ცნობა სამეფოს შესახებ №35

ეყვარებათ ოდესმე ადამიანებს ერთმანეთი?

მოყვასის მიმართ სიყვარული განელდა

დღეს მილიონობით ადამიანი დაბნეულობასა და გასაცოდავებულ მდგომარეობაშია და ყველანაირი იმედი გადაწურული აქვს. ერთი ყოფილი კომერსანტი ქალი იხსენებდა: „ერთ საღამოს კარზე მეზობელმა ქვრივმა ქალმა დამიკაკუნა და შემომჩივლა, რომ მარტოობას გრძნობდა. თავაზიანად, მაგრამ პირდაპირ ვუთხარი, რომ არ მეცალა. მან შეწუხებისთვის მომიბოდიშა და წავიდა“.

სამწუხაროდ, ქვრივმა იმ ღამეს თავი მოიკლა. მოგვიანებით კომერსანტმა ქალმა აღიარა, რომ ეს მისთვის „მწარე გაკვეთილი“ იყო.

მოყვასის მიმართ სიყვარულის უქონლობა ხშირად ტრაგიკულია. ბოსნია და ჰერცეგოვინაში, იუგოსლავიის ყოფილ ნაწილში, ეთნიკური კონფლიქტების დროს მილიონზე მეტი ადამიანი სახლებიდან გააძევეს და ათი ათასობით დახოცეს. ვინ ჩაიდინა ყოველივე ეს? „ჩვენმა მეზობლებმა, — მოთქვამდა მშობლიური სოფლიდან გამოდევნილი გოგონა. — ჩვენ ვიცნობდით მათ“.

რუანდაში ასი ათასობით ადამიანი, უმეტეს შემთხვევაში, თავისივე მოყვასმა გამოასალმა სიცოცხლეს. „ხუტუ და ტუტსი ერთად [ცხოვრობდნენ], ერთმანეთს უმოყვრდებოდნენ, არ აინტერესებდათ და არც კი იცოდნენ, ვინ იყო ხუტუ და ვინ — ტუტსი“, — გვაუწყებს „ნიუ-იორკ ტაიმზი“. „უეცრად რაღაც შეიცვალა“ და „დაიწყო ხოცვა-ჟლეტა“.

მსგავსად ამისა, ისრაელში ებრაელები და არაბები გვერდიგვერდ ცხოვრობენ, მაგრამ ბევრს სძულს ერთმანეთი. ანალოგიური სიტუაციაა მრავალ კათოლიკესა და პროტესტანტს შორის ირლანდიაში და სხვა ქვეყნებში მცხოვრები ადამიანების მზარდ რაოდენობას შორის. ისტორიას არ ახსოვს, რომ ოდესმე ადამიანებს ასე სძულებოდათ ერთმანეთი.

რატომ განელდა მოყვასისადმი სიყვარული?

პასუხს ჩვენი შემოქმედი გვაძლევს. მისი სიტყვა, ბიბლია, დროის იმ პერიოდს, რომელშიც ვცხოვრობთ, ‘უკანასკნელ დღეებს’ უწოდებს. ეს ის პერიოდია, რომლის განმავლობაშიც, როგორც წინასწარმეტყველება ამბობს, ადამიანები „მოძულენი“ იქნებიან. იესო ქრისტემ იწინასწარმეტყველა, რომ ამ ‘საზარელი ჟამის’ პერიოდში, რომელსაც ბიბლია ‘წუთისოფლის აღსასრულსაც’ უწოდებს, ‘მრავალს გაუნელდებოდა სიყვარული’ (2 ტიმოთე 3:1–5; მათე 24:3, 12).

ამიტომ, დღეს სიყვარულის უქონლობა იმის ერთ-ერთი მტკიცებაა, რომ ამ წუთისოფლის უკანასკნელ დღეებში ვცხოვრობთ. საბედნიეროდ, ეს იმასაც ნიშნავს, რომ უღვთო ადამიანთა წუთისოფელს მალე სამართლიანი ახალი ქვეყნიერება შეცვლის, სადაც სიყვარული იმეფებს (მათე 24:3–14; 2 პეტრე 2:5; 3:7, 13).

