Yihowwaxxi Anga Harumaaxxebaan

1. Muuse Israꞌeeloota Gibisteeꞌni akeekaꞌni fulcheexxa yanna Yihowwaꞌni addataꞌneexxa leellisheeki hittate?

IBRAYISIXETIKE Maxaafaꞌni addeti fakkeenna kadeeke manni giddiiꞌni Muuse jabaxxa adde afeeke manjomman. (Ibr. 3:2-5; 11:23-25) Isinna Israꞌeeloota Gibisteeꞌni akeekaꞌni fulcheexxa yanna adde afeexxa leellisheemman. Etenne yanna Feriꞌoninna sannachcha isika sodaate alayyiki culphisebaan. Muuse Yihowwaꞌni addateexxi arda Diimooxxe Abbayya giddiiꞌni akeeke fulcheechchi uduma, gammoojje qiilliinbaanna akeekeen. (Ibr. 11:27-29) Baci Israꞌeelooti Yihowwa insaꞌnee karkarsatixxa dandeette afeexxa mama safeemman. Kadoolenna Muuse Mageno isikeꞌni addata ittin sufeemman. Ardi gammoojje qiillakeꞌni hedhemma wodda Mageni masoti sagalenna wodeꞌe qophpheessat arda gargaareemmaxxeꞌe Muusexxi adde toliinxemmabaan.a—Zts. 15:22-25; Far. 78:23-25.

2. Mageni Muuseꞌe “Yihowwaxxi anga harumaaxxe?” hiyye qoreeki mayeete? (Zehulquꞌu 11:21-23)

² Muuse jabaxxa adde afeemmake manjo kadoolenna, Israꞌeelooti Gibisteeꞌni fuleexxe mitte wogga uduma kinni, Yihowwa arda isikee maala uwwatixxa dandeette afeexxa mameemman. Gammoojje qiillakeꞌni mittichchi hedhebaaxxe bakkaꞌni bukki hiyyeeke heddo miiloonen lakkoꞌemaake ardiꞌaa geyaaka maala Yihowwa hitta qophpheessaaxxa Muuse hedeemmabaan. Tenneꞌaa Yihowwanna Muuseꞌe, “Yihowwaxxi anga harumaaxxe?” hiyye qoreen. (Zehulquꞌu 11:21-23 yaansis.) Tenne bakkaꞌni ‘Yihowwaxxa anga’ hiyyaꞌneeki yaadi, Mageniinka Qullichcha manfasa yookiin hujeteꞌni hexxeexxa hunna isixxa ifisaaken. Wele orinni, Yihowwa Muuseꞌe; ‘Dhugaandinni hiyyennexxa yaane assa dandeꞌabeꞌnochcho ateꞌni fakkaattaꞌne?’ hiyye qoreeshshatemman.

3. Muusekanna wele Israꞌeelotika fakkeenna qoꞌnisa hasisseeki mayeete?

³ Yihowwa atiꞌanna mini hado atike hedhotee hasissaaxxa yaane wonshaaxxa mande egendete? Mandootolenna mandenna egeꞌna gophphottole, Yihowwa insaꞌnaa hasissaaxxa yaane wonshatixxa dandeete afeexxa mameemmake mannika, Muusekanna Israꞌeelootiinka fakkeenna uundo. Tenne xiqseke hundaayyetike seeraꞌni, Yihowwaxxi anga harumaaxxe kaddeebaaxxa anfeennexxi adde jabaattaashsha gargaaraaki gorsi hedheen.

MUUSENAAꞌNINNA ISRAꞌEELOOTAKENAAꞌNI BARATTE

4. Heddi manni Yihowwa insaꞌnaa hasissaaxxa yaane wonshatixxa dandeette afeexxa mamaashsha assiteexxi yaane maachcho kada dandeetta?

⁴ Qarqarakeꞌni hedheeka yaada baꞌlinse uundo. Israꞌeexxi gosa Gibisteeꞌni Kakotike Bogibaa, gammoojje qiilli giddiiꞌni meetaammaxxa yanna insaꞌnenni welti Israꞌeelota kadebaaki “baci makemeeki ardi” hedhemman. (Zts. 12:38; Zed. 8:15) Menna ita jibbisseemmaki makemeemmaki ardinna heddi Israꞌeelooti Muuseꞌni gungumeen. (Zeh. 11:4-6) Ardikinna Gibiste hedhemma wodda itaammaxxa sagale yora safeen. Ardiinxe gungunsonaaꞌni kexxeexxa Muuse ardakee hasissaaxxa yaane qophpheesaa hasissaaki isote kadeeshsha asse hedeechcho fakkaattaꞌneen.—Zeh. 11:13, 14.

5-6. Israꞌeelotiki makemeemmaki ardi heddo Israꞌeelotaꞌni geesiseexxe yaanenaaꞌni maa barantanno?

⁵ Israꞌeelootiki makemeemmaki ardi Yihowwa insaꞌnaa assaꞌneexxa yaane saadaammabaan. Tennenaaꞌni kexxeexxa, heddi Israꞌeelootinna insaꞌneshshanni heda safeen. Noꞌonna insaꞌneshshanni weliinke galateefata gophatike manfasinni daafemmannoxxinna Yihowwa noꞌaa assaꞌneexxe yaaneꞌni gammandabeꞌnoke manna kandannoxxi hexxaan. Edo anfeennaxxa yaane udumiꞌa hinge yorraannole yookiin weli manji afeexxa yaane gaabbinaannole iitta hexxeexxi yaane noꞌoꞌninna geya dandeettaan. Kaddomeleꞌe, anfeennexxe yaaneꞌni itite hedhatika adaba anfaannole, gammandaanneke kandannon

⁶ Israꞌeelooti orakeꞌni hedhemmaxxa yanna, Kakotike bogiba gennoole Mageni insaꞌnaa hasissaaxxa yaane wonshaate kako aageexxa qalliyya hasissamman. Mageni hiyyeexxa yaane muuxaꞌneeki orakeꞌni heꞌneeꞌnaate kaddebaangi, Kakotike Bogaꞌni gennooletemman. Weli fakkaattaanxa, noꞌonna tenne buttaxxe fuggoxxe aadaꞌni alfinannoxxe yaaneꞌni miꞌlachcho assati irra, haarooxxe buttaꞌni Yihowwa noꞌaa uwwatee kako aageexxa yaanuwwa heda eloxxen. Ittan Yihowwaꞌni anfeennexxi adde jabaattaashsha gargaartaaxxe xiqsuwwaꞌni alalchino.

7. Yihowwaxxi anga harumaaxxe kaddeebaaxxa addantaanneki mayeete?

⁷ Mageni Muuseꞌe: “Yihowwaxxi anga harumaaxxee?” hiyye qoreeki mayeete kaddeexxa heddattoxxi hexxaan. Yihowwa Muuse anga isixxi lumoxxa hunna affeexxe kaddeexxa qalli hiyyaashsha calla kaddebaangi, anga isixxi gargaarsakeenna qeerraaxxe kaddeexxa qalliyyaashsha gargaaroꞌaate kada gophpheebaan. Israꞌeelooti mittichchi hedhebaaxxe bakkaꞌni gammoojje qiillakeꞌni, hedhoolenna Mageni insaꞌnaa geyaaka maala qophpheessa dandeꞌaan. “Jabaxxe anga isixxenninnna diriirteexxe hirrenni” Mageni hunna isixxa leellishsheen. (Far. 136:11, 12) Tenneꞌaa noꞌonna jabaxxe rakko giddo heꞌnanno wodda, Yihowwaxxi gargaarsiinxi anga noꞌaa geltaaxxa ijjenda mama hasissabaan.—Far. 138:6, 7.

8. Gammoojje qiillakeꞌni hedhemmaki Israꞌeelooti hujemmakika dedha hunjabeꞌnoshsha ifi heqqedha dandeennannoki hittate? (Fakketanna uudi.)

⁸ Yihowwa hirbangeꞌni maala insaꞌnaa qophpheesseen, ardi maala ite goddaashsha dirciite hinaaxxa ciꞌa uwween. Israꞌeelooti Mageni insaꞌnaa asseexxe yaaneꞌaa galateeffataammabaan. Tenne irra heddi manni ifiꞌaa calla bukki assedhatee haafemaamman. Hashshannna barra qonceexxi heddo dirciite bukki asseꞌneemman. Yihowwa ‘haafemaammake mannaꞌni’ yoꞌoshsha aareemmaxxeꞌe okkone manna balleesseen. (Zeh. 11:31-34) Konne fakkeennanaaꞌni noꞌonna barachcho alfa dandeennannon. Duuchchinii wodda hansaannexxe yaaneꞌaa calla, haafantaanneke manna kandabeꞌnoshsha xexxeꞌata hasissaan. Hiyyeessa yookiin dureessa kandonnolenna Yihowwanni welti anfeennexxa jaalunte jabeessedhati, “iimateꞌni ifiꞌaa karra [tuuꞌlatixxe]” hujeꞌa lumoxxa bakka uwwa hasissaan. (Mat. 6:19, 20; Luq. 16:9) Iitta assinanno wodda Yihowwa noꞌaa hasissaaxxa yaane wonshaaxxa addantaannexxa leellinshannon.

9. Mageni noꞌoo gargaaraaxxa addantaanneki mayeete?

⁹ Yihowwa arda isika gargaarateꞌe techchixxe yannaꞌninna anga isixxa qeerrisaan. Iitta hiyyo kinni rakko noꞌoꞌni geltabaan, yookiin ijjenda soloꞌwinabeꞌnon hiyyotebaan.b Kaddoolenna Yihowwa noꞌoo ijjenda hune waalabaan. Abari yookiin rakko noꞌoꞌni geltaa wodda isi noꞌoo gargaaraan. Yihowwa hasissaaxxa yaane noꞌaa wonshatee gargaarsiinxa anga isixxa noꞌaa qeerrisaaxxa addantaannexxa leellisha dandeennannoka lame oruwwa uundo: (1) maallaqa gonphe rakkantanno wodda (2) ediꞌaa hedho noꞌoxxe hasissaaxxa yaanuwwa caꞌminanno wodda.

MAALLAQA GONPHE RAKKANTANNO WODDA

10. Maallaqiinxi rakko noꞌoꞌni geltaashsha assitaaxxi yaanuwwa heente kada dandeetta?

¹⁰ Tenne buttaki muuxami shiqaꞌni dagaashshanni galdumakee hasissaaxxa yaanuwwa alfa haꞌurtaꞌni metaaxxa egenneennen. Polotikiinki nageꞌi gophemaa wodda, bagedi keꞌaa woddanna dadumiinxi bala geltaa wodda yookiin haarooki daafaaki dhukkubi keꞌaaxxa yanna, hidhdhinannoxxi yaanuwwa fiixxaaxxi, huje, anfeennexxa yaane ittan mine noꞌoka gonphannoxxi hexxaan. Taꞌa heꞌnaannexxe bakkaꞌni wele haarooxxa huje halsa hasissaaxxi, yookiini noꞌoke mini hadiꞌa hasissaaxxa yaane wonshate insaꞌnenni welti wele bakkabaanna meꞌatee hendannoxxi hexxaan. Yihowwaxxe gargaarsiinxe angaꞌni addantaannexxa leellishshaaxxa murte murteesseꞌnannoshsha noꞌoo gargaartaaxxi yaane maachcho?

11. Maallaqiinxi rakko ateꞌni geltaa wodda atee gargaartaaxxi yaane maachcho? (Luqqaasi 12:29-31)

¹¹ Taakkaxxinna haranga laꞌo affeexxi mitte yaane atee yaadissaꞌneexxa yaane kadhati Yihowwaꞌni kuꞌlaten. (Fak. 16:3) Eloxxa murte murteessexxinaashshanna haꞌnooꞌni gelteexxa yaane ‘miketi iimi darre heddinabaashsha ittan yaadinabaashsha’ qalbe haꞌnooxxi raankitabaashsha gargaaroꞌaa isoꞌni kuꞌle. (Luqqaasi 12:29-31 yaansis.) Hedhotee hasissaaxxe hundaayye kaddeexxe yaanuwwaꞌni itittine hexxinaashsha gargaaroꞌaa duuchchinii wodda kadhatte. (1 Xi. 6:7, 8) Maallaqiinxi rakko geltaa wodda dandeenne heꞌnaa qico egeꞌnatee borreessiluwwa noꞌoxxa qoꞌnisse. Heddi galdumakee hasissaaxxe yaanuwwaxxi rakko gelteeki manni jw.org teꞌni hedheeke yaaduwwanaaꞌni laꞌo alfeen.

