ყველგან აუწყე იეჰოვას აღმატებულობის შესახებ
1. რა აღგვძრავს იმისკენ, რომ ყველგან ვაუწყოთ იეჰოვას აღმატებულობის შესახებ?
1 „შენია, იეჰოვა, სიდიადე, ძლევამოსილება, მშვენება, აღმატებულობა და ღირსება, რადგან ყველაფერი შენია ცაში თუ დედამიწაზე!“ (1 მატ. 29:11). რისკენ აღგვძრავს იეჰოვასადმი სიყვარული და მადლიერება? იმისკენ, რომ ‘ყველგან ვაუწყოთ მისი აღმატებულობის შესახებ, ვინც სიბნელიდან თავის საოცარ სინათლეში გამოგვიხმო’ (1 პეტ. 2:9). ჩვენ ვერ შევწყვეტთ ლაპარაკს ჩვენი დიდებული ღვთის შესახებ! მარტში, აპრილსა და მაისში იმის შესანიშნავი შესაძლებლობა გვექნება, რომ იეჰოვას აღმატებულობის შესახებ ვაუწყოთ.
2. რა სპეციალური კამპანიაა დაგეგმილი გახსენების საღამოსთვის და ვის შეუძლია მასში მონაწილეობის მიღება?
2 გახსენების საღამოს სპეციალური კამპანია: 2 აპრილს, ორშაბათს, ჩვენ უფლის გახსენების საღამოს აღვნიშნავთ, რითაც იეჰოვას აღმატებულობაზე გავამახვილებთ ყურადღებას. ამ მნიშვნელოვანი მოვლენის მოსაწვევები მთელ მსოფლიოში 17 მარტიდან 2 აპრილის ჩათვლით გავრცელდება. ყველას მოგიწოდებთ, მონაწილეობა მიიღოთ ამ კამპანიაში. ეს შესაფერისი დრო იქნება ახლებისთვის, რომ სასიხარულო ცნობის ქადაგება დაიწყონ. თუ ბიბლიის შემსწავლელი ან თქვენი შვილი მზად არის მაუწყებელი გახდეს, ამის შესახებ უხუცესებს დაელაპარაკე.
3. რა შეგვიძლია ვუთხრათ მათ, ვისაც გახსენების საღამოზე ვეპატიჟებით?
3 კრებებს საკმარისი რაოდენობის მოსაწვევები გაეგზავნება; თითოეული მაუწყებელი 30 ცალის აღებას შეძლებს, ხოლო პიონერი — ასის. შეთავაზება მოკლედ გააკეთე, შეგიძლია მობინადრეს უთხრა: „მინდა, მთელი გულით მოგიწვიოთ წლის ყველაზე მნიშვნელოვან მოვლენაზე. დაწვრილებით ინფორმაციას ამ მოსაწვევში ნახავთ“. უპასუხე მობინადრის კითხვებს, რომლებიც შეიძლება მას წამოეჭრას. უფლის გახსენების საღამოსთან დაკავშირებით შენთვის შეიძლება დამხმარე იყოს ინფორმაცია, რომელიც მოცემულია წიგნის „რას გვასწავლის ბიბლია?“ დანართში 206—208 გვერდებზე. შაბათობით და კვირაობით მიმდინარე თვის ჟურნალებთან ერთად შევთავაზებთ სპეციალურ მოსაწვევებს. ჩაინიშნე, ვინ გამოავლინა ინტერესი, რათა განმეორებით მიაკითხო მათ.
4. როგორ უნდა გავრცელდეს გახსენების საღამოს მოსაწვევი?
4 შეძლებისდაგვარად ყველა მობინადრეს პირადად უნდა გადავცეთ ეს მოსაწვევი. ამიტომ, გააკეთე ჩანაწერები, თუ ვინ არ დაგხვდა სახლში და სხვა დროს მიდი. კრებებს, რომლებსაც დიდი რაოდენობით მოსაწვევები აქვთ დარჩენილი, შეუძლიათ ეს მოსაწვევები მათ კართან დატოვონ, ვინც სახლში ვერ ნახეს, ოღონდ ეს გახსენების საღამოს მხოლოდ წინა კვირაში უნდა გაკეთდეს. შეეცადე, რომ მოსაწვევები ყველა ნაცნობს მიუტანო, იქნება ეს ნათესავი, თანამშრომელი, მეