თავი პირველი

როგორ გავიგოთ, რას მოითხოვს ღმერთი?

რა მნიშვნელოვან ცნობას შეიცავს ბიბლია? (1)

ვინ არის ბიბლიის ავტორი? (2)

რატომ უნდა ვისწავლოთ ბიბლია? (3)

1. ბიბლია ღვთისგან ბოძებული ძვირფასი ძღვენია. ის შეიძლება შევადაროთ წერილს, რომელიც მოსიყვარულე მამამ შვილებს მისწერა. ბიბლია მოგვითხრობს, თუ ვინ არის ჭეშმარიტი ღმერთი და რა პრინციპები აქვს. გვიხსნის იმასაც, თუ როგორ გადავჭრათ პრობლემები და როგორ მივაღწიოთ ნამდვილ ბედნიერებას. მხოლოდ ბიბლიიდან ვიგებთ, როგორ ვასიამოვნოთ ღმერთს (ფსალმუნები 1:1—3; ესაია 48:17, 18).

2. ბიბლიის წერა ძვ. წ. 1513 წელს დაიწყო. ის 1 600 წელზე მეტ ხანს იწერებოდა და 40-მდე მამაკაცი წერდა. ბიბლია 66 პატარა წიგნისგან შედგება. ეს მამაკაცები ღვთისგან შთაგონებით წერდნენ მისივე სიტყვებს და არა საკუთარ აზრებს. სწორედ ამიტომ, ბიბლიის ავტორი ღმერთია და არა ადამიანი (2 ტიმოთე 3:16, 17; 2 პეტრე 1:20, 21).

3. ღმერთმა იზრუნა იმაზე, რომ ბიბლია სწორად გადაწერილიყო და შემონახულიყო. ტირაჟით ბიბლიას ვერც ერთი წიგნი ვერ გაუტოლდება. ყველას არ გაუხარდება, ბიბლიას რომ სწავლობთ, მაგრამ რა წინააღმდეგობასაც არ უნდა შეხვდეთ, არ შეწყვიტოთ შესწავლა. თქვენი მარადიული მომავალი ღვთის გაცნობასა და მისი ნების შესრულებაზეა დამოკიდებული (მათე 5:10—12; იოანე 17:3).