ქრისტიანული შეხვედრები „სიყვარულისა და კარგი საქმეებისკენ“ აღგვძრავს

საუკუნეებია, რაც იეჰოვას ხალხი ორგანიზებულად იკრიბება. ძველად ისრაელში წელიწადში სამჯერ დიდი დღესასწაულების აღსანიშნავად ყველა მამაკაცი იერუსალიმში მიემგზავრებოდა (კან. 16:16). პირველ საუკუნეში ქრისტიანები თანამორწმუნეთა სახლებში რეგულარულად იკრიბებოდნენ (ფლმ. 1, 2). დღეს ჩვენც ვესწრებით კრებებსა და კონგრესებს, რადგან ერთად შეკრება თაყვანისმცემლობის განუყოფელი ნაწილია (ფსალმ. 95:6; კოლ. 3:16).

² კრების შეხვედრები თითოეული დამსწრისთვის მეტად მნიშვნელოვანია. ბიბლიაში ყოველი მეშვიდე კარვობის დღესასწაულის შესახებ ვკითხულობთ: „შეკრიბეთ ხალხი: კაცები, ქალები, ბავშვები და თქვენს ქალაქებში მცხოვრები უცხოელები, რათა მოუსმინონ იეჰოვას, თავიანთ ღმერთს, მეტი გაიგონ მის შესახებ, ეშინოდეთ მისი და გულდასმით შეასრულონ ამ კანონის ყველა სიტყვა“ (კან. 31:12). ამ მუხლიდან ვხედავთ, რომ ერთად შეკრების ძირითადი მიზანი იეჰოვას მიერ ჩვენი განსწავლაა (ეს. 54:13). შეხვედრები ერთმანეთის უკეთ გაცნობისა და ურთიერთგამხნევების შესაძლებლობასაც გვაძლევს.

კრების შეხვედრები

³ მოწაფეები, რომლებიც ახ. წ. 33 წლის ორმოცდამეათე დღის დღესასწაულის შემდეგ იკრიბებოდნენ, გამუდმებით სწავლობდნენ მოციქულებისგან და „ერთი აზრით გაერთიანებულნი ყოველდღე ერთად იყვნენ ტაძარში“ (საქ. 2:42, 46). როცა ქრისტიანები ღვთის თაყვანსაცემად ერთად იკრიბებოდნენ, კითხულობდნენ როგორც წმინდა წერილებს, ისე მოციქულებისა და მოწაფეების წერილებს (1 კორ. 1:1, 2; კოლ. 4:16; 1 თეს. 1:1; იაკ. 1:1). ამ შეხვედრებზე საჯარო ლოცვებიც წარმოითქმებოდა (საქ. 4:24—29; 20:36). ზოგჯერ ქადაგებისას მომხდარ შემთხვევებს ჰყვებოდნენ (საქ. 11:5—18; 14:27, 28). აგრეთვე განიხილებოდა ბიბლიური სწავლებები და ღვთის შთაგონებით წარმოთქმული წინასწარმეტყველებები. ისიც განიხილებოდა, თუ რამდენად მნიშვნელოვანი იყო ქრისტიანისთვის შესაფერისად ცხოვრება, ღვთის ერთგულება და სასიხარულო ცნობის გულმოდგინედ ქადაგება (რომ. 10:9, 10; 1 კორ. 11:23—26; 15:58; ეფეს. 5:1—33).

