ბაალ-ზებუბი

[ბატონი ბუზებისა]

ბაალი, რომელსაც ფილისტიმელები ეკრონში სცემდნენ თაყვანს. არსებობს იმის დამამტკიცებელი ფაქტები, რომ ებრაელები ცრუღმერთების სახელებს მსგავსი ჟღერადობის დამამცირებელი სახელებით ცვლიდნენ. ასე რომ, დაბოლოება „ზებუბი“ შესაძლოა რას-შამრას ტექსტების მიხედვით ბაალის ერთ-ერთი წოდების „ზაბულის“ (მთავარი) ან „ზებულის“ სახეცვლილებაა. მაგრამ ზოგი მეცნიერის აზრით ეს სახელი მას მისმა თაყვანისმცემლებმა მიაკუთვნეს, რადგან მას ბუზების წარმომქმნელად და შესაბამისად ახლო აღმოსავლეთში გავრცელებული ამ მწერის ბატონ-პატრონად თვლიდნენ. ზოგის აზრით კი ბაალ-ზებუბი იყო ღმერთი, რომელიც ორაკულს ბუზის ფრენისა თუ ბზუილის მიხედვით აცხადებდა (2მფ. 1:2).

როცა ისრაელის მეფე ახაზია სერიოზულად დაშავდა, მან მაცნეები გაგზავნა ბაალ-ზებუბთან იმის საკითხავად, გამოჯანმრთელდებოდა თუ არა. თავისი წინასწარმეტყველის, ელიას მეშვეობით იეჰოვამ გაკიცხა ახაზია: „ნუთუ არ არის ღმერთი ისრაელში, ეკრონის ღმერთთან, ბაალ-ზებუბთან რომ გზავნი შენს ხალხს საკითხავად? ვეღარ ადგები საწოლიდან, რომელზეც წევხარ, რადგან მოკვდები“ (2მფ. 1:2—8; იხ. ბელზებელი).