იასონი

[შესაძლოა ნაწარმოები იყოს ფუძიდან, რომელიც ნიშნავს განკურნებას]

სახელგანთქმული ქრისტიანი თესალონიკეში, რომელმაც პავლე და სილა სტუმართმოყვარულად მიიღო მაკედონიაში მათი პირველი მოგზაურობის დროს. შურით აღვსილი იუდეველები იასონის სახლში შეიჭრნენ, რომ პავლე და სილა გამოეყვანათ იქიდან, თუმცა ვერ იპოვეს ისინი და მათ ნაცვლად იასონი წაიყვანეს. მას ბრალი დასდეს, რომ ხალხს კეისრის წინააღმდეგ განაწყობდა, თუმცა იასონი და მასთან მყოფნი თავდებით გაათავისუფლეს (სქ. 17:5—10).

კორინთიდან რომაელებისთვის მიწერილ წერილში, რომელიც პავლემ მაშინ დაწერა, როცა მაკედონიიდან საბერძნეთში ჩავიდა, მოციქულმა მათ იასონის მოკითხვა გადასცა (რმ. 16:21). თუ პავლემ თესალონიკეში მცხოვრები იასონი იგულისხმა, მაშინ შეგვიძლია ვივარაუდოთ, რომ იმ დროს ის პავლესთან ერთად კორინთში იყო ჩასული. პავლე მას თავის ნათესავს უწოდებს, რაც შეიძლება ისე გავიგოთ, რომ ისინი თანამემამულეები იყვნენ, თუმცა ნათესავად ნათარგმნი ბერძნული სიტყვის პირველადი მნიშვნელობაა „ერთი თაობის სისხლით ნათესავები“. თუ იასონი და პავლე მართლა ახლო ნათესავები იყვნენ, მაშინ გასაკვირი არაა, რომ თესალონიკეში პავლე სწორედ მასთან დარჩა.