შეხვედრები, რომლებიც სიყვარულისა და კეთილი საქმეებისკენ აღძრავს
ადრინდელი ქრისტიანები სწავლებისა და გამამხნევებელი ურთიერთობით სიამოვნების მიღების მიზნით, ჩვეულებრივ, კერძო სახლებში იკრიბებოდნენ. დღეს იეჰოვას მოწმეებს კვირაში სამჯერ აქვთ კრების შეხვედრები. გიწვევთ, დაესწრო რომელიმე ამ შეხვედრას. მათი შეხვედრები არ არის რიტუალური, არამედ მთელი ყურადღება ღვთიური განათლებისკენაა მიმართული. კრების შეხვედრები იწყება და მთავრდება სიმღერითა და ლოცვით. დასწრება თავისუფალია და არავითარი ფულის შეგროვება არ ხდება (საქმეები 4:23–31; 14:22; 15:32, 35; რომაელთა 16:5; კოლასელთა 4:15).
შესაძლოა, პირველი შეხვედრა, რომელსაც დაესწრები, 45-წუთიანი საჯარო მოხსენება იყოს, რომელიც ეხება ბიბლიურ სწავლებებს, წინასწარმეტყველებას ან ქრისტიანული ცხოვრების შესახებ რჩევას იძლევა. მოხსენების შემდეგ „საგუშაგო კოშკის“ სპეციალურად კრების შესწავლისთვის გამოყოფილი სტატიის გამოყენებით ხდება ბიბლიის შესწავლა. სწავლება შემდეგნაირად მიმდინარეობს: „საგუშაგო კოშკიდან“ იკითხება აბზაცი და შესწავლის ხელმძღვანელი სვამს მასალიდან გამომდინარე კითხვას, ხოლო აუდიტორიიდან ნებისმიერ მსურველს შეუძლია ხელის აწევით გასცეს პასუხი. ჩვეულებრივ, თითოეულ აბზაცზე რამდენიმე კომენტარი კეთდება. შეხვედრა ერთ საათს გრძელდება.
კვირის ბოლოსთვის ორი 45-წუთიანი შეხვედრა ტარდება. ერთ-ერთია თეოკრატიული სამსახურის სკოლა. მისი დანიშნულებაა ბიბლიურ თემებზე მასალების შეგროვებისა და ეფექტური სწავლებისთვის მომზადება. 21-წუთიანი სწავლების შემდეგ მოწაფეები, რომლებსაც წინასწარ აქვთ დავალება მიცემული, მოკლე მოხსენებით ან ინსცენირებით გამოდიან. თითოეული გამოსვლის შემდეგ სკოლის ზედამხედველი იძლევა რჩევას, რომელშიც ნაჩვენებია, თუ როგორ შეუძლია მოსწავლეს გაუმჯობესება. სკოლაში გამოსაყენებლად რამდენიმე სახელმძღვანელოა მომზადებული. სკოლაში შეუძლია ჩაეწეროს ყველას, ვინც რეგულარულად ესწრება კრების შეხვედრებს და ქრისტიანული პრინციპების შესაბამისად ცხოვრობს.
შემდგომ შეხვედრას სამსახურებრივი შეხვედრა ეწოდება. ის სამი ან ოთხი ნაწილისგან შედგება და მსახურების სხვა თავისებურებებთან ერთად კარდაკარ ქადაგებისას კეთილი ცნობის შესახებ საუბრებს ეხება. ეს ნაწილები მოხსენებების, განხილვებისა და ინსცენირების სახით გადმოიცემა, რომლის დროსაც ზოგჯერ მსმენელიც ღებულობს მონაწილეობას. პროგრამის დიდი ნაწილი დაფუძნებულია „ჩვენს სამეფო მსახურებაზე“, საზოგადოება „საგუშაგო კოშკის“ მიერ ყოველთვიურად გამოქვეყნებულ ოთხგვერდიან სასწავლო მასალაზე.
კიდევ ერთი შეხვედრა ყოველკვირეულად, ჩვეულებრივ, კრების ტერიტორიაზე მდებარე კერძო სახლებში შედარებით პატარა ჯგუფებს უტარდებათ. შესწავლა ბიბლიაზე და საზოგადოების მიერ გამოცემულ ახალ წიგნზეა დაფუძნებული. რადგან ჯგუფი პატარაა, დამსწრეებს ერთმანეთის უკეთესად გაცნობისა და განხილვაში მონაწილეობის მიღების მეტი შესაძლებლობა ეძლევათ.
კრებების უმეტესობას აქვს საკუთარი სამეფო დარბაზი, რომელიც იეჰოვას მოწმეებმა ააშენეს. ხარჯები თვითონ იეჰოვას მოწმეების მიერ გაღებული ნებაყოფლობითი შესაწირავებით იფარება და, უმეტეს შემთხვევაში, სამუშაოებს ყოველგვარი ანაზღაურების გარეშე მოხალისეები ასრულებენ. შესაწირავების ყუთი, რომელიც ყოველი შეხვედრისას არის სამეფო დარბაზში, მსურველებს შესაწირავების გაღების შესაძლებლობას აძლევს.
კრების შეხვედრები იეჰოვას მოწმეებს ეხმარება, მიჰყვნენ ებრაელთა 10:24, 25-ში მოცემულ რჩევას: „ყურადღებით მოვეკიდოთ ერთმანეთს, წავახალისოთ სიყვარულისა და კეთილი საქმეებისათვის. ნუ მივატოვებთ ჩვენს შესაკრებელს, როგორც ზოგიერთებს სჩვევიათ, არამედ შევაგონოთ ერთმანეთს. და, მით უმეტეს, რაც უფრო მეტად ატყობთ იმ დღის მოახლოებას“.
• ადრინდელ ქრისტიანთა შეხვედრების რა თავისებურებების დანახვაა შესაძლებელი იეჰოვას მოწმეთა შეხვედრებზე?
• ახსენი რა ხდება იეჰოვას მოწმეთა ხუთ შეხვედრაზე, რომელიც რეგულარულად ტარდება.
• საიდან აქვთ იეჰოვას მოწმეებს დარბაზები შეხვედრებისთვის?
[სურათები 14 გვერდზე]
უხუცესს მიჰყავს „საგუშაგო კოშკის“ შესწავლა (შეერთებული შტატები).
სცენა თეოკრატიული სამსახურის სკოლიდან (ფარერის კუნძულები).
ჯგუფის შესწავლა კერძო სახლში (იაპი).
იეჰოვას მოწმეების მიერ ორ დღეში აშენებული სამეფო დარბაზი ნიუ-ბრაუნფელში (ტეხასი, აშშ).
[სურათები 15 გვერდზე]
სამეფო დარბაზები სხვადასხვა ქვეყნებში.
იაპონია
ავსტრალია
ავსტრია
ესპანეთი