ღვთის სამეფოს შესახებ საქადაგებლად ორგანიზებული კრებები

დედამიწაზე ცხოვრებისას იესო ღვთის სამეფოს შესახებ ქადაგებდა, დადიოდა დაბიდან დაბაში და ქალაქიდან ქალაქში. მან მოწაფეებიც მოამზადა და იმავე საქმის შესასრულებლად გაგზავნა. ზეცაში ამაღლების წინ თავის მიმდევრებს დაუბარა, რომ მოწაფეებად გაეხადათ ყველა ერის ადამიანები. თავისი არსებობის პირველი დღიდანვე ადრინდელი ქრისტიანული კრება სახარების საქადაგებლად იყო ორგანიზებული. მოწაფეები, სადაც არ უნდა წასულიყვნენ, ყველგან ღვთის სამეფოს შესახებ ქადაგებდნენ (მათე 4:17, 23; 10:1–16; 28:19, 20; ლუკა 4:43, 44; 8:1; 10:1–9; საქმეები 1:8; 4:31; 5:42; 8:12; 19:8; 28:23, 30, 31; რომაელთა 10:9, 10, 14).

ამ სისტემის აღსასრულის შესახებ თავის წინასწარმეტყველებაში იესომ თქვა: „ექადაგება ეს სახარება სასუფეველზე მთელს მსოფლიოს ყველა ხალხისთვის დასამოწმებლად. აი, მაშინ დადგება აღსასრული“. დღეს ქადაგება ქრისტიანული კრების ნებისმიერი წევრის პირდაპირი ვალდებულებაა (მათე 24:14; მარკოზი 13:10).

მთელ მსოფლიოში იეჰოვას მოწმეთა თითოეული კრება ორგანიზებულია, რათა ღვთის სამეფოს შესახებ სახარების საქადაგებლად სისტემატურად მოიაროს ადგილობრივი ტერიტორია. ამის სათანადო წესრიგით გასაკეთებლად ყოველ ქვეყანაში საზოგადოება „საგუშაგო კოშკის“ ფილიალი თითოეულ კრებას საქადაგებლად ტერიტორიას აძლევს. კრება ამ ტერიტორიას უფრო პატარა ნაწილებად ყოფს და იმ პიროვნებებს აძლევს, რომლებიც საკუთარ თავზე აიღებენ პასუხისმგებლობას, მივიდნენ ამ ტერიტორიაზე მცხოვრებ ადამიანებთან (1 კორინთელთა 14:33, 40).

კარდაკარ ქადაგებისას მოწმეებს ხალხთან უწევთ ურთიერთობა. ამიტომ თავიანთ კრებებზე იეჰოვას მოწმეები მზადდებიან კარდაკარ მსახურებისას ბიბლიის გამოყენებით სამეფოს შესახებ მოკლე საუბრებისთვის. მოწმეები თან ატარებენ ბიბლიურ ლიტერატურას იმ მიზნით, რომ დაუტოვონ მობინადრეებს, რომლებსაც ღვთის სიტყვიდან უფრო მეტი შემეცნების მიღების სურვილი აქვთ.

სამეფოს შესახებ მნიშვნელოვანი ცნობის მოსმენის შესაძლებლობა ყველას რომ მისცენ, მოწმეები კარდაკარ სიარულისას დაწვრილებით ჩანაწერებს აკეთებენ და აღნიშნავენ, თუ რომელ სახლში არ იყო მობინადრე ან, გარკვეული მიზეზის გამო სად ვერ მოახერხეს საფუძვლიანი ქადაგება. იქ, სხვა დროს მივლენ. სადაც ინტერესი გამოავლინეს, ჩაიწერენ და დამატებითი ბიბლიური ინფორმაციის მისაწოდებლად მოწმეები კვლავ მივლენ ამ პიროვნებასთან. თუ სურვილი იქნა გამოვლენილი, ჩაატარებენ ბიბლიის რეგულარულ შესწავლას. ყოველივე ეს უფასოდ კეთდება.

აგრეთვე, იეჰოვას მოწმეები ჟურნალებს სთავაზობენ ქუჩაში გამვლელებს. ასეთნაირად შეიძლება გამოელაპარაკო იმ მრავალ ადამიანს, რომლებიც, შესაძლოა, სახლში ვერ ნახო. ყველა ღონეს ხმარობენ იმისათვის, რომ ხმა მიაწვდინონ ყველას, ვინც მოისმენს (საქმეები 17:17; გამოცხადება 14:6, 7; 22:17).

რატომ განაგრძობენ მოწმეები სახლებში მისვლას მაშინ, როცა უმრავლესობა არავითარ ინტერესს არ ავლენს? პრაქტიკამ აჩვენა, რომ ადამიანთა მდგომარეობა ხშირად იცვლება, და ამიტომ მეორედ მისვლისას ისინი შეიძლება დადებითად გამოეხმაურონ ცნობას, ან, შესაძლოა, ოჯახის რომელიმე წევრი დაინტერესდეს.

იესომ თავის მოწაფეებს უთხრა: „უწინარეს ეძიეთ ღვთის სასუფეველი და მისი სიმართლე“. უწინარეს ღვთის სასუფევლის ძიებაში ღვთის სამეფოს შესახებ ქადაგება მნიშვნელოვან როლს ასრულებს და იეჰოვას მოწმეები ამას თავიანთ ცხოვრებაში ძალიან მნიშვნელოვან საქმედ თვლიან (მათე 6:33; 2 ტიმოთე 4:2).

• წინასწარმეტყველების თანახმად, იესოსა და ადრინდელი ქრისტიანების მსგავსად, რა საქმიანობას უნდა ჰქონოდა ადგილი ჩვენს დღეებში?

• როგორ ეწევა ორგანიზება იეჰოვას მოწმეთა საქმიანობას?

• რატომ განაგრძობენ იეჰოვას მოწმეები ადამიანებთან სახლებში მიკითხვას, მაშინ როცა უმეტესობა არავითარ ინტერესს არ ავლენს?

[სურათები 16, 17 გვერდებზე]

იეჰოვას მოწმეები ღვთის სამეფოს შესახებ ქადაგებენ სხვადასხვა ქვეყნებში.

ტაილანდი

მექსიკა

ნიდერლანდები

კორეა

კიურასაო

განა

ბრიტანეთი

ავსტრალია