ღვთიური სწავლება დემონთა მოძღვრებების წინააღმდეგ
„ზოგიერთები განდგებიან რწმენისაგან, დაუჯერებენ მაცდურ სულებს და ეშმაკთა მოძღვრებებს“ (1 ტიმოთე 4:1).
1. რომელი ბრძოლის შუაგულში იმყოფებიან ქრისტიანები?
წარმოიდგინე, რომ მთელი სიცოცხლის მანძილზე ცხოვრობ რაიონში, სადაც ომი მიმდინარეობს. როგორი იქნებოდა, რომ დაწოლისას და ადგომისას მოგესმინა სასროლი იარაღისა და არტილერიის გრუხუნი? სამწუხაროდ, მსოფლიოს ზოგიერთ ნაწილში ადამიანები ზუსტად ასეთ პირობებში ცხოვრობენ. თუმცა, სულიერი გაგებით ყველა ქრისტიანი ამგვარად ცხოვრობს. ისინი იმყოფებიან უდიდესი ბრძოლის შუაგულში, რომელიც მძვინვარებს დაახლოებით 6 000 წლის განმავლობაში და რომელიც ჩვენს დღეებში უფრო გაძლიერდა. რას წარმოადგენს ეს ხანგრძლივი ომი? ეს არის ბრძოლა ჭეშმარიტებისა სიცრუის წინააღმდეგ, ღვთიური სწავლებისა დემონთა მოძღვრებების წინააღმდეგ. ყოველ შემთხვევაში, მოწინააღმდეგეთაგან ერთ-ერთის მოქმედების განხილვით, არ იქნება გაზვიადება, რომ ვუწოდოთ მას კაცობრიობის ისტორიის ყველაზე უფრო ულმობელი და უფრო სასიკვდილო კონფლიქტი.
2. ა) პავლეს სიტყვების თანახმად, რომელი ორი მხარე ეწინააღმდეგება ერთიმეორეს? ბ) რას გულისხმობდა პავლე გამოთქმაში ‘რწმენა’?
2 ტიმოთესადმი წერილში მოციქულმა პავლემ აღნიშნა ამ კონფლიქტის ორი მხარე: „სული გარკვევით ამბობს, რომ უკანასკნელ დროებში ზოგიერთები განდგებიან რწმენისაგან, დაუჯერებენ მაცდურ სულებს და ეშმაკთა მოძღვრებებს“ (1 ტიმოთე 4:1). ყურადღება მიაქციე, რომ დემონთა მოძღვრებები განსაკუთრებულად „უკანასკნელ დროებში“ მოახდენდნენ ძლიერ გავლენას. როგორც პავლეს დღეებში იყო განხილული, ჩვენ ზუსტად ასეთ დროში ვცხოვრობთ. ამასთანავე შენიშნე, რომ იმას, რაც ეწინააღმდეგება დემონთა მოძღვრებებს ეწოდება ‘რწმენა’. აქ ‘რწმენა’ ნიშნავს ღმერთის მიერ წარმოთქმულ, ღვთაებრივ, ინსპირირებულ სიტყვას, რომელსაც ბიბლია შეიცავს. ასეთი რწმენა სიცოცხლის მომცემია. ის ასწავლის ქრისტიანებს ღმერთის ნების შესრულებას. ის მარადიული სიცოცხლისკენ მიმყვანი ჭეშმარიტებაა (იოანე 3:16; 6:40).
3. ა) ჭეშმარიტებასა და სიცრუეს შორის ბრძოლაში რა მოსდის მრავალ მსხვერპლს? ბ) ვინ დგას დემონთა მოძღვრებების უკან?
3 ყველა, ვინც განუდგება რწმენას, ვერ მოიპოვებს მარადიულ სიცოცხლეს. ომში ასეთი ადამიანები წარმოადგენენ მსხვერპლს. რაოდენ ტრაგიკული შედეგი ელის მას, ვინც ნებას რთავს საკუთარ თავს, ცდუნდეს დემონთა მოძღვრებებით! (მათე 24:24). როგორ შეგვიძლია ყოველ ჩვენთაგანს პირადად მოვერიდოთ ასეთ განადგურებას? — ცრუ მოძღვრებების სრული უარყოფით, რომლებიც ემსახურებიან ‘ეშმაკთა მთავრის’ სატანა-ეშმაკის მიზანს (მათე 12:24). დანამდვილებით შეიძლება ითქვას, რომ სატანის მოძღვრებები არის სიცრუე, რადგან სატანა — „სიცრუის მამაა“ (იოანე 8:44). დაფიქრდი, რამდენად მოხერხებულად გამოიყენა მან სიცრუე, რომ შეეცდინა ჩვენი პირველი მშობლები.
