Mazmur
Lagu sing digawé Daud.
144 Muga-muga Yéhuwah, Gunung Watuku,+ dipuji.
Dhèwèké sing ngajari aku perang
Lan ngajari aku nglawan mungsuhku.+
2 Dhèwèké bèntèngku, lan Dhèwèké nresnani* aku.
Dhèwèké kuwi panggonanku berlindung* sing aman lan sing nylametké aku.
Dhèwèké tamèngku lan perlindunganku.+
Dhèwèké nggawé bangsa-bangsa manut karo aku.+
3 Oh Yéhuwah, manungsa kuwi apa kok nganti mbok gatèkké?
Manungsa kuwi apa kok nganti Njenengan perduli karo dhèwèké?+
4 Manungsa kuwi mung kaya napas.+
Uripé kaya bayangan sing suwé-suwé ilang.+
5 Oh Yéhuwah, tulung Njenengan mudhun bèn langité mlengkung.+
Tulung Njenengan ndemèk gunung-gunung bèn metu asapé.+
6 Tulung Njenengan nggawé kilat nyamber-nyamber bèn mungsuhku kocar-kacir.+
Panahen wong-wong kuwi bèn padha bingung.+
7 Tulung Njenengan ngulurké tangan-Mu saka ndhuwur.
Slametna aku saka laut sing ombaké gedhé.
Bébasna lan slametna aku saka wong asing+
8 Sing omongané ngapusi
Lan sing nggawé sumpah* sing ora ditepati.
9 Oh Gusti Allah, aku bakal nyanyi lagu anyar kanggo Njenengan.+
Aku bakal nyanyi lagu pujian* kanggo Njenengan nganggo iringan harpa sing gedhé,
10 Kanggo Gusti Allah sing nggawé raja-raja menang,*+
Sing nylametké Daud abdiné bèn wong-wong ora matèni dhèwèké nganggo pedhang.+
11 Bébasna lan slametna aku saka wong asing
Sing omongané ngapusi
Lan sing nggawé sumpah* sing ora ditepati,
12 Bèn anakku lanang kaya wit sing tambah gedhé
Lan anakku wédok kaya cagak-cagak sing ana ing pojokan istana.
13 Gudhang-gudhangku bakal kebak karo hasil panèn.
Ternak sing ana ing ladhangku bakal dadi akèh banget nganti ora isa diétung.
14 Sapiku sing meteng ora bakal luka lan ora bakal keguguran.
Ora bakal ana wong sing nangis ing lapangan.
15 Wong-wong sing keadaané kaya ngono kuwi bahagia.
Wong-wong sing Gusti Allahé Yéhuwah kuwi bahagia.+