სინათლის ნათებები — ძლიერი და სუსტი — (ნაწილი მეორე)
„შენი შუქით ვხედავთ სინათლეს“ (ფსალმუნი 35:10).
1. როგორი ძალისხმევა მოახმარეს ადრინდელ წლებში „გამოცხადების“ სიმბოლური მნიშვნელობების გასაგებად?
ბიბლიის წიგნი „გამოცხადება“ ადრიდანვე აღძრავს ქრისტიანების ცნობისმოყვარეობას. ის შესანიშნავი მაგალითია იმისა, თუ როგორ უფრო და უფრო ბრწყინავს ჭეშმარიტების სინათლე. ათას ცხრაას ჩვიდმეტ წელს იეჰოვას ხალხმა გამოაქვეყნა წიგნი „დასრულებული საიდუმლო“ (ინგლ.), რომელშიც „გამოცხადებას“ განმარტავდა. წიგნი უშიშრად ამხელდა ქრისტიანული სამყაროს რელიგიებსა და პოლიტიკურ წინამძღოლებს, მაგრამ მასში მოყვანილი მრავალი განმარტება სხვადასხვა წყაროებიდან იყო აღებული. მიუხედავად ამისა, წიგნი „დასრულებული საიდუმლო“ იეჰოვას მიერ გამოყენებული ხილული არხისადმი ბიბლიის მკვლევარების ერთგულების გამოცდას მოემსახურა.
2. როგორი სინათლე მოჰფინა „გამოცხადებას“ სტატიამ „ერის დაბადება“ ?
2 საოცარი სინათლე მოეფინა წიგნს „გამოცხადება“ 1925 წლის 1 მარტის „საგუშაგო კოშკში“ (ინგლ.) გამოცემული სტატიის საშუალებით, სათაურით „ერის დაბადება“. არსებობდა თვალსაზრისი, რომ გამოცხადების მეთორმეტე თავი წარმართულ და კათოლიკურ რომს შორის ომს აღწერდა, სადაც ვაჟი პაპობას ასიმბოლოებდა. მაგრამ ამ სტატიამ აჩვენა, რომ გამოცხადების 11:15–18 შეესაბამებოდა მეთორმეტე თავის მნიშვნელობას და მიუთითებდა იმაზე, რომ ის ღმერთის სამეფოს დაბადებას უკავშირდება.
3. რომელმა პუბლიკაციებმა მოჰფინეს „გამოცხადებას“ მზარდი სინათლე?
3 ყოველივე ეს ხელს უწყობდა „გამოცხადების“ უფრო ნათელ გაგებას, რომელიც მოყვა 1930 წელს გამოქვეყნებულ ორტომიან პუბლიკაციას „სინათლე“ (ინგლ.). კიდევ უფრო მეტი სიზუსტე გამოჩნდა პუბლიკაციებში: «„დიდი ბაბილონი დაეცა! “, ღმერთის სამეფო მმართველობს!» (1963 წ. [ინგლ.] ) და „მაშინ შესრულდება ღმერთის საიდუმლო“ (1969 წ. [ინგლ.] ). მაგრამ ჯერ კიდევ ბევრი იყო სასწავლი წინასწარმეტყველური წიგნის, „გამოცხადების“ შესახებ. დიახ, 1988 წელს მას უფრო კაშკაშა სინათლე მოჰფინა პუბლიკაციამ „გამოცხადება — მისი გრანდიოზული აპოგეა ახლოსაა! “ (ინგლ.). ამ განათლების ზრდის მიზეზი, შეიძლება ითქვას, არის ფაქტი, რომ გამოცხადების წინასწარმეტყველება ეხება „უფლის დღეს“, რომელიც 1914 წელს დაიწყო (გამოცხადება 1:10). ამრიგად, რაც უფრო წინ წაიწევდა დღე მით უფრო გასაგები იქნებოდა წიგნი „გამოცხადება“.
