ბიბლიის შესწავლების დასაწყებად ახალი დამხმარე საშუალება გვაქვს!

¹ შეერთებულ შტატებში მცხოვრები ერთი თავგამოდებული კათოლიკე ქალი ერთგულად იცავდა საეკლესიო მოძღვრებებს. იგი ვატიკანშიც კი გაემგზავრა სალოცავად. თუმცა, როდესაც იეჰოვას ერთ-ერთმა მოწმემ სახლში მიაკითხა, ქალი დასთანხმდა ბიბლიის საშინაო შესწავლაზე. რატომ? იმიტომ რომ თავის ეკლესიაში არ სთავაზობდნენ ბიბლიის შესწავლას, მას კი აინტერესებდა იმის გაგება, თუ რა ეწერა ბიბლიაში. რას ვსწავლობთ ამ შემთხვევიდან? ჩვენ ვერასდროს განვსაზღვრავთ, თუ ვინ უფრო მეტ ინტერესს გამოავლენს და დაგვთანხმდება ბიბლიის უფასო საშინაო შესწავლაზე (ეკლ. 11:6).

² მოგრიდებია, როდესმე ხალხისთვის იმის თქმა, რომ ჩვენ ყველა მსურველს ბიბლიის უფასო შესწავლას ვთავაზობთ? იცის ყველამ, ვისთანაც გაქვს ურთიერთობა, ამის შესახებ? როგორ დავრწმუნდეთ ამაში? ახალი დამხმარე საშუალების გამოყენებით! ეს არის კარგად გაფორმებული, ექვსგვერდიანი ტრაქტატი, სათაურით „გსურთ უკეთ გაეცნოთ ბიბლიას?“. მოდი გავეცნოთ ამ ტრაქტატის ყოველ ქვესათაურს.

³ „რატომ უნდა ვიკითხოთ ბიბლია?“. ტრაქტატში ამის საფუძვლიანი მიზეზებია მოყვანილი. მასში ახსნილია, რომ ბიბლიის საშუალებით ღმერთი „სიყვარულით გვარიგებს“ და გვასწავლის, თუ დახმარებისთვის როგორ მივმართოთ ლოცვით და როგორ მოვიპოვოთ მარადიული სიცოცხლე (1 თეს. 2:13). ტრაქტატში მოხსენიებულია სხვადასხვა ბიბლიური სწავლება. მაგალითად, რა ხდება სიკვდილის შემდეგ და რატომ არსებობს ამდენი სირთულე დედამიწაზე. მასში აღწერილია „ბიბლიაში მოცემული ღვთიური პრინციპები“, რომელთა გამოყენებაც სასარგებლოა ჯანმრთელობისთვის, ხელს უწყობს ბედნიერებას, გვისახავს იმედს და მრავალი დადებითი თვისების განვითარებაში გვეხმარება. ტრაქტატი მიუთითებს კიდევ ერთ მიზეზზე: რატომ უნდა ვიკითხოთ ბიბლია; ეს არის წინასწარმეტყველებები, რომლებიც ჩვენს უახლოეს მომავალს ეხება (გამოცხ. 21:3, 4).

⁴ „დახმარება ბიბლიის გასაგებად“. ტრაქტატში ნათქვამია: „ყველა ვსაჭიროებთ დახმარებას ღვთის სიტყვის გასაგებად“. შემდეგ ახსნილია, თუ რა მეთოდით მიმდინარეობს ბიბლიის შესწავლა: „ჩვეულებრივ უკეთესია, თუ თავიდან მარტივი საკითხებით დაიწყებთ და ბიბლიას თანდათანობით შეისწავლით“. მასში ნათლადაა მითითებული, რომ „ბიბლია მთავარი სახელმძღვანელოა“, ამასთანავე აღნიშნულია, რომ ბროშურა „რას მოითხოვს“ დაეხმარება შემსწავლელს „სხვადასხვა ბიბლიური საკითხის გაგებაში“. შემდგომ ქვესათაურში მოქმედებისკენ აღმძვრელი კითხვაა დასმული.

