Piranti kanggo Nginjil​—Wacan kanggo Nginjil ing Sakdonya

1, 2. (a) Ing abad kapisan, apa sing mbantu kabar apik isa nyebar ing Wilayah Romawi? (b) Apa buktiné Yéhuwah ndhukung umaté saiki? (Deloken uga kothak ”Kabar Apik ing Luwih saka 670 Basa”.)

WONG-WONG sing teka nèng Yérusalèm pas Péntakosta taun 33 M nggumun merga krungu wong Galiléa isa lancar ngomong nganggo basa liya. Kabar sing diwartakké nggawé wong-wong sing teka nèng Yérusalèm padha nggatèkké. Murid-muridé Yésus sing isa omongan nganggo basa liya kuwi bukti nèk Yéhuwah ndhukung umaté. (Wacanen Para Rasul 2:1-8, 12, 15-17.) Dina kuwi, kabar apik wis diwartakké marang akèh wong sing basa lan budayané béda-béda. Kuwi nggawé kabar apik saya nyebar ing Wilayah Romawi.—Kl. 1:23.

² Senajan ora dikèki mukjijat bèn isa ngomong nganggo basa liya, ning umaté Allah saiki wis nggunakké luwih akèh basa ketimbang pas abad kapisan. Saiki, warta bab Kratoné Allah wis diterjemahké ing luwih saka 670 basa. (PR. 2:9-11) Umaté Allah wis ngasilké akèh banget wacan ing akèh basa, dadi warta bab Kratoné Allah wis diwartakké nganti saklumahing bumi.a Iki uga bukti sing cetha nèk Yéhuwah nggunakké Sang Raja Yésus Kristus kanggo ngarahké gawéan nginjil. (Mt. 28:19, 20) Awaké dhéwé bakal ngrembug piranti-piranti sing wis digunakké ing gawéan nginjil saksuwéné 100 taun iki. Gatèkna uga piyé Sang Raja wis nglatih awaké dhéwé sithik mbaka sithik bèn isa mbantu saben wong, lan nyemangati kanggo dadi guru Alkitab.—2 Tm. 2:2.

Sang Raja Nyedhiyakké Piranti kanggo Nginjil

3. Ngapa awaké dhéwé nggunakké piranti sing werna-werna wektu nginjil?

³ Yésus madhakké ”pangandika bab Kratoning Swarga” karo wiji, lan atiné manungsa karo lemah. (Mt. 13:18, 19) Kaya tukang kebon sing nggunakké piranti werna-werna kanggo nggemburké lemah sakdurungé ditanduri winih, umaté Allah uga nggunakké akèh piranti kanggo nyiapké ati jutaan wong bèn isa nampa warta bab Kratoné Allah. Ana piranti sing digunakké mung sedhéla. Ning, piranti kaya buku lan majalah isih terus digunakké nganti saiki. Ing bab sakdurungé, awaké dhéwé wis ngrembug sarana sing digunakké kanggo mbagèkké katrangan marang akèh wong. Saiki, arep dirembug piranti-piranti sing wis mbantu para penginjil wektu ketemu langsung karo wong-wong.—PR. 5:42; 17:2, 3.

4, 5. Piyé rekaman fonograf digunakké, ning apa kekurangané?

⁴ Rekaman ceramah. Saka taun 1930-an nganti 1940-an, para penginjil nyetèlké rekaman ceramah Alkitab nganggo fonograf wektu nginjil. Saben rekaman suwéné ora nganti limang menit. Kadhang judhul ceramahé mung cekak, contoné ”Tritunggal”, ”Api Penyucian”, lan ”Kratoné Allah”. Piyé rekaman-rekaman kuwi digunakké? Sedulur Clayton Woodworth, Jr., sing dibaptis taun 1930 ing Amerika Serikat, kandha, ”Aku nggawa fonograf sing ukurané kaya koper cilik. Nèng njeroné, ana alat kanggo nyetèl rekaman lan jarumé kudu didèlèhké ing piringan hitam bèn metu swarané. Pas ngadeg nèng ngarep omahé wong, koperé tak bukak, nyiapké fonografé, terus ndudul bèl. Wektu sing nduwé omah mbukak lawang, aku langsung ngomong, ’Ana kabar penting kanggo Njenengan.’ Akèh-akèhé wong gelem ngrungokké, ning ana sing langsung nutup lawangé. Malah, ana sing ngira nèk aku lagi dodolan fonograf.”

⁵ Ing taun 1940, luwih saka 90 rekaman ceramah sing béda-béda wis disedhiyakké, lan luwih saka sakyuta rekaman ceramah wis digawé. John E. Barr, sing wektu kuwi merintis ing Inggris lan akiré dadi anggota Pengurus Pusat, kandha, ”Saka taun 1936 nganti 1945, fonograf dadi kanca akrabku. Malah, aku ngrasa ana sing kurang nèk ora nggawa fonograf. Aku uga ngrasa dikuwatké wektu ngrungokké swarané Sedulur Rutherford pas nyetèlké fonograf nèng ngarep lawang. Aku ngrasa kaya-kayané Sedulur Rutherford ana ing kono. Pancèn, nginjil nganggo fonograf isih kurang ampuh kanggo mulang lan ngrogoh atiné wong-wong.”

6, 7. (a) Apa waé paédah lan kekurangané kertu kesaksian? (b) Piyé carané Yéhuwah maringké sabdané sing kudu diomongké?

⁶ Kertu kesaksian. Wiwit taun 1933, para penginjil nggunakké kertu kesaksian wektu nginjil saka omah nèng omah. Kertu kesaksian kuwi ukurané kira-kira 8 sèntimèter ping 13 sèntimèter, lan isiné katrangan cekak bab Alkitab uga katrangan bab wacan Alkitab sing isa diduwèni. Para penginjil mung ngekèkké kertu kuwi lan ngongkon wong kuwi maca. Lilian Kammerud sing akiré dadi utusan injil ing Puerto Riko lan Argentina, kandha, ”Aku seneng banget nggunakké kertu kesaksian merga ora kabèh penginjil pinter ngomong. Dadi, kertu kuwi mbantu aku wektu nginjil bèn luwih gampang ngomong marang wong-wong.”

⁷ Sedulur David Reusch sing dibaptis taun 1918, kandha, ”Kertu kesaksian wis mbantu para sedulur, merga ora kabèh pinter ngomong.” Ning, iki uga ana kekurangané. ”Kadhang, aku ketemu karo wong sing ngira nèk aku lan sedulur liyané bisu. Pancèn, aku lan para sedulur ora pinter ngomong. Ning, Yéhuwah lagi mbantu aku lan para sedulur bèn isa ngomong langsung karo wong-wong. Bar kuwi, Yéhuwah maringké sabdané sing kudu diomongké nganggo cara mulang aku lan para sedulur nggunakké Alkitab wektu nginjil. Kuwi ditindakké liwat Sekolah kanggo Mulang Alkitab, sing diwiwiti taun 1940-an.”—Wacanen Yérémia 1:6-9.