‘უმაღლესი ხელმწიფების’ გაგება აიხსნა
4, 5. ა) როგორი თვალსაზრისი ჰქონდათ ბიბლიის მკვლევარებს რომაელთა 13:1-ის შესახებ? ბ) როგორც მოგვიანებით გაირკვა, როგორი იყო ბიბლიური თვალსაზრისი ‘უმაღლეს ხელმწიფებასთან’ დაკავშირებით?
4 სინათლის ბრწყინვალე ნათება გამოიკვეთა 1962 წელს რომაელთა 13:1-თან დაკავშირებით, სადაც ნათქვამია: „ყოველი სული დაემორჩილოს უმაღლეს ხელმწიფებას“. ბიბლიის ადრინდელი მკვლევარები ხვდებოდნენ, რომ აქ მოხსენიებული ‘უმაღლესი ხელმწიფება’ ეხებოდა ქვეყნიურ ხელისუფლებებს. მათ ისე ესმოდათ ეს მუხლი, რომ ქრისტიანი ომის პერიოდში ჯარში გაწვევის შემთხვევაში, ვალდებული იყო, ჩაეცვა ფორმა, ხელში იარაღი აეღო და ფრონტზე, სანგრებში წასულიყო. არსებული გაგებით, რადგან ქრისტიანი ადამიანს ვერ მოკლავდა, ყველაზე უკიდურეს შემთხვევაში ის ჰაერში გაისროდა.a
5 ამ საკითხს ნათელი მოჰფინა 1962 წლის 15 ნოემბრისა და 1 დეკემბრის „საგუშაგო კოშკებმა“ (ინგლ.), რომლებშიც ირჩეოდა მათეს 22:21-ში ჩაწერილი იესოს სიტყვები: „მიეცით კეისრისა კეისარსა და ღვთისა — ღმერთსა!“ მართებული იყო საქმეების 5:29-ში ჩაწერილი სიტყვები: „ღმერთს უფრო მეტად უნდა ვემორჩილებოდეთ, ვიდრე ადამიანებს“. ქრისტიანი იმ დრომდე ემორჩილება კეისარს — ‘უმაღლეს ხელმწიფებას’ — სანამ ეს მორჩილება არ მოითხოვს მისგან ღმერთის კანონის წინააღმდეგ წასვლას. როგორც გაირკვა, კეისრისადმი მორჩილება იყო პირობითი და არა სრული. ქრისტიანები აძლევენ კეისარს მხოლოდ იმას, რაც არ ეწინააღმდეგება ღმერთის მოთხოვნებს. რამდენად დამაკმაყოფილებელი იყო ამ საკითხის ნათელი გაგება!
ორგანიზაციული საკითხების გაშუქება
6. ა) ქრისტიანულ სამყაროში გაბატონებული იერარქიული სტრუქტურის თავიდან ასაცილებლად, რომელი პრინციპი იქნა მიღებული? ბ) საბოლოოდ რა გამოვლინდა, როგორც სწორი საშუალება იმ ადამიანთა ასარჩევად, რომლებიც კრებას ზედამხედველობენ?
6 არსებობდა კითხვა, თუ ვის უნდა ემსახურა კრებებში უხუცესებად და დიაკვნებად. ქრისტიანულ სამყაროში გაბატონებული იერარქიული სტრუქტურის თავიდან ასაცილებლად გადაწყდა, რომ ყოველი კრების წევრების ხმის მიცემის საშუალებით ასეთი ადამიანები დემოკრატიული გზით უნდა არჩეულიყვნენ. მაგრამ მზარდმა სინათლემ, რომელსაც 1932 წლის 1 სექტემბრისა და 15 ოქტომბრის „საგუშაგო კოშკები“ (ინგლ.) შეიცავდნენ, ნათელყო რომ უხუცესების არჩევისთვის არ არსებობდა ბიბლიური საფუძველი. ამიტომ, მათი ადგილი დაიკავა სამსახურებრივმა კომიტეტმა, ხოლო სამსახურებრივ ხელმძღვანელს საზოგადოება ირჩევდა.
