კრებები, რომლებიც სიყვარულისა და ერთიანობის განვითარებას უწყობს ხელს

შენ შეიძლება უკვე დასწრებიხარ შენს საცხოვრებელ ადგილთან ახლოს მდებარე იეჰოვას მოწმეთა შეხვედრებს. შენიშნავდი, რომ იქ ყველანაირი ადამიანები იყვნენ: მთელი ოჯახები, დაუქორწინებლები, მოხუცები და ახალგაზრდები. ისინი ყველა გაერთიანებული იყვნენ თაყვანისცემაში და სხვებისადმი დახმარების ინტერესს ავლენდნენ.

ნებისმიერ ორგანიზაციაში, რომელშიც მრავალი ადამიანის სურვილია, გაერთიანებულად მოქმედება, საჭიროა გარკვეული ზედამხედველობა. ღმერთი არის წესრიგის ღმერთი; მაშასადამე, მისი ხალხის კრებებიც წესრიგს უნდა ირეკლავდეს. პირველი საუკუნის მსგავსად, დღესაც დახელოვნებული, მოწიფული და გამოცდილი ქრისტიანი მამაკაცები უხუცესებად ანუ ზედამხედველებად ინიშნებიან. ისინი ზედამხედველობას უწევენ კრებებს და მისი წევრების სულიერ მოთხოვნილებებზე ზრუნავენ. მათ დახმარებას უწევენ ერთგული მამაკაცები, რომლებიც სამსახურებრივ თანაშემწეებად არიან ცნობილი. ეს მამაკაცები არ ღებულობენ არავითარ ხელფასსა და სხვა რამე მატერიალურ სარგებელს, არამედ ნებაყოფლობით მსახურობენ; ცხოვრობენ საკუთარი ხარჯებით და, ჩვეულებრივ, სადმე მუშაობენ (1 კორინთელთა 14:33, 40; ფილიპელთა 1:1; 1 ტიმოთე 3:8, 9).

როგორ ირჩევენ მათ? ისინი ღვთის ისეთი ერთგული მსახურები უნდა იყვნენ, რომლებიც გარკვეულ ბიბლიურ მოთხოვნებს შეესაბამებიან. ამ მოთხოვნებიდან ზოგიერთია: იყვნენ ‘ზომიერი, აზრიანი, წესიერი, სტუმართმოყვარე, დამმოძღვრავი და შემწყნარე; ვერცხლის უყვარული; თავისი სახლის კარგი განმგებელი; არა ახალმოქცეული; გარეშეებისგან კარგი მოწმობის მქონე’; ‘სარწმუნო სიტყვის მიმდევარი მოძღვრების მიხედვით’ (1 ტიმოთე 3:1–15; ტიტე 1:7–9).

ეს მამაკაცები ამ პასუხისმგებლობაზე კრების წევრების ხმის მიცემით არ ინიშნებიან, სადაც უმრავლესობა ხშირად ახალმონათლული ქრისტიანია. ნაცვლად ამისა, მათ რეკომენდაციას აძლევენ მოწიფული, გამოცდილი უხუცესები, რომლებიც გამჭრიახები არიან და ნათლად ამჩნევენ, თუ რომელი პიროვნება შეესაბამება ბიბლიურ მოთხოვნებს. გარდა ამისა, უხუცესებისა და სამსახურებრივი თანაშემწეების დანიშვნა იეჰოვას მოწმეთა ხელმძღვანელი საბჭოს ზედამხედველობით ხდება, რომელიც პირველი საუკუნის ქრისტიანთა კრების მიერ დატოვებულ მაგალითს მიჰყვება.

ეს უხუცესები, ანუ ზედამხედველები, არ შეადგენენ სამღვდელოების კლასს; ისინი სხვებზე არ ბატონობენ. იესოს ნათქვამის თანახმად, ნებისმიერი, ვინც ზედამხედველობას იღებს, ყველას მონა უნდა იყოს. იეჰოვას მოწმეთა კრებაში უხუცესები ნამდვილად ღვთის სამეფოს თანამშრომელნი არიან (მათე 20:26, 27; 23:8–11; რომაელთა 12:8; 1 კორინთელთა 3:5; 4:1, 2; კოლასელთა 4:11; 1 თესალონიკელთა 5:12–14).

როგორც ზედამხედველები, ისინი მეთვალყურეობას უწევენ კრებების დამოძღვრის საკითხს და ხელმძღვანელობენ სამქადაგებლო საქმიანობას. კრების უშუალო მოვალეობაა მისთვის გამოყოფილ მთელ ტერიტორიაზე სამეფოს შესახებ კეთილი ცნობის ქადაგება. ზედამხედველები მწყემსებადაც მსახურობენ და, საჭიროების შემთხვევაში, გამხნევების მიზნით ინახულებენ კრების წევრებს (მათე 24:14; საქმეები 1:8; 1 თესალონიკელთა 2:11, 12; 5:14, 15; 2 ტიმოთე 2:24–26; ებრაელთა 13:17; იაკობი 5:13–16; 1 პეტრე 5:1–4).

უხუცესების მოვალეობაში შედის ისიც, რომ შენიშვნა მისცენ და დასაჯონ ნებისმიერი პიროვნება, ვინც არასწორად იქცევა და ვისი კრებაში ყოფნაც კრების ერთიანობას, სულიერსა და ზნეობრივ სისუფთავეს საშიშროებას უქმნის (1 კორინთელთა 5:4, 5, 7, 11–13; ტიტე 1:9; 2:15; 3:10, 11).

კრებასთან რეგულარული ურთიერთობა შესანიშნავ მეგობრებს შეგძენს და დიდ სულიერ სარგებლობას მოგიტანს (ფსალმუნი 34:18; 83:11).

• ვინ ზედამხედველობს ცალკეული კრების საქმიანობას?

• რის საფუძველზე ირჩევენ ზედამხედველებს?

• რა შედის მათ პასუხისმგებლობებში?

[სურათები 13 გვერდზე]

ზედამხედველები ასწავლიან კრებას, ხელმძღვანელობენ კარდაკარ ქადაგებას, სამწყემსო მონახულებისას ამხნევებენ კრების წევრებს, იძლევიან რჩევებს და, საჭიროების შემთხვევაში, შენიშვნებსაც.