Ngupayaa Tenanan Anggoné Mbantu Wong-Wong Dadi Siswané Yésus
1. Apa sing dibutuhké wong-wong bèn isa slamet?
1 Laporan kagiyatan 2014 nduduhké nèk abdiné Yéhuwah padha semangat martakké kabar apik bab Kratoné Gusti Allah. (Mt. 24:14) Akèh selebaran anyar lan undangan dibagèkké kanggo wong-wong ing omah-omah lan ing panggonan umum. Sing gelem nampa kabar apik kuwi dadi tambah akèh. Ning, supaya wong-wong isa slamet, awaké dhéwé kudu mbantu wong-wong kuwi dadi muridé Yésus. Mulané kudu dibantu sinau Alkitab.—1 Tm. 2:4.
2. Awaké dhéwé kudu ngupaya apa waé bèn isa nawakké sinau Alkitab?
2 Ngupayaa Nawakké Sinau Alkitab Pas Ana Kesempatan: Nèk ana sing gelem nampa kabar apik, awaké dhéwé kudu njaluk nomer tilpuné, e-mail, utawa alamaté bèn isa ndang dihubungi lan ditawani sinau Alkitab. Panjenengan isa nawakké carané sinau Alkitab langsung pas pisanan ketemu wong lan karo sing wis ajeg nampa majalah. Awaké dhéwé uga isa nduduhké vidhéo Apa Sebabé Perlu Sinau Alkitab? lan Sinau karo Seksi-Seksi Yéhuwah Kuwi Kaya Apa? marang kluwarga, kanca kerja, kanca sekolah, tangga lan kenalan liyané. Pas majang wacan (gerai), nèk ana sing njupuk wacan sing dinggo sinau Alkitab, awaké dhéwé kudu nduduhké nèk buku kuwi isa dinggo sinau Alkitab lan ora perlu mbayar.
3. Bèn awaké dhéwé isa trampil mulang bab sing bener, apa sing dibutuhké?
3 Bantuan saka Yéhuwah lan Yésus: Pas Yésus ngongkon murid-muridé ndadèkké wong-wong ’siswané’, Yésus ngomong ”lungaa”. Kuwi nduduhké nèk awaké dhéwé kudu ngupaya lan nggunakké saben kesempatan kanggo nawakké sinau Alkitab. Yésus ora mung ngendika, ning uga mbantu awaké dhéwé. (Mt. 28:19, 20) Yéhuwah uga maringi awaké dhéwé roh suci, bahan-bahan kanggo sinau lan nglatih bèn isa luwih trampil mulang kabar apik marang wong-wong. (Za. 4:6; 2 Kr. 4:7) Awaké dhéwé isa donga nyuwun Yéhuwah ”nuwuhaké iya kekarepan, iya penggawé” kanggo nindakké gawéan nginjil.—Fp. 2:13.
4. Apa sebabé awaké dhéwé kudu ngupaya tenanan anggoné mbantu wong-wong dadi siswané Yésus?
4 Martakké kabar apik isa nggawé awaké dhéwé seneng. Nanging, sing luwih nyenengké yaiku awaké dhéwé isa mulang wong-wong bab wulangan sing bener lan mbantu wong-wong kuwi mèlu awaké dhéwé mlaku ing dalan sing ciyut ”kang anjog ing urip”. (Mt. 7:14; 1 Ts. 2:19, 20) Sing luwih penting manèh, nèk awaké dhéwé ngupaya tenanan mbantu wong-wong dadi siswané Yésus, awaké dhéwé nyenengké Yéhuwah sing ngersakké aja nganti ana wong kang mati, ”nanging supaya kabèh wong padha bali sarta mratobat”.—2 Pt. 3:9.