7. რომელი გაუმჯობესებული შესწორებები გამოიწვია სინათლის ნათებებმა კრებებში მსახურების დანიშვნასთან დაკავშირებით?
7 ათას ცხრაას ოცდათვრამეტი წლის 1 და 15 ივნისს გამოქვეყნებული „საგუშაგო კოშკები“ (ინგლ.) შეიცავდნენ სინათლის ნათებებს, რომლებიც მიუთითებდა, რომ მსახურები კრებაში არჩეული კი არა, არამედ დანიშნული უნდა ყოფილიყვნენ, რაც ნიშნავს თეოკრატიული გზით დანიშვნას. სინათლის სხვა ნათებამ 1971 წელს აჩვენა, რომ თითოეულ კრებას არ უნდა გაძღოლოდა კრების მხოლოდ ერთი მსახური. ნაცვლად ამისა, თითოეულ კრებას უნდა ჰყავდეს იეჰოვას მოწმეების ხელმძღვანელი კორპორაციის მიერ დანიშნული უხუცესების, ანუ ზედამხედველების კორპორაცია. ამრიგად, 40 წელზე მეტი ხნის განმავლობაში მზარდმა სინათლემ ნათელყო, რომ როგორც უხუცესები, ასევე დიაკვნები, რომლებსაც დღეს სამსახურებრივ თანაშემწეებად იცნობენ, უნდა დაენიშნა ‘ერთგულ და გონიერ მონას’ თავისი ხელმძღვანელი კორპორაციის მეშვეობით (მათე 24:45–47). ეს შეესაბამებოდა მდგომარეობას, რომელიც მოციქულთა დღეებში არსებობდა. პირველი საუკუნის ხელმძღვანელი კორპორაციის მიერ ზედამხედველებად ინიშნებოდნენ ტიმოთესა და ტიტეს მსგავსი მამაკაცები (1 ტიმოთე 3:1–7; 5:22; ტიტე 1:5–9). ყოველივე ამით საოცრად სრულდება ესაიას 60:17: „სპილენძის ნაცვლად ოქროს მოგიტან და რკინის ნაცვლად მოგიტან ვერცხლს, ხეების ნაცვლად — სპილენძს და ქვების ნაცვლად — რკინას. შენს განმგებელად მშვიდობას გავხდი და ზედამხედველად — სიმართლეს“.
8. ა) როგორ გააუმჯობესა საზოგადოების მართვის შესაძლებლობა გაძლიერებულმა ჭეშმარიტებამ? ბ) რომელია ხელმძღვანელი კორპორაციის კომიტეტები და რა არის მათი საქმიანობის ან ზედამხედველობის შესაბამისი სფეროები?
8 ასევე გასარკვევი იყო საკითხი საგუშაგო კოშკის საზოგადოების ხელმძღვანელობასთან დაკავშირებით. მრავალი წლის განმავლობაში იეჰოვას მოწმეების ხელმძღვანელი კორპორაცია განასახიერებდა პენსილვანიაში არსებული საგუშაგო კოშკის, ბიბლიისა და ტრაქტატების საზოგადოების ხელმძღვანელთა კავშირს, ხოლო საქმეებს უმთავრესად მისი პრეზიდენტი აკონტროლებდა. როგორც 1977 წლის „იეჰოვას მოწმეების წელიწდეულში“ (გვერდები 258–259 [ინგლ.] ) იყო ნაჩვენები, 1976 წელს ხელმძღვანელმა კორპორაციამ დაიწყო მოქმედება ექვს კომიტეტთან ერთად, რომელთაგან თითოეული მსოფლიო მასშტაბის სამსახურის გარკვეულ ასპექტებზე ზრუნავდა. კადრების კომიტეტი განიხილავს კადრების საკითხებს, მათ შორის ბეთელის მსოფლიო ოჯახში ყოველი მსახურის ინტერესებს. გამომცემლობის კომიტეტი მართავს ყველა საერო და იურიდიულ საკითხებს, როგორიცაა საკუთრება და ლიტერატურის გამოცემა. სამსახურებრივი კომიტეტი ზრუნავს