Dargagge Kaddineeki Dayyuwwi—Marqoosiinna Ximootwosii Fakkaatte

1-2. Marqoosinna Ximootwosi welekee woꞌma kadeeke garinni ergatemmabaashsha gufo kada dandeettaammaxxi yaane maachcho?

DARGAGGE dayyuwwi Yihowwaa ergatematee caaldeexxa yaane assateenna gubaꞌe giddo hexxeexxa dayyuwwa edi irran caala gargaartinaake manjo kada hassinaꞌnee? Hassinaaxxi egeꞌnendeexxen. Heddo dargagge, welekee ergatemmaaꞌnaa uuda hitta-hitta gammachchiissaaxxe yaane! (Far. 110:3) Kaddomaleꞌe, haꞌurtaaxxi yaanenna hedha dandeettaan. Mitte mitte egendebexxoxxe yaanexxe sodaꞌanaaꞌni kexxeexxa ergatensha atixxa baꞌlisatee hooddaatte? Mitte huje uwwendaa wodda ‘huje tennee hujannoxxa dandeette afebeꞌnon’ hite gibbee egendete? Iittate kaddoole tinni yaane laqendaꞌneeki ateꞌni callabaan.

² Marqoosiꞌninna Ximootwosiꞌni tennenni weli fakkaattaaxxi yaanuwwa futti hiteemman. Kaddomaleꞌe, egennebaaxxe yaanexxi sodaꞌa yookiin hedho insaꞌnexxixxe barachchoxxi heenoꞌma welekee ergatemmabaashsha assitoꞌaa waallemmabaan. Marqoosi taakkake misoonootiinke mari wodda Phawuloosininna Bernabaasinni meꞌaa yeꞌemeexxa yanna eloke mineꞌni ama isixxenni welti hedhaammachcho fakkaattaꞌneen. (Huj. 12:12, 13, 25) Marqoosi Yihowwaa adda ergatematee hiyyeexxi iitta hedheeka mine waale fuleen. Taakkaꞌa Antsokiyaa meꞌeen. Okkoꞌni Phawuloosininna Bernabaasini welt wele bayyatte hexxeexxe bakkabaa meꞌeen. (Huj. 13:1-5) Weli fakkaattaanxa, Ximootwosinna lassatixxa huje Phawuloosini welti hujoꞌaa yeꞌemeexxa yanna hadi isikinni welti hedhaammachcho fakkaattaꞌneen. Ximootwosi oosichcha belto kademmaxxeꞌe ‘Phawuloosini meꞌe tennee huje hujatixxa dandeette afebeꞌnon’ hiyye heda dandeꞌamman. (1 Qorontoosi 16:10, 11 nna 1 Ximootwosi 4:12 welti hokkokisiisi.) Kaddomaleꞌe, Ximootwosi Phawuloosika yeꞌinjo ishshi hiyye adhdheemmaxxeꞌe heddo eebba alfeen.—Huj. 16:3-5.

3. (a) Phawuloosi, Marqoosiinna Ximootwosiꞌaa lumoxxa bakka uwwaammaxxa hitta egennanno? (2 Ximootwosi 4:6, 9, 11) (Fakketanna uudi.) (b) Tenne qoꞌneꞌni mariꞌantaanneki qortumuwwi hoonte?

³ Marqoosinna Ximootwosi hedho insaꞌnexxeꞌni eloxxa barachcho alfineen, ittan oosummani heꞌne jabaxxa magannuwwanna baꞌedha badhanteen. Phawuloosi tennee dargaggeeyye yoꞌoshsha saadaamman, ittan udumiiꞌni shiqixxe yannaꞌni reyaꞌneexxa hubateexxa yanna insaꞌne isinni welti heꞌnaashsha haseemman. (2 Ximootwosi 4:6, 9, 11 yaansis.) Phawuloosi, Marqoosiinna Ximootwosi eeyyaashsha asseeki adabuwwi hoonte? Dargaggeeyye kadeeki dayyuwwi adabiki insaꞌnee fakkaata dandeꞌaaki hittate? Ittan labbaxxi dargaggeeyye Phawuloosike anniinkike gorsaꞌnaaꞌni laꞌo alfa dandettaaki hittate?

MARQOOSII FAKKAATTE—ERGATEMATEE FEDHIITIKE KADATI

4-5. Marqoosi welekee ergaatematee fedhiitike kadeexxa leellisheeki hittate?

⁴ Mitte kokeessatixxe borroshsha, ergatema hitaaxxi hiyya “jabeennikinna ossunteti” wele manjo gargaara hitaaxxa tika affeen. Konne darrenni Marqoosi dargaggeeyyetee eloke fakkeenna leellisheen. Langake miisoonetike mari wodda Phawuloosi isoo adhdhe meꞌa gibeemmaxxa yanna, Marqoosi yaade adde woxa gopheemmabaan. (Huj. 15:37, 38) Kaddomaleꞌe, tinni yaane Marqoosi dayyuwwatee ergatemabaashsha udumiꞌaa hiissiteemmabaan.

⁵ Marqoosi fira isike kadeeke Bernabaasini welebaa ergatematee meꞌeen. Phawuloosi 11 wogga uduma taakkaa Roome usuremeemmaxxa yanna, isoo gargaaraammake manni giddo Marqoosinna hedhemman. (Film. 23, 24) Matanga Phawuloosi, Marqoosika gargaarsa yoꞌoshsha jajaammaxxeꞌe, isoo “jajjabeeniinxe muumme” hiyyeen.—Qol. 4:10, 11.

6. Marqoosi galfateeke Kirsitaaninni jaaloomati laꞌo alfeeki hittate? (Lekkatibaꞌika qallassanjo uudi.)

⁶ Marqoosi galfateeke Kirsitaaninni jaaloomati eloxxa laꞌo alfeen. Marqoosi, Phawuloosinni heenoxxa yanna Roome tureechchi uduma, hawaarya Pheexiroosinni welti hujatee Baabilooniꞌaa meꞌeen. Oddo insaꞌnexxeꞌni hexxeexxi jaalunte jabaxxe kadatenaaꞌni kexxeexxa Pheexiroosi, Marqoosii “belto anke” hiyyeen. (1 Ph. 5:13) Insaꞌne welti hunjaammaxxeꞌe, Yesuusixxa hedhonna ergatensha uuddaaxxa Marqoosi udumiiꞌni Wengeele isixxeꞌni borreesseeka raaga, Pheexiroosi dargaggeessa kadeeke jaalo isikee heddo yaane diideesse kula gopheebaan.a

7. Mitti Singihu hiyyemaꞌneeki dargaggeessi dayyi Marqoosika fakkeenna hordofeeki hittate? (Fakketanna uudi.)

⁷ Marqoosi ergatenshatixxe hujeꞌni bebbedakenna galfateeke dayyuwwinni yoꞌoshsha shiqaammake manjomman. Marqoosii fakkaattattoki hittate? Mitte hassaattexxa ergatenshatixxa mabite alfa gophphottole ossaameessa kadi, ittan Yihowwaanna gubaꞌetee ergatendattoka wele tooruwwa hasa ittin sufi. Taꞌa geercho kade ergatemaꞌneeka Singihu hiyyemaꞌneeke dayyika fakkeenna uundo. Kunni dayyi dargaggumma hedhemma wodda ifi gubaꞌe giddo hexxeexxe wele dargaggeeyyenni hokkokisiisaamman. Tenne dargaggeeyyenaaꞌni mitte mitte isiꞌaa edisse ergatenshatixxa mabite alfiteemman. Singihu tenne yaaneꞌni yoꞌoshsha yaadeemman, udumiiꞌni kinni galfatteexxe dayyuwwaꞌni tenne yaane haasoꞌeen. Mitti geerchi mitte mitte yanna isi assaꞌneexxa eloxxa yaane weli hubatanna gophoole, welekee ergatematee dandeꞌeexxa yaane duuchcha assaashsha gorseen. Kunni gorsi Singihu woggati lummexxeexxa dayyuwwanna gubaꞌe dagatee rakkattaꞌneexxa dayyuwwa gargaaratee ifi shiqisaashsha tirtirseen. Singihu qalli hiyyeexxi: “Dayyuwwatee woꞌma kadeeke garinni ergatemate hiyyo maa hiyyote kaddeexxa egeꞌnennen. Assinannoxxe yaanenni wele gargaaratenaaꞌni daggaaxxa gammashsho uudeennen” hiyyeen.

