PITAKONAN 10
Piyé Alkitab Isa Mbantu Aku?
KOWÉ KUDU PIYÉ?
Bayangna cerita iki: David lagi nyopir ing dhaérah sing durung tau ditekani. Saka rambu-rambu lalu lintas lan petunjuk arah, kuduné David ora ing kono. David sadhar nèk dhèwèké kesasar. Dhèwèké mesthi salah ménggok pas lagi ing perjalanan kuwi.
Nèk kowé dadi David, kowé kudu piyé?
PIKIREN DHISIK!
Kowé nduwé pilihan:
Takon dalané.
Ndelok péta utawa nggunakké GPS.
Bablas waé, mbokmenawa mengko ketemu dalan sing bener.
Mesthiné, Pilihan C sing paling ora cocog.
Pilihan B luwih ana gunané timbang sing kapisan. Péta utawa GPS biyasané digawa pas lagi perjalanan, kuwi mbantu kowé ngerti dalan sing bener.
Alkitab isa mbantu kowé kaya GPS mau.
Buku sing paling laris iki isa
nuntun kowé pas ngadhépi masalah
mbantu kowé ngerti awakmu dhéwé lan dadi wong sing luwih apik
nduduhké piyé carané éntuk urip sing paling nyenengké
NJAWAB PITAKONAN PENTING BAB URIP
Wiwit isih cilik awaké dhéwé kerep takon.
Kena apa langit warnané biru?
Lintang digawé saka apa?
Terus awaké dhéwé mulai takon bab kedadéan ing donya iki.
Kena apa isa ana kesusahan?
Apa sebabé manungsa mati?
Apa kira-kira jawabané ana ing Alkitab?
Akèh wong ngomong Alkitab kuwi isiné mung dongèng, wis ketinggalan jaman, utawa angèl disinaoni. Sakjané, sing dadi masalah kuwi Alkitab utawa anggepané wong bab Alkitab? Apa wong-wong kuwi éntuk katrangan sing klèru?
Miturut wong-wong, Alkitab mulang nèk Gusti Allah sing nguwasani donya, apa pancèn ngono? Donya iki kisruh, akèh kesusahan lan kasangsaran, penyakit lan pati, wong mlarat lan musibah. Mosok iya, Gusti Allah sing welas asih nyebabké kuwi kabèh?
Apa kowé péngin ngerti jawabané? Wulangané Alkitab bab kuwi isa waé marahi kowé nggumun.
Mbokmenawa kowé ngerti nèk naséhat sing ana ing buku iki saka Alkitab. Seksi-Seksi Yéhuwah yakin nèk Alkitab kuwi sumber tuntunan sing isa dipercaya. Kuwi merga Alkitab ”diwangsitaké déning Gusti Allah . . . migunani kanggo memulang, kanggo melèhaké, kanggo mbangun wewatekan”. (2 Timotéus 3:16, 17) Kowé kudu mriksa dhéwé buku sing kuna ning ora ketinggalan jaman iki.