Tambah Trampil Anggoné Nginjil—Mbantu Siswa Bèn Nduwé Kebiasaan Sinau sing Apik

Apa Sebabé Kuwi Penting: Bèn hubungané karo Yéhuwah tambah akrab, siswa Alkitab ora mung ngisi ati lan pikirané nganggo wulangan Alkitab sing gampang-gampang thok. (Ib. 5:12–6:1) Wong sinau kuwi butuh upaya. Kuwi klebu nyambungké apa sing lagi waé disinaoni karo sing wis disinaoni, lan ngerti carané ngetrapké. (WB. 2:1-6) Nèk ana pitakonan sing jawabané ing Alkitab, siswa isa nyoba sinau dhéwé kanggo nggolèk jawabané, nganggo wacan-wacan Alkitab sing ana. Upaya sing tenanan kanggo ngetrapké sing disinaoni bakal mbantu para siswa isa tetep setya, senajan ngadhepi masalah.—Lk. 6:47, 48.

Carané:

Kandhanana siswa nèk ndonga njaluk bantuané Yéhuwah saben arep sinau Alkitab kuwi penting banget.—Yo. 14:26; 1 Kr. 2:10.
Kèt sepisanan sinau Alkitab, kandhanana siswa bèn persiapan ndhisik saben arep sinau Alkitab. Duduhna buku panjenengan, lan ajarana carané nggarisi utawa mènèhi tandha tembung utawa ukara sing penting.
Ajarana siswa njawab pitakonan nganggo tembungé dhéwé. Aja mènèhi pitakonan sing jawabané gampang digolèki ing buku.
Kandhanana siswa kon ngupaya maca Alkitab saben dina. Duduhna jadwal maca Alkitab sing ana ing jw.org, sing ngandhani carané nindakké kuwi. Maca Alkitab saben dina kuwi butuh tekad sing gedhé. Ning, nèk diupayakké mesthi isa kelakon.—Ms. 1:2, 3.
Nèk ana pitakonan-pitakonan sing jawabané ing Alkitab, duduhna siswa carané nemokké jawabané nganggo Watchtower Library utawa PERPUSTAKAAN ONLINE Menara Pengawal. Kandhanana carané nitèni singkatané buku-buku sing dinggo ing jemaat.

Sesasi Iki Cobanen Cara Iki:

Saben rampung ngrembug sak judhul cilik utawa sak bab, siswa dikon crita ringkesané wulangan sing wis disinaoni, ning critané aja dawa-dawa. Nèk ora ana wong sing dibantu sinau Alkitab, panjenengan isa nyoba ngringkes bab sing diwaca ing Alkitab utawa ing Warta Penting, kanggo mbantu panjenengan bèn luwih isa ngerti sing diwaca. Ning, ringkesané ya aja dawa-dawa.