Sakwisé krungu wulangané Yésus, ana sing kandha, ”Dhèwèké mesthi Nabi sing diramalké kuwi”, mungkin merga éling ramalan bab nabi sing ngungkuli Musa. Sing liyané kandha, ”Dhèwèké kuwi Kristus.” Nanging sapérangan wong kandha, ”Kristus kan ora teka saka Galiléa, ta? Kitab Suci waé kandha nèk Kristus kuwi keturunané Daud lan asalé saka Bètléhèm, yaiku désa asalé Daud.”​—Yohanes 7:40-42.

Kitab Suci pancèn ora langsung kandha nèk bakal ana nabi sing asalé saka Galiléa. Nanging, ana ramalan sing kandha nèk cahya sing padhang bakal kétok ing ”Galiléa sing dienggoni bangsa-bangsa liya”. (Yésaya 9:1, 2, BJP; Matius 4:13-17) Apa manèh, kaya sing diramalké, Yésus lair ing Bètléhèm lan dhèwèké kuwi keturunané Daud. Senajan wong Farisi mungkin ngerti bab iki, nanging wong-wong kuwi malah nyebarké pandhangan sing klèru bab Yésus marang akèh wong.