თავი 6
იესო ქრისტე — ღმერთის წარმოგზავნილია?
1, 2. ა) როგორი მტკიცებები არსებობს, რომ იესო ქრისტე იყო რეალური პიროვნება? ბ) როგორი კითხვები წამოიჭრება იესოს შესახებ?
დღეს თითქმის ყველას სმენია იესო ქრისტეს შესახებ. სხვა ადამიანებთან შედარებით, კაცობრიობაზე მისი ზეგავლენა გაცილებით დიდია. თვით ახალი წელთაღრიცხვაც კი, რომელსაც აღიარებს მსოფლიოს უმეტესი ნაწილი, იწყება იმ თარიღიდან, რომელსაც მიიჩნევენ მისი დაბადების წლად. „მსოფლიო ენციკლოპედიის“ (The World Book Encyclopedia) თანახმად: „თარიღები ამ წლამდე აღინიშნება, როგორც . . .ქრისტეს შობამდე, ხოლო ამ წლის შემდგომი თარიღები აღინიშნება, როგორც . . .ქრისტეს შობიდან“.
2 მაშასადამე, იესო არ ყოფილა წარმოსახვითი პიროვნება. ის სინამდვილეში ცხოვრობდა დედამიწაზე, როგორც ადამიანი. „ძველ დროში, ქრისტიანობის მოწინააღმდეგეებსაც კი არასდროს ეპარებოდათ ეჭვი იესოს არსებობაში“, — აღნიშნავს ენციკლოპედია „ბრიტანიკა“ (Encyclopædia Britannica). მაგრამ ვინ იყო იესო? ნამდვილად ღმერთისგან იყო წარმოგზავნილი? რატომ არის ის ასე კარგად ცნობილი?
ის უკვე ადრე ცხოვრობდა
3. ა) ანგელოზის სიტყვების თანახმად, ვისი ძე უნდა ეშვა მარიამს? ბ) რატომ იყო შესაძლებელი, რომ ქალწულ მარიამს ეშვა იესო?
3 სხვა ადამიანებისგან განსხვავებით, იესო იშვა ქალწულისგან, რომლის სახელი იყო მარიამი. ანგელოზმა განუცხადა მარიამს ყრმის შესახებ: „დიდი იქნება ის და უზენაესის ძედ იწოდება“ (ლუკა 1:28–33; მათე 1:20–25). მაგრამ როგორ უნდა ჰყოლოდა შვილი ქალს, რომელსაც არასდროს ჰქონია სქესობრივი კავშირი მამაკაცთან? ეს შესაძლებელი იყო ღმერთის სულიწმიდით. იეჰოვამ თავისი ძლევამოსილი, სულიერი ძის სიცოცხლე ზეციდან ქალწული მარიამის საშვილოსნოში გადაიტანა. ეს იყო სასწაული! რა თქმა უნდა, მას, რომელმაც შექმნა ქალი შობადობის შესანიშნავი უნარით, შეეძლო მოეხდინა, რომ ქალს ეშვა ბავშვი, მამაკაცთან სქესობრივი კავშირის გარეშე. ბიბლია აცხადებს: „და როცა მოვიდა აღვსება დროისა, მოავლინა ღმერთმა თავისი ძე, რომელიც დედაკაცისაგან იშვა“ (გალატელთა 4:4).
4. ა) როგორი სიცოცხლით ტკბებოდა იესო დედამიწაზე მოვლენამდე? ბ) რა თქვა იესომ იმის მისანიშნებლად, რომ ადრე ზეცაში ცხოვრობდა?
4 მაშასადამე, სანამ იესო დედამიწაზე მოევლინებოდა ადამიანად, ზეცაში ძლიერი სულიერი პიროვნება იყო. მას ჰქონდა ღმერთის სხეულის მსგავსი უხილავი, სულიერი სხეული (იოანე 4:24). თვითონ იესოც ხშირად ლაპარაკობდა მაღალი მდგომარეობის შესახებ, რომელიც მას ზეცაში ეკავა. ერთხელ ის ლოცულობდა: „ახლა კი, შენ განმადიდე მამაო, იმავე დიდებით, რაც მქონდა შენთან წუთისოფლის გაჩენამდე“ (იოანე 17:5). ასევე, მან თავის მსმენელებს უთხრა: „თქვენ ქვენანი ხართ, მე კი ზემოთიდან ვარ“; „თუკი იხილავთ კაცის ძეს იქ აღმავალს, სადაც წინათ იყო?“ „სანამ აბრაამი იქნებოდა, მე ვარ“ (იოანე 8:23; 6:62; 8:58; 3:13; 6:51).
