Dayyuwwikinna Dayyuwwati Shiqa Noꞌaa Eloxxen!

1-2. Yihowwa lummise uudaꞌneexxi mitte yaane maachcho?

YIHOWWA lummise uudaꞌneexxe yaane giddiiꞌni mitte, wele manjo abindaanne garan. Yesuusi ifi eenaanneshshanni jaaluwwa noꞌokanna eeyya hasissaaxxa barsiiseen. (Mat. 22:37-39) Tinni isi barsiiseexxi barachcho addeti noꞌonni shiqabaake maniꞌaanna jaalala leellisha hasissaaxxa ifissaaxxen. Jaalala leellinshanno wodda ‘fuggichchakeenna eloke manniꞌaa arrishsho isixxa fulchaꞌneeka, qulliyyeteenna kadi qulliyye kadebaake manniꞌa xeena gansisaꞌneeka’ Mageno Yihowwaa fakkaantannon.—Mat. 5:45.

² Yihowwa duuchchiinga manjo eeyyaan. Kaddomaleꞌe, qalbe giddixxen eeyyaaki kinni eloxxa yaane assaake manjon. (Yoh. 14:21) Isi isoo fakkaantonnaa hasaꞌneen. Isi dayyuwwateenna dayyuwwakee “giddixxa jaalala” anfannoshshanna “qalbe mitten” eenannoshsha kuleen. (1 Ph. 4:8; Rom. 12:10) Iitta hexxeexxi jaalala, hado noꞌoke kadeeke qalbe mitten eenaanneke manjiꞌaa yookiin mitte shinqaanneke jaaliꞌaa leellinshannoxxe jaalalanni mitteten.

3. Jaalala uuddaaxxa qalli hiyya hasissaaxxi yaane maachcho?

³ Jaalala nophphaashsha karkarsa hasissaake mitte hiddichchishshaten. Hawaarya Phawuloosi Kirsitaana “weliꞌaan weli dayyuwwiinsha eeyya ittin suffe” hiyye gorseen. (Ibr. 13:1) Yihowwa, weliꞌaan weli anfeennexxa jaalala jabeesseꞌnonnaa hasaꞌneen. Tenne qoꞌneꞌni addetike jaaluwwi noꞌokinni, shiqa hasisseeki mayeete kaddeexxanna duuchchinii wodda iitta assa ittin ediꞌa sufa dandeennannoki hittate kaddeexxa uundannon.

WELIꞌAAN WELI SHIQA HASISSEEKI MAYEETE?

4. Faaro 133:1 keꞌni kulendeeshsha, butta duuchchaꞌni hedheeke dayyuwwixxe oddoꞌni hexxeexxe mittunteꞌaa anfeennexxa saadino jabeessedha dandeennannoki hittate? (Fakketanna uudi.)

⁴ Faaro 133:1 yaansis. Noꞌonna faarsanji Yihowwaa eeyyaake manjinni dhugaati jaalooma “eloxxe” nna “gammachchiissaaxxe” hiyye borreesseeka yaada addantaannen. Welebaaꞌni dageeki manni saadaaka haqichcho, techcho soodo uudaaki mitti manji lummise uuda gophammashsha, manbeꞌa assitaaxxa oddo noꞌoxxeꞌni hexxeexxa mittunte tuffantannoxxi hexxaan. Dayyuwwa noꞌoxxenni torba mitte giddo heddole afemmonnaa dandeennannon. Insaꞌnaa anfeennexxa saadino jabeessedhdha dandeennannokita hittate? Mitti mittin manji gubaꞌeteenna noꞌaa hitteexxa laꞌo afeexxa yanna uune hendaaꞌnexxe kaddoole, dayyuwwa noꞌoxxee anfeennexxi jaalala lebbaꞌni meꞌitaan.