დამოწმებასთან დაკავშირებულ სამსახურზე და მეთვალყურეობს მიმომსვლელი ზედამხედველების, პიონერებისა და კრების მაუწყებლების საქმიანობას. სასწავლო კომიტეტი პასუხისმგებელია კრების შეხვედრებზე და სპეციალურ, სარაიონო, საოლქო და საერთაშორისო კონგრესებზე, ისევე როგორც ღმერთის ხალხის სულიერი განათლებისთვის განკუთვნილ სხვადასხვა სკოლებზე. სამწერლო კომიტეტი ზედამხედველობს ყველა სახის პუბლიკაციის მომზადებასა და თარგმნას, იმაში დარწმუნებით, რომ ყველაფერი საღვთო წერილთან არის შეთანხმებული. თავმჯდომარეების კომიტეტი ზრუნავს გაუთვალისწინებელი და სხვა გადაუდებელი საკითხების შესახებ.b ასევე 1970-იან წლებში საგუშაგო კოშკის საზოგადოების მრავალი ფილიალის ხელმძღვანელობა ერთი ზედამხედველის ნაცვლად კომიტეტმა დაიწყო.
სინათლე ქრისტიანულ ყოფაქცევასთან დაკავშირებით
9. როგორი გავლენა მოახდინა ჭეშმარიტების სინათლემ ქვეყნიური ხელისუფლებებისადმი ქრისტიანების დამოკიდებულებაზე?
9 სინათლის მრავალი ნათება ქრისტიანების ყოფაქცევას ეხებოდა. მაგალითად, განვიხილოთ ნეიტრალიტეტის საკითხი. სინათლის განსაკუთრებით კაშკაშა ნათება მოეფინა ამ საკითხს სტატიაში „ნეიტრალიტეტი“, რომელიც 1939 წლის 1 ნოემბრის „საგუშაგო კოშკში“ (ინგლ.) გამოქვეყნდა. რამდენად დროული იყო ეს — მეორე მსოფლიო ომის დაწყებისთანავე! სტატია ზუსტად განმარტავდა ნეიტრალიტეტს და აჩვენებდა, რომ ქრისტიანები არ უნდა ჩაებან პოლიტიკურ საქმეებში ან ერთა შორის კონფლიქტებში (მიქა 4:3, 5; იოანე 17:14, 16). ზუსტად ამიტომ შეიძულა ისინი ყველა ერმა (მათე 24:9). როგორც იესო მათეს 26:52-ში ცხადყოფს, ძველი ისრაელის ბრძოლები არ წარმოადგენს მაგალითს ქრისტიანებისთვის. გარდა ამისა, დღეს არსებული არც ერთი პოლიტიკური ერი არ არის თეოკრატიული, არც ერთს ხელმძღვანელობს ღმერთი, როგორც ძველ ისრაელს მართავდა.
10. რა ნათელყვეს სინათლის ნათებებმა ქრისტიანების სისხლისადმი დამოკიდებულებასთან დაკავშირებით?
10 ასევე, სინათლემ სისხლის სიწმინდე გააშუქა. ბიბლიის ზოგიერთი მკვლევარი ფიქრობდა, რომ საქმეების 15:28, 29-ში მოხსენიებული აკრძალვა სისხლის საჭმელად გამოყენებასთან დაკავშირებით იუდეველი ქრისტიანებით შემოიფარგლებოდა. მაგრამ საქმეების 21:25 ცხადყოფს, რომ მოციქულთა დღეებში ეს ბრძანება სხვა ეროვნების ადამიანებსაც ეხებოდა, რომლებიც მორწმუნეები გახდნენ. ამიტომ, სისხლის სიწმინდე ყველა ქრისტიანს ეხება, როგორც ნაჩვენებია 1945 წლის 1 ივლისის „საგუშაგო კოშკში“ (ინგლ.). ეს ნიშნავს არა მხოლოდ ცხოველების სისხლის საკვებად გამოყენების უარყოფას, როგორიცაა სისხლისგან დამზადებული ძეხვი, არამედ ასევე ადამიანის სისხლისგან თავის შეკავებას, როგორიცაა სისხლის გადასხმა.