დემონთა მოძღვრებები მხილებულია
4, 5. რა მოატყუა სატანამ ევას და რატომ იყო ეს მოქმედება ასე ბოროტი?
4 ეს შემთხვევები ჩაწერილია ბიბლიაში, დაბადების 3:1–5-ში. გველის გამოყენებით, სატანამ მიმართა ქალს, ევას და ჰკითხა: „მართლა გითხრათ ღმერთმა, ბაღის არცერთი ხის ნაყოფი არ შეჭამოთო?“ კითხვა თითქოს უვნებელია, მაგრამ კიდევ ერთხელ მიაქციე მას ყურადღება. „მართლა?“ სატანის კითხვაში ჩანდა გაკვირვება, თითქოს ამბობდა: „რატომ უნდა ამბობდეს ღმერთი მსგავს რამეს?“
5 თავისი გულუბრყვილობით ევამ დაადასტურა, რომ ყოველივე ზუსტად ასე იყო. მან იცოდა ამ საკითხთან დაკავშირებული ღვთიური სწავლება: ღმერთმა უთხრა ადამს, რომ ისინი მოკვდებოდნენ, თუ შეჭამდნენ კეთილისა და ბოროტის შეცნობის ხიდან (დაბადება 2:16, 17). სატანის შეკითხვამ ნამდვილად აღძრა ევას ინტერესი, ამიტომაც მოისმინა მისი მტკიცების მთავარი აზრი: „უთხრა გველმა დედაკაცს: არ მოკვდებით“. რა დიდი ბოროტება დევს ამ სიტყვებში! სატანამ დაადანაშაულა იეჰოვა, ჭეშმარიტებისა და სიყვარულის ღმერთი, შემოქმედი, მიწიერი შვილების მოტყუებაში! (ფსალმუნი 30:6; 1 იოანე 4:16; გამოცხადება 4:11).
6. როგორ შეეცილა სატანა იეჰოვას გულკეთილობასა და ხელმძღვანელობის უფლებაში?
6 მაგრამ სატანამ თქვა უფრო მეტიც. მან გააგრძელა: „მაგრამ იცის ღმერთმა, რომ როგორც კი შეჭამთ, თვალი აგეხილებათ და შეიქნებით ღმერთივით კეთილისა და ბოროტის შემცნობელნი“. სატანის სიტყვების თანახმად, იეჰოვა ღმერთს, რომელმაც უხვად უზრუნველყო ჩვენი პირველი მშობლები, სურდა წაერთმია მათთვის რაღაც საოცარი. თითქოს უნდოდა რომ ისინი არ ყოფილიყვნენ ღმერთის მსგავსნი. ამრიგად, სატანამ ეჭვი შეიტანა ღმერთის გულკეთილობაში. ის, ასევე, ხელს უწყობდა, ადამიანებში საკუთარი სურვილების დაკმაყოფილებასა და ღმერთის კანონების განზრახ უგულებელყოფას, იმის თქმით, რომ ასეთი მოქმედებით სარგებელს ნახავდნენ. სინამდვილეში, იმის მტკიცებით, რომ ღმერთს არა აქვს უფლება დააწესოს ადამიანთა მოქმედების საზღვრები, სატანა შეეცილა ღმერთს, საკუთარი ქმნილების ხელმძღვანელობის უფლებაში.
7. როდის დაიწყო ეშმაკთა მოძღვრებები და რა მსგავსი ვითარებაა დღეს?