⁴ დღეს ქრისტიანული შეხვედრები ისევე ტარდება, როგორც პირველ საუკუნეში. ჩვენ ყურად ვიღებთ ებრაელების 10:24, 25-ში ღვთის შთაგონებით ჩაწერილ სიტყვებს: „ყურადღებიანები ვიყოთ . . . ნუ მოვიშლით ერთად შეკრებას ზოგიერთებივით, პირიქით, გავამხნეოთ ერთმანეთი, მით უმეტეს, რომ ვხედავთ იმ დღის მოახლოებას“. ამ მძიმე, ბოლო დღეებში უფრო მეტად გვჭირდება გამხნევება, ამიტომ რეგულარულად უნდა დავესწროთ შეხვედრებს. ერთად შეკრება სულიერი სიძლიერისა და ერთგულების შენარჩუნებაში გვეხმარება (რომ. 1:11, 12). დღეს ჩვენც „უკუღმართი და გახრწნილი“ ხალხის გარემოცვაში ვცხოვრობთ. ჩვენ უარვყავით „უღვთოება და ქვეყნიური სურვილები“ (ფილ. 2:15, 16; ტიტ. 2:12—14). ღვთის ხალხთან ერთად ყოფნას და ღვთის სიტყვის შესწავლას არაფერი სჯობს! (ფსალმ. 84:10) ქვემოთ მიმოვიხილავთ იმ შეხვედრებს, რომლებიც სულიერი სიმტკიცის შენარჩუნებაში გვეხმარება.

შაბათ-კვირის შეხვედრა

⁵ შაბათ-კვირის შეხვედრა იწყება ბიბლიური მოხსენებით, რომელიც ფართო საზოგადოებისთვისაა განკუთვნილი. საჯარო მოხსენებები ხელს უწყობს კრებაში ყველა დამსწრის, მათ შორის იმ დაინტერესებულების სულიერი მოთხოვნილებების დაკმაყოფილებას, რომლებიც ასეთ შეხვედრას პირველად ესწრებიან (საქ. 18:4; 19:9, 10).

⁶ იეჰოვას მოწმეთა საჯარო შეხვედრები იესო ქრისტეს, მისი მოციქულებისა და სხვა მოწაფეების მიერ ჩატარებული შეხვედრების მსგავსად ტარდება. რასაკვირველია, იესოს სიტყვის წარმოთქმაში ბადალი არ მოეძებნებოდა. იესოს შესახებ ამბობდნენ: „მის მსგავსად ჯერ არავის ულაპარაკია!“ (იოან. 7:46). როგორც ბიბლიაში ვკითხულობთ: „ხალხი განცვიფრებული იყო იმით, თუ როგორ ასწავლიდა, რადგან . . . ღვთიური ძალაუფლებით ასწავლიდა“ (მათ. 7:28, 29). ვინც იესოს სიტყვებს ყურად იღებდა, კურთხევები არ აკლდა (მათ. 13:16, 17). მოციქულები მის მაგალითს მიჰყვებოდნენ. საქმეების 2:14—36-ში ვკითხულობთ, რომ ახ. წ. 33 წლის ორმოცდამეათე დღის დღესასწაულზე პეტრემ შთამბეჭდავი მოხსენება წარმოთქვა, რის შედეგადაც დაახლოებით 3 000 ადამიანი მოინათლა. მოგვიანებით, ათენში პავლეს მიერ წარმოთქმული მოხსენების მოსმენის შემდეგ ზოგიერთმა ირწმუნა უფალი (საქ. 17:22—34).

⁷ შაბათ-კვირის შეხვედრაზე, აგრეთვე სარაიონო, რეგიონულ და საერთაშორისო კონგრესებზე წარმოთქმული საჯარო მოხსენებები დღესაც მილიონობით ადამიანზე ახდენს სასიკეთო გავლენას. ასეთი მოხსენებები გვეხმარება, რომ ქრისტიანული სწავლებების თანახმად ვიცხოვროთ და მხარი დავუჭიროთ სამეფოს საქმეს. როდესაც საჯარო მოხსენებაზე დაინტერესებულებსა თუ ნებისმიერ მსურველს ვიწვევთ, ამით მათ შესაძლებლობა ეძლევათ, გაეცნონ ბიბლიის ძირითად სწავლებებს.