⁵ „გსურთ ყოველკვირა გამოუნახოთ დრო ბიბლიის შესწავლას?“. ტრაქტატში ახსნილია, რომ ბიბლიის შესწავლა შეიძლება ჩატარდეს შემსწავლელისთვის მოსახერხებელ დროსა და ადგილას — მის სახლში. შესაძლებელია ტელეფონითაც. კითხვაზე, ვინ შეიძლება მოწვეულ იქნეს შესწავლაში მონაწილეობის მისაღებად?, ტრაქტატში ასეთი პასუხია გაცემული: „თქვენი ოჯახის ყველა წევრი. გარდა ამისა, თუ მეგობრების მოწვევა გსურთ, ამაზეც არავინ გეტყვით უარს. ან, თუ ასე გირჩევნიათ, შესწავლა მხოლოდ თქვენთან ჩატარდება“. რამდენ ხანს გაგრძელდება შესწავლა? ტრაქტატში ამ კითხვაზეცაა პასუხი: „ბევრმა გამონახა კვირაში ერთი საათი ბიბლიის შესასწავლად. თუ მეტი ან, პირიქით, უფრო ნაკლები დროის გამონახვა შეგიძლიათ, იეჰოვას მოწმეები გაგებით მოეკიდებიან თქვენს მდგომარეობას“. აქ აღსანიშნავია ერთი მნიშვნელოვანი რამ! ჩვენ გვსურს, გავითვალისწინოთ ყოველი შემსწავლელის მდგომარეობა.

⁶ „გთავაზობთ შესწავლას“. ტრაქტატის ბოლოს მოცემულია ტალონი, რომლითაც ადრესატს შეუძლია შეუკვეთოს ბროშურა „რას მოითხოვს“ ან ითხოვოს ბიბლიის საშინაო შესწავლა. ტალონზე ნაჩვენებია, თუ როგორ გამოიყურება ბროშურა „რას მოითხოვს ღმერთი ჩვენგან?“. ალბათ მიხვდით, რატომ მოუწოდებს ტრაქტატი უფრო მეტ გულწრფელ ადამიანს, რომ დახმარებაზე თანხმობა განგვიცხადონ? ახლა კი მთავარი ისაა, ჩვენ როგორ გამოვიყენოთ საუკეთესოდ ახალი ტრაქტატი.

⁷ ვის შეგიძლიათ შესთავაზოთ ტრაქტატი? ტრაქტატი შეგვიძლია პირადად მივცეთ ხალხს ან დავუტოვოთ მათ, ვინც სახლში არ გვხვდება. მისი გავრცელება შეიძლება კარდაკარ, ქუჩაში და საქმიან უბანზე. შესთავაზეთ ყველას, მიუხედავად იმისა, კითხულობენ თუ არა ჩვენს ლიტერატურას. ჩადეთ ჟურნალებში ან სხვა გასავრცელებელ პუბლიკაციებში. თან დაურთეთ წერილებს. ტრაქტატის ფოსტით გაგზავნა შესთავაზეთ მათ, ვისაც ტელეფონით უკავშირდებით ხოლმე. ყოველთვის თან იქონიეთ იგი, რომ გაავრცელოთ საყიდლებზე სიარულის, საზოგადოებრივი ტრანსპორტით მგზავრობის ან არაფორმალურად ქადაგების დროს. შესთავაზე ყველას, ვინც კარზე დაგიკაკუნებს. მიეცი ნათესავებს, მეზობლებს, თანამშრომლებს, თანასკოლელებსა და სხვა ნაცნობებს. გულმოდგინედ ეცადე, ეს ტრაქტატი ყოველ შემხვედრს მისცე! შემდეგი ნაბიჯი რა არის?

⁸ სწრაფი გამოხმაურების შემთხვევაში. ზოგიერთი მაშინვე გამოთქვამს ბიბლიის შესწავლის სურვილს. ამიტომ ქადაგებისას ყოველთვის თან გქონდეს ბროშურის „რას მოითხოვს“ ორი ეგზემპლარი, ერთი შემსწავლელისთვის, მეორე კი — შენთვის. თუ ადამიანს სურს, მყისვე დაიწყე შესწავლა. გადაშალე ბროშურა მეორე გვერდზე და წაიკითხე „ბროშურის გამოყენების მეთოდი“. შემდეგი კი პირდაპირ პირველ გაკვეთილზე გადადი და აჩვენე, თუ როგორ ხდება შესწავლა. ამაზე ადვილი რა უნდა იყოს?

⁹ თუ მსმენელი მოსაფიქრებლად დროს მოითხოვს. გულმოდგინედ ეცადე, რაც შეიძლება მალე დაუკავშირდე. თან იქონიე ბროშურა „რას მოითხოვს“. აჩვენე მას მეორე გვერდზე მოცემულ შინაარსი. შეარჩევინე ის გაკვეთილი, რომელიც ყველაზე მეტად დააინტერესებს. გადაშალე შესაბამის გვერდზე და განიხილე შერჩეული გაკვეთილი.