12. Mitti Kirsitaani maate isixxee laꞌo affeexxa murte murteessedhaashsha gargaaraaki qortumuwwi hoonte?

¹² Mitti mitti manni maate ifixxenaaꞌni bayyate hedhaashsha assitaaxxa huje huja safeechchi uduma, murte itti beekkumi beloxxe kaddeexxa hubateen. Mitte haarooxxa huje safati edi darre, huje tenaaꞌni alfitattoke maallaqa calla kadebaangi tinni huje manfasiinxa hedho atixxa miitaaki hittate kaddeexxanna hedi. (Luq. 14:28) Ifi iitta hite qori: ‘Hujetee hiyye maate anxenaaꞌni bayyate hedhaannole tinni yaane bulii anxa miitaaki hittate? Hujete hiyye bayyate meꞌaannole tinni yaane Kirstaana kadeeke jaaluwwa ankeꞌninna ergateshshateꞌni idaggaaxxa rakko maachcho?’ Oose affeetteke manjo kaddoottole kinni, konne haranga hasisaaka qortuma ifi qora hasissaan:’ Oose anxinni welti hedha gophaannole Yihowwake xixichchinninna gorsinni insaꞌne nossannoki hittate?’ hite ifi qori. (Eff. 6:4) Maxaafi Qullichchiinke hundaayyetike seeruwwiꞌaa ulfinna afebaake jaaluwwixxenna mini hadixxe hedinonni akeekemati irra Yihowwaxxe hedinonni akeekendaatteke kadi.c Dhidhimike Eezhiyaꞌni hedhaꞌneeki Tooni wele gadhike bogaꞌni heddo huje alfatixxa futtii afeemman. Yaane tenne uuddaaxxa Yihowwabaa kadhate miniinxe amanni mariꞌateechchi uduma, huje ettene safa gophateenna mini giddo fulaꞌneeka maallaqa heenoonsatee murteessedheen. Udumiiꞌni Tooni iitta hiyyeen: “Tenne murte murteessedhennexxeꞌe heddi manji Yihowwaa egeꞌnaashshanna oose noꞌoxxinna dhugaatee jaalala affaashsha gargaaratixxa bado alfeennen. Matwoosi 6:33 keꞌni hexxeexxe qaalexxe hundaayyeshsha heꞌnaannole Yihowwa noꞌoo karkarsaaxxa maate noꞌoxxi egendeꞌeen.”

EDIꞌAA HEDHO NOꞌOXXEE HASISSAAXXA YAANE QOPHPHEEFFANTANNO WODDA

13. Cimmanno wodda hedho noꞌoxxee hasissaaxxe yaanuwwaaꞌa taꞌanni mitte mitte assa dandeennannoxxi yaanuwwa maachcho?

¹³ Cimmanno woddaaꞌa kaddaaxxa yaane qophpheeffantanno wodda Yihowwaꞌni addantaannexxa leellisha dandeennannon. Maxaafi Qullichchi ediꞌaa hedho noꞌoxxe hasissaaxxe yaanuwwaaꞌa taꞌanni jabaante hunjannoshsha jajjabeessaan. (Fak. 6:6-11) Dandeessissaꞌnoole soodiꞌaa kaddaaxxa yaane massedha eloxxen. Mitte mitte orinni maallaqi foggoxxe yaanenaaꞌninna gargaaraan. (Mek. 7:12) Kaddomaleꞌe, maallaqa calla gussinabeꞌnoshshanna xexxeꞌata hasissaan.

14. Ediꞌaa hedho noꞌoxxee hasissaaxxa yaanuwwa qophpheeffantanno wodda Ibraawiyaane 13:5 keꞌni hedheeka yaada qalliyya hasisseeki mayeete?