⁸ საჯარო მოხსენებები სხვადასხვა საკითხს ეხება. მოხსენებებში განიხილება ბიბლიური სწავლებები, წინასწარმეტყველებები, ოჯახურ ცხოვრებასთან დაკავშირებული ბიბლიური პრინციპები, ქრისტიანული ნორმები და აგრეთვე ის, თუ რა სირთულეებს ხვდებიან ახალგაზრდები. ზოგ მოხსენებაში ყურადღება მახვილდება იეჰოვას შემოქმედებაზე, ზოგში კი — იმაზე, თუ რა ძლიერ რწმენას, გაბედულებასა და ერთგულებას ავლენდნენ ძველ დროში მცხოვრები ღვთის მსახურები და ჩვენ რისი სწავლა შეგვიძლია მათგან.

⁹ საჯარო მოხსენებამ მოქმედებისკენ რომ აღგვძრას, ჩვენც უნდა მოვძებნოთ მომხსენებლის მიერ მოყვანილი ბიბლიური მუხლები და ყურადღებით მოვუსმინოთ, თუ როგორ ახსნის ამ მუხლებს (ლუკ. 8:18). საჯარო მოხსენების მოსმენის შემდეგ კი შესაბამისად უნდა ვიმოქმედოთ (1 თეს. 5:21).

¹⁰ თუ მომხსენებლები საკმარისად არიან, საჯარო მოხსენება ყოველკვირეულად წარმოითქმება. მომხსენებლებს ხშირად მეზობელი კრებებიდან იწვევენ. იმ შემთხვევაში, თუ მომხსენებლების ნაკლებობაა, შეძლებისდაგვარად ყველაფერი უნდა გაკეთდეს იმისათვის, რომ საჯარო მოხსენებები მაინც წარმოითქვას.

¹¹ საჯარო მოხსენების შემდეგ ტარდება „საგუშაგო კოშკის“ შესწავლა, რომლის დროსაც სასწავლო სტატია კითხვა-პასუხებით განიხილება. „საგუშაგო კოშკის“ შესწავლის მეშვეობით იეჰოვა დროულად გვაწვდის სულიერ საზრდოს.

¹² სასწავლო სტატიებში ხშირად მახვილდება ყურადღება იმაზე, თუ როგორ გამოიყენონ ქრისტიანებმა ბიბლიური პრინციპები ყოველდღიურ ცხოვრებაში, რათა წინ აღუდგნენ „ქვეყნიერების სულს“ და შეინარჩუნონ ზნეობრივი სიწმინდე (1 კორ. 2:12). „საგუშაგო კოშკის“ სტატიები სულ უფრო მეტ ნათელს ჰფენს ბიბლიურ სწავლებებსა და წინასწარმეტყველებებს, რისი წყალობითაც შესაძლებლობა გვეძლევა, ვიცხოვროთ ჭეშმარიტების თანახმად და ვიაროთ მართალთა გზაზე (ფსალმ. 97:11; იგავ. 4:18). „საგუშაგო კოშკის“ შესწავლაზე დასწრება და მონაწილეობა გვეხმარება, ყოველთვის გვქონდეს იეჰოვას მიერ აღთქმულ ახალ ქვეყნიერებაში ცხოვრების იმედი (რომ. 12:12; 2 პეტ. 3:13). ეს აგრეთვე გვეხმარება, განვივითაროთ სულის ნაყოფი და გავიძლიეროთ იეჰოვასადმი მსახურების სურვილი (გალ. 5:22, 23). „საგუშაგო კოშკის“ შესწავლა გვიმტკიცებს რწმენას, რათა განსაცდელები გადავიტანოთ, ჩვენს მომავალს „მტკიცე საძირკველი“ ჩავუყაროთ და „ჭეშმარიტ სიცოცხლეს“ ჩავეჭიდოთ (1 ტიმ. 6:19; 1 პეტ. 1:6, 7).

