BAB 10
Ibadah Endi sing Ditampa Gusti Allah?
1. Ibadah sing ditampa Gusti Allah apa mung siji?
”Padha sing ngati-ati ana nabi-nabi palsu.”—MATIUS 7:15.
Ibadah, utawa agama, sing diwulangaké Yésus kanggo wong-wong sing nresnani Gusti Allah mung siji. Kuwi diupamakaké kaya dalan sing nuntun ing urip langgeng. Yésus ngendika yèn ”mung sethithik cacahé wong sing milih” dalan kuwi. (Matius 7:14) Ibadah sing ditampa karo Gusti Allah ya mung sing cocog karo Alkitab. Wong-wong sing nindakaké ibadah kuwi manut karo kersané Gusti Allah.—Wacanen Yokanan 4:23, 24; 14:6; Éfesus 4:4, 5.
Deloken vidéo Ibadah Endi sing Ditampa Gusti Allah?
2. Yésus ngendika apa bab wong Kristen palsu?
”Wong-wong kuwi ngakuné precaya karo Gusti Allah, nanging penggawé-penggawéné nelakaké yèn wong-wong mau satemené ora precaya.”—TITUS 1:16.
Yésus ngélingaké yèn bakal ana nabi-nabi palsu sing ngrusak pangajarané. Wong-wong kuwi kétoké padha karo wong sing tenanan manut pangajarané Yésus. Gréja-gréjané ngakuné Kristen. Kepriyé carané awaké dhéwé bisa mbédakaké sing palsu karo sing bener? Wong Kristen sing bener bisa kétok saka tumindak lan sipat-sipaté sing apik.—Wacanen Matius 7:13-23.
3. Apa tandhané wong sing ibadahé bener?
Tandhané ana lima yaiku:
Percaya isiné Alkitab merga Alkitab saka Gusti Allah. Wong sing ibadahé bener manut karo pathokané Alkitab. Béda karo agama-agama liyané, pangajarané agama sing bener ora manut karo pikirané manungsa. (Matius 15:7-9) Wong sing ibadahé bener uripé kudu cocog karo sing disinaoni.—Wacanen Yohanes 17:17; 2 Timotius 3:16, 17.
Ngurmati asmané Gusti Allah, yaiku Yéhuwah. Nabi Musa lan Dawud kenal lan nyebut asmané Gusti Allah. (Pangentasan 3:15; Jabur 8:1) Yésus ngandhani wong-wong asmané Gusti Allah. Yésus uga mbantu wong ngerti bab Gusti Allah lan ngajari ndonga supaya asmané Gusti Allah disucèkaké. Kuwi carané Yésus ngurmati asmané Gusti Allah. (Matius 6:9) Ing panggonan panjenengan, agama endi sing ngandhani wong-wong asmané Gusti Allah?—Wacanen Yohanes 17:26; Rum 10:13, 14.
Ngabaraké bab Kratoné Gusti Allah. Yésus diutus Gusti Allah martakaké kabar apik bab Kratoné Gusti Allah. Pamréntahané Gusti Allah sing diwartakaké kuwi bisa mènèhi pengarep-arep kanggo manungsa. Wektu Yésus ing bumi, dhèwèké terus martakaké kabar apik iku. (Lukas 4:43; 8:1; 23:42, 43) Yésus ngendika yèn murid-muridé uga bakal martakaké bab iku. Yèn ana wong sing teka lan crita karo panjenengan kabar apik bab Kratoné Gusti Allah, wong kuwi agamané apa?—Wacanen Matius 24:14.
Ora mèlu-mèlu urusané pamréntahané manungsa. Murid-muridé Yésus gampang dititèni merga ora mèlu-mèlu urusané pamréntahané manungsa. (Yohanes 17:16; 18:36) Murid-muridé Yésus uga ora tumindak ala kaya umumé wong-wong ing donya iki.—Wacanen Yakobus 4:4.
Padha tresna siji lan sijiné. Alkitab kandha supaya muridé Yésus ngajèni wong sing budayané béda. Wong sing ibadahé palsu biyasané gelem mèlu perang, nanging muridé Yésus ora. (Mikha 4:1-3) Muridé Yésus nggunakaké wektu, tenaga, lan dhuwit kanggo mbantu lan nglipur wong liya.—Wacanen Yohanes 13:34, 35; 1 Yohanes 4:20.
4. Panjenengan apa wis bisa nitèni ibadah sing bener?
Nurut panjenengan, ibadah endi sing cocog karo Alkitab, ngurmati asmané Gusti Allah, lan ngabaraké bab Kratoné Gusti Allah sing mènèhi pengarep-arep kanggo manungsa? Pakumpulan endi sing padha tresna siji lan sijiné lan ora gelem mèlu perang?—Wacanen 1 Yohanes 3:10-12.