5. ა) რატომ ეწოდებოდა იესოს „სიტყვა“, „პირმშო“ და „მხოლოდშობილი“? ბ) რა საქმეებში მონაწილეობდა იესო ღმერთთან ერთად?
5 დედამიწაზე მოსვლამდე იესოს ეწოდებოდა ღმერთის სიტყვა. ეს ტიტული მიუთითებს, რომ იესო ზეცაში მსახურობდა ღმერთის სიტყვის გადამცემად. მას ასევე ეწოდებოდა „პირმშო“ და „მხოლოდშობილი“ (იოანე 1:14; 3:16; ებრაელთა 1:6). ეს ნიშნავს, რომ იესო უშუალოდ ღმერთის მიერ იყო შექმნილი ყველა სხვა სულიერი ძეების შექმნამდე. ბიბლია გვიხსნის, რომ ეს „პირმშო“ იეჰოვასთან ერთად მონაწილეობდა ყოველივე დანარჩენის შექმნაში (კოლასელთა 1:15, 16). ამიტომ, როდესაც ღმერთმა თქვა „გავაჩინოთ კაცი ჩვენს ხატად, ჩვენს მსგავსებად“, მან მიმართა თავის ძეს. დიახ, ის, ვინც შემდგომ დედამიწაზე მოვიდა და იშვა ქალწულისგან, მონაწილეობდა ყოველივე არსებულის შექმნაში! ის წინათ მამასთან ცხოვრობდა ზეცაში ჩვენთვის უცნობი დროის განმავლობაში (დაბადება 1:26; იგავნი 8:22, 30; იოანე 1:3).
მისი ცხოვრება დედამიწაზე
6. ა) რა მოხდა იესოს დაბადებამდე ცოტა ხნით ადრე და მისი დაბადების შემდეგ? ბ) სად დაიბადა იესო და სად გაიზარდა?
6 მარიამი იოსებზე იყო დანიშნული. როდესაც იოსებმა შეიტყო, რომ მარიამი ორსულად იყო, იფიქრა, რომ სხვა მამაკაცთან ჰქონდა სქესობრივი კავშირი და აღარ სურდა მასზე დაქორწინება. ხოლო იმის შემდეგ, როცა იეჰოვამ უთხრა, რომ ყრმა სულიწმიდის მეშვეობით იყო ჩასახული, იოსებმა მარიამი ცოლად შეირთო (მათე 1:18–20, 24, 25). მოგვიანებით, ქალაქ ბეთლემში ყოფნის დროს, მათ შეეძინათ იესო (ლუკა 2:1–7; მიქა 5:1). იესო ჯერ კიდევ ჩვილი იყო, როდესაც მეფე ჰეროდე შეეცადა მის მოკვლას. მაგრამ იეჰოვამ გააფრთხილა იოსები და ის ოჯახით გაიხიზნა ეგვიპტეში. მეფე ჰეროდეს სიკვდილის შემდეგ, იოსები და მარიამი იესოსთან ერთად გალილეის ქალაქ ნაზარეთში დაბრუნდნენ. იესო იქ იზრდებოდა (მათე 2:13–15, 19–23).
7. ა) რა მოხდა, როდესაც იესო 12 წლის იყო? ბ) რომელ ხელობას ეუფლებოდა იესო ბავშვობაში?
7 როდესაც იესო 12 წლის იყო, ოჯახთან ერთად იერუსალიმში წავიდა, რომ დასწრებოდა პასექად წოდებულ განსაკუთრებულ დღესასწაულს. იქ ყოფნისას მან სამი დღე დაყო ტაძარში, სადაც უსმენდა და შეკითხვებს აძლევდა მოძღვრებს. ყველა მსმენელი გაოცებული იყო იესოს ცოდნით (ლუკა 2:41–52). ქალაქ ნაზარეთში, სადაც იზრდებოდა, ის დაეუფლა დურგლის ხელობას. უეჭველია, ეს ხელობა მამობილმა, იოსებმა შეასწავლა, რადგან ისიც დურგალი იყო (მარკოზი 6:3; მათე 13:55).
8. რა მოხდა, როდესაც იესოს შეუსრულდა 30 წელი?