¹⁰ მიაკითხე ყველას, ვისაც ჟურნალები დაუტოვე. თუ ჟურნალები ტრაქტატთან ერთად დატოვე, ხელმეორედ მისვლისას შეგიძლია უთხრა: «ადრე რომ თქვენთან ვიყავი, დაგიტოვეთ ჟურნალი „საგუშაგო კოშკი“. ალბათ, შეამჩნიეთ, რომ ჟურნალის სათაური შეიცავს სიტყვებს „საგუშაგო კოშკი იუწყება იეჰოვას სამეფოს“. მინდოდა, დღეს თქვენთვის მეთქვა, თუ რა არის ეს სამეფო და რას მოგიტანთ თქვენ და თქვენს ოჯახს». შემდეგ გადაშალე ბროშურა „რას მოითხოვს“ მე-6 გაკვეთილზე. დაიწყე პირველი აბზაცით; წაიკითხე და განიხილე იმდენი მასალა, რამდენის მოსასმენადაც სცალია მობინადრეს. შეუთანხმდი, რომ მეორე დღეს მიხვალ და დაასრულებ გაკვეთილის განხილვას.

¹¹ მუდამ გქონდეს ტრაქტატები. სამსახურებრივი ზედამხედველი და ლიტერატურაზე პასუხისმგებელი ძმები იზრუნებენ, რომ კრებაში ტრაქტატი „გსურთ უკეთ გაეცნოთ ბიბლიას?“ ყოველთვის სამყოფი იყოს. რამდენიმე მათგანი ატარე ჯიბით ან ხელჩანთით, იქონიე მანქანაში, სამუშაოზე, სკოლაში, სახლის შესასვლელშივე, სადმე ახლოს — ყველგან, სადაც კი ხელმისაწვდომი იქნება. აუცილებლად ატარე ისინი სამქადაგებლო ჩანთით, რადგან, როდესაც ვინმეს შეხვდები, ბიბლიის შესახებ საუბრისას გამოიყენო.

¹² დაე იეჰოვამ აკურთხოს ჩვენი გულმოდგინება. ყოველი ქრისტიანის მიზანია, ჭეშმარიტება ასწავლოს ვინმეს (მათ. 28:19, 20). ამჟამად თუ ატარებ ბიბლიის საშინაო შესწავლას? თუ დიახ, შეგიძლია შენს ყოველკვირეულ გეგმაში დრო გამონახო სხვა შესწავლისთვისაც? თუ ამჟამად არა გაქვს შესწავლა, უეჭველია, მისი ჩატარების სურვილი გაქვს. ლოცვით სთხოვე იეჰოვას, აკურთხოს შენი მცდელობა, იპოვო ვინმე, ვისთანაც შესწავლის დაწყებას შეძლებ. შემდეგ კი ლოცვის შესაბამისად იმოქმედე (1 იოან. 5:14, 15).

¹³ ჩვენ ახალი დამხმარე საშუალება გვაქვს ბიბლიის შესწავლების დასაწყებად! გაეცანი მას. ნუ დაიშურებ ამ ტრაქტატის გავრცელებას. ყველაფერი აკეთე იმისათვის, რომ ‘იყო ქველმოქმედი, გამდიდრდე კეთილი საქმეებით, იყო გულუხვი და გამზიარებელი’ იმისა, რაც ღვთის სიტყვიდან ისწავლე (1 ტიმ. 6:18).

[Box on page 4]

როდის გავავრცელოთ ტრაქტატი

◼ ყოვლდღიური საუბრების დროს

◼ როდესაც ვინმე იღებს ჩვენს ლიტერატურას

◼ როდესაც სახლში არავინაა

◼ განმეორებითი მონახულებების დროს

◼ ქუჩაში ქადაგების დროს

◼ საქმიან უბანზე ქადაგების დროს

◼ არაფორმალურად ქადაგების დროს

◼ წერილების წერისას

◼ საზოგადოებრვი ტრანსპორტით მგზავრობისას

◼ როდესაც ვინმე კარზე გვიკაკუნებს

◼ ნათესავებთან, მეზობლებთან, თანამშრომლებთან, თანაკლასელებთან და სხვა ნაცნობებთან საუბრისას.