11. რა გაირკვა თამბაქოს გამოყენებაზე ქრისტიანულ თვალსაზრისთან დაკავშირებით?
11 მზარდი სინათლის შედეგად, ჩვევებს, რომლებსაც თავიდან მხოლოდ უარყოფითად უყურებდნენ, მოგვიანებით სათანადო სერიოზულობით მოეკიდნენ. ერთ-ერთი მაგალითია თამბაქოს გამოყენება. ათას რვაას ოთხმოცდათხუთმეტი წლის 1 აგვისტოს გამოცემულ „სიონის საგუშაგო კოშკში“ (ინგლ.) ძმა რასელმა ყურადღება გაამახვილა 1 კორინთელთა 10:31-სა და 2 კორინთელთა 7:1-ზე და დაწერა: „გაუგებარია, თუ როგორ შეიძლება, რომ ქრისტიანის მიერ თამბაქოს ნებისმიერი სახეობის გამოყენება სასარგებლო იყოს მისთვის ან ღმერთს განადიდებდეს“. დაწყებული 1973 წლიდან ნათლად გამოჩნდა, რომ მას, ვინც იყენებს თამბაქოს, არ შეუძლია იყოს იეჰოვას მოწმე. ათას ცხრაას სამოცდათექვსმეტ წელს გაირკვა, რომ არც ერთ მოწმეს შეეძლო ემუშავა აზარტული თამაშების დაწესებულებაში და კრებაში დარჩენილიყო.
სხვა გაუმჯობესებები
12. ა) რა გამოავლინა სინათლის ნათებამ სამეფოს იმ გასაღებების რიცხვთან დაკავშირებით, რომლებიც პეტრეს მიანდეს? ბ) რა ვითარებში გამოიყენა პეტრემ თითოეული გასაღები?
12 ასევე, სინათლემ იმატა იმ სიმბოლური გასაღებების რიცხვთან დაკავშირებით, რომლებიც იესომ პეტრეს მისცა. ბიბლიის მკვლევარები თვლიდნენ, რომ პეტრემ მხოლოდ ორი გასაღები მიიღო, რომლებითაც წარუდგინა ადამიანებს საშუალება, სამეფოს მემკვიდრეები გამხდარიყვნენ — ერთი იუდეველებისთვის, რომელიც ახალი წელთაღრიცხვით 33 წელს იყო გამოყენებული და მეორე არაიუდეველებისთვის, რომელიც პირველად ახალი წელთაღრიცხვით 36 წელს იყო გამოყენებული, როცა პეტრემ კორნელიოსს უქადაგა (საქმეები 2:14–41; 10:34–48). დროთა განმავლობაში გაირკვა, რომ არსებობდა მესამე ჯგუფიც — სამარიელები. პეტრემ გამოიყენა მეორე გასაღები, როცა სამეფოში შესვლის შესაძლებლობა მათ წარუდგინა (საქმეები 8:14–17). ამრიგად, როცა პეტრემ კორნელიოსს უქადაგა გამოყენებული იყო მესამე გასაღები („საგუშაგო კოშკი“ 1979 წლის 1 ოქტომბერი, გვერდები 16–22, 26 [ინგლ.]).
13. რა ცხადყვეს სინათლის ნათებებმა იოანეს სახარების მეათე თავში მოხსენიებული ფარეხების შესახებ?
13 სინათლის სხვა სხივის საშუალებით გაირკვა, რომ იესო სამ ფარეხზე მიუთითებდა და არა ორზე (იოანე, თავი 10). ესენი იყო: 1) იუდეველებისგან შემდგარი ფარეხი, რომლის მეკარე იოანე ნათლისმცემელი იყო, 2) სამეფოს ცხებული მემკვიდრეებისგან შემდგარი ფარეხი და 3) ფარეხი, რომელსაც მიწიერი იმედის მქონე ‘სხვა ცხვრები’ შეადგენენ (იოანე 10:2, 3, 15, 16; „საგუშაგო კოშკი“ 1984 წლის 15 თებერვალი, გვერდები 10–20 [ინგლ.]).