8 ოცდაათი წლის ასაკში იესოს ცხოვრებაში მოხდა უდიდესი ცვლილება. ის წავიდა იოანე ნათლისმცემელთან და სთხოვა, რომ მოენათლა მდინარე იორდანეში სრული ჩაძირვით. ბიბლია მოგვითხრობს: «ნათელღებული იესო მაშინვე ამოვიდა წყლიდან და აჰა, გაიხსნენ ცანი, და მან იხილა ღვთის სული, მტრედივით გარდმომავალი, მასზე რომ ეშვებოდა. აჰა, ხმა ციდან მეტყველი: „ეს არის ჩემი საყვარალი ძე, რომელიც მოვიწონე მე“» (მათე 3:16, 17). იოანესთვის არ არსებობდა ეჭვის მიზეზი, რომ იესო ღმერთის მიერ იყო წარმოგზავნილი.
9. ა) როდის გახდა იესო, სინამდვილეში, ქრისტე და კერძოდ, რატომ იმ დროს? ბ) რაზე განაცხადა იესომ მზადყოფნა თავისი ნათლობით?
9 როცა იეჰოვამ სულიწმიდა გადმოაფრქვია საკუთარ ძეზე, სცხო, ანუ დანიშნა ის თავისი მომავალი სამეფოს მეფედ. სულით ცხებული იესო გახდა „მესია“, ანუ „ქრისტე“, ვინაიდან ეს სიტყვები ებრაულ და ბერძნულ ენაზე ნიშნავს „ცხებულს“. მაშასადამე, ის გახდა იესო ქრისტე, ანუ იესო ცხებული. ამიტომ ამბობდა პეტრე მოციქული, რომ „სცხო ღმერთმა სულიწმიდით და ძალით იესო ნაზარეველს“ (საქმეები 10:38). გარდა ამისა, წყალში ნათლობით იესომ თავი წარუდგინა ღმერთს, რათა შეესრულებინა ის საქმე, რისთვისაც მოავლინა შემოქმედმა დედამიწაზე. რა იყო ეს მნიშვნელოვანი საქმე?
რისთვის მოვიდა ის დედამიწაზე
10. რომელი ჭეშმარიტებების საუწყებლად მოვიდა იესო დედამიწაზე?
10 როცა რომის ნაცვალს, პილატე პონტოელს, უხსნიდა დედამიწაზე თავისი მოსვლის მიზეზს, იესომ უთხრა: „მე იმიტომ დავიბადე და იმიტომ მოვედი წუთისოფელში, რომ ჭეშმარიტება დავამოწმო“ (იოანე 18:37). კერძოდ, რომელი ჭეშმარიტებების დასამოწმებლად იყო წარმოგზავნილი იესო დედამიწაზე? უპირველესად, თავისი ზეციერი მამის შესახებ ჭეშმარიტების დასამოწმებლად. იესო თავის მიმდევრებს ასწავლიდა ელოცათ, რომ მამის სახელი ‘წმიდა ყოფილიყო’, ანუ განწმენდილიყო (მათე 6:9). ის ლოცულობდა: „შენი სახელი გამოვუცხადე ადამიანებს, რომლებიც შენ მომეცი წუთისოფლისგან“ (იოანე 17:6). მან ასევე განაცხადა: „უნდა ვახარო ღვთის სასუფეველი, ვინაიდან ამისთვის ვარ მოვლენილი“ (ლუკა 4:43).
11. ა) რატომ თვლიდა იესო თავის საქმეს ასე მნიშვნელოვნად? ბ) რა საქმისგან არ იკავებდა იესო თავს არასოდეს და ამიტომ, როგორ უნდა მოვიქცეთ ჩვენ?
11 რამდენად მნიშვნელოვანი იყო იესოსთვის, ეუწყებინა მამის სახელი და სამეფო? მან თავის მოწაფეებს უთხრა: „ჩემი საჭმელია — ვქმნა ჩემი მომავლინებლის ნება და აღვასრულო მისი საქმე“ (იოანე 4:34). რატომ თვლიდა იესო ღმერთის საქმეს საკვებივით მნიშვნელოვნად? იმიტომ რომ, ღმერთი თავის სასწაულებრივ განზრახვას კაცობრიობისთვის განახორციელებს სამეფოს მეშვეობით. ეს სამეფო მოსპობს და შემუსრავს ყოველგვარ ბოროტებას და ღმერთის სახელს გაათავისუფლებს მიყენებული შეურაცხყოფისგან (დანიელი 2:44; გამოცხადება 21:3, 4). იესო არასოდეს იკავებდა თავს, რომ ემცნო სხვებისთვის ღმერთის სახელი და სამეფო (მათე 4:17; ლუკა 8:1; იოანე 17:26; ებრაელთა 2:12). ის ყოველთვის ლაპარაკობდა ჭეშმარიტებას, მიუხედავად იმისა, იყო თუ არა ეს ცნობა პოპულარული. ამგვარად, იესომ მოგვცა მაგალითი, რომელსაც უნდა მივბაძოთ, თუ გვსურს, ვასიამოვნოთ ღმერთს (1 პეტრე 2:21).
