ᲐᲜᲒᲘᲐ

1 დარიოსის მეფობის მე-2 წელს, მე-6 თვის პირველ დღეს, ანგია*+ წინასწარმეტყველის პირით იეჰოვას სიტყვა ეუწყა იუდას გამგებელ ზერუბაბელს,+ შეალთიელის ვაჟს, და მღვდელმთავარ იეჰოშუას, იეჰოცადაკის ვაჟს:

2 «აი, რას ამბობს ლაშქართა ღმერთი იეჰოვა: „ეს ხალხი ამბობს, ჯერ არ დამდგარაო იეჰოვას ტაძრის შენების დრო“».+

3 კვლავ ეუწყა იეჰოვას სიტყვა წინასწარმეტყველ ანგიას:+ 4 «აბა იმის დროა, რომ თქვენ ხით მოპირკეთებულ სახლებში ცხოვრობდეთ, ეს ტაძარი კი დანგრეული იყოს?!+ 5 აი, რას ამბობს ლაშქართა ღმერთი იეჰოვა: „დაუკვირდით თქვენს საქმეებს! 6 ბევრს თესავთ, მაგრამ ცოტას იმკით;+ ჭამთ, მაგრამ ვერ ძღებით; სვამთ, მაგრამ ვერ კმაყოფილდებით; იცვამთ, მაგრამ ვერ თბებით. მოჯამაგირე თავის ჯამაგირს გახვრეტილ ქისაში დებს“».

7 «აი, რას ამბობს ლაშქართა ღმერთი იეჰოვა: „დაუკვირდით თქვენს საქმეებს!

8 წადით მთაში, ჩამოიტანეთ ხე-ტყე+ და ააშენეთ ჩემი მოსაწონი ტაძარი+ ჩემ განსადიდებლად,+ — ამბობს იეჰოვა. —

9 ბევრს ელოდით, მაგრამ ცოტა მიიღეთ; კი დააბინავეთ, მაგრამ მე გაგინიავეთ.+ რატომ? — ამბობს ლაშქართა ღმერთი იეჰოვა. — იმიტომ რომ დანგრეულია ჩემი ტაძარი, თქვენ კი თქვენს სახლებს დაჰფოფინებთ.+ 10 ამიტომაც დაგიკავათ ცამ ნამი და მიწამ — მოსავალი. 11 გვალვას ვუვლენდი მიწას, მთებს, მარცვლეულს, ახალ ღვინოს, ზეთს, მიწის მოსავალს, კაცსა და პირუტყვს, მთელ თქვენს ნაშრომს“».

12 ზერუბაბელმა,+ შეალთიელის+ ვაჟმა, მღვდელმთავარმა იეჰოშუამ, იეჰოცადაკის+ ვაჟმა, და მთელმა ხალხმა მოუსმინეს თავიანთ ღმერთს, იეჰოვას, და ანგია წინასწარმეტყველს, რადგან იეჰოვას, მათი ღვთის, გამოგზავნილი იყო იგი; ხალხს იეჰოვასადმი კრძალვა გაუჩნდა.

13 შემდეგ ანგიამ, იეჰოვას მაცნემ, ხალხს იეჰოვას დავალებით მისი ცნობა გადასცა: „თქვენთანა ვარ!+ — ამბობს იეჰოვა“.

14 აღძრა იეჰოვამ+ იუდას გამგებელი ზერუბაბელი,+ შეალთიელის ვაჟი, მღვდელმთავარი იეჰოშუა,+ იეჰოცადაკის ვაჟი, და მთელი ხალხი, რომ წამოეწყოთ ლაშქართა ღვთის, იეჰოვას, თავიანთი ღვთის, ტაძრის მშენებლობა.+ 15 ეს მოხდა დარიოსის მეფობის მე-2 წელს, მე-6 თვის 24-ე დღეს.+

2 მე-7 თვის 21-ე დღეს ანგია+ წინასწარმეტყველს იეჰოვას სიტყვა ეუწყა: 2 «უთხარი იუდას გამგებელ+ ზერუბაბელს,+ შეალთიელის ვაჟს, მღვდელმთავარ იეჰოშუას,+ იეჰოცადაკის + ვაჟს, და მთელ ხალხს: 3 „რომელს გახსოვთ ეს ტაძარი და მისი უწინდელი დიდება?+ ახლა როგორია? უწინდელთან ახლოსაც ვერ მივა!+

4 ზერუბაბელ, გამაგრდი, — ამბობს იეჰოვა, — მღვდელმთავარო იეჰოშუა, იეჰოცადაკის ვაჟო, შენც გამაგრდი!

ამ მიწის მკვიდრნო, გამაგრდით,+ — ამბობს იეჰოვა, — და იშრომეთ!

