Tennee Egendeetta?
Isiraꞌeeloota Kadebaaki Manni Daawitike Sannachchi Giddo Ergatemaammaki Mayeete?
Daawitike sannachchi giddo ergatemaammake Isiraꞌeeloota kadebaake sannachchuwwi giddiiꞌn Amoonaawichchi Tseleqi, Hiitaawichchi Ooryo, Moꞌaabaawichchi Yitimaa hiyyemaaki manni hedhemman. (1 Zeena 11:39, 41, 46) Ittan Daawitike sannachchi giddo “Keretaawooti, Pheletaawootinna Geetawooti hedhemman. (2 Samu. 15:18) Keretaawootinna Pheletaawooti Filsixeemootiki jabaxxa firunte anfeeshsha adatendaan. (Hizi. 25:16) Getawooti keꞌitokeꞌn Filsixeemootiinke Geet hiyyemaammake qachchaꞌn hedhaammake manna kada gopheebaan.—Iya. 13:2, 3; 1 Samu. 6:17, 18.
Daawiti konneꞌe Isiraꞌeelixxe gosa kadebaaka manna isike sannachcha kadaashsha fiꞌleeki mayeete kada dandeetta? Isiꞌaanna addatemeeke mannanna Yihowwanna laꞌo afeeke manna kadeexxa addataammaxxeeten. Fakkeennake, Keretaawootanna Pheletaawoota uuddaaxxa mitte Maxaafi Qullichchiinxe tikaxxi Dikishineere: “Daawitixxe galchaꞌn haꞌuraaki jeeji geyeemmaxxa yanna kunni manni Daawitiꞌa addatemeemmake kadeexxa” haasootteen. Isiꞌaa addatemmeeki hittate? ‘Isiraꞌeelooti duuchchi Daawiti waalat rakko geesisaammaka Saabate hiyyemaammaka manjo hordofeemma’ wodda Keretawootinna Pheletawooti Daawitiꞌa addatemat Saabaxxi jallotixxi huje qabbabaashsha assit Mootichcha Daawiti gargaarreen. (2 Samu. 20:1, 2, 7) Wele wodda kinni, Mootichchi Daawitiki belt Adoniyaasi, Anniniinka zuufana hunnat adhdhatee woꞌlaaneemman. Kaddomaleꞌe, Keretaawootinna Pheletaawooti, Yihowwa melleeki Solomooni, Daawitii tukkeesse mootichcha kadaashsha gargaarat Daawitiꞌa addatemeexxa leellinsheen.—1 Neg. 1:24-27, 38, 39.
Weli kinni Daawitiꞌa addatemeeki Isiraꞌeelixxe gosa kadebaake Geetawootichchi Itaꞌiten. Mootichchi Daawitiki belt Abiseloomi, Daawitiꞌn jallateexxi, Isiraꞌeelootiinxi qalbe isibaa higgaashsha asseemmaxxa yanna Itaꞌinna isinni welt hedhemmaki 600 sannachchi Daawitii kinpheen. Keꞌitokeꞌn Daawit Itaꞌi gadhixxe gosake manjo kadeemmaxxee isoꞌo gargaara hasissabaaxxa haasoꞌeemman. Kaddomaleꞌe Itaꞌi: “Hedho afeeke Yihowwaꞌninna hedho afeeke goottanna mootichcha ankeꞌn kakataannen, hedhoti hedhonnolenna yookiin reyonnolenna anki mootichchi afemaaxxe heene bakka duuchchaꞌn ani ergantichchi atiki okkoon hedhannon!” hiyyeen.—2 Samu. 15:6, 18-21.
Itaꞌi Yihowwa hariireeke mootichcha Daawitiꞌa addatemeeke manjomman
Keretaawooti, Pheletaawooti ittan Geetawooti gadhixxe gosa kandoolenna Yihowwa dhugaatike Mageno kedeexxanna Daawitiinna harireeki isote kadeexxa addantaamman. Daawit addatenshati isoꞌo kiphaaka manna alfa hittatta galateeffataashsha assitaaxxe yaane!
a Zedaagimi 23:3-6 qicoꞌn borreessemeeki Mageniinki seer, Amoonaawootinna Moꞌaabawooti, Isiraꞌeelixxe gubaꞌebaa eꞌyinabaashsha kutaamman. Kaddomaleꞌe, kunni seeri, Deetichcha Isiraꞌeelike ilaalixxe una kada uuddaaxxa ifisoolenna, kunni gadhixxe gosa kadeeki manni, Mageniinke ardinni jaaloommaaxxa yookii welt hedhaaxxa kutaammachcho fakkaattaꞌnebaan. Qullitte Borruwwa Baꞌlise Huba, Kuta 1, qoola. 95 uudi.