14. როგორ გაირკვა მზარდი სინათლის საშუალებით საკითხები არატრადიციული იუბილეს დაწყებასთან დაკავშირებით?
14 ასევე, ნათელი გახდა არატრადიციული იუბილეს საკითხი. რჯულის წესით, ყოველ ორმოცდამეათე წელს აღნიშნავდნენ დიდ იუბილეს, რომლის დროსაც ყველაფერი თავდაპირველ პატრონს უბრუნდებოდა (ლევიანნი 25:10). დიდი ხნის განმავლობაში ფიქრობდნენ, რომ ეს ქრისტეს ათასწლიანი მმართველობის მომასწავებელი იყო. მაგრამ უფრო თანამედროვე დროში გაირკვა, რომ არატრადიციული იუბილე სინამდვილეში ახალი წელთაღრიცხვით 33 წლის ორმოცდამეათე დღის ზეიმის დროს დაიწყო, როცა ადამიანები, რომლებზეც სულიწმიდა გადმოვიდა, გათავისუფლდნენ მოსეს რჯულის აღთქმის მონობისგან („საგუშაგო კოშკი“ 1987 წლის 1 იანვარი, გვერდები 18–28 [ინგლ.]).
ტერმინოლოგიის უფრო ძლიერი გაშუქება
15. რა სინათლე მოეფინა სიტყვა „გეგმის“ გამოყენებას?
15 „ეძებდა ეკლესიასტე საჭირო სიტყვებს და წრფელად დაიწერა ჭეშმარიტი სიტყვები“ (ეკლესიასტე 12:10). ეს მუხლი ძალიან კარგად შეესატყვისება ჩვენს თემას, რადგან სინათლე ეფინებოდა არა მხოლოდ ისეთ მნიშვნელოვან საკითხებს, როგორიცაა სწავლება და ყოფაქცევა, არამედ ასევე ქრისტიანულ ტერმინოლოგიასა და მის ზუსტ მნიშვნელობას. მაგალითად ბიბლიის მკვლევარებისთვის ყველაზე საყვარელი პუბლიკაცია იყო „საღვთო წერილის გამოკვლევების“ (ინგლ.) პირველი ტომი, სათაურით „ღმერთის გეგმა საუკუნეების მანძილზე“. მაგრამ დროთა განმავლობაში გაირკვა, რომ ღმერთის სიტყვა მხოლოდ ადამიანებზე ამბობს, რომ გეგმებს ადგენენ (იგავნი 19:21, აქ). საღვთო წერილში არსად არის ნათქვამი იმის შესახებ, რომ იეჰოვა ადგენს გეგმებს. მას არ სჭირდება დაგეგმვა. რაც არ უნდა განიზრახოს აუცილებლად წარმატებით დასრულდება, რადგან მას უსაზღვრო სიბრძნე და ძალა აქვს, როგორც ეფესელთა 1:9, 10-ში ვკითხულობთ: „გვაუწყა. . . სურვილით, რომელიც წინასწარ განიზრახა მასში [საკუთარ თავში, აქ] ჟამთა აღვსების განგებულებისთვის“. ამრიგად, თანდათანობით გამოჩნდა, რომ იეჰოვასთან დაკავშირებით უფრო სათანადოა, გამოვიყენოთ გამოთქმა „განზრახვა“.
16. როგორ დაზუსტდა თანდათანობით ლუკას 2:14-ის გაგება?