8. Piyé panjenengan mbuktèkké nèk gelem nampa pelatihan saka Yésus?

⁸ Buku. Wiwit taun 1914, umaté Yéhuwah wis nyétak luwih saka 100 buku bab Alkitab sing béda-béda. Ana buku sing dirancang kanggo nglatih para penginjil bèn luwih trampil. Anna Larsen, sing wis dadi penginjil suwéné 70 taun, ing Denmark, kandha, ”Yéhuwah mbantu awaké dhéwé dadi penginjil sing trampil liwat Sekolah kanggo Mulang Alkitab lan buku-buku sing digunakké ing sekolah kuwi. Aku isih éling buku sing sepisanan yaiku Theocratic Aid to Kingdom Publishers, sing metu taun 1945. Bar kuwi, buku Equipped for Every Good Work sing metu taun 1946. Saiki, awaké dhéwé nduwé buku Memperoleh Manfaat dari Pendidikan Sekolah Pelayanan Teokratis, sing metu taun 2001.” Dadi, cetha nèk Yéhuwah wis ’mbisakaké [umaté] padha dadi abdiné’ liwat Sekolah kanggo Mulang Alkitab lan buku-buku sing digunakké ing sekolah kuwi. (2 Kr. 3:5, 6) Saiki, awaké dhéwé nampa pelatihan bèn trampil nginjil saka acara pakumpulan ibadah Urip lan Nginjilé Wong Kristen. Saben sasi awaké dhéwé nampa Jadwal Kagiyatan Urip lan Nginjilé Wong Kristen. Nèk nggunakké tenanan jadwal kagiyatan kuwi, panjenengan mbuktèkké yèn gelem nampa pelatihan saka Yésus bèn dadi guru sing trampil.—2 Kr. 9:6; 2 Tm. 2:15.

9, 10. Piyé buku-buku mbantu awaké dhéwé nandur lan nyiram wiji, yaiku piwulang bab Kratoné Allah?

⁹ Liwat pakumpulané, Yéhuwah uga nyedhiyakké buku-buku sing mbantu para penginjil nerangké wulangan dhasar Alkitab. Buku Kebenaran yang Membimbing kepada Hidup yang Kekal, sing sepisanan dicétak taun 1968, mènèhi hasil sing apik. Pelayanan Kerajaan November 1968 nglaporké, ”Akèh banget wong sing njaluk buku Kebenaran. Merga kuwi, ing sasi September, percétakan Lembaga ing Brooklyn dadi nglembur nganti bengi.” Artikel kuwi uga nerangké, ”Ing sasi Agustus, pesenan buku Kebenaran akèh banget, nganti ngluwihi jumlah buku sing wis ana yaiku siji setengah yuta buku.” Taun 1982, luwih saka 100 yuta buku dicétak ing 116 basa. Saksuwéné 14 taun, yaiku saka taun 1968 nganti 1982, buku Kebenaran wis mbantu luwih saka sakyuta wong dadi penginjil.b

¹⁰ Ing taun 2005, salah siji piranti liyané kanggo sinau Alkitab yaiku buku Apa yang Sebenarnya Alkitab Ajarkan? Buku iki dicétak kira-kira 200 yuta buku ing 256 basa. Apa hasilé? Mung pitung taun waé, yaiku saka taun 2005 nganti 2012, kira-kira 1,2 yuta wong dadi penginjil. Ing wektu sing padha, wong sing sinau Alkitab saya mundhak saka 6 yuta dadi luwih saka 8,7 yuta wong. Kuwi bukti nèk Yéhuwah mberkahi upaya para abdiné kanggo nandur lan nyiram wiji, yaiku piwulang bab Kratoné Allah.—Wacanen 1 Korinta 3:6, 7.

11, 12. Miturut ayat-ayat sing disebutké, saben majalah sing dicétak tujuané kanggo sapa waé?

¹¹ Majalah. Awalé, majalah Warta Penting dicétak utamané kanggo ”pepanthan cilik” utawa wong-wong sing éntuk ”panduman timbalan kaswargan”. (Lk. 12:32; Ib. 3:1) Tanggal 1 Oktober 1919, pakumpulané Yéhuwah ngetokké majalah liya sing tujuané kanggo wong-wong umum. Majalah iki disenengi karo Siswa-Siswa Alkitab lan wong-wong umum, mula nganti pirang-pirang taun majalah iki dicétak luwih akèh ketimbang Warta Penting. Majalah kuwi jenengé The Golden Age. Ing taun 1937 jenengé diganti Consolation. Terus ing taun 1946 diganti manèh dadi Awake! utawa Sadarlah!

¹² Saksuwéné puluhan taun, bentuk lan tampilané majalah Warta Penting lan Sadarlah! gonta-ganti. Ning, tujuané tetep padha, yaiku martakké bab Kratoné Allah lan nguwatké iman marang Alkitab. Saiki, majalah Warta Penting ana rong èdhisi, yaiku èdhisi wulangan lan èdhisi umum. Èdhisi wulangan disedhiyakké kanggo ”abdi-abdi liyané” yaiku ”pepanthan cilik” lan ”wedhus liyané”.c (Mt. 24:45, BJP; Yo. 10:16) Èdhisi umum disedhiyakké kanggo wong-wong sing durung ngerti wulangan sing bener, ning ngajèni Alkitab lan Gusti Allah. (PR. 13:16) Majalah Sadarlah! disedhiyakké kanggo wong-wong sing mung ngerti sithik bab Alkitab lan Gusti Allah sing sejati, yaiku Yéhuwah.—PR. 17:22, 23.

13. Miturut panjenengan, apa sing nggumunké saka majalah-majalahé awaké dhéwé? (Deloken uga kothak ”Wacan sing Paling Akèh Sakdonya”.)

¹³ Ing wiwitan taun 2014, luwih saka 44 yuta majalah Sadarlah! lan kira-kira 46 yuta majalah Warta Penting wis dicétak saben sasi. Majalah Sadarlah! diterjemahké ing kira-kira 100 basa lan Warta Penting diterjemahké ing luwih saka 200 basa. Rong majalah iki dadi majalah sing paling akèh diterjemahké lan dibagèkké sakdonya. Kuwi nggumunké. Ning ora perlu nggumun, merga majalah-majalah iki isiné warta sing Yésus kandhakké bakal diwartakké ing saindenging jagad.—Mt. 24:14.

14. Ngapa jeneng badan hukum sing wis diowahi kuwi cocog banget, lan cocog karo jeneng kuwi umaté Allah semangat kanggo apa?

¹⁴ Alkitab. Ing taun 1896, Sedulur Russell lan kanca-kancané ngganti jeneng badan hukum sing digunakké kanggo nyétak wacan-wacan. Jeneng badan hukum sing anyar kuwi ana tembung Alkitab, jenengé yaiku Lembaga Alkitab dan Risalah Menara Pengawal. Owah-owahan kuwi cocog banget, merga wiwit sepisanan, Alkitab dadi piranti utama kanggo martakké kabar apik bab Kratoné Allah. (Lk. 24:27) Cocog karo jeneng badan hukum kuwi, umaté Allah semangat nyiarké Alkitab lan ngajak wong-wong maca Alkitab. Contoné, taun 1926, awaké dhéwé nggunakké mesin cétak dhéwé kanggo nyétak The Emphatic Diaglott, yaiku Kitab-Kitab Yunani Kristen terjemahané Benjamin Wilson. Wiwit taun 1942, awaké dhéwé wis nyétak lan nyebarké kira-kira 700.000 Alkitab terjemahan King James Version. Rong taun sakwisé kuwi, awaké dhéwé mulai nyétak Alkitab American Standard Version sing nggunakké asmané Yéhuwah ping 6.823. Ing taun 1950, luwih saka 250.000 Alkitab wis disiarké.

15, 16. (a) Apa sing panjenengan senengi saka Terjemahan Dunia Baru? (Deloken uga kothak ”Upaya Nerjemahké Alkitab Bèn Luwih Cepet”.) (b) Apa sing kudu ditindakké bèn pangandikané Yéhuwah ngrogoh atiné panjenengan?

¹⁵ Kitab-Kitab Yunani Kristen Terjemahan Dunia Baru diwetokké taun 1950. Kitab Suci Terjemahan Dunia Baru sing lengkap diwetokké taun 1961. Terjemahan Alkitab kuwi ngluhurké asmané Yéhuwah, merga asmané Yéhuwah ditulis manèh ing panggonan sing sak mesthiné, padha kaya sing ana ing tèks asli basa Ibrani. Asmané Gusti Allah uga disebutké ping 237 ing tulisan utama Kitab-Kitab Yunani Kristen. Bèn luwih cocog karo asliné lan gampang dingertèni, Alkitab Terjemahan Dunia Baru wis didandani ping bola bali. Èdhisi paling anyar diwetokké taun 2013. Nganti taun 2013, luwih saka 201 yuta Alkitab Terjemahan Dunia Baru lengkap utawa sebagéan dicétak ing 121 basa.

¹⁶ Piyé tanggepané wong sing maca Alkitab Terjemahan Dunia Baru ing basané dhéwé? Wong lanang saka Nepal kandha, ”Terjemahan Alkitab basa Nepal sing tak gunakké mbiyèn angèl dingertèni, merga basané kuna. Ning saiki, Alkitab basa Nepal luwih gampang dingertèni merga nggunakké basa sing dinggo saben dina.” Ing Republik Afrika Tengah, ana wong wadon sing nangis wektu maca Alkitab ing basa Sango. Dhèwèké kandha, ”Iki basa sing ngrogoh atiku.” Kaya wong wadon kuwi, nèk maca Alkitab saben dina, Pangandikané Yéhuwah isa ngrogoh atiné awaké dhéwé.—Ms. 1:2; Mt. 22:36, 37.

Ngajèni Piranti lan Pelatihan sing Wis Disedhiyakké

17. Piyé panjenengan nduduhké nèk ngajèni piranti lan pelatihan sing wis disedhiyakké, lan apa paédahé?

¹⁷ Apa panjenengan ngajèni piranti lan pelatihan sing wis disedhiyakké Sang Raja Yésus Kristus? Apa panjenengan nyedhiyakké wektu kanggo maca wacan saka pakumpulané Yéhuwah, lan nggunakké wacan kuwi kanggo mbantu wong liya? Nèk iya, panjenengan setuju karo sedulur wadon sing jenengé Opal Betler, sing dibaptis tanggal 4 Oktober 1914. Opal kandha, ”Wis taunan suwéné, aku lan bojoku [Edward] nggunakké fonograf lan kertu kesaksian. Aku nginjil saka omah ing omah nggunakké buku, brosur, lan majalah. Aku lan liyané mèlu nginjil kusus lan baris mlaku mbagèkké warta sing dicétak. Terus, aku dilatih marani manèh wong sing nduwé minat lan mulang Alkitab ing omahé wong sing gelem sinau. Uripku sibuk banget ning seneng.” Yésus wis janji nèk rakyaté bakal sibuk nyebar winih, sibuk panèn, lan ngrasakké seneng bebarengan. Kaya Sedulur Betler, jutaan wong wis ngrasakké nèk janji kuwi bener.—Wacanen Yokanan 4:35, 36.

18. Pakurmatan gedhé apa sing awaké dhéwé duwèni?

¹⁸ Akèh wong mungkin nganggep umaté Allah ”wong lumrah [utawa, biyasa] lan dudu wong pasinaon”. (PR. 4:13) Ning, Sang Raja wis nggawé rakyaté sing mung wong biyasa kuwi dadi pakumpulan gedhé sing nyétak wacan-wacan. Wacan-wacan kuwi dadi wacan sing paling akèh diterjemahké lan dibagèkké sakdonya. Sing paling penting, Sang Raja wis nglatih lan nyemangati awaké dhéwé bèn nggunakké wacan kuwi kanggo martakké kabar apik marang akèh wong. Iki pakurmatan gedhé merga isa nyambut gawé bareng Kristus kanggo nandur winih, yaiku wulangan sing bener lan manèn murid anyar.