¹³ ამ სულიერმა საზრდომ ჩვენზე სასიკეთო გავლენა რომ იქონიოს, საჭიროა, შესწავლისთვის წინასწარ მოვემზადოთ ინდივიდუალურად ან ოჯახთან ერთად, წავიკითხოთ მითითებული მუხლები და შევეცადოთ, შეხვედრის დროს კომენტარები საკუთარი სიტყვებით გავაკეთოთ. ამგვარად, ჭეშმარიტება უფრო ღრმად გაიდგამს ფესვებს ჩვენს გულებში. ამავე დროს, ჩვენი კომენტარებით სხვებიც გამხნევდებიან. თუ და-ძმების კომენტარებს ყურადღებით მოვუსმენთ, ყოველკვირეული შესწავლა ჩვენთვის უფრო ნაყოფიერი იქნება.

შუა კვირის შეხვედრა

¹⁴ იეჰოვას მოწმეთა დარბაზში ყოველკვირეულად ტარდება კიდევ ერთი შეხვედრა „ჩვენი ქრისტიანული ცხოვრება და მსახურება“. ამ შეხვედრის პროგრამა სამი ნაწილისგან შედგება. მისი მიზანია, რომ ღვთისთვის გამოსადეგი მსახურები ვიყოთ (2 კორ. 3:5, 6). შეხვედრის განრიგი და განსახილველი მასალა იბეჭდება ყოველთვიურ ბუკლეტში „ჩვენი ქრისტიანული ცხოვრება და მსახურება — პროგრამა სავარჯიშოებით“. ბუკლეტში აგრეთვე დაბეჭდილია საუბრის ნიმუშები.

¹⁵ შეხვედრის პირველი ნაწილი, რომელსაც „ღვთის სიტყვის საუნჯე“ ეწოდება, უკეთ გვაცნობს ამა თუ იმ ბიბლიურ მონაკვეთთან დაკავშირებულ მოვლენებს, მის კონტექსტს და გვანახვებს მის პრაქტიკულ ღირებულებას. შეხვედრის ამ ნაწილში წარმოითქმება მოხსენება, იკითხება ბიბლია და განიხილება მუხლები ბიბლიის კითხვის ყოველკვირეული პროგრამიდან. ბუკლეტში „ჩვენი ქრისტიანული ცხოვრება და მსახურება“ მოცემულია ილუსტრაციები და დატოვებულია ადგილი ჩანაწერების გასაკეთებლად. თუ ბიბლიურ მონაკვეთებს საფუძვლიანად განვიხილავთ, უკეთესი ქრისტიანები და მასწავლებლები გავხდებით, და „ყოველმხრივ აღჭურვილი და მომზადებული“ ვიქნებით ნებისმიერი კარგი საქმისთვის (2 ტიმ. 3:16, 17).

¹⁶ შეხვედრის მეორე ნაწილს ეწოდება „ქრისტიანული მსახურება“. მისი მიზანი ქადაგებასა და სწავლებაში დახელოვნებაა. შეხვედრის ამ ნაწილში განიხილება საუბრის ნიმუშის ვიდეორგოლები, რის შემდეგაც და-ძმები წარმოადგენენ ინსცენირებებს. ეს ნაწილი გვეხმარება, დავეუფლოთ „სწავლულთა ენას“, რათა ვიცოდეთ, „როგორ ვუპასუხოთ დაღლილს“ (ეს. 50:4).

¹⁷ შეხვედრის მესამე ნაწილში „ქრისტიანული ცხოვრება“ განიხილება ის, თუ როგორ გამოვიყენოთ ბიბლიური პრინციპები ყოველდღიურ ცხოვრებაში (ფსალმ. 119:105). ამ ნაწილში უმეტესი დრო „კრების ბიბლიის შესწავლას“ ეთმობა. „საგუშაგო კოშკის“ შესწავლის მსგავსად, კრების ბიბლიის შესწავლაც კითხვა-პასუხებით მიმდინარეობს.

