რიცხვებიᲡ 6:24—26 — „უფალმა გაკურთხოს და დაგიფაროს“

„იეჰოვამ გაკურთხოთ და დაგიფაროთ. მოგაფინოთ იეჰოვამ თავისი სახის ნათელი და შეგიწყალოთ. იეჰოვამ გადმოგხედოთ და მშვიდობა მოგცეთ“ (რიცხვები 6:24—26; „ახალი ქვეყნიერების თარგმანი“).

„უფალმა გაკურთხოს და დაგიფაროს. უფალმა მოგანათოს თვისი სახე და შეგიწყალოს, უფალმა მოგაპყრას თავისი სახე და სიმრთელე მოგცეს“ (რიცხვები 6:24—26; საქართველოს საპატრიარქოს გამოცემა).

ახსნა

ეს სიტყვები ისრაელი ერის პირველი მღვდელმთავრის, აარონის, დალოცვადაა ცნობილი (გამოსვლა 28:1). თუმცა მან ის ღვთის ნებით წარმოთქვა (რიცხვები 6:22, 23). სანამ აარონი ისრაელებს დალოცავდა, ღმერთმა მოსეს უთხრა: „აარონსა და მის ვაჟებს გადაეცი, რომ ასე დალოცონ ისრაელები“. მღვდლები ემორჩილებოდნენ ღმერთს და დიდებას მიაგებდნენ ღვთის სახელს, იეჰოვასa. 27-ე მუხლში ვკითხულობთ: „დალოცონ [მღვდლებმა] ისრაელები ჩემი სახელით და მე ვაკურთხებ მათ“.

„იეჰოვამ გაკურთხოთ და დაგიფაროთ“. იეჰოვა თავის თაყვანისმცემლებს იცავდა, ხელმძღვანელობდა და წარმატების მიღწევაში ეხმარებოდა და ასეთი სახით არ აკლებდა მათ კურთხევას (იგავები 10:22). რიცხვების 6:24—26-ში, ზოგ თარგმანში, გამოყენებულია მხოლობითი რიცხვი, რაც იმაზე მიანიშნებს, რომ ღმერთს ცალკეული ადამიანების დალოცვა სურდა და არა მხოლოდ მთლიანი ერის.

„მოგაფინოთ იეჰოვამ თავისი სახის ნათელი და შეგიწყალოთ“. ვინმეს ღვთისთვის რომ ეთხოვა, შენი სახის ნათელი მომაფინეო, ეს იმის მიმანიშნებელი იქნებოდა, რომ მას ღვთის კეთილგანწყობის მოპოვება სურდა.b ეს ფრაზა შეიძლება ასეც ითარგმნოს: „უფალმა მოგანათოს თავისი სახის შუქი“ (რიცხვები 6:25; ახალი გადამუშავებული გამოცემა, 2015). იეჰოვა თავისი ხალხის მიმართ კეთილგანწყობას იმით გამოხატავს, რომ სიკეთეს, თანაგრძნობასა და გულმოწყალებას ავლენს (ესაია 30:18).

„იეჰოვამc გადმოგხედოთ და მშვიდობა მოგცეთ“. ამ სიტყვებში ის იგულისხმება, რომ იეჰოვა თავისი თაყვანისმცემლების მდგომარეობით ინტერესდება და მათ მშვიდობას აძლევს. ერთი ნაშრომის თანახმად, «ებრაული სიტყვა „მშვიდობა“ (შალომ) მხოლოდ ომის არარსებობას კი არ გულისხმობს, არამედ ფიზიკურ და სულიერ კეთილდღეობასაც».

ღვთისგან კურთხევა რომ მიეღოთ ისრაელებს, იეჰოვას მორჩილები უნდა ყოფილიყვნენ (ლევიანები 26:3—6, 9). მხოლოდ ამ შემთხვევაში ასრულებდა ის თავის პირობას. ეს კარგად ჩანდა ისრაელის ზოგი მეფის, მაგალითად, სოლომონის და ხიზკიას, მმართველობის პერიოდში (1 მეფეები 4:20, 25; 2 მატიანე 31:9, 10).

მართალია, დღეს ქრისტიანები სიტყვა-სიტყვით არ იმეორებენ აარონის დალოცვას, მაგრამ, როცა სხვებისთვის ლოცულობენ ან თანაქრისტიანებს ამხნევებენ, ამავე გრძნობებს გამოხატავენ (1 თესალონიკელები 5:11, 25). იეჰოვა არ იცვლება. მას კვლავაც სურს, აკურთხოს და დაიფაროს თავისი ერთგული თაყვანისმცემლები. დღეს ნამდვილ ქრისტიანებს მშვიდობა აქვთ, რადგან იციან, რომ იეჰოვა იწონებს და თავისი სახის ნათელს ჰფენს მათ.

კონტექსტი

რიცხვების პირველ ათ თავში ჩაწერილია იეჰოვას მითითებები, რომლებიც აღთქმული მიწისკენ მიმავალ ისრაელებს სინაის მთასთან მისცა. ისინი დაახლოებით ერთი წელი იყვნენ დაბანაკებული ამ ტერიტორიაზე. სწორედ მაშინ ჩამოაყალიბა იეჰოვამ ისინი ერად და კანონის შეთანხმება დაუდო.

იეჰოვამ მოსეს უთხრა, რომ აარონსა და მის ვაჟებს, რომლებიც მღვდლებად აირჩია, დაელოცათ ისრაელები (რიცხვები 6:22, 23). სწორედ ამ მითითების შემდეგ წარმოთქვეს მათ რიცხვების 6:24—26-ში ჩაწერილი დალოცვა. დროთა განმავლობაში წესად იქცა, რომ ტაძარში მსხვერპლშეწირვამდე მღვდელს ეს სიტყვები წარმოეთქვა.

უყურეთ ვიდეორგოლს, რომელიც ზოგად წარმოდგენას შეგიქმნით წიგნ „რიცხვებზე“.