კურთხევები, რომლებიც იეჰოვას სიყვარულის საპასუხოდ მადლიერების გამოვლენას მოაქვს (ნაწილი I)

¹ მოციქული იოანე წერდა: „ჩვენ გვიყვარს იმიტომ, რომ პირველად მან [იეჰოვამ] შეგვიყვარა“ (1 იოან. 4:19). იმაზე დაფიქრება, რაც იეჰოვამ გვიბოძა, აღგვძრავს საპასუხოდ ღრმა მადლიერება გამოვავლინოთ. ამის მაგალითი იესომ დაგვიტოვა. იგი ღვთისა და მისი სამეფოს შესახებ მორჩილად ქადაგებდა (იოან. 14:31). კარგი იქნება განვიხილოთ, თუ როგორ შეგვიძლია მადლიერება გამოვხატოთ იმ სიყვარულისთვის, რომელსაც იეჰოვა ავლენს, და რა კურთხევები მოჰყვება ამას.

² კარდაკარ ქადაგება. იესომ თავის მოწაფეებს ასწავლა, თუ როგორ მოემზადებინათ მოწაფეები. მისი მითითებებიდან აშკარად ჩანს, რომ ისინი კარდაკარ დადიოდნენ და ავრცელებდნენ სასიხარულო ცნობას (ლუკ. 9:1—6; 10:1—7). კარდაკარ მსახურების გაგრძელება, როდესაც ადამიანების გულგრილობასა და წინააღმდეგობას ვაწყდებით, ღვთისა და მოყვასისადმი სიყვარულს მოითხოვს. თუმცა კარდაკარ მსახურება ჩვენთვისაც არანაკლებ სასარგებლოა, რადგან რწმენას გვიმტკიცებს და ჩვენი იმედიც უფრო რეალური ხდება.

³ ანგელოზთა ხელმძღვანელობით ჩვენ ჭეშმარიტებას მოწყურებული მრავალი ადამიანი ვიპოვეთ (გამოცხ. 14:6). მობინადრეები აღნიშნავენ ხოლმე, რომ დახმარებისთვის ლოცულობდნენ და ამ დროს იეჰოვას მოწმეებს კარზე დაუკაკუნებიათ. კარიბის კუნძულებზე მცხოვრები ორი მოწმე, რომელთაც პატარა ბავშვი ახლდათ თან, კარდაკარ მსახურობდა. როდესაც უფროსებმა ქადაგების დამთავრება გადაწყვიტეს, ბავშვმა შემდეგ კართან მიირბინა და დააკაკუნა. კარი ახალგაზრდა ქალმა გააღო. როცა ეს უფროსებმა დაინახეს, კარს მიუახლოვდნენ და გამოესაუბრნენ მას. ქალმა ისინი შინ შეიპატიჟა და აუხსნა, რომ მათ მოსვლამდე ის ლოცულობდა და ღმერთს სთხოვდა, მოწმეები გამოეგზავნა მისთვის ბიბლიის შესასწავლად!

⁴ ქუჩაში ქადაგება. რადგან მრავალ ადგილას ძნელია ადამიანების სახლში პოვნა, ქუჩაში ქადაგება ეფექტური საშუალებაა. გარდა ამისა, მრავალი ადამიანი ცხოვრობს საგულდაგულოდ დაცულ შენობებში, სადაც შეუძლებელია შესვლა კარდაკარ საქადაგებლად. თუმცა იეჰოვას სიყვარულისთვის მადლიერება აღგვძრავს ყველა შესაძლებლობა გამოვიყენოთ, რომ ადამიანებს დავუკავშირდეთ სასიხარულო ცნობის გადასაცემად; რაც ქუჩაში ქადაგებასაც მოიცავს (იგავ. 1:20, 21).

⁵ განმეორებითი მონახულებები. რადგან ჩვენ ვეძებთ მათ, „ვისაც შეგნებული აქვთ თავიანთი სულიერი მოთხოვნილებები“, გვსურს შეძლებისდაგვარად დავუკმაყოფილოთ ეს წადილი (მათ. 5:3, აქ). ამისათვის საჭიროა დავბრუნდეთ ჭეშმარიტების დათესილი თესლის მოსარწყავად (1 კორ. 3:6—8). ერთმა დამ ავსტრალიაში ტრაქტატი დაუტოვა ქალს, რომელსაც ერთი შეხედვით დიდი ინტერესი არ გამოუვლენია. მიუხედავად ამისა, და ყველანაირად ცდილობდა ამ ქალის ხელმეორედ ნახვას. საბოლოოდ, როდესაც დაუკავშირდა, გაიგო, რომ მათი პირველი შეხვედრის შემდეგ ქალს თურმე ძვირადღირებული ბიბლია შეუძენია. დამ მასთან ბიბლიის შესწავლა დაიწყო.

⁶ ბიბლიის შესწავლების ჩატარება. ეს შეიძლება ჩვენი მსახურების ყველაზე სასიამოვნო და ღირებული ნაწილია. ფასდაუდებელი კურთხევაა დაეხმარო ადამიანებს იეჰოვას შესახებ ცოდნის მიღებაში, დაინახო ღვთისმოსაწონი ცვლილებები მათ ცხოვრებაში და ღვთისადმი მიძღვნის ნიშნად მათი ქრისტიანული ნათლობის მოწმე გახდე (1 თეს. 2:20; 3 იოან. 4).

⁷ მომდევნო ნომერში განვიხილავთ კიდევ როგორ ვართ კურთხეული, როდესაც მადლიერებით ვპასუხობთ იეჰოვას გამოვლენილ სიყვარულს.