¹⁸ როდესაც კრებაში მოდის ახალი ბუკლეტი „ჩვენი ქრისტიანული ცხოვრება და მსახურება — პროგრამა სავარჯიშოებით“, უხუცესთა საბჭოს კოორდინატორი ან სხვა უხუცესი, მისი დამხმარე, ყურადღებით ეცნობა მის შინაარსს და ანაწილებს დავალებებს. ყოველკვირეულად შეხვედრას უძღვება უხუცესთა საბჭოს მიერ შერჩეული ერთ-ერთი უხუცესი, რომელიც კარგი მასწავლებელია. მას ევალება შეხვედრის დროულად დაწყება და დასრულება, ინსცენირებით გამომსვლელთა შექება და მათთვის რჩევების მიცემა.

¹⁹ თუ ყოველთვის მოვემზადებით შეხვედრისთვის „ჩვენი ქრისტიანული ცხოვრება და მსახურება“, დავესწრებით და მონაწილეობასაც მივიღებთ, გავიღრმავებთ ბიბლიურ ცოდნას, უკეთ ჩავწვდებით ბიბლიურ პრინციპებს, მეტი შემართებით ვიქადაგებთ სასიხარულო ცნობას და დავხელოვნდებით მოწაფეების მომზადების საქმეში. ისინიც, ვინც ჯერ არ მონათლულან, მაგრამ ამ შეხვედრას ესწრებიან, გამხნევდებიან სასიამოვნო ურთიერთობებითა და სულიერ თემებზე საუბრით. ამ და სხვა შეხვედრებისთვის მომზადებაში დაგვეხმარება „საგუშაგო კოშკის ბიბლიოთეკა“, „JW ბიბლიოთეკა“, „საგუშაგო კოშკის ონლაინ ბიბლიოთეკა“ და იეჰოვას მოწმეთა დარბაზის ბიბლიოთეკა. დარბაზის ბიბლიოთეკაში არის იეჰოვას მოწმეების პუბლიკაციები, „საგუშაგო კოშკის პუბლიკაციების საძიებელი“, „იეჰოვას მოწმეების საკვლევი სახელმძღვანელო“, ბიბლიის სხვადასხვა თარგმანი, სიმფონია, ლექსიკონი და სხვა დამხმარე სახელმძღვანელოები. კრების ბიბლიოთეკით სარგებლობა შესაძლებელია შეხვედრის დაწყებამდე ან დამთავრების შემდეგ.

სამქადაგებლო მსახურების შეხვედრა

²⁰ კვირის განმავლობაში სხვადასხვა დროს მაუწყებელთა ჯგუფები მცირე ხნით იკრიბებიან სამქადაგებლო მსახურების შეხვედრაზე. ჩვეულებრივ, ასეთი შეხვედრები სახლებში ან სხვა მოსახერხებელ ადგილას ტარდება. ეს შეხვედრა შეიძლება იეჰოვას მოწმეთა დარბაზშიც ჩატარდეს. თუ სამქადაგებლო მსახურების ჯგუფებში ბევრი მაუწყებელი არ იქნება და მსახურების შეხვედრები რამდენიმე ადგილას ჩატარდება, მაუწყებლებს გაუადვილდებათ შეხვედრაზე დასწრება და შემდეგ სამქადაგებლო უბნებამდე მისვლა. გარდა ამისა, პატარა სამქადაგებლო ჯგუფში ჩამტარებელი უფრო სწრაფად გაანაწილებს მაუწყებლებს, რაც უბნამდე მისვლისთვის საჭირო დროს დაზოგავს. ამასთანავე, ჯგუფის ზედამხედველი შეძლებს უფრო მეტი ყურადღება დაუთმოს თავის ჯგუფში მყოფ მაუწყებლებს. უმჯობესია, სამქადაგებლო მსახურების ჯგუფები ცალ-ცალკე შეიკრიბონ, მაგრამ მდგომარეობიდან გამომდინარე შეიძლება საჭირო იყოს ორი ან მეტი ჯგუფის ერთად შეკრება. მაგალითად, შუა კვირაში, როდესაც შედარებით ნაკლები მაუწყებელი მსახურობს, შესაძლებელია რამდენიმე ჯგუფისთვის ერთი სამქადაგებლო შეხვედრის ან მთელი კრებისთვის დარბაზში ან სხვა მოსახერხებელ ადგილას გაერთიანებული სამქადაგებლო მსახურების შეხვედრის ჩატარება. ამგვარად, მაუწყებლები შეძლებენ ერთმანეთთან თანამშრომლობას. შეიძლება დღესასწაულების დროსაც ხელსაყრელი იყოს იეჰოვას მოწმეთა დარბაზში შეკრება. შესაძლოა აგრეთვე მოსახერხებელი იყოს სამქადაგებლო მსახურების გაერთიანებული შეხვედრის ჩატარება „საგუშაგო კოშკის“ შესწავლის შემდეგ.