7 სატანის ამ სიტყვებიდან მოყოლებული გაისმის დემონთა მოძღვრებები. ეს დამღუპველი მოძღვრებები ჯერ კიდევ ხელს უწყობს მსგავს უსამართლო პრინციპებს. როგორც ედემის ბაღში, ასევე დღესაც, სატანა, რომელსაც სხვა მეამბოხე სულები შეუერთდნენ, ჯერ ეწინააღმდეგება ღმერთის უფლებას, დააწესოს მოქმედების ნორმა. ის ახლაც უარყოფს იეჰოვას ხელმძღვანელობას და ცდილობს, აღძრას ადამიანები ზეციური მამისადმი დაუმორჩილებლობისკენ (1 იოანე 3:8, 10).
8. რა დაკარგეს ადამმა და ევამ ედემში, ხოლო როგორ დამტკიცდა იეჰოვას სიტყვების ჭეშმარიტება?
8 ღვთიურ სწავლებებსა და დემონთა მოძღვრებებს შორის გაჩაღებული ბრძოლის პირველ შეტაკებაში ადამმა და ევამ მიიღეს მცდარი გადაწყვეტილება და დაკარგეს მარადიული ცხოვრების იმედი (დაბადება 3:19). განვლო წლებმა, მათმა სხეულებმა, რომელთა მდგომარეობა თანდათან უარესდებოდა, საკმაოდ კარგად დაამოწმა თუ ვინ ცრუობდა და ვინ ამბობდა ჭეშმარიტებას ედემის ბაღში. მაგრამ, ფიზიკურ სიკვდილამდე ასობით წლით ადრე, ჭეშმარიტებასა და სიცრუეს შორის ბრძოლაში, ისინი იქცნენ პირველ მსხვერპლად, როდესაც დაისაჯნენ შემოქმედის, სიცოცხლის წყაროს მიერ, როგორც სიცოცხლის უღირსნი. სწორედ მაშინ, მოკვდნენ ისინი სულიერად (ფსალმუნი 35:10; შეადარე ეფესელთა 2:1).
დემონთა მოძღვრებები დღეს
9. როგორ მოქმედებდა დემონთა მოძღვრებები საუკუნეების განმავლობაში?
9 „გამოცხადებაში“ ჩაწერილი სიტყვების თანახმად, მოციქული იოანე წმინდა სულის მეშვეობით იყო გადაყვანილი ‘უფლის დღეში’, რომელიც დაიწყო 1914 წელს (გამოცხადება 1:10). იმ დროს სატანა და მისი დემონები გადმოგდებულნი იყვნენ ზეციდან დედამიწის მიდამოებში, რაც ჩვენი დიდებული შემოქმედის მოწინააღმდეგისთვის დიდი მარცხი იყო. მისი ხმა, რომელიც გამუდმებით ადანაშაულებდა იეჰოვას მსახურებს, მეტად აღარ ისმოდა ზეცაში (გამოცხადება 12:10). მაგრამ, როგორ განვითარდა დედამიწაზე დემონთა მოძღვრებები, რომელიც ედემში მომხდარი მოვლენებით დაიწყო? ჩანაწერი გვატყობინებს: „გადმოგდებულ იქნა დიდი დრაკონი, ძველი გველი, რომელსაც ეშმაკი და სატანა ჰქვია, მსოფლიოს მაცდუნებელი“ (გამოცხადება 12:9). სატანისგან გამომდინარე სიცრუემ მთელი ქვეყნიერება დაიყოლია! არ არის გასაკვირი, რომ სატანას „ამ ქვეყნიერების მთავარი“ ეწოდება! (იოანე 12:31; 16:11).
10, 11. რა მხრივ არიან სატანა და მისი დემონები აქტიურები დღეს?
10 აღიარა კი სატანამ მარცხი, ზეციდან მისი გადმოგდების შემდეგ? არავითარ შემთხვევაში! მან გადაწყვიტა, იბრძოლოს ღვთიური სწავლებისა და მასზე ჩაჭიდებული ადამიანების წინააღმდეგ. გადმოგდებული ზეციდან, სატანა აგრძელებს თავის ომს: „განრისხდა დრაკონი [სატანა] დედაკაცზე და წავიდა, რომ ომი დაეწყო სხვა მის თესლთაგანებთან, რომლებიც იცავენ ღმერთის მცნებებს და რომელთაც აქვთ იესოს მოწმობა“ (გამოცხადება 12:17).