მაგრამ გვაქვს იმის რწმენის საფუძვლიანი მიზეზი, რომ ასეთი ცვლილებები შესაძლებელია — რომ ყველა ერთმანეთს შეიყვარებს და მშვიდობიან ცხოვრებას ისწავლის?

მოყვასის სიყვარული რეალობაა

„ვინ არის ჩემი მოყვასი?“ — შეეკითხა რჯულის მცოდნე იესოს პირველ საუკუნეში. უეჭველია, ის მოელოდა, რომ იესო ეტყოდა: „შენი მოძმე იუდეველები“. მაგრამ იესომ მოუთხრო გულმოწყალე სამარიელზე, რითაც აჩვენა, რომ სხვა ეროვნების ადამიანიც ჩვენი მოყვასია (ლუკა 10:29–37; იოანე 4:7–9).

იესომ ხაზგასმით აღნიშნა, რომ ღვთისადმი სიყვარულის შემდეგ ჩვენი ცხოვრების მამოძრავებელი ძალა მოყვასისადმი სიყვარული უნდა იყოს (მათე 22:34–40). მაგრამ თუ ჰყვარებია ჭეშმარიტად ოდესმე ადამიანთა რომელიმე ჯგუფს თავისი მოყვასი? ადრინდელ ქრისტიანებს უყვარდათ! ისინი ცნობილი იყვნენ სხვების სიყვარულით (იოანე 13:34, 35).

რის თქმა შეიძლება დღევანდელობის შესახებ? ავლენს ვინმე ქრისტეს მსგავსად სიყვარულს? ერთ-ერთი ენციკლოპედია აღნიშნავს: „იეჰოვას მოწმეები აღადგენენ და კვლავ აფუძნებენ ადრინდელ, იესოსა და მისი მოწაფეების დროინდელ, ქრისტიანობას. . . ყველანი ძმები არიან“ (Encyclopedia Canadiana).

რას ნიშნავს ეს? იმას, რომ იეჰოვას მოწმეები არაფერს — არც რასას, არც ეროვნებას და არც ეთნიკურ წარმოშობას — არ რთავენ ნებას, შეაძულოს თავიანთი მოყვასი. და არც არავის მოკლავენ, რადგანაც, ხატოვნად რომ ვთქვათ, თავიანთი მახვილებისგან სახნისები გამოჭედეს და შუბებისგან — ნამგლები (ესაია 2:4). სინამდვილეში, იეჰოვას მოწმეები იმით არიან ცნობილი, რომ თავიანთი ინიციატივით ეხმარებიან მოყვასს (გალატელთა 6:10).

გასაკვირი არ არის, რომ კალიფორნიის ერთმა გაზეთმა შენიშნა: „მთელ მსოფლიოს იეჰოვას მოწმეთა შეხედულებებით რომ ეცხოვრა, შეწყდებოდა სისხლის ღვრა და სიძულვილი და ყველგან სიყვარული იმეფებდა“ (Sacramento Union). უნგრული ჟურნალის ავტორი აღნიშნავს: „იმ დასკვნამდე მივედი, რომ დედამიწაზე მხოლოდ იეჰოვას მოწმეებს რომ ეცხოვრათ, ომები შეწყდებოდა და პოლიციელთა მოვალეობა მხოლოდ საგზაო მოძრაობის წესების დაცვა და პასპორტების გაცემა იქნებოდა“ (Ring).

საყოველთაოდ აღიარებულია, რომ ძალიან დიდი, მსოფლიო მასშტაბის ცვლილებებია საჭირო ადამიანებმა რომ ერთმანეთი შეიყვარონ. როგორ მოხდება ეს ცვლილებები? (გთხოვთ, იხილოთ უკანა გვერდი).

როცა ყველას ერთმანეთი ეყვარება

ლოცვა, რომელსაც იესო ქრისტე მთაზე ქადაგებისას ასწავლიდა, ცხადყოფს, რომ ძალიან მალე შთამბეჭდავი ცვლილებები მოხდება. ის ასწავლიდა: «მოვიდეს სუფევა [„სამეფო“, აქ] შენი, და იყოს ნება შენი, ვითარცა ცათა შინა, ეგრეცა ქვეყანასა ზედა» (მათე 6:10).

რა არის ღვთის სამეფო? ეს ნამდვილი მთავრობაა, ზეციერი მთავრობა. სწორედ ამიტომ ეწოდება მას „ცათა სასუფეველი“. მის მმართველად მამამ თავისი ძე, იესო, „მშვიდობის მთავარი“, დანიშნა (მათე 10:7; ესაია 9:5, 6; ფსალმუნი 71:1–8).

რა მოუვა ამ სიძულვილით აღსავსე ქვეყნიერებას, როცა ღვთის სამეფო დამყარდება? ეს ‘სამეფო შემუსრავს და დააქცევს’ ანგარებით სავსე ყველა მიწიერ მთავრობას (დანიელი 2:44). ბიბლია ხსნის: „გადადის წუთისოფელი. . . ღვთის ნების აღმსრულებელი კი რჩება უკუნისამდე“ (1 იოანე 2:17).

ღვთის ახალი ქვეყნიერების შესახებ ბიბლია ამბობს: „მართალნი დაიმკვიდრებენ ქვეყანას და იარსებებენ მასზე უკუნისამდე“ (ფსალმუნი 36:9–11, 29; იგავნი 2:21, 22). რა დიდებული დრო იქნება! „აღარ იქნება სიკვდილი. გლოვა, გოდება და ტკივილიც აღარ იქნება“ (გამოცხადება 21:4). მკვდრებსაც კი სიცოცხლე დაუბრუნდებათ, და მთელი დედამიწა ნამდვილ სამოთხედ გადაიქცევა (ესაია 11:6–9; 35:1, 2; საქმეები 24:15).

ღვთის ახალ ქვეყნიერებაში რომ ვიცხოვროთ, უნდა გვიყვარდეს ერთმანეთი, როგორც ამას ღმერთი გვასწავლის (1 თესალონიკელთა 4:9). ერთმა აღმოსავლეთში მცხოვრებმა ბიბლიის შემსწავლელმა თქვა: „მოველი დროს, როდესაც, როგორც ბიბლია გვპირდება, ყველა ერთმანეთის სიყვარულს ისწავლის“. და შეგვიძლია დარწმუნებული ვიყოთ, რომ ღმერთი შეასრულებს თავის დაპირებებს! „ვთქვი, — ამბობს ის, — და დიაღაც მოვახდენ“ (ესაია 46:11).

მაგრამ, რომ გაიხარო ღვთის სამეფოს კურთხევებით, უნდა მიიღო ბიბლიური შემეცნება, როგორც ამას მთელ მსოფლიოში მილიონობით გულწრფელი ადამიანი აკეთებს (იოანე 17:3). ამაში დაგეხმარება 32-გვერდიანი ბროშურა „რას მოითხოვს ღმერთი ჩვენგან?“ თუ გსურთ ამ ბროშურის მიღება, შეავსეთ წინა გვერდზე მოცემული ტალონი და გაგზავნეთ უახლოეს მისამართზე.

□ მსურს მივიღო ბროშურა „რას მოითხოვს ღმერთი ჩვენგან?“

□ გთხოვთ, დამიკავშირდეთ სახლში ბიბლიის უსასყიდლო შესწავლასთან დაკავშირებით.

[საავტორო უფლება დაცულია 2 გვერდზე]

Sniper and funeral in Bosnia: Reuters/Corbis-Bettmann