12. სხვა რომელი მნიშვნელოვანი მიზეზით მოვიდა იესო დედამიწაზე?
12 მაგრამ ღმერთის სამეფოს ქვეშევრდომობით მარადიული სიცოცხლე შესაძლებელი რომ ყოფილიყო ჩვენთვის, იესოს უნდა დაეღვარა თავისი სისხლი. იესოს ორმა მოციქულმა თქვა: „[ჩვენ] მისი სისხლით გავმართლდით“. „მისი ძის, იესო ქრისტეს სისხლი, გვწმენდს ყოველგვარი ცოდვისაგან“ (რომაელთა 5:9; 1 იოანე 1:7). მაშასადამე, იესოს დედამიწაზე მოსვლის ერთ-ერთი მნიშვნელოვანი მიზეზი, იყო ის, რომ მომკვდარიყო ჩვენთვის. მან თქვა: „კაცის ძე არ მოსულა იმისათვის, რომ ემსახურონ, არამედ იმისათვის, რომ თავად მოემსახუროს და თავი [ანუ სიცოცხლე] შესწიროს მრავალთა გამოსასყიდად“ (მათე 20:28). მაგრამ რას ნიშნავს, რომ იესომ სიცოცოხლე შესწირა კაცობრიობის გამოსასყიდად? რატომ იყო ჩვენი გადარჩენისთვის საჭირო, რომ მას თავისი სისხლი დაეღვარა?
მან თავისი სიცოცხლე გაიღო, როგორც გამოსასყიდი
13. ა) რა არის გამოსასყიდი? ბ) რა არის ის გამოსასყიდი, რითაც იესომ გაგვათავისუფლა ცოდვისა და სიკვდილისაგან?
13 სიტყვა „გამოსასყიდი“ გამოიყენება ადამიანების მოტაცებასთან დაკავშირებით. როცა ვინმეს მოიტაცებენ, მის გასათავისუფლებლად შეიძლება მოითხოვონ სათანადო გამოსასყიდი. ამრიგად, გამოსასყიდი არის დატყვევებულის გამათავისუფლებელი საშუალება, რის შედეგადაც მას უნარჩუნდება სიცოცხლე. იესომ თავისი სრულყოფილი სიცოცხლე შესწირა, რათა კაცობრიობა გაეთავისუფლებინა ცოდვისა და სიკვდილის ტყვეობისგან (1 პეტრე 1:18, 19; ეფესელთა 1:7). რატომ იყო საჭირო ასეთი გათავისუფლება?
14. რატომ იყო აუცილებელი გამოსყიდვა?
14 გამოსყიდვა აუცილებელი იყო იმიტომ, რომ ჩვენი წინაპარი ადამი აჯანყდა ღმერთის წინააღმდეგ. ამ უკანონო მოქმედებით ის ცოდვილი გახდა, რადგან ბიბლია გვატყობინებს, რომ „ცოდვა უსჯულოებაა“ (1 იოანე 3:4; 5:17). ამიტომ, ადამი არ იყო ღირსი მიეღო ღმერთისგან ბოძებული მარადიული სიცოცხლე (რომაელთა 6:23). ადამმა დაკარგა სრულყოფილი სიცოცხლე სამოთხეში, დედამიწაზე. მან ეს შესანიშნავი პერსპექტივა თავისი შთამომავლებისთვისაც დაკარგა. მაგრამ შეიძლება იკითხო: „რატომ უნდა მომკვდარიყვნენ მისი შთამომავლები, თუ პირადად ადამმა შესცოდა?“
15. რატომ იტანჯება ადამის შთამომავლობა, თუ პირადად ადამმა შესცოდა?
