Surat saka Pengurus Pusat

Kanggo kabèh sing nresnani Yéhuwah lan Alkitab:

Yésus kandha, ”Kowé bakal ngerti apa sing bener, lan apa sing bener kuwi bakal mbébaské kowé.” (Yohanes 8:32) Wektu sepisanan ngerti sing bener saka Alkitab, mesthiné njenengan seneng banget, ta? Njenengan isa ngerti sing bener senajan ana akèh sing ora jujur ing donya iki.​—2 Timotius 3:1.

Yéhuwah péngin awaké dhéwé ngerti sing bener. Lan merga tresna, awaké dhéwé péngin crita soal kuwi karo wong liya. Ning, ora mung kuwi. Awaké dhéwé kudu ngupaya tenan ngetrapké kabèh pathokané Alkitab. Yésus kandha, ”Nèk kowé nindakké préntah-préntahku, kowé bakal tetep dadi wong sing tak tresnani, kaya aku wis nindakké préntah-préntahé Bapak lan tetep dadi wong sing ditresnani Bapak.”​—Yohanes 15:10.

Merga tresna banget karo Yéhuwah, Yésus manut karo kabèh préntahé Yéhuwah. Nèk niru Yésus, awaké dhéwé isa bahagia lan bakal ditresnani Yéhuwah. Yésus kandha, ”Saiki kowé ngerti bab-bab iki, nanging kowé bakal bungah nèk kowé nindakké kuwi.”​—Yohanes 13:17.

Aku lan para sedulur péngin buku iki isa mbantu njenengan ngetrapké Alkitab lan dadi kancané Gusti Allah. Aku lan para sedulur ya ndonga bèn njenengan tetep ”ditresnani Gusti Allah . . . sing bakal ngasilké urip saklawasé”.​—Yudas 21.