Yérémia
20 Pasyur anaké Imèr, sing dadi imam lan pengawas utama ing omahé Yéhuwah, krungu Yérémia nyampèkké ramalan kuwi. 2 Terus, Pasyur nggebugi Nabi Yérémia lan masung*+ dhèwèké ing Gerbang Bènyamin Sisih Ndhuwur, sing ana ing cedhak omahé Yéhuwah. 3 Ning sésuké, pas Pasyur mbébaské Yérémia saka pasung, Yérémia kandha marang Pasyur,
”Yéhuwah ora bakal nyebut kowé Pasyur, ning bakal nyebut kowé nganggo jeneng sing artiné ’Rasa Wedi Ana ing Endi-Endi’,+ 4 sebab Yéhuwah kandha, ’Aku bakal nggawé kowé lan kanca-kancamu dadi wedi. Wong-wong kuwi bakal dipatèni mungsuh-mungsuhé nganggo pedhang ing ngarepmu.+ Kabèh wilayah ing Yéhuda bakal Tak wènèhké marang raja Babilon, lan wong-wong kuwi bakal ditawan menyang Babilon, terus dipatèni nganggo pedhang.+ 5 Kabèh kekayaan, kabèh sing diduwèni, kabèh barang berharga saka kutha iki, lan kabèh hartané raja-raja Yéhuda bakal Tak serahké marang mungsuhé wong-wong kuwi.+ Kuwi kabèh bakal dijarah, dirampas, lan digawa menyang Babilon.+ 6 Kowé lan kabèh sing manggon ing omahmu bakal ditawan. Kowé bakal lunga menyang Babilon lan mati ing kana. Kowé bakal dikubur ing kana bareng karo kabèh kancamu, merga kowé wis mènèhi ramalan sing palsu marang wong-wong kuwi.’”+
7 Oh Yéhuwah, Njenengan wis nggawé aku yakin, lan akhiré aku dadi yakin.+
Njenengan mbuktèkké nèk luwih kuwat timbang aku, lan Njenengan menang.
Saben dina aku diguyu.
Kabèh wong ngécé aku.+
8 Saben ngomong, aku kudu mbengok lan ngumumké,
”Kejahatan lan kehancuran.”
Omongané Yéhuwah nggawé aku diécé lan dirèmèhké saben dina.+
9 Mula aku kandha, ”Aku wegah nyebut-nyebut Dhèwèké manèh.
Aku ora bakal nyebut jenengé manèh.”+
Tapi ing njero atiku, omongan-Mu kuwi kaya geni sing murub, sing ana ing njero balung-balungku.
Kuwi ora isa tak tahan, lan aku ora isa meneng waé.+
10 Aku krungu hal-hal jahat sing diomongké wong-wong.
Keadaan ing sekitarku medèni banget.+
Wong-wong padha kandha, ”Ayo nglaporké dhèwèké, ayo dhèwèké dilaporké.”
Kabèh sing éthok-éthok apik karo aku padha péngin aku nindakké sing salah.+
Wong-wong kuwi kandha, ”Muga-muga dhèwèké nggawé kesalahan,
Supaya awaké dhéwé isa ngalahké lan balas dendam marang dhèwèké.”
11 Ning, Yéhuwah ndhukung aku kaya pejuang sing kuwat banget.+
Kuwi sebabé wong-wong sing nganiaya aku bakal kesandhung lan ora bakal menang.+
Wong-wong kuwi bakal isin banget merga ora bakal berhasil.
Wong-wong kuwi bakal kisinan saklawasé, lan kuwi ora bakal dilalèkké.+
12 Ning Yéhuwah pemimpiné pasukan, Njenengan mriksa wong sing bener.
Njenengan ngerti pikiran* lan atiné manungsa.+
Oh Gusti Allah, tulung ijinké aku ndelok Njenengan mbales wong-wong kuwi+
Merga kabèh masalahku wis tak pasrahké Njenengan.+
13 Padha nyanyia kanggo Yéhuwah. Pujinen Yéhuwah.
Dhèwèké wis mbébaské wong mlarat saka wong-wong sing jahat.
14 Bèn waé kena kutuk dina pas aku dilairké.
Bèn waé ora diberkahi dina pas ibuku nglairké aku.+
15 Bèn waé kena kutuk wong sing nggawé bapakku seneng banget
Merga krungu kabar, ”Anakmu wis lair, anakmu lanang”.
16 Bèn waé wong kuwi dadi kaya kutha-kutha sing wis dihancurké Yéhuwah tanpa rasa gela.
Pas ésuk bèn waé dhèwèké krungu swara wong njerit, lan pas awan bèn waé dhèwèké krungu swara sing nduduhké nèk ana perang.
17 Ngapa aku ora dipatèni waé pas isih ing njero weteng,
Bèn wetengé ibuku dadi kuburanku
Lan ibuku ora tau nglairké?+
18 Ngapa aku kudu metu saka weteng?
Apa bèn aku isa ndelok masalah lan rasa sedhih?
Apa bèn aku mati karo kisinan?+