15 მიზეზი ისაა, რომ, როდესაც ადამი ცოდვილი გახდა, მან ცოდვა და სიკვდილი გადასცა თავის შვილებს, მათ შორის, დღეს მცხოვრებ ყველა ადამიანს (იობი 14:4; რომაელთა 5:12). „ვინაიდან ყველამ შესცოდა და მოკლებულნი არიან ღვთის დიდებას“, — ამბობს ბიბლია (რომაელთა 3:23; მესამე მეფეთა 8:46). ღვთისმოსავმა დავითმაც თქვა: „აჰა, უკანონოდ ჩავისახე და ცოდვით დაორსულდა ჩემზე დედაჩემი“ (ფსალმუნი 50:7). მაშასადამე, ადამიანები კვდებიან ადამისგან მემკვიდრეობით მიღებული ცოდვის გამო. მაგრამ იესოს სიცოცხლის მსხვერპლად შეწირვით როგორღა იყო შესაძლებელი ადამიანის ცოდვისა და სიკვდილის ტყვეობისგან გათავისუფლება?
16. ა) გამოსყიდვაზე ზრუნვისას, როგორ გამოავლინა ღმერთმა პატივისცემა თავისი კანონის მიმართ, რომ „სიცოცხლე სიცოცხლის წილ უნდა ზღონ“? ბ) რატომ იყო იესო ერთადერთი ადამიანი, რომელსაც შეეძლო ჩვენი გამოსყიდვა?
16 ამ შემთხვევაში მოქმედებს ისრაელი ერისთვის ღმერთის კანონში დაწესებული სამართლებრივი პრინციპი, რომლის თანახმად, „სიცოცხლე სიცოცხლის წილ უნდა ზღონ“ (გამოსვლა 21:23; მეორე რჯული 19:21). დაუმორჩილებლობის გამო სრულყოფილმა ადამიანმა ადამმა დაკარგა სრულყოფილი სიცოცხლე დედამიწაზე, სამოთხეში, როგორც თავისთვის, ასევე თავისი შთამომავლობისთვისაც. ადამის მიერ დაკარგულის გამოსასყიდად იესო ქრისტემ შესწირა საკუთარი სრულყოფილი სიცოცხლე. დიახ, იესომ „თავი გასწირა ყველას გამოსახსნელად [შესაბამის გამოსასყიდად, აქ]“ (1 ტიმოთე 2:5, 6). რამდენადაც იესო ადამის მსგავსად სრულყოფილი ადამიანი იყო, მას ეწოდება „უკანასკნელი ადამი“ (1 კორინთელთა 15:45). იესოს გარდა, არც ერთ ადამიანს არ შეეძლო წარედგინა გამოსასყიდი, რადგან ოდესმე მცხოვრები ადამიანებიდან მხოლოდ ის იყო ადამის თანასწორი, როგორც ღმერთის სრულყოფილი მიწიერი ძე (ფსალმუნი 48:8; ლუკა 1:32; 3:38).
17. როდის გადაეცა ღმერთს გამოსასყიდი?
17 იესო მოკვდა ოცდაცამეტი წლინახევრის ასაკში, მაგრამ სიკვდილიდან მესამე დღეს აღდგენილი იქნა. ორმოცი დღის შემდეგ კი ზეცას დაუბრუნდა (საქმეები 1:3, 9–11). ის — კვლავ როგორც სულიერი პიროვნება წარსდგა „ჩვენთვის ღვთის წინაშე“ და თან წაიღო გამომსყიდველური მსხვერპლის ფასი (ებრაელთა 9:12, 24). გამოსასყიდი ღმერთს გადაეცა ზეცაში. აი, ამ დროს ხსნა შესაძლებელი გახდა კაცობრიობისთვის. მაგრამ როდის მიიღებს ის მისგან სარგებელს?
18. ა) როგორ შეგვიძლია დღესვე ვისარგებლოთ გამოსასყიდით? ბ) რა იქნება შესაძლებელი გამოსყიდვის საშუალებით მომავალში?