11 გარდა იმისა, რომ კაცობრიობაზე ძალაუფლების შენარჩუნების მცდელობით იბრძვის ღმერთის მსახურების წინააღმდეგ, სატანა ავსებს ქვეყნიერებას თავისი პროპაგანდით. გამოცხადებაში, უფლის დღის ერთ-ერთ ხილვაში, მოციქულმა იოანემ იხილა სამი გარეული ცხოველი, რომელიც სიმბოლურად გამოხატავდა სატანას, მის მიწიერ პოლიტიკურ ორგანიზაციასა და დღეს გაბატონებულ მსოფლიო მპყრობელს. სამი ცხოველის პირიდან გამოვიდნენ ბაყაყები. რას ასიმბოლოებდა ყოველივე ეს? იოანე წერს: „ესენი ეშმაკის სულები არიან [ეს დემონთა მიერ შთაგონებული გამონათქვამებია, აქ]; ისინი ახდენენ სასწაულებს, გამოდიან მთელი მსოფლიოს მეფეებთან, რათა შეკრიბონ ისინი საომრად ყოვლისმპყრობელი ღმერთის ამ დიდი დღისათვის“ (გამოცხადება 16:14). ნათელია, რომ დემონთა მოძღვრებების მოქმედება დედამიწაზე ძალიან აქტიურია. სატანა და მისი დემონები ისევ იბრძვიან ღვთიური სწავლების წინააღმდეგ და იმოქმედებენ ასე, სანამ იესო ქრისტე, მესიანური მეფე, არ აღკვეთავს მათ მოქმედებებს თავისი ძალით (გამოცხადება 20:2).
დემონთა მოძღვრებების გამოცნობა
12. ა) რატომ არის შესაძლებელი, წინააღმდეგობა გავუწიოთ დემონთა მოძღვრებებს? ბ) როგორ ცდილობს სატანა, მიაღწიოს თავის მიზანს ღმერთის მსახურებთან დაკავშირებით?
12 შეუძლიათ თუ არა ღვთისმოშიშ ადამიანებს წინააღუდგნენ დემონთა მოძღვრებებს? რასაკვირველია, მათ შეუძლიათ წინააღმდეგობის გაწევა ორი მიზეზის გამო. პირველი ისაა, რომ ღვთიური სწავლება ბევრად უფრო ძლიერია; მეორე — იეჰოვამ ამხილა სატანას ხრიკები, რომ ჩვენ შევძლოთ წინააღუდგეთ მათ. პავლე მოციქულის სიტყვების თანახმად „ჩვენთვის უცნობი არ არის მისი ზრახვები“ (2 კორინთელთა 2:11). ჩვენ ვიცით, რომ თავისი მიზნის მისაღწევად სატანა იყენებს დევნას (2 ტიმოთე 3:12). მაგრამ, ის ცდილობს უფრო მზაკვრულად მოახდინოს ზეგავლენა ღმერთის მსახურების გონებასა და გულზე. მან შეაცდინა ევა და ჩაუდო გულში მცდარი სურვილები. ის ცდილობს იგივე გააკეთოს დღესაც. პავლე სწერდა კორინთელებს: „ვშიშობ, რომ, როგორც გველმა თავისი მზაკვრობით აცდუნა ევა, ასევე არ გაირყვნეს თქვენი აზროვნებაც ქრისტეში გულუბრყვილობით“ (2 კორინთელთა 11:3). დაუკვირდი, საერთოდ რამდენად გარყვნა მან ადამიანთა აზროვნება.
13. ედემის ბაღში მომხდარი შემთხვევებით დაწყებული რა ცრუ მოძღვრებების შესახებ ელაპარაკა სატანა კაცობრიობას?