XIMOOTWOSII FAKKAATTE—WELEKEE HEDDINAꞌNEEXXA JAALALATI LEELLISHATI

8. Phawuloosi, Ximootwosii isinni welti meꞌoꞌaa melledheeki mayeete? (Filphisiyuusi 2:19-22)

⁸ Phawuloosi moronsha isoꞌni geltemmake qachchibaa higaa wodda isinni welti hedhe isoo jajjabeessaaki jaali hasisseemman. Ediseexxi Silaasi hedhotixxa baranno afeeke manjo kademmaxxeꞌe isinni meꞌaashsha melleen. (Huj. 15:22, 40) Udumiiꞌni kinni Ximootwosinna insaꞌnenni welti meꞌaashsha melleen. Phawuloosi, Ximootwosii melleeki mayeete? Isi eloka summa afeeke dargaggeessa kaddemmaxxeeten. (Huj. 16:1, 2) Ittan welekee qalbe giddixxinni hedaammake manjomman.—Filphisiyuusi 2:19-22 yaansis.

9. Ximootwosi dayyuwwakeenna dayyuwwatee qalbe giddixxinni hedaꞌneexxa leellisheeki hittate?

⁹ Ximootwosi, Phawuloosinni ergatensha safeeshshanni, ifiꞌaa irra welekee hedaꞌneexxa leellisheemman. Tennenaaꞌni kexxeexxa, Phawuloosi Beeriya hexxemmaxxa haarooxxa hordofooleeyye Ximootwosi jajjabeessaashsha addate isoꞌni waale meꞌeen. (Huj. 17:13, 14) Eettene yannaꞌni Beeriya gateemmake Silaasike fakkeennanaaꞌni Ximootwosi laꞌo alfeexxi mansiissaaxxe yaanebaan. Udumiiꞌni kinni, Phawuloosi Teselonqeke qachchaꞌni hedheeka Kirsitaana jajjabeessaashsha Ximootwosii calla ergeemman. (1 Te. 3:2, lqj.) Itti aandaaxxe 15 wogga caaldaaxxe yannaaꞌa, rakko gelteeke duuchchiꞌa mararte afeexxa leellishati Ximootwosi “oodhaaken welti oodha” barateꞌeen. (Rom. 12:15; 2 Xi. 1:4) Labbaxxi dargaggeeyye Ximootwosi fakkaata dandeettaaki hittate?

10. Hujayi hiyyemaꞌneeki dayyi welekee hedaꞌneexxa leellishaa qico barateeki hittate?

¹⁰ Mitti Hujayi hiyyemaꞌneeki dayyi, welekee adda hedaꞌneexxa leellishaa qico barateen. Hujayi oosumma hedhemma wodda lumolla dayyuwwanni geeba isoꞌni yoꞌoshsha haꞌurtaamman. Tenneꞌaa bukkiitiba insaꞌnee nageꞌa calla aadhaꞌnee saꞌaamman. Mitti geerchi Hujayi dayyuwwa assitaꞌneexxa saadaꞌneexxa yaane haasoꞌati insaꞌnenni geebo safaashsha gorseen. Kunni geerchi Hujayi wele manjo yaadissaꞌneexxi yaane maachchoke hiyye hedaashshanna jajjabeesseen. Isinna geerchi konneka gorsa hujeteꞌni hosiseen. Hujayi taꞌa geercho kade iitta hiyyeen: “Taꞌa shiixxo lumongenninni laꞌo affeexxa geebo geeba shollaxxe kaddeexxa barateennen. Wele yaadissaꞌneexxa yaane elo qicinni egeꞌna qalbe gammachchiissaaxxe yaane kaddeexxa egeꞌneennen. Tinninna dayyuwwakeenna dayyuwwatee hasissaaxxi yaane maachcho kaddeexxa egeꞌnannoshshanna gargaaratee dandeꞌennexa yaane duuchcha assannoshsha anee gargaarteen.”