18 უკვე დღეს შეგვიძლია ვისარგებლოთ იესოს მიერ გაღებული გამომსყიდველური მსხვერპლით. როგორ? ამ მსხვერპლისადმი რწმენის გამოვლენით შეგვიძლია წმინდად ვიდგეთ ღმერთის წინაშე და მოვექცეთ სიყვარულით აღსავსე მის მფარველობაში (გამოცხადება 7:9, 10, 13–15). ღმერთის შეცნობამდე მრავალი ჩვენგანი საზარელ ცოდვებს სჩადიოდა. ჩვენ ახლაც ვუშვებთ შეცდომებს, ზოგჯერ ძალიან სერიოზულსაც. მაგრამ გამოსყიდვის საფუძველზე გულახდილად შეგვიძლია პატიება ვთხოვოთ ღმერთს, დარწმუნებულებმა, რომ მოგვისმენს (1 იოანე 2:1, 2; 1 კორინთელთა 6:9–11). გარდა ამისა, ეს გამოსყიდვა ახლო მომავალში შესაძლებელს გახდის, მივიღოთ ღმერთისგან ნაბოძები მარადიული სიცოცხლე მის სამართლიან ახალ ქვეყნიერებაში (2 პეტრე 3:13). მაშინ, ყველა, ვისაც სწამს გამოსყიდვის, სრულიად გათავისუფლდება ცოდვისა და სიკვდილის მონობისგან. მათ აქვთ პერსპექტივა მიიღონ მარადიული, სრულყოფილი სიცოცხლე!
19. ა) როგორ მოქმედებს შენზე გამოსყიდვა? ბ) პავლე მოციქულის სიტყვების თანახმად, როგორ უნდა გამოვავლინოთ მადლიერება გამოსყიდვისთვის?
19 რას გრძნობ მას შემდეგ, რაც გამოსყიდვის შესახებ გაიგე? ნუთუ სითბოთი არ აივსო შენი გული იეჰოვა ღმერთის მიმართ, როცა გაიგე, თუ როგორ ზრუნავს შენზე, რომ თავისი საყვარელი ძე შემოგწირა? (იოანე 3:16; 1 იოანე 4:9, 10). დაუფიქრდი ქრისტეს მიერ გამომჟღავნებულ სიყვარულსაც. ის ნებაყოფლობით მოვიდა დედამიწაზე, რომ ჩვენთვის მომკვდარიყო. ნუთუ მადლიერები არ უნდა ვიყოთ ამის გამო? მოციქულმა პავლემ აგვიხსნა, როგორ უნდა გამოვავლინოთ ჩვენი მადლიერება: „ქრისტე კი ყველასთვის მოკვდა, რათა ცოცხლებმა თავიანთთვის კი აღარ იცოცხლონ, არამედ იმისთვის, ვინც მათთვის მოკვდა და აღდგა“ (2 კორინთელთა 5:14, 15). გამოავლენ თუ არა მადლიერებას იმით, რომ მოახმარ სიცოცხლეს ღმერთისა და მისი ზეციერი ძის — იესო ქრისტესადმი მსახურებას?
რატომ ახდენდა იესო სასწაულებს
20. რას ვიგებთ იესოს შესახებ, კეთროვნის განკურნების შემთხვევიდან?
20 იესო კარგადაა ცნობილი იმ სასწაულებით, რასაც ახდენდა. მას ღრმა თანაგრძნობა ამოძრავებდა გაჭირვებაში მყოფი ადამიანების მიმართ და მოხარული იყო, ღმერთის მიერ მოცემული ძალები მათ დასახმარებლად გამოეყენებინა. მაგალითად, ერთხელ მასთან მივიდა საშინელი სენით, კეთრით, დაავადებული კაცი და უთხრა: „თუ გსურს, შეგიძლია ჩემი განწმედა“. იესოს «შეეცოდა იგი, გაიწოდა ხელი, შეახო მას და უთხრა: „მსურს, განიწმიდე!“» კეთროვანი მაშინვე განიკურნა! (მარკოზი 1:40–42).
21. როგორ ეხმარებოდა იესო ადამიანებს?
21 განვიხილოთ ბიბლიაში აღწერილი შემდეგი შემთხვევა, როდესაც იესომ უდიდესი თანაგრძნობა გამოავლინა ადამიანთა მიმართ: „მივიდა მასთან დიდძალი ხალხი; თან ჰყავდათ კოჭლები, დასახიჩრებულები, ბრმები, მუნჯები და მრავალი სხვა. დასხეს მის ფერხთით და მან განკურნა ისინი. ასე რომ, უკვირდა ხალხს, ხედავდა რა, რომ მუნჯები ალაპარაკდნენ, დასახიჩრებულნი გამოჯანსაღდნენ, კოჭლებმა გაიარეს და ბრმებმა დაინახეს. და ადიდებდნენ ისრაელის ღმერთს“ (მათე 15:30, 31).