13 ევასთან საუბრისას სატანამ დაადანაშაულა იეჰოვა სიცრუეში და თქვა, რომ შემოქმედის მიმართ დაუმორჩილებლობით ადამიანებს შეეძლოთ, ღმერთების მსგავსი ყოფილიყვნენ. დღეს, კაცობრიობის დაცემული მდგომარეობა ამტკიცებს, რომ სატანაა ცილისმწამებელი და არა იეჰოვა. დღეს ადამიანები არ არიან ღმერთები! მიუხედავად ამისა, სატანის პირველ სიცრუეს მოჰყვა სხვა ტყუილები. მან წამოაყენა იდეა, რომ ადამიანის სული უკვდავია, ანუ არ კვდება. ამრიგად, მან აცდუნა კაცობრიობა სხვა შესაძლებლობით, ყოფილიყვნენ ღმერთების მსგავსი. შემდეგ, ამ ცრუ სწავლებაზე დაფუძნებით მან ჩამოაყალიბა მოძღვრებები ჯოჯოხეთის ცეცხლის, განსაწმენდელის, სპირიტიზმისა და წინაპრებისადმი თაყვანისცემის შესახებ. ეს ტყუილები დღემდე იმონებენ ასობით მილიონ ადამიანს (მეორე რჯული 18:9–13).
14, 15. რას შეიცავს ჭეშმარიტება სიკვდილისა და ადამიანის მომავალთან დაკავშირებული იმედის შესახებ?
14 რასაკვირველია, ის, რაც იეჰოვამ უთხრა ადამს იყო ჭეშმარიტება. ადამი მოკვდა ღმერთის წინაშე შეცოდების გამო (დაბადება 5:5). სიკვდილისთანავე ადამი და მისი შთამომავლები გახდნენ მკვდარი სულები და ამიტომ დაკარგეს აზროვნებისა და მოქმედების უნარი (დაბადება 2:7, აქ; ეკლესიასტე 9:5, 10; ეზეკიელი 18:4). ამრიგად, ადამისგან მემკვიდრეობით მიღებული ცოდვის გამო ყველა ადამიანი, სული კვდება (რომაელთა 5:12). მაგრამ, ჯერ კიდევ ედემში, იეჰოვამ დადო აღთქმა თესლის შესახებ, რომელიც გაილაშქრებდა ეშმაკის ნამოქმედარის წინააღმდეგ (დაბადება 3:15). ის თესლი იყო იესო ქრისტე, ღმერთის მხოლოდშობილი ძე. იესო მოკვდა უცოდველი და სიცოცხლით რომელიც გაწირა, გამოისყიდა მოკვდავი კაცობრიობა. მათ, ვინც მორჩილებით ამჟღავნებს რწმენას იესოს მიმართ, აქვთ ხელსაყრელი შესაძლებლობა მიიღონ მარადიული სიცოცხლე, რომელიც დაკარგა ადამმა (იოანე 3:36; რომაელთა 6:23; 1 ტიმოთე 2:5, 6).
15 კაცობრიობისთვის ნამდვილი იმედი არის არა სულის უკვდავების ბუნდოვანი იდეა, არამედ გამოსყიდვა. ეს ღვთიური სწავლებაა. ეს არის ჭეშმარიტება. აგრეთვე, ეს იეჰოვას სიყვარულისა და სიბრძნის შესანიშნავი მტკიცებაა (იოანე 3:16). რამდენად მადლიერნი უნდა ვიყოთ იმისათვის, რომ შევიცანით ჭეშმარიტება და განვთავისუფლდით ამ საკითხებთან დაკავშირებულ დემონთა მოძღვრებისგან (იოანე 8:32).
16. რა არის იმის შედეგი, რომ ხანგრძლივი პერიოდის განმავლობაში ადამიანები ენდობიან საკუთარ სიბრძნეს?
16 ედემის ბაღში გამოთქმული სიცრუით სატანამ აღძრა ადამსა და ევაში სწრაფვა ღმერთისგან დამოუკიდებლობისა და საკუთარ სიბრძნეზე მინდობისაკენ. დღეს, ხანგრძლივი პერიოდის შემდეგ, ჩვენ ვხედავთ შედეგს: დამნაშავეობას, ეკონომიკურ პრობლემებს, ომებს და ქვეყნიერებაზე არსებულ აღმაშფოთებელ არათანასწორობას. ამიტომ, არ არის გასაკვირი, რომ ბიბლია ამბობს: „ამ წუთისოფლის სიბრძნე უგუნურებაა ღმერთის წინაშე“! (1 კორინთელთა 3:19). მიუხედავად ამისა, უგუნურების გამო, მრავალ ადამიანს ურჩევნია დაიტანჯოს, ვიდრე ყურადღება მიაპყროს იეჰოვას სწავლებებს (ფსალმუნი 13:1–3; 106:17). ქრისტიანები, რომლებმაც მიიღეს ღვთიური სწავლება, ერიდებიან ამ ხაფანგში ჩავარდნას.