5. Weli manni dayyuwwa noꞌoxxen weliꞌaan weli anfeennexxa jaalala uuddaaxxa maachcho hubata dandeꞌa?

⁵ Taakka bukki noꞌoxxeꞌni dagaaki mitti mitti manni, oddo noꞌoxxeꞌni hexxeexxa jaalala uuda wodda manbeꞌa hiyyaan. Tenne yaanenaaꞌni kexxeexxa dhugaa alfineexxa addantaaxxi hexxaan. Yesuusi: “Weliꞌaan weli jaalala affinoole, manni duuchchi hordofooleeyye anxe kaddinneexxa tennen egeꞌnaan” hiyyeen. (Yoh. 13:35) Fakkeennakeꞌe, Yihowwaxxe Naqaashenni Maxaafa Qullichcha barattaammaxxa, Yunversetixxe barattoxxa Cheetiraxxa hedhotixxa baranno uundo. Iseꞌaa killiletixxe bukkiika yeꞌinjiinka woraqata uuneemman. Ise mitte barra tenne bukkiiꞌni afendeechchi uduma, isee Maxaafa Qullichcha barsiissaammaxxe dayyoꞌni: “Hadi anki anee ijjenda hanqalfedhe egeꞌnebaan. Kaddomaleꞌe, haꞌnooxxe bukkiiꞌni barra mitteꞌninni calla 52 manji hiribbi hiyyeꞌe anee nageꞌa aadheen! Yihowwa tenne manfasiinxe maate darreeꞌni, anee eeyyaꞌneexxa leellishaꞌneechcho fakkaatteen. Aninna tenne maatexxe una kadonnaa hasaannen” hiteen. Cheetira manfasiinxe hedhonni nophphiteexxi 2024 woggaꞌni cuuphendeen. Dhugaaten, haarooki manni noꞌoxxa eloxxa hujenna weliꞌaan weli anfeennexxa jaalala uudaa wodda Yihowwaa ergatema safaan.—Mat. 5:16.

6. Dayyuwwa noꞌoxxibaa shiqa noꞌoo fuggoxxe yaanenaaꞌni heqqitaaki hittate?

⁶ Dayyuwwa noꞌoxxibaa shiqa noꞌoo fuggoxxe yaanenaaꞌni heqqitaan. Phawuloosi Kirsitaana: “Haꞌnoo giddiiꞌni mitti manjinna cubbo affeexxe dedhisatixxe hunnanni dilloꞌabaashsha, techcho hine yeꞌnaaxxi yanna hexxee qicoꞌni barra barrandeꞌni weliꞌaan weli jajjabeesse” hiyye gorseen. (Ibr. 3:13) Dhugaatike oranaaꞌni lekka noꞌoxxi dokonkoratenaaꞌni kexxeexxa adde wonxoonnole, Yihowwa mitti addetiki jaali noꞌoki heꞌnenneka jeeja hubateexxi hasisaa garinni noꞌoo gargaaraashsha dammassaaxxi hexxaan. (Far. 73:2, 17, 23) Iitta hedheeki jajjabeenni noꞌaa yoꞌoshsha eloken.

7. Jaalalanna mittunte weli afensiissaaxxi yaane maachcho? (Qolaasiysi 3:13, 14)

⁷ Noꞌo heꞌnaanneki weliꞌaan weli jaalala leellishatee jabaxxa woꞌlaancho assaꞌneeke ardixxe gamo giddon. Tenneꞌaa heddo eebba alfa dandeennannon. (1 Yo. 4:11) Fakkeennakeꞌe, jaalala “weliꞌaan weli dandeenne heꞌnannoshshanna,” oddo noꞌoxxeꞌni hexxeexxi mittunte jabaattaashsha assitaan. (Qolaasiysi 3:13, 14 yaansis; Eff. 4:2-6) Buttateꞌni habanna afemabaaki gammachchiissaaki jeeji oddo noꞌoxxeꞌni hedha dandeꞌeeki tenneꞌaaten.

