Tennee Egendeettaꞌa?

Muuziqi Qarixxe Israꞌeeliꞌaa hittee qico laꞌo affeexxe yaanemmaꞌa?

QARIKE Israꞌeelootixxe aadaꞌa muuziqi hundaayyee yaanemman. Maxaaf Qullichchi heddi muuziqiinke miyuwwinni geenbeekinna hafuuri calliki muuziqi hedhemmaxxa haasoꞌaan. Maxaaf Qullichchi giddo mitte tommeessoxxi anga faaruwwaten, fakkeennakeꞌe baꞌla qicoꞌni egeꞌnemeeke Maxaafi Qullichchi giddiꞌni Faaro, Mehalye Mehalinna Seqoqawwe Erimiyaasiten. Muuziki in Baybilikaali Layfi hiyyemaaki maxaafi, Maxaafi Qullchchi “ardi muuziqiki shiiqqabaaxxa huje hujaamma wodda muuziqa laꞌoonfataammaxxa caꞌa asse kulaaxxa haasoꞌaan.”

Muuziqi barra barratixxe hedhoꞌn. Israꞌeelooti yaada ifika ifisateꞌe muuziqa geebaamman. (Isa. 30:29) Dubbarte mootichcha baalloonsinaaxxa yanna, ayyaaniinxa yannanna sannachchi injifateꞌe aagaaxxa yanna gammashshot faarsitaꞌninnaa sirbitaꞌni dibbe gandaꞌni geebbaamman. (Mesa. 11:34 ; 1 Samu. 18:6, 7; 1 Neg. 1:39, 40) Israꞌeelooti mitti manji reyaaxxa yanna yaaddo ifisaammaki wiꞌlishshatitemman.(2 Zeena 35:25) Miklintokinna Istirongis Sayiklopiidiyi mitte qortumi belo “Ibirawooti muuziqiki egeꞌnemeemmake mannamman” hiyyeen.

Muuziqi mootoleeyyetike mineꞌn. Israꞌeelootiinxi mootoleeyye muuziqa laqa yoꞌoshsha eetaamman. Mootichchi Saꞌooli, Daawiti isiꞌaa muuziqa geebaashsha yeꞌeemman. (1Samu. 16:18, 23) Udumiiꞌn Daawiti mootichcha kadeechchi uduma, Yihowwake mini giddo geenbaaka muuziqiinka miyuwwa giisseemman, gammachchiissaaxxa faaronna qophpheesseemman, ittan muuziqiinka miyanna geebaaka mannanna orgeesseemman. (2 Zeena 7:6; Amo. 6:5) Mootichchi Solomooninna mootummatike mini giddo faarsitaaxxa labbaxxanna meyyaxxa faarsooleeyye afeemman.—Meki. 2:8.

Muuziqi mageneeffachchotee. Duuchchiinxe yaane iimi darre Israꞌeelooti muuziqa laꞌoonfataammaki Yihowwaa mageneeffatateetemman, matanga Iyyerussaalemi hedhemmake mageneeffachchotike mineꞌn, Yihowwaaꞌa faaroti jajaammaki 4,000 manji hedhemman. (1 Zeena 23:5) Insaꞌnenna sinbaale, jimmaatet giissineeka muuziqiinka miya, begenanna malagata geenbaamman. (2 Zeena 5:12) Kaddomaleꞌe, Yihowwaa muuziqiki mageneeffataammaki muuziqiinxa oge afeemmake manna callammabaan. Heddi Israꞌeelooti woggatike ayyaaniꞌaa Iyyerusaalemi meꞌaammaxxa yanna orakeꞌni Iimiꞌaa Fulatixxa faaro hiyyendaaxxa faarsaꞌni meꞌaamman. (Faaro 120-134) Ittan Ayhuudootiinxi borro hitaꞌneeshshate kaddoole, Israꞌeelooti faasikiinke hirbaatixxa yanna Haleel hiyyendaaxxa faaroa faarsaamman.

Muuziqi taꞌi qicoꞌni Mageniinke ardiꞌaa haranga hasissaaxxe yaanen. (Yaꞌiqo. 5:13) Faaro mageneeffachchotixxe kutan. (Effe. 5:19) Faaro kirsitaanummatixxa mittunte jabeessitaan. (Qola. 3:16) Ittan rakko noꞌoꞌni geltaa wodda jajjabeessitaan. (Huje 16:25) Faaro Yihowwaꞌn anfeennexxa addennaa isiꞌaa anfeennexxa jaalala leellinshannoke eloke oran.