17. რა ‘ცრუმეცნიერება’ წამოაყენა სატანამ და რას წარმოადგენს მისი ნაყოფები?
17 პავლემ მისწერა ტიმოთეს: „ო, ტიმოთე, გაუფრთხილდი მობარებულს, განერიდე უშვერ ლაქლაქს და ცრუმეცნიერულ კამათს, რასაც მიჰყვნენ და ზოგიერთები რწმენას ჩამოშორდნენ“ (1 ტიმოთე 6:20, 21). ეს ‘ცრუმეცნიერება’, ასევე, წარმოადგენს დემონთა მოძღვრებებს. პავლეს დღეებში მისით, როგორც ჩანს, გადმოიცემოდა განდგომილების იდეები, რომლებიც ზოგიერთების მიერ კრებებში იყო წამოყენებული (2 ტიმოთე 2:16–18). მოგვიანებით, ცრუმეცნიერებამ, როგორიცაა გნოსტიციზმი და ბერძნული ფილოსოფია, გახრწნა კრება. დღეს მსოფლიოში არსებული ათეიზმი, აგნოსტიციზმი, ევოლუციური თეორიები და ბიბლიის გადამეტებული კრიტიკა ისევე წარმოადგენს ცრუმეცნიერების მაგალითებს, როგორც დღეს მცხოვრები განდგომილი პიროვნებების მიერ წამოყენებული არაბიბლიური იდეები. ამ ცრუმეცნიერების ყველა ნაყოფი ჩანს ზნეობრივ დაცემაში, ხელისუფლებათა მიმართ ყველგან გავრცელებულ უპატივცემლობაში, უპატიოსნობასა და ეგოიზმში, რაც სატანის სისტემას ახასიათებს.
ჩაეჭიდე ღვთიურ სწავლებას
18. ვინ ეძებს ღვთიურ სწავლებას დღეს?
18 მიუხედავად იმისა, რომ ედემის ბაღში მომხდარი მოვლენების დროიდან სატანამ გაჟღინთა დედამიწა დემონთა მოძღვრებებით, ყოველთვის იყვნენ ადამიანები, რომლებიც ეძებდნენ ღვთიურ სწავლებას. ასეთი ადამიანების რიცხვი დღეს მილიონებს აღწევს. ეს რიცხვი შეიცავს იმ ცხებული ქრისტიანების დარჩენილ ნაწილს, რომელთაც აქვთ მტკიცე იმედი მართონ იესოსთან ერთად მის ზეციურ სამეფოში, და უამრავი ხალხის, ‘სხვა ცხვრების’ მზარდ რაოდენობას, რომელთა იმედია დაიმკვიდრონ ამ სამეფოს მიწიერი სამფლობელო (მათე 25:34; იოანე 10:16; გამოცხადება 7:3, 9). დღეს, ეს ხალხი იკრიბება ერთ მსოფლიო ორგანიზაციაში, რომლის მიმართაც გამოიყენება ესაიას სიტყვები: „შენი ვაჟები, ყველანი, უფლის დამოძღვრილნი იქნებიან და დიდი იქნება შენი ვაჟების კეთილდღეობა“ (ესაია 54:13).
19. რას შეიცავს დამოძღვრა იეჰოვასაგან?
19 იყო იეჰოვასგან დამოძღვრილი ნიშნავს უფრო მეტს, ვიდრე იცოდე ჭეშმარიტი სწავლება, თუმცა ცოდნაც მნიშვნელოვანია. იეჰოვა გვასწავლის, როგორ ვიცხოვროთ, როგორ გამოვიყენოთ ღვთიური სწავლება საკუთარ ცხოვრებაში. მაგალითად, ჩვენ ვეწინააღმდეგებით ეგოიზმს, უზნეობასა და დამოუკიდებლობის სულს, რომელიც ასე გამძვინვარებულია ქვეყნიერებაში ჩვენს გარშემო. ჩვენ გვესმის, რომ ამ ქვეყნიერებაში სიმდიდრისკენ სწრაფვას მიჰყავს სიკვდილისკენ (იაკობი 5:1–3). ჩვენ არასდროს ვივიწყებთ მოციქული იოანეს სიტყვებით გამოთქმულ ღვთიურ სწავლებას: „ნუ შეიყვარებთ ქვეყნიერებას, ნურც იმას, რაც ქვეყნიერებაზეა: ვისაც ქვეყნიერება უყვარს, მასში არ არის მამის სიყვარული“ (1 იოანე 2:15).
20, 21. ა) რა მცდელობებს იყენებს სატანა ადამიანების დასაბრმავებლად? ბ) რა კურთხევები ელით ადამიანებს, რომლებიც დარჩებიან ღმერთის სწავლების ერთგული?
20 დემონთა მოძღვრებების ზემოქმედება თავის მრავალ მსხვერპლზე ჩანს პავლეს სიტყვებიდან კორინთელთა მიმართ: „ურწმუნოთათვის, რომელთაც . . . [სატანამ] დაუბრმავა გონება, რათა მათთვის არ იბრწყინოს სახარების შუქმა ქრისტეს დიდებაზე, რომელიც უხილავი ღმერთის ხატია“ (2 კორინთელთა 4:4). სატანა ისურვებდა, დაებრმავებინა, ასევე, ჭეშმარიტი ქრისტიანები. ედემის ბაღში, ღმერთის მსახურთაგან ერთ-ერთის შეცდენის მიზნით მან გველი გამოიყენა. დღეს ის იყენებს კინოპროგრამებსა და სატელევიზიო პროგრამებს, რომლებშიც ნაჩვენებია სისასტიკე და უზნეობა. ის იყენებს რადიოს, ლიტერატურასა და მუსიკას. მის განკარგულებაშია ძლიერი იარაღი — ცუდი საზოგადოება (იგავნი 4:14; 28:7; 29:3). ყოველთვის გამოიცანი ასეთი საგნები — ეს დემონთა მზაკვრული ხერხები და მოძღვრებებია.
21 გახსოვდეს, რომ ედემის ბაღში სატანის სიტყვები იყო სიცრუე; იეჰოვას სიტყვებმა დაამტკიცა ჭეშმარიტება. დაწყებული იმ ადრინდელი დღეებიდან ყველაფერი მსგავსად გრძელდება. სატანა ყოველთვის იყო ცრუ, ხოლო ღვთიური სწავლება უცვლელად ჭეშმარიტი რჩებოდა (რომაელთა 3:4). თუ ვიქნებით ღმერთის სიტყვის ერთგულნი, ჭეშმარიტებასა და სიცრუეს შორის ბრძოლაში ყოველთვის გამარჯვებულ მხარეს დავიკავებთ (2 კორინთელთა 10:4, 5). ამიტომ, უყოყმანოდ უარვყოთ დემონთა ყველა მოძღვრება. ასეთი მოქმედებით ჩვენ მივაღწევთ დროს, როდესაც ომი ჭეშმარიტებასა და სიცრუეს შორის დასრულდება. ჭეშმარიტება გაიმარჯვებს. სატანა აღარ იარსებებს და აივსება დედამიწა ღვთიური სწავლებით (ესაია 11:9).
შეგიძლია თუ არა ახსნა?
◻ როდის გაისმა დემონთა მოძღვრებები პირველად?
◻ რა არის ზოგიერთი იმ ცრუმოძღვრებათაგანი, რომელიც ჩამოაყალიბეს სატანამ და მისმა დემონებმა?
◻ რა მხრივ არის სატანა უკიდურესად აქტიური დღეს?
◻ რა გამოიყენა სატანამ დემონთა მოძღვრებების ჩამოყალიბების მიზნით?
◻ რა კურთხევები ელით ადამიანებს, რომლებიც დარჩებიან ღმერთის სწავლების ერთგული?
[სურათი მე-10 გვერდზე]
დემონთა მოძღვრება პირველად ედემის ბაღში გაისმა.
[სურათი მე-12 გვერდზე]
ღვთიური სწავლება გამოსყიდვისა და სამეფოს შესახებ სთავაზობს კაცობრიობას ერთადერთ იმედს.