WELIꞌAAN WELI ULFEESSE

8. Yihowwa dayyuwwikinna dayyuwwati mittummati heꞌnannoshsha gargaaraꞌneeki hittate?

⁸ Butta duuchchaꞌni hexxeexxe dayyuwwa noꞌoxxixxe oddoꞌni hexxeexxi mittunte manbeꞌa assitaaxxen. Noꞌo qulliyyetenna kada gonphonnole, iitta hexxeexxi mittunte oddo noꞌoxxeꞌni hexxaashsha Yihowwa gargaaraꞌneen. (1 Qo. 12:25) Maxaafi Qullichchi “weliꞌaan weli eeyya Magenokenaaꞌni [baranteennexxa]” haasoꞌaan. (1 Te. 4:9) Wele hiyyanni, weliꞌaan weli shiqatee maa assa hasissaaxxa Yihowwa Maxaafi Qullichchi darreeꞌni barsiisaꞌneen hiyyoten. Tenneꞌaa isi barsiisaꞌneexxa yaane xexxeꞌachchoti qoꞌnisatinna hujeteꞌni hosisati, Magenokenaaꞌni baranteenneke kada dandeennannon. (Ibr. 4:12; Yaq. 1:25) Yihowwaxxi Naqaashenna tennee yaane hujeteꞌni hosisatee jabaxxa woꞌlaancho assitaꞌneen.

9. Weliꞌaan weli ulfeessatee Roome 12:9-13 qicoꞌni hedheeke yaadanaaꞌni maa barantanno?

⁹ Weliꞌaan weli shinqannoshsha Mageniinxi Qaale noꞌoo barsiissaꞌneeki hittate? Phawuloosi Roome 12:9-13 qicoꞌni maa hiyyeexxa uundo. (Xiqse yaansis.) Giddiiꞌninni qalli hiyya hasissaaxxi mitte hiyya “weliꞌaan weli ulfeessatee edissineeke kadde” hiyyeexxen. Iitta hiyyo maa hiyyote? Weli hettinsebeꞌnongi welekee gattowwaali hiyyati, keesumma adhdhati, ittan wele yaaneninna arjunte leellishati “qalbetixxa jaalala” leellishatee edinsaanneke kada hasissaan. (Eff. 4:32) Dayyuwwinna dayyuwwa noꞌobaa shiqqaa qicoꞌni heqqa hasissabaan. Noꞌonni “edinse” shiqa hasissaan. Yesuusinna: “Adhdhati irra uwwa caaldeexxa gammashsho affeen” hiyyeen.—Huj. 20:35.

10. Weliꞌaan weli ulfeessatee “bebbeda [kada]” dandeennannoki hittate? (Fakketanna uudi.)

¹⁰ Manbeꞌa assitaaxxa, Phawuloosi weliꞌaan weli ulfeessatee edissineeke kadde hiyyeechchi uduma, hirbangeꞌni “bebbeda kadde malee, boosoommatinoqqe” hiyye gorseen. Bebbedake hinaaki manji shenichchakenna jabaate hujaaken. Ittan mitte huje isiꞌaa uwwendaa wodda huje ettene jabaate hujaan. Fakkeenna 3:27, 28 keꞌni: “Manjo gargaaratee dandeessissaaxxa hunna affoottole, gargaarsi hasisaake manjiꞌa eloxxa yaane assatenaaꞌni udumiꞌa higgoxxe” hiyyaan. Tenneꞌaa mitte gargaarsi hasisaaka manjo uundonnole, isoo gargaaratee dandeennennexxa yaane duuchcha assinannon. Isoo gargaaratee techcho soodo hittoxxe; ‘weli isoo gargaaraaki manji hedhaan’ hite heddoxxe.—1 Yo. 3:17, 18.