22. რა გვიჩვენებს, რომ იესო ნამდვილად ზრუნავდა იმ ადამიანებზე, რომლებსაც ეხმარებოდა?
22 იესო რომ ნამდვილად ზრუნავდა ამ ტანჯულ ადამიანებზე და გულწრფელად სურდა მათთვის დახმარება, ჩანს იქიდანაც, რაც მან თავის მოწაფეებს უთხრა: „მებრალება ეს ხალხი, სამი დღე რომ ჩემთან არის და საჭმელი კი არაფერი აქვს. არ მინდა მათი უჭმელად გაშვება, რათა გზაში არ დაუძლურდნენ“. იესომ მხოლოდ შვიდი პურითა და რამდენიმე თევზით სასწაულებრივად დააპურა ‘დედაკაცებისა და ბავშვების გარდა ოთხი ათასი კაცი’ (მათე 15:32–38).
23. რამ აღძრა იესო, აღედგინა ქვრივის ვაჟი?
23 ერთხელ იესო გზაზე შეხვდა ქალაქ ნაინიდან გამომავალ დამკრძალავ პროცესიას. ბიბლია ამ შემთხვევას ასე მოგვითხრობს: „მოასვენებდნენ მიცვალებულს, დედისერთა ვაჟს, ხოლო დედა ქვრივი იყო. . . ქვრივის დანახვისას უფალს შეეცოდა იგი“. მან ღრმად თანაუგრძნო მის მწუხარებას და მიმართა ცხედარს: „ჭაბუკო, შენ გეუბნები, ადექ!“ როგორი სასწაულია! „მკვდარი წამოჯდა და იწყო ლაპარაკი, და იესომ ჩააბარა იგი თავის დედას“. წარმოიდგინე, რა გრძნობა დაეუფლებოდა ვაჟის დედას! შენ რას იგრძნობდი? ცნობა ამ შესანიშნავ მოვლენაზე სწრაფად გავრცელდა. ამიტომ, არ არის გასაკვირი, რომ იესო ასე კარგად ცნობილი პიროვნებაა (ლუკა 7:11–17).
24. რას გვიჩვენებს იესოს სასწაულები მომავალთან დაკავშირებით?
24 მაგრამ სასწაულებს, რომლებსაც ახდენდა იესო მხოლოდ დროებითი სარგებელი მოჰქონდა. მის მიერ განკურნებული ადამიანები ისევ სნეულდებოდნენ და აღდგენილებიც კვლავ კვდებოდნენ. იესოს სასწაულები ამტკიცებდა, რომ ის ღმერთის მიერ იყო წარმოგზავნილი და რომ ნამდვილად ღმერთის ძე იყო. ყოველივე ამან დაამტკიცა, რომ ღმერთის ძალით კაცობრიობის ყველა პრობლემა მოგვარდება. დიახ, ამ სასწაულებმა ნაწილობრივ გვიჩვენა, თუ რა მოხდება დედამიწაზე ღმერთის სამეფოს მმართველობის დროს. მაშინ მშივრები დაპურდებიან, სნეულები განიკურნებიან და თვით მკვდრებიც აღდგებიან! ადამიანებს მეტად აღარასოდეს დაამწუხრებს ავადმყოფობა, სიკვდილი ან რომელიმე სხვა უბედურება. მართლაც, როგორი კურთხევა იქნება ეს! (გამოცხადება 21:3, 4; მათე 11:4, 5).
ღმერთის სამეფოს მმართველი
25. რომელ სამ პერიოდად შეიძლება დაიყოს იესოს ცხოვრება?
25 ღმერთის ძის ცხოვრება იყოფა სამ პერიოდად. დასაწყისში, სანამ ადამიანი გახდებოდა, ჩვენთვის უცნობი რაოდენობის წლები მამასთან ერთად გაატარა ზეცაში. შემდეგ დედამიწაზე იცხოვრა ოცდაცამეტ წელნახევარი. ამჟამად კი, იესო ისევ ზეცაში ცხოვრობს, როგორც სულიერი პიროვნება. როგორი მდგომარეობა უკავია ზეცაში მას აღდგენის შემდეგ?
26. რა დაიმსახურა იესომ დედამიწაზე თავისი ერთგულებით?
