Yésus Marèkké Wong ing Dina Sabat

Wong Farisi sengit karo Yésus lan nggolèk cara kanggo nangkep dhèwèké. Wong-wong kuwi ngomong nèk Yésus ora éntuk marèkké wong lara ing dina Sabat. Nah, pas kuwi dina Sabat. Yésus ndelok ana wong lanang wuta lagi ngemis ing dalan. Yésus ngandhani murid-muridé, ’Deloken piyé kuwasané Gusti Allah mbantu wong iki.’ Yésus nyampur iduné karo tanah, terus ngolèské kuwi ing mripaté wong lanang mau. Yésus ngomong, ’Raupa ing kolam Siloam.’ Wong lanang kuwi raup, lan hasilé dhèwèké dadi isa ndelok kanggo pertama kaliné.

Wong-wong padha kagèt, terus ngomong, ’Wong iki kan sing biasané ngemis kaé, ta? Apa mung mirip thok?’ Wong lanang mau ngomong, ’Iya, aku iki wongé.’ Wong-wong kuwi takon, ’Kok saiki kowé isa ndelok?’ Sakwisé wong lanang mau nyritakké apa sing dialami, wong-wong kuwi nggawa dhèwèké nemoni wong Farisi.

Wong lanang kuwi ngomong karo wong Farisi, ’Yésus nggawé campuran, terus ngolèské kuwi ing mripatku. Bar kuwi, aku dikon raup. Bar raup, aku isa ndelok.’ Wong Farisi ngomong, ’Nèk Yésus marèkké wong lara ing dina Sabat, kuwi berarti kuwasané dudu saka Gusti Allah.’ Tapi, wong liyané ngomong, ’Nèk kuwasané dudu saka Gusti Allah, dhèwèké ora bakal isa marèkké wong.’

Bar kuwi, wong Farisi ngundang wong tuwané wong lanang mau. Wong Farisi takon, ’Anakmu saiki kok isa ndelok? Piyé carané?’ Wong tuwané wong lanang mau wedi merga wong Farisi tau ngomong nèk bakal ngusir wong sing nduwé iman karo Yésus saka sinagogé. Mula, wong tuwané ngomong, ’Aku ora ngerti. Takon waé karo dhèwèké.’ Wong Farisi takon manèh karo wong lanang kuwi. Dhèwèké njawab, ’Aku kan wis ngandhani kowé kabèh. Ngapa kok kowé takon manèh?’ Wong Farisi dadi nesu banget, terus ngusir wong lanang kuwi.

Yésus nemoni wong lanang kuwi, terus takon, ’Apa kowé nduwé iman karo Mésias?’ Wong lanang kuwi ngomong, ’Nèk aku ngerti sapa dhèwèké kuwi, aku bakal nduwé iman karo dhèwèké.’ Yésus ngomong, ’Aku iki Mésias.’ Yésus ora mung marèkké wong lanang kuwi, tapi ya mbantu dhèwèké bèn isa nduwé iman karo Yésus. Yésus kuwi apikan, ta?