11. Weliꞌaan weli shinqannoshsha noꞌoo gargaartaaxxi yaane maachcho?

¹¹ Mitte manjo ulfeesinaannexxa leellinshannoki weli ori, noꞌoo mufachchiinseexxe yaaneꞌa ranke gattowwaali hiyyatiten. Effesooni 4:26 keꞌni: “Mufattineeshsha hexxineeꞌnaa arishsho aaggoqqe” hiyyaan. Mayee? Laakkoossi 27 iitta assinaannexxe kaddoole, “Dabiloosi ora alfammaxxeeten” hiyyaan. Yihowwa Qaale isixxeꞌni higge higgeen weliꞌaan weli gattowwaali hinannoshsha gorseen. Qolaasiysi 3:13 “weliꞌaan weli. . .tolanga gattowwaali hiyya ittin [sunfannoshsha]” jajjabeesseen. Weliinxa balleessa gattowwaali hiyya weliꞌaan weli shinqannoshsha assaake haranga eloke oran. Iitta assinaannexxe kaddoole, “mitteba usuraꞌneeke nageꞌiinke usurinni manfasiinxa mittunte [heqqa]” dandeennannon. (Eff. 4:3) Harumaake haasoꞌinni, gattowwaali toggichcha kadeeke orinni oddo noꞌoxxeꞌni mittuntenna nageꞌi hedhaashsha assitaan.

12. Gattowwaali hinannoke manna kandannoshsha Yihowwa noꞌoo gargaaraaki hittete?

¹² Noꞌoo jaba qicinni miidheeke manjꞌaa gattowwaali hiyya, haꞌurtaaxxi egeꞌnendeexxen. Kaddomaleꞌe, Mageniinke manfasike gargaarsinni gattowwaali hiyya dandeennannon. Maxaafi Qullichchi: “Weliꞌaan weli qalbe giddixxen eenannoshsha” nna “bebbeda kandannoshsha” gorseechchi uduma “manfasiki gubattinaaꞌneeke kadde” hiyyeen. Mitti manfasi qullichchiki ‘gubataaki’ manji manfasakenaaꞌni kexxeexxa jabaxxa yortenna halcha afaan. Tenneꞌaa Mageniinki manfasi, qalbe giddixxa jaalala leellinshannoshshanna weliꞌaan weli tolanga gattowwaali hinannoshsha gargaara dandeꞌaan. Kaddomaleꞌe, Yihowwa gargaarashsha qalbe giddixxen kadhata hasissaan.—Luq. 11:13.

“ODDO HAꞌNOXXEꞌNI QOQQOODENSHA HEXXOQQE”

13. Oddo noꞌoxxeꞌni qoqqoodensha hexxaashsha assitaaxxi yaane maachcho kada dandeetta?

¹³ Gubaꞌe gargariti hexxeexxa aada afeeki “gargariti hedheeki manni” bukki hiyyaꞌneexxe bakkan. (1 Xi. 2:3, 4) Xexxeꞌata gonphonnole, tinni gargarunte ifiꞌaa fiꞌlinaannexxe yaanuwwanni tinninna; oddoono, seefachcho, fayyunte ifixxe assinaannexxi yookiin dayyeeffantaannexxi yaanuwwa oddo noꞌoxxeꞌni qoqqoodensha hexxaashsha assa dandeettaan. (Rom. 14:4; 1 Qo. 1:10) “Weliꞌaan weli eenannoshsha Mageni [barsiiseemmaxxeꞌe]” ifiꞌaa fiꞌlinaannexxi yaane weliinxenaaꞌni caaldeexxishsha assine keꞌne leellinshabeꞌnoshsha xexxeꞌata hasissaan.—Flp. 2:3.

14. Duuchchinii wodda maa assatee woꞌlaana hasissa? Mayee?

¹⁴ Duuchchinii wodda weliꞌaan weli dayyeessateenna jajjabeessatee woꞌlaancho assati, gubaꞌe giddo qoqqoodensha hexxabaashsha assa dandeennannon. (1 Te. 5:11) Shqixxe yannani kayyiꞌaa, qiide tureemmaki yookiin gubaꞌetenaaꞌni fuleemmaki heddi manni higateꞌni hedheen. Konnee manna anga banne gammashshoti adhdhinannon! (2 Qo. 2:8) Tomme wogguwwaa qiidde turteexxi mitte dayyo, Bukkitike Galmibaa daggeexxa yanna iseꞌni futti hiteexxa yaane uundo. Iitta hiteen, “Duuchchiniingi manji anee nageꞌa aadheeki gammashshotinna ashshamma hiyyaꞌneeten.” (Huj. 3:19) Tinni heenooxxi yaane isee tuqqeeki hittate? Isenna, “Yihowwaxxi anga anee gammashshotibaa hiissitee akeekateꞌni hexxeeshsha asse hedannoshsha assiteen.” Duuchchiinga jajjabeessati, Kirsitoosi ‘gopheekanna baꞌo haꞌurteeka’ dayyeessatee laꞌoonfataꞌneeke manna kada dandeennannon.—Mat. 11:28, 29.