მე თქვენთანა ვარ,+ — ამბობს ლაშქართა ღმერთი იეჰოვა. — 5 გაიხსენეთ, რას დაგპირდით, როცა ეგვიპტიდან გამოხვედით;+ ჩემი სული თქვენთანაა*.+ ნუ შეშინდებით!“+

6 აი, რას ამბობს ლაშქართა ღმერთი იეჰოვა: „ცოტაც და კიდევ ერთხელ შევძრავ ცასა და დედამიწას, ზღვასა და ხმელეთს;+

7 შევძრავ ხალხებს და მოვა ხალხთა საუნჯე ამ ტაძარში;+ დიდებით ავავსებ მას,+ — ამბობს ლაშქართა ღმერთი იეჰოვა. —

8 ვერცხლიც ჩემია და ოქროც, — ამბობს ლაშქართა ღმერთი იეჰოვა. —

9 ამ ტაძრის სიდიადე უწინდელი ტაძრის სიდიადეზე აღმატებული იქნება,+ — ამბობს ლაშქართა ღმერთი იეჰოვა. —

მშვიდობას დავავანებ ამ ადგილზე“,+ — ამბობს ლაშქართა ღმერთი იეჰოვა».

10 დარიოსის მეფობის მე-2 წელს, მე-9 თვის 24-ე დღეს, ანგია+ წინასწარმეტყველს იეჰოვას სიტყვა ეუწყა: 11 «აი, რას ამბობს ლაშქართა ღმერთი იეჰოვა: „ჰკითხე მღვდლებს, რა წერია კანონში:+ 12 კაცს სამოსის კალთით წმინდა ხორცი რომ მიჰქონდეს და სამოსით შეეხოს პურს, შეჭამანდს, ღვინოს, ზეთს ან რაიმე საჭმელს, განიწმინდება რომელიმე მათგანი?“»

მღვდლებმა მიუგეს: „არა!“

13 შემდეგ ანგიამ მათ ჰკითხა: „აქედან რომელიმეს რომ შეეხოს მიცვალებულთან შეხებით გაუწმინდურებული, გაუწმინდურდება ის, რასაც შეეხება?“+

მღვდლებმა მიუგეს: „გაუწმინდურდება“.

14 ანგიამ მათ უთხრა: „აი, ასეთია ეს ხალხი, ასეთია ეს ერი ჩემთვის, — ამბობს იეჰოვა, — ასეთია მთელი მათი ნაშრომი. ყველაფერი, რაც იქ მიაქვთ, უწმინდურია.

15 იფიქრეთ იმაზე, რა მოხდა ამ დღიდან მოყოლებული: ვიდრე იეჰოვას ტაძარში ქვა ქვაზე დაიდებოდა,+ 16 რა ხდებოდა მაშინ? 20 საწყაო მარცვლეულის გროვასთან რომ მივიდოდნენ, 10 საწყაო მარცვლეული ხვდებოდათ; საწნახელთან რომ მივიდოდნენ 50 საწყაოს ამოსახაპავად, 20 საწყაო ხვდებოდათ.+ 17 ხორშაკით, ჭრაქითა და სეტყვით გაგინადგურეთ მთელი ნაშრომი,+ მაგრამ არცერთი თქვენგანი არ დაბრუნებულა ჩემთან, — ამბობს იეჰოვა. —

18 იფიქრეთ იმაზე, რა ხდებოდა ამ დღიდან, მე-9 თვის 24-ე დღიდან, მოყოლებული, რა დღესაც საძირკველი ჩაეყარა იეჰოვას ტაძარს;+ იფიქრეთ ამაზე: 19 დარჩა თესლი საცავში?!+ გამოიღო ნაყოფი ვაზმა, ლეღვმა, ბროწეულმა ან ზეთისხილმა?! მაგრამ დღეიდან გაკურთხებთ“.+

20 იმ თვის 24-ე დღეს იეჰოვას სიტყვა ანგიას მეორედ ეუწყა:+ 21 «უთხარი იუდას გამგებელ ზერუბაბელს: „შევძრავ ცასა და მიწას.+ 22 დავამხობ სამეფო ტახტებს და ბოლოს მოვუღებ ხალხთა სამეფოების ძლიერებას,+ გადავაყირავებ ეტლს მხედრებითურთ, ცხენებიც დაეცემიან მხედრებიანად, თითოეული თავისი ძმის მახვილით განიგმირება.+

23 იმ დღეს, — ამბობს ლაშქართა ღმერთი იეჰოვა, — აგიყვან, ზერუბაბელ,+ შეალთიელის+ ვაჟო, ჩემო მსახურო, — ამბობს იეჰოვა, — და ბეჭდად* გაქცევ, რადგან შენა ხარ ჩემი რჩეული“, — ამბობს ლაშქართა ღმერთი იეჰოვა».