a di en a da worl ya difrant fram wa did gwaan iina Jeruusilem taim, kaa da vors ya mek wi si se iivn jos bifuo Aamagedan staat piipl stil a-go av di chaans fi lisn tu di gud nyuuz an ton tu Gad.
Kaa wi andastan Matyu 24:14 beta nou, dat elp wi fi andastan Revilieshan 16:21 beta tu. Da vors de taak bout som big uol ielstuon we a jrap we wuda kaaz “torbl sofarieshan.” Wen wi tek a gud luk pan it, di tuu skripcha dem riili a taak bout di siem mesij. Wa mek wi se so? It av fi du wid wa piipl du afta dem ier di mesij bout di Kindom. Paal rait se di mesij bout di Kindom a-go ‘sumel gud laik sopm we wuda gi laif’ tu ‘di piipl dem we a get siev.’ Bot fi di wan dem we a fait gens Gad, di gud nyuuz “tingk laik ded sitn.” (2 Kor. 2:15, 16) Dem wan de iet di Kindom mesij laik a duos a paizn. An a laik se di mesij a-go lik dem an shuo dem op fi di wikid sumadi dem we dem bi, an shuo se di worl we dem lov an a eng aan pan a wan wikid worl we Sietan a ruul, an dem an di worl suun don we wid.—Jan 7:7; 1 Jan 2:17; 5:19.
Dis luk laik se wen di wos sofarieshan a gwaan, wi a-go priich di mesij bout Gad Kindom govament an piipl a-go get fi nuo bout Jeuova an im niem muor dan eni ada taim bifuo dat. (Izii. 39:7) Kaaz a dat, di mesij a-go shiek op piipl fi chuu. Dem afi go disaid ef dem a-go sopuot Gad Kindom govament ar dem naa go sopuot it. So dem taim de afta Powaful Babilan mash op, yu tingk se som piipl mait tek aan tu di mesij laik ou dem wuda tek aan tu sitn we sumel swiit? Ye! Dat kyan gwaan. Miebi dem taim de dem get fi lorn ar memba se fi uol iip a ier dem did si di Jeuova Witnis dem a priich bout ou faalz rilijan a-go mash op an nou dem a si it fi demself.
It wuda komiin laik wa did apm iina Iijip iina Muoziz taim afta Jeuova did bring dong di Ten Plieg pan Iijip, kaa wen Jeuova did bring dong jojment pan Iijip gad dem, a uol iip a piipl we a neehn Izrelait did jain op wid di Izrelait dem wen dem a lef Iijip. (Ek. 12:12, 37, 38) Dem piipl ya did staat fi chos iina Jeuova wen dem si se wa Muoziz se wuda apm did apm wen di Ten Plieg dem did gwaan.
Di wan dem we staat chos iina Jeuova afta Powaful Babilan get mash dong a-go get di chaans fi du gud fi Krais breda dem we wuda stil de pan ort. (Mat. 25:34-36, 40) Bot di chaans we dem a-go get fi du sitn gud fi Jiizas joj dem az shiip a-go don likl bifuo Aamagedan staat. Kaa bai di taim Aamagedan fi staat, aal a uu get pik fi go a evn wuda de a evn aredi.
Nou dat wi andastan dis beta, dis mek wi si umoch Jeuova lov piipl an ou gud an kain im bi. Ye man! Im “no waahn fi kil aaf nobadi. Bot wa im riili waahn a fi evribadi ton we fram dem sin an staat du wa rait.”—2 Pii. 3:9.