²¹ თუ ჯგუფები ცალ-ცალკე იკრიბებიან, სამქადაგებლო მსახურების შეხვედრები, ძირითადად, ჯგუფის ზედამხედველმა უნდა ჩაატაროს. დროდადრო ჯგუფის ზედამხედველს შეუძლია თავის დამხმარეს ან სხვა შესაფერის ძმას სთხოვოს სამქადაგებლო მსახურების შეხვედრის ჩატარება. ჩამტარებელმა ისეთი საკითხი უნდა განიხილოს, რომელიც ჯგუფში შემავალ მაუწყებლებს სამქადაგებლო მსახურებაში დაეხმარება. მაუწყებლების განაწილების შემდეგ ჯგუფიდან ერთ-ერთი წარმოთქვამს ლოცვას. მაუწყებლები მალევე უნდა გავიდნენ მსახურებაში. როგორც წესი, სამქადაგებლო მსახურების შეხვედრა 5—7 წუთი გრძელდება, თუმცა, თუ ის კრების შემდეგ ტარდება, უფრო მცირე დრო უნდა დაეთმოს. ეს შეხვედრა ისე უნდა ჩატარდეს, რომ და-ძმები წახალისდნენ და პრაქტიკული რჩევები მიიღონ. შედარებით ახლები ან ისინი, ვისაც მსახურებაში დახმარება სჭირდებათ, ჩამტარებელმა გამოცდილ მაუწყებლებთან უნდა გაანაწილოს.

ახალჩამოყალიბებული თუ მცირერიცხოვანი კრებები

²² და-ძმების რიცხვის ზრდასთან ერთად კრებების რაოდენობაც იზრდება. სარაიონო ზედამხედველი ახალი კრების ჩამოყალიბების თაობაზე რეკომენდაციას ფილიალს წარუდგენს. ზოგ შემთხვევაში უმჯობესია, პატარა ჯგუფი უახლოეს კრებას მიეკუთვნებოდეს.

²³ ზოგჯერ მცირერიცხოვანი კრებები მხოლოდ დებისგან შედგება. ასეთ შემთხვევაში დამ, რომელიც ლოცვას წარმოთქვამს ან შეხვედრას უძღვება, ბიბლიური პრინციპის თანახმად, თავზე უნდა დაიფაროს (1 კორ. 11:3—16). და ისე უნდა იჯდეს, რომ ჯგუფს უყურებდეს. მართალია, ის შეხვედრებზე მოხსენებებით არ გამოდის, მაგრამ კითხულობს ორგანიზაციის მიერ მოწოდებულ მასალას და აკეთებს კომენტარს. მრავალფეროვნებისთვის მან შეიძლება მასალა ჯგუფთან ერთად განიხილოს ან ინსცენირების სახით წარმოადგინოს. ფილიალის დავალებით ერთ-ერთი და მიმოწერას აწარმოებს ფილიალთან და ორგანიზებას გაუწევს კრების შეხვედრების ჩატარებას. დროთა განმავლობაში, როცა კრებას ძმები შეემატებიან, ამ მოვალეობებს ისინი გადაიბარებენ.

სარაიონო კონგრესები

²⁴ ყოველწლიურად ორგანიზება ეწევა ორი ერთდღიანი სარაიონო კონგრესის ჩატარებას, რომლებსაც ერთ რაიონში შემავალი კრებები ესწრებიან. ამ სასიხარულო ღონისძიებებზე თითოეულ დამსწრეს შეუძლია გამოეხმაუროს ბიბლიაში ჩაწერილ მოწოდებას: „ფართოდ გახსენით გულისკარი!“ (2 კორ. 6:11—13). იეჰოვას ორგანიზაცია არსებული საჭიროებების გათვალისწინებით ამზადებს ბიბლიაზე დაფუძნებულ პროგრამას. საკონგრესო პროგრამა წარმოდგენილია მოხსენებების, ინსცენირებების, მონოლოგების ან ინტერვიუების მეშვეობით. ამ ღონისძიებაზე მიღებული დროული მითითებები ყველა დამსწრისთვის გამამხნევებელია. კონგრესებზე მოუნათლავი მაუწყებლები იეჰოვასადმი მიძღვნის ნიშნად ინათლებიან.

რეგიონული კონგრესები

²⁵ წელიწადში ერთხელ უფრო დიდი შეხვედრები, სამდღიანი რეგიონული კონგრესები ტარდება. ეს კონგრესები რამდენიმე რაიონში შემავალი კრებებისთვის იმართება. პატარა ფილიალებმა შეიძლება პრაქტიკულად მიიჩნიონ, რომ ყველა კრებამ ერთსა და იმავე ადგილას ჩაატაროს კონგრესი. არსებული მდგომარეობის ან ორგანიზაციიდან მიღებული მითითებების გათვალისწინებით სხვადასხვა ქვეყანაში კონგრესებს შეიძლება სხვადასხვაგვარად გაეწიოს ორგანიზება. დროდადრო ზოგ ქვეყანაში საერთაშორისო და სპეციალური კონგრესებიც იმართება. ასეთ კონგრესებს შეიძლება სხვადასხვა ქვეყნიდან ჩამოსული ათიათასობით მოწმე დაესწროს. უამრავმა ადამიანმა სამეფოს შესახებ სასიხარულო ცნობა სწორედ ასეთი დიდი შეხვედრების წყალობით გაიგო.

²⁶ იეჰოვასადმი მიძღვნილი ხალხისთვის კონგრესებს სიხარული მოაქვს, რადგან ერთობლივად განადიდებენ იეჰოვას. ასეთ კონგრესებზე უფრო მეტი ნათელი ეფინება ჭეშმარიტებას. ზოგ კონგრესზე ვიღებთ ახალ პუბლიკაციებს, რომლებიც განკუთვნილია პირადი შესწავლისთვის, კრებაზე განხილვისა თუ სამქადაგებლო მსახურებისთვის. გარდა ამისა, კონგრესებზე უამრავი ადამიანი ინათლება. ასეთი ღონისძიებები სულიერად გვზრდის. კონგრესები იმის დასტურია, რომ იეჰოვას ხალხი მსოფლიო საძმოს წარმოადგენს და ჭეშმარიტი ქრისტიანებისთვის დამახასიათებელი ნიშნით, სიყვარულით, გამოირჩევა (იოან. 13:35).

²⁷ კონგრესებზე და კრების შეხვედრებზე დასწრება ძალას გვმატებს, რომ შევასრულოთ იეჰოვას ნება და არ მოვექცეთ ქვეყნიერების გავლენაში, რომელმაც შესაძლოა რწმენა შეგვირყიოს. გარდა ამისა, ეს შეხვედრები ჩვენს ზეციერ მამას განადიდებს (ფსალმ. 35:18; იგავ. 14:28). ჩვენ მადლიერნი ვართ იეჰოვასი, რომ ამ ბოლო დღეებში ასეთი შეკრებების საშუალებით სულიერად გვაძლიერებს.