11. Dargaggeeyye kadeeki dayyuwwi, gubaꞌe giddo hexxeexxa dayyuwwa gargaaratixxa halcha ifixxa nossedha dandeꞌaaki hittate? (Fakketanna uudi.)

¹¹ Haꞌno dargagge kaddineeki dayyuwwi wele gargaaratee affineexxa halcha leellisha dandeettinaan. Bukkiitixxa yanna gubaꞌe giddo hedheeke shiixxo lumongee ittan duuchchiinge manjiꞌaa miꞌlachcho uwwe. Heꞌnaꞌnee qico qorre, okkoꞌni insaꞌne haasoonnaa wodda caqasse. Iitta hedheeki qortumi insaꞌnee gargaartinaaki hittate kaddeexxa hubattinaashsha assaan. Dedha woggati lummexxeexxe dayyuwwaa JW Laybireeretixxa appilikeeshiine laꞌoonfatatee gargaarsi hasissaaxxa hubattinaaxxi hexxaan. Yookiin mitti manjininna ergatensha fulatee barra abixxineebaaxxa hubattinaaxxi hexxaan. Elekitiroonetika miya laꞌoonfantaa qico leellisha yookiin insaꞌnenni ergatensha fula dandeettinaa? Dayyuwwa gargaaratee edissineeke kadati duuchchiniingee eloke fakkeenna kada dandeettinaan.

PHAWULOOSIKE ANNIINKIKE GORSANAAꞌNI LAꞌO ALFE

12. Phawuloosi, Ximootwosii gorseeke gorsanaaꞌni labbaxxi dargaggeeyye kaddeexxi dayyuwwa laꞌo alfa dandeettaki hittate?

¹² Phawuloosi, Ximootwosii gammashshoti hedhaashshanna Magenokee woꞌma kadeeke garinni ergatemaashsha gargaaraaka eloka gorsa uwween. (1 Xi. 1:18; 2 Xi. 4:5) Haꞌno dargagge kaddineeki dayyuwwi Phawuloosike anniinkike gorsinaaꞌni laꞌo alfa dandeettinaan. Hitta? Phawuloosi, Ximootwosiꞌaa borreesseexxa lamiinxa daddaabbe, aniꞌaa borreessendeexxen hitinaꞌni yaansisse. Okkoꞌni hedho haꞌnooxxeꞌni hujeteꞌni hosissinaaxxa yaanuwwa halse. Heenoka fakkeennuwwa uundo.

13. Yihowwanni welti affeettexxa firunte jabeessexxattoshsha gargaartaaxxi yaane maachcho?

¹³ “Magenokee hedha herrega atike assexxe ifi leenjisi.” (1 Xi. 4:7b) Magenokee hedhate hiyyo maa hiyyote? Isinni welti shiqike jaalo kadanna isoo gammachchiissaaxxa yaane assatixxe halchan. Konne adabinni welti ilema gonpheennaxxeꞌe isoo nossedha hasissaan. Hitta? “Ifi leenjisa” hiyyende tikendeexxi Giriketixxi hiyya atileettooti hokkokketee qophpheeffatatee assaaxxa jabaxxa leenjo ifisatee laꞌoteꞌni hossaaxxe hiyyan. Atileettootakenaaꞌni ifi hira heqqendaan. Noꞌonna iittan duuchchinii wodda Yihowwabaa shinqannoshsha gargaartaaxxa yaanuwwa assatee ifi hira hasissaan.