¹⁴ Yesuusi “Mageni edo dureessa” kandebaangi maallaqa tuuꞌla gowwuntete kaddeexxa fakkeenniki haasoꞌeen. (Luq. 12:16-21) Soodo kaddaaxxa yaane ayyinna egeꞌneengi hedhebaan. (Fak. 23:4, 5; Yaq. 4:13-15) Yesuusixxe hordofooleeyye kandennaxxeꞌe gargarti hexxeexxi rakko noꞌoꞌni geya dandeettaan. Yesuusi hordofoole isixxe kandonnaa hanssaannole anfennexxa yaane duuchcha “waalate” qophpheeffanteenneke kada hasissaaxxa kuleꞌeen. (Luq. 14:33, lqj.) Keꞌitiinke dhibbeesso baroꞌni Yihuuda hedhemmaki Kirsitaan shorrichchiinxe buutonaaꞌni kexxeexxa afeexxa yaane gophoolenne tenne yaane gammashshoti adhdheemman. (Ibr. 10:34) Techchixxe yannaꞌni heddi dayyuwwi polotikakeꞌni eꞌya gibeexxeeꞌe afeexxa karranna huje gopheꞌeen. (Lel. 13:16, 17) Adde wonxabaashsha insaꞌnee gargaarteexxi yaane maachcho? Insaꞌnenna Yihowwa “ani atee haanonna waalabeꞌnon, ijjenda hunabeꞌnon” hiyyeexxe kakoꞌni woꞌma adde anfeemman. (Ibraawiyaane 13:5 yaansis.) Ediꞌaa hedho noꞌoxxee hasissaaxxe yaanuwwa qophpheeffatate dandeennennexxa duuchcha assa eloxxen. Keekkantebeꞌnoxxi yaane futti hitoole Yihowwa gargaaraaxxa addantannon.

15. Kirsitaana kadeeki hadi oose ifixxee heene miketixxa uushsho afa hasissa? (Fakketanna uudi.)

¹⁵ Mitte mitte aadaꞌni miniinki anninna miniinxi ama oose illaꞌneeki insaꞌne cimmaa wodda oose insaꞌnexxi maallaqiki insaꞌnee kophphoꞌaaten. Wele darrinni kunni hadi oose ifixxa uudaꞌneeki “xuratiinke maallaqishshaten” hiyyoten. Maxaafi Qullichchi hadi oose ifixxa hasissaaxxe yaane duuchchinni karkarsa hasissaaxxa haasoꞌaan. (2 Qo. 12:14) Dhugaaten hadi cimaa wodda mitte mitte gargaarsa oose ifixxenaaꞌni hasaaxxi hexxaan, ittan heddo oosenna hado ifika karkarsitaꞌneeki gammashshotitenn. (1 Xi. 5:4) Kirsitaana kadeeki hadi lumoxxa gammashsho alfaaki, oosetenaaꞌni maallaqiinka gargaarsa alfaaxxa hedaꞌni nossatite kaddebaangi, oose insaꞌnexxi Yihowwaa ergatendaaxxe kaddaashsha gargaaratenaaꞌnite kaddeexxa egeꞌneꞌeen.—3 Yo. 4.

16. Hadi oose insaꞌnexxi ediꞌaa hasissaaxxe yaanenni ifi dandeettaashsha asse nossaaki hittate? (Effesooni 4:28)

¹⁶ Oose haꞌnooxxi ifi dandeettaaxxe kaddaashsha qophpheessitinaa wodda fakkeenna kadati Yihowwaꞌni addattaashsha barsiisse. Oose gikki hitaꞌni metaashshanni jabaate huja maa laꞌo affeexxa egendaashsha asse. (Fak. 29:21; Effesooni 4:28 yaansis.) Nophphite barrachcho saffaa wodda jabaatte barattaashsha gargaarre. Kirsitaana kadeeki hadi oose insaꞌnexxi barachchotike mininaaꞌni alfiteexxa egeꞌna seeriki laꞌoonfattaashsha qoꞌne assanna hundaayyetika seeruwwa hujeteꞌni hosissati gargaara eloxxen. Tinninna oose insaꞌnexxi hasissaaxxe yaanenni ifi dandeettaashshanna Yihowwaa woꞌma kadeeke garinni ergatendaashsha assitaan.

17. Woꞌma qalbenni heene yaane addata dandeennanno?

¹⁷ Addatendeexxi Yihowwaxxi ergantooleeyye Yihowwaxxe hunnaꞌninna insaꞌnaa hasissaaxxa yaane wonshatee afeexxe halchaꞌni adddata dandeettaan. Tenne buttake muuxamibaa shinqaꞌni menennexxe qixxeꞌni Yihowwaꞌni anfeennexxi adde hega uudema dandeettaaxxa egenneennen. Fedheexxi yaanenna kaddo, Yihowwa noꞌoo gargaaraate hunna isixxa laꞌoonfataaxxa addanto. Hunna jabaxxa affeexxi anga isixxinna diriirteexxi hirre isixxi noꞌoo gargaarate harumaaxxe kaddeebaaxxa woꞌma qalbenni addata dandeennannon.