26 ცხადია, რომ იესო მეფე უნდა გამხდარიყო. თვით ანგელოზმა ახარა მარიამს: „უკუნისამდე იმეფებს. . . და მის მეფობას არ ექნება დასასრული“ (ლუკა 1:33). მიწიერი მსახურებისას ის ყოველთვის საუბრობდა ღმერთის სამეფოს შესახებ. იესო თავის მიმდევრებს ასწავლიდა, ასე ელოცათ: „მოვიდეს სუფევა [სამეფო, აქ] შენი, და იყოს ნება შენი, ვითარცა ცათა შინა, ეგრეცა ქვეყანასა ზედა“. და მიმართავდა მათ: „უწინარეს ეძიეთ ღვთის სასუფეველი და მისი სიმართლე“ (მათე 6:10, 33). თავისი ერთგულებით დედამიწაზე იესომ დაამტკიცა, რომ ღირსია, იყოს ღმერთის სამეფოს მეფე. ზეცაში დაბრუნებისთანავე დაიწყო თუ არა მან მეფობა?
27. ა) რას აკეთებდა იესო ზეცაში დაბრუნების შემდეგ? ბ) რა გააკეთა იესომ პირველად, როგორც ღმერთის სამეფოს მეფემ?
27 არა, მას მეფობა მაშინვე არ დაუწყია. მოციქული პავლე მიგვითითებს ფსალმუნის 109:1-ზე და გვიხსნის: „მან კი [იესომ] ერთი მსხვერპლი შესწირა ცოდვებისათვის და სამუდამოდ დაჯდა ღვთის მარჯვნივ. მას შემდეგ კი ელის, სანამ მისი მტრები მის ფერხთა კვარცხლბეკად იქცევიან“ (ებრაელთა 10:12, 13). იესო ელოდა იეჰოვას ბრძანებას: „იბატონე შენს მტერთა შორის“ (ფსალმუნი 109:2). როცა დადგა ეს დრო, მან დაიწყო ზეცის გაწმენდა სატანისა და მისი ანგელოზებისგან. ზეცაში მომხდარი ამ ომის შედეგი გადმოიცემა შემდეგი სიტყვებით: „ახლა დადგა ჩვენი ღვთის ხსნა, ძალა და მეფობა და მისი ქრისტეს ხელმწიფება, ვინაიდან გადმოგდებულ იქნა ჩვენი ძმების ცილისმწამებელი, რომელიც ცილს სწამებდა მათ დღე და ღამე ჩვენი ღვთის წინაშე“ (გამოცხადება 12:10). როგორც ამ წიგნის ერთ-ერთ წინა თავში აღწერილი ფაქტები ცხადყოფს, ეს ომი ზეცაში უკვე მოხდა და ამჟამად იესო ქრისტე მეფობს მტრებს შორის.
28. ა) რას გააკეთებს ქრისტე ახლო მომავალში? ბ) რა უნდა გავაკეთოთ, რომ იესომ დაგვიცვას?
28 ახლო მომავლში ქრისტე და მისი ზეციერი ანგელოზები ზომებს მიიღებენ, რომ იხსნან დედამიწა წუთისოფლის ყველა თანამედროვე მთავრობისგან (დანიელი 2:44; გამოცხადება 17:14). ბიბლიაში ნათქვამია, რომ მას აქვს „ბასრი მახვილი, რომელიც შემუსრავს ერებს, და იგი დამწყემსავს მათ რკინის კვერთხით“ (გამოცხადება 19:11–16). მოახლოებული განადგურების დროს დაცვის ღირსი რომ ვიყოთ, ჩვენ უნდა გამოვავლინოთ იესო ქრისტესადმი რწმენა, უნდა გავხდეთ მისი მოწაფეები და დავემორჩილოთ, როგორც ჩვენს ზეციერ მეფეს (იოანე 3:36). გააკეთებ შენ ამას?
[სურათი 58-ე გვერდზე]
იესომ მიატოვა სადურგლო საქმიანობა, რომ მონათლულიყო და გამხდარიყო იეჰოვას ცხებული.
[სურათი 63-ე გვერდზე]
იესო იყო სრულყოფილი ადამიანის, ადამის, თანასწორი.
[სურათი 64-ე გვერდზე]
სიბრალულის გრძნობით აღძრული იესო ეხმარებოდა ავადმყოფებსა და მშივრებს.
[სურათი 67-ე გვერდზე]
მკვდრების აღდგენით იესომ ცხადყო, თუ რას გააკეთებს უფრო დიდი მასშტაბით ღმერთის სამეფოს მმართველობის დროს.