14. Maxaafa Qullichcha yaansinsanno wodda herregi noꞌoki maachcho kada hasissa? Fakkeenniki kuli.

¹⁴ Maxaafa Qullichcha yaansisa aada ifixxe assexxe duuchchinii wodda yaansissatto wodda herregi atiki Yihowwabaa shiqate kaddeexxa qalliyyi. Fakkeennakeꞌe Yesuusi dureessanna sooreessa kadeemmake dargaggeessinni haasoꞌeeke yaadanaaꞌni maa barattatto? (Mar. 10:17-22) Dargaggeessi kunni Yesuusi Mesihcho kadeexxa addatoolenna isoo hordofatee afeemmaxxi adde xeꞌyatemman. Kaddoolenna Yesuusi kinni “isoo eeyyeemman.” Yesuusi konnee dargaggeessa haasoossee gari qalbe atixxa tuqeebaa? Yesuusi kunni dargaggeessi eloxxa murte murteessedhaashsha haseemmaxxi egeꞌnendeexxen. Ittan konne dargaggeessiꞌaa Yihowwaxxixxa jaalala leellisheꞌeen. (Yoh. 14:9) Konnee raaganna hexxetteka jeeja heddatto wodda, ‘Yihowwabaa shiqateenna welekee woꞌma kadeeke garinni ergatematee maa assa hasissa?’ hite ifi qori.

15. Mitti dargaggeessi eloke fakkeenna kadatee lumoxxa bakka uwwa hasisseeki mayeete? Fakkeenniki kuli. (1 Ximootwosi 4:12, 13)

¹⁵ “Addatemeeke manniꞌaa fekkeenna kadi.” (1 Ximootwosi 4:12, 13 yaansis.) Phawuloosi, Ximootwosii gorseeki yaansisanna barsiisa fakkaattaaxxa dandeettuwwa nossedhaashsha calla kaddebaangi, jaalala, addenna caꞌunte fakkaataaka adabuwwa nossedhaashshaten. Mayee? Buutotinna mitti manji assaaxxi yaane haasoꞌaaxxi iimi darre hunna affeen. Fakkennakeꞌe, ergatenshatixxe hujeꞌaa anfeennexxa hinaaffe nosseꞌnannoki hittate kaddeexxa kulaaka haasoꞌaa atee shiqisi hineen hino. Ati ergatenshatixxe hujeꞌni dandeettaattexxa yaane duuchcha assitaatttole, konnee haasoꞌa woꞌma qalbenni shiqisa dandeettatton. Ati, eloke fakkeenna keddoottole haasoꞌi atiki haꞌurre afaan.—1 Xi. 3:13.

16. (a) Kirsitaana kaddeexxi dargaggeeyye welekee fakkeenna kada dandeettaaki ondi oruwwi hoonte? (b) Mitti dargaggeessa kadeeki dayyi “haasoꞌiki” fakkeenna kada dandeꞌaaki hittate?

¹⁶ Taakkaka Ximootwosi 4:12 keꞌni, Phawuloosi mitti dargaggeessi dayyi welekee fakkeenna kada dandeꞌaaka onde oruwwa kuleen. Ifixxa qoꞌnetixxa projekite assexxatto wodda konnee mitte mittenga oruwwa qoꞌnisseettelenaꞌa? Fakkeennakeꞌe, “haasoꞌiki” eloke fakkeenna kaddottaa hassaate hino. Tenneꞌaa haasoottaattexxe yaanenni wele jajjabeessa dandeettattoka oruwwa hedi. Hexxaatteki hadi atikinnite kaddoole insaꞌne atiꞌaa assinaꞌneexxe yaaneꞌaa edi irra galateeffata dandeettato? Gubaꞌeteꞌni kuta shiqisseexxe dayyuwwaꞌa, kuta insaꞌnexxi giddiiꞌni eeteettexxi yaane maachcho kaddeexxa bukkiiti uduma kulde galateefa dandeettato? Gubaꞌe giddo ifixxe hiyyanni yaada uwwateenna woꞌlaana dandeettatton. Haasoꞌiki fakkeenna kadatee assitaattexxi woꞌlaancho manfasiinxe hedhonni nophphateꞌni hexxettexxa leellishaan.—1 Xi. 4:15.