15. Mittunte noꞌoxxa jabeessedha dandeennannoki weli ori hoonte? (Fakketanna uudi.)

¹⁵ Mittunte noꞌoxxa jabeessedha dandeennannoki weli ori haasoonnannexxe yaanenniten. Iyyoob 12:11: “Arrabi sagaletixxa aya gargar foye egeꞌnammashsha manshata hiyyuwwa kiildabaa?” hiyyaan. Mitti sagale raꞌissaaki manji, manjokee sagale shiqisebaa edi darre xeꞌmiteexxa muxe uudammashsha, noꞌonna mitte yaane manji edo haasoꞌati edi darre ettene yaane adda xexxeꞌachchoti heda eloxxen. (Far. 141:3) Duuchchinii wodda haasoonnaannexxi yaane jajjabeessitaaxxe, dayyeessitaaxxenna laqaakee laꞌo affeexxe kaddaashsha hansaannen.—Eff. 4:29.

16. Haasoonnaꞌneexxi yaane jajjabeessitaaxxe kaddaashsha, giddiiꞌninnni woꞌlaancho assa hasissaaki ayyeera?

¹⁶ Giddiiꞌninni miniinki annuwwinna oosetiki hadi haasoonnaꞌneexxi yaane wele jajjabeessitaaxxe kaddaashsha xexxeꞌata hasissaan. (Qol. 3:19, 21; Tit. 2:4) Geedhenna Yihowwake gedhebixxe allalsano kaddemmaxxeꞌe, haasoottaꞌneexxe yaanenni wele dayyeessanna jajjabeessa hasissaan. (Isa. 32:1, 2; Gel. 6:1) Maxaafi Qullichchi: “hasissaaxxe yannaꞌni haasoꞌeendexxi hiyya hittatta eloxxe!” hiyyaan.—Fak. 15:23.

JAALALA “HUJETINNA DHUGAATI LEELLISHA”

17. Dayyuwwa noꞌoxxee anfeennexxi jaalala dhugaatixxe kaddeexxa leellishsha dandeennannoki hittate?

¹⁷ Hawaarya Yohaannisi, “hujetinna dhugaati maleꞌe, hiyyatinna afoꞌi callin” weli eenabeꞌnoshsha jajjabeesseen. (1 Yo. 3:18) Dayyuwwa noꞌoxxee anfeennexxi jaalala qalbe giddixxe kaddoꞌaa hansaannen. Iitta hexxeexxa jaalala anfeennexxa leellisha dandeennannoki hittate? Dayyuwwa noꞌoxxenni qeerraaxxa yanna saꞌisinnaꞌni menennexxe qixxeꞌni insaꞌnenni shinqaꞌni meꞌinannon. Ittan weliꞌaan weli anfeennexxi jaalalanna jabaattaꞌni meꞌitaan. Tenneꞌa gubaꞌeteꞌninna ergatenshateꞌni weliki saꞌisitinaaxxa yanna halse. Weliꞌaan weli mine martinaꞌni geebbinaaxxa yanna foꞌe. Iitta assinaannexxe kaddoole, ‘weliꞌaan weli eeyyatee Magenokenaaꞌni baranteenneke’ kandannon. (1 Te. 4:9) Ittan dayyuwwiki welti hedha “hittatta eloxxe! Hittatta gammachchiissaaxxe!” kaddeexxa ille noꞌoxxinninni uuda ittin ediꞌa sunfannon!—Far. 133:1.