ქრისტეს სიკვდილის გახსენების საღამო

²⁸ ქრისტეს სიკვდილის გახსენების საღამოს წელიწადში ერთხელ იეჰოვას მოწმეთა ყველა კრებაში აღნიშნავენ (1 კორ. 11:20, 23, 24). იეჰოვას ხალხისთვის ეს ყველაზე მნიშვნელოვანი შეხვედრაა. ბიბლია მოგვიწოდებს, რომ აღვნიშნოთ ეს მოვლენა (ლუკ. 22:19).

²⁹ უფლის გახსენების საღამო სწორედ იმ დღეს აღინიშნება, რომელ დღესაც ძველად ებრაელები აღნიშნავდნენ პასექს. ამ თარიღს ბიბლია გვამცნობს (გამ. 12:2, 6; მათ. 26:17, 20, 26). პასექი იყო დღესასწაული, რომელიც ძვ. წ. 1513 წელს ისრაელი ერის ეგვიპტიდან გამოსვლის აღსანიშნავად დაწესდა და რომელსაც ებრაელები ყოველწლიურად აღნიშნავდნენ. იეჰოვამ მათ უთხრა, რომ მთვარის კალენდრის მიხედვით პირველი თვის მეთოთხმეტე დღეს ეჭამათ საპასექო კრავი და დაეტოვებინათ ეგვიპტე, სადაც მონები იყვნენ (გამ. 12:1—51). ამ თარიღის დადგენა შემდეგნაირად ხდება: მას შემდეგ, რაც გაზაფხულის ბუნიობის უახლოეს პერიოდში იერუსალიმში ახალი მთვარე გამოჩნდება, უნდა გადაითვალოს 13 დღე. როგორც წესი, გახსენების საღამო გაზაფხულის ბუნიობის შემდეგ პირველ სავსემთვარეობას ემთხვევა.

³⁰ იესოს სიტყვებიდან, რომლებიც მათეს 26:26—28-შია ჩაწერილი, ვიგებთ, თუ როგორ უნდა აღინიშნოს გახსენების საღამო. ეს მისტიკური რიტუალი კი არ არის, არამედ სიმბოლური მნიშვნელობის მქონე ვახშამია, რომლის დროსაც სიმბოლოებს ისინი იღებენ, ვისაც ზეციერ სამეფოში ქრისტესთან ერთად მეფობის იმედი აქვს (ლუკ. 22:28—30). უფლის გახსენების საღამოზე დასწრება შეუძლია ყველა მიძღვნილ ქრისტიანს და დაინტერესებულ ადამიანს. ამგვარად ისინი მადლიერებას გამოხატავენ იეჰოვასადმი, რომელმაც კაცობრიობის სახსნელად თავისი მხოლოდშობილი ძე გაიღო. გახსენების საღამოს აღნიშვნამდე წარმოითქმება სპეციალური საჯარო მოხსენება, რომლის მიზანია, მსმენელები განაწყოს ამ საღამოს აღსანიშნავად და დაინტერესებულებს ბიბლიის შესწავლის სურვილი გაუღვივოს.

³¹ იეჰოვას მოწმეები სიხარულით იკრიბებიან და „ერთმანეთს სიყვარულისა და კარგი საქმეებისკენ“ ახალისებენ (ებრ. 10:24). „ერთგული და გონიერი მონა“ კრებაზე განსახილველ მასალას ჩვენს სულიერ მოთხოვნილებებს არგებს. როგორც იეჰოვას მსახურები, ისე დაინტერესებულები, ყოველმხრივ უნდა ეცადონ, რეგულარულად დაესწრონ ამ შეხვედრებს, რათა სულიერად გაძლიერდნენ. თუ მადლიერები ვიქნებით იმ ყველაფრისთვის, რასაც იეჰოვა თავისი ორგანიზაციის მეშვეობით გვაწვდის, ეს ერთიანობის შენარჩუნებაში დაგვეხმარება. ყველაზე მთავარი ისაა, რომ ამ შეხვედრებზე იეჰოვას განვადიდებთ (ფსალმ. 111:1).