17. Mitti dargaggeessa kadeeki dayyi manfasiinxe hedhoke herrega isikeꞌni geyaashsha gargaartaaxxi yaane maachcho? (2 Ximootwosi 2:22)

¹⁷ “Dargaggummatixxe yortenaaꞌni bayyati, tenne irra qullumma hordofi.” (2 Ximootwosi 2:22 yaansis.) Phawuloosi, Ximootwosii manfasiinxe hedhoke herrega isikeꞌni geyabaashsha assitaaxxenna Yihowwanni welti afeexxa firunte balleessitaaxxe yortenaaꞌni bayyataashsha jajjabeesseen. Mitte mitte rakko affebaachcho fakkaattaanxi assitattoxxi yaanuwwa, manfasiinxe hedhoka ora hordofatee heenooxxa yanna calla uutattoshsha assitaaxxa hubattattoxxi hexxaan. Fakkeennakeꞌe, ispoorte huja, interneete dooyya, yookiin viidiyotixxa geeme geeba hitteexxa yanna atenaaꞌni adhdhitaꞌneexxa hedi. Tenne yaanuwwaa laꞌoonfattaattexxe yannanaaꞌni tiꞌokiraasetixxe hujeꞌaa laꞌoonfata dandeettatto? Loola atikeꞌni Bukkiitika Galma karkarsa yookiin baꞌliniinxa ergatenshanna kipha dandeettatton. Tennee yaanuwwa assitaattexxe kaddoole, manfasiinxe hedhoka herrega fulchexxattoshsha yookiin isoꞌni geltattoshsha gargaaraaka haarooka jaaluwwa alfitattoxxi egeꞌnendeexxen.

WELEKEE ERGATEMA EEBBA AFFEEN

18. Marqoosinna Ximootwosi maa eebba alfinee?

¹⁸ Marqoosinna Ximootwosi welekee woꞌma kadee garinni ergatematee hinaa wodda ifixxa hedho waalleen. Ittan heddo eebbanna gammashsho alfineen. (Huj. 20:35) Marqoosi addetika jaaluwwaa gargaaratee gargariti hedheeke boguwwibaa mammaremaamman. Ittani Yesuusixxa hedhonna ergatensha uuddaaxxa gammachchiisaaka raaguwwa borreesseen. Ximootwosi kinni Phawuloosi haarooxxa gubaꞌe hundeessaamma woddanna dayyuwwa jajjabeessamma wodda iso kiphaamman. Marqoosinna Ximootwoosi ifixxa halcha tolcha assatika manfasa leellinsheexxeꞌe, Yihowwa gammadaaxxi mama affeexxe yaanebaan.

19. Dargagge kaddeexxi dayyuwwa Phawuloosi Ximootwosiꞌi gorseeka gorsa lummise uuda hasisseeki mayeete? Iitta assa maa laꞌo affee?

¹⁹ Phawuloosi, Ximootwosiꞌaa jaalala afeemmaxxa, isiꞌaa borreesseexxe daddaabbenaaꞌni sholla qicinni egeꞌna dandeennannon. Tinni manfasiinxe akeettenni borreessendeexxi daddaabuwwa, Yihowwa dargaggeeyye yoꞌoshsha eeyyaꞌneexxa leellishshaan. Isi yaane duuchchi haꞌnoꞌaa qabboꞌaa hasaꞌneen. Tenneꞌaa Phawuloosi uwweeka anniinkika gorsa qalbeeffatte, ittan welekee woꞌma kadee garinni ergatematixxa halcha nossedhdhe. Iitta assitinaꞌneexxe kaddoole, taꞌanni gammachchiisaaxxa hedho, ediꞌaa kinni ‘dhugaatixxa hedho jabeessexxine abixxa’ dandeettinaan.—1 Xi. 6:18, 19.