16 შემდეგი საკითხი ეხებოდა ლუკას 2:14-ის ნათელყოფას. „ახალი აღთქმისა და ფსალმუნების“ (კიკნაძისა და სონღულაშვილის თარგმანი) თანახმად ვკითხულობთ: „დიდება მაღალთა შინა ღმერთს, მშვიდობა ქვეყანაზე და კაცთა შორის სათნოება! “ ნათელი გახდა, რომ აქ არ გამოიხატება ზუსტი აზრი, რადგან ღმერთი არ ავლენს სათნოებას ბოროტებისადმი. ამიტომ მოწმეებმა მიიჩნიეს, რომ ეს საკითხი ეხებოდა მშვიდობას ადამიანებისთვის, რომლებიც ღმერთისადმი სათნოებას ავლენდნენ. ამრიგად ისინი თვლიდნენ, რომ ადამიანები, რომლებსაც ბიბლია აინტერესებთ, სათნოებას ავლენენ. მაგრამ შემდეგ ისინი მიხვდნენ, რომ იგულისხმებოდა სათნოება ღმერთის მხრიდან და არა ადამიანების მხრიდან. ამიტომ, „ახალი ქვეყნიერების თარგმანი“ (ინგლ.) ლუკას 2:14-ის სქოლიოში გვატყობინებს ‘ადამიანთა შესახებ, რომლებსაც ღმერთი იწონებს’. ღმერთი სათნოებას ავლენს ყოველი ქრისტიანისადმი, რომელიც მიძღვნის აღთქმის თანახმად ცხოვრობს.
17, 18. რას გაამართლებს და რას განწმენდს იეჰოვა?
17 მსგავსად ამისა, დიდი ხნის განმავლობაში მოწმეები საუბრობდნენ იეჰოვას სახელის გამართლებაზე. მაგრამ განა სატანამ ეჭვის ქვეშ დააყენა იეჰოვას სახელი? განა სატანის რომელიმე წარმომადგენელმა ეჭვი შეიტანა ამ საკითხში, რომ იეჰოვას არ ჰქონდა ამ სახელის ტარების უფლება. სულაც არა. იეჰოვას სახელს არ გამოუწვევია ეჭვი და არ სჭირდებოდა გამართლება. ზუსტად ამ მიზეზით არ ლაპარაკობენ საგუშაგო კოშკის საზოგადოების დღევანდელი პუბლიკაციები იეჰოვას სახელის გამართლებაზე. ისინი ლაპარაკობენ იეჰოვას უზენაესი ხელისუფლების გამართლებაზე და მისი სახელის განწმენდაზე. ეს შეესაბამება იმას, რის შესახებაც იესომ გვითხრა, რომ ვილოცოთ: „წმიდა იყოს სახელი შენი“ (მათე 6:9). იეჰოვა არაერთხელ ამბობდა, რომ უნდა განეწმინდა თავისი სახელი, რომელიც ისრაელებმა ეჭვის ქვეშ კი არ დააყენეს, არამედ შელახეს (ეზეკიელი 20:9, 14, 22; 36:23).
18 საინტერესოა, რომ 1971 წელს წიგნმა «„ერებმა უნდა იცოდნენ, რომ მე ვარ იეჰოვა“ — როგორ?» (ინგლ.) გააკეთა ასეთი განსხვავება: „იესო ქრისტე იბრძვის. . . იეჰოვას უნივერსალური უზენაესი ხელისუფლების გამართლებისთვის და იეჰოვას სახელის განდიდებისთვის“ (გვერდები 364–365). წიგნი „ღმერთის ათასწლიანი სამეფო მოახლოვდა“ (ინგლ.) 1973 წელს იტყობინებოდა: „მოახლოებული ‘დიდი გასაჭირი’ არის ის დრო, როცა ყოვლისშემძლე ღმერთი იეჰოვა გაამართლებს თავის უნივერსალურ უზენაეს ხელისუფლებას და განწმენდს თავის ღირსეულ სახელს“ (გვერდი 409). შემდეგ, 1975 წელს გამოქვეყნებული წიგნი „მსოფლიო გასაჭირისგან ადამიანის ხსნა ახლოსაა“ (ინგლ.) აცხადებდა: „სამყაროს ისტორიაში ყველაზე დიდებული შემთხვევა დასრულდება იეჰოვას უნივერსალური უზენაესი ხელისუფლების გამართლებითა და მისი წმინდა სახელის განწმენდით“ (გვერდი 281).
19, 20. როგორ შეგვიძლია გამოვავლინოთ მადლიერება სულიერი სინათლის ნათებისთვის?
19 რამდენად დიდი კურთხევაა იეჰოვას ხალხისთვის — ტკბებოდეს მთელი ამ სულიერი სინათლით! ამის სრულიად საპირისპიროდ, სულიერი სიბნელე, რომელშიც ქრისტიანული სამყაროს წინამძღოლები იმყოფებიან, გამოიხატა ერთი მღვდლის სიტყვებში: „რატომ არსებობს ცოდვა? რატომ არსებობს ტანჯვა? რატომ არსებობს ეშმაკი? ამ კითხვებს მე დავუსვამ უფალს, როცა ზეცაში ავალ“. მაგრამ იეჰოვას მოწმეებს შეუძლიათ, უთხრან, რატომ: ყოველივე ეს არსებობს საკამათო საკითხის გამო, რომელიც ეხება იეჰოვას უფლებას იყოს უზენაესი მმართველი და საკითხს, შეუძლიათ თუ არა ღმერთის შექმნილ ადამიანებს შეინარჩუნონ ღმერთისადმი ერთგულება ეშმაკის წინააღმდეგობის მიუხედავად.
20 წლების განმავლობაში ძლიერი და სუსტი სინათლე უნათებდა ბილიკს იეჰოვასადმი მიძღვნილ მსახურებს. ამით სრულდება ისეთი მუხლები, როგორიცაა ფსალმუნის 96:11 და იგავნის 4:18. მაგრამ, მოდი, არასდროს დავივიწყოთ, რომ სინათლეში სიარული ნიშნავს მზარდი სინათლისთვის მადლიერების გამოვლენასა და მასთან შეთანხმებულად ცხოვრებას. როგორც დავინახეთ ეს მზარდი სინათლე შეიცავს ჩვენს ყოფაქცევასა და ქადაგებასთან დაკავშირებულ დავალებას.
[სქოლიოები]
a ასეთი თვალსაზრისის გავლენით, 1929 წლის 1 და 15 ივნისის „საგუშაგო კოშკებმა“ (ინგლ.) ‘უმაღლესი ხელმწიფება’ განმარტეს, როგორც იეჰოვა ღმერთი და იესო ქრისტე. ძირითადად ეს პოზიცია შესწორდა 1962 წელს.
b ათას ცხრაას ოთხმოცდათორმეტი წლის 15 აპრილის „საგუშაგო კოშკში“ (ინგლ.) იყო განცხადება, რომ ეზრას დღეებში მცხოვრები შეწირულების მსგავსად, ხელმძღვანელი კორპორაციის კომიტეტების დასახმარებლად, უმთავრესად ‘სხვა ცხვრებიდან’ ამორჩეული ძმები იყვნენ დანიშნული (იოანე 10:16; პირველი ეზრა 2:58).
გახსოვს თუ არა შენ?
◻ რა სინათლე მოეფინა საკითხს ‘უმაღლესი ხელმწიფებისადმი’ დამოკიდებულების შესახებ?
◻ რომელი ორგანიზაციული განვითარება მოყვა სინათლის ნათებებს?
◻ როგორ გავლენას ახდენს მზარდი სინათლე ქრისტიანის ყოფაქცევაზე?
◻ როგორ გააუმჯობესა ჩვენი გაგება გარკვეული ბიბლიური საკითხების შესახებ სულიერმა სინათლემ?
[საავტორო უფლება 30-ე გვერდზე]
გასაღებები 31-ე გვერდზე: ნახატი დაფუძნებულია სურათზე, რომელიც გადაღებულია Cooper-Hewitt, National Design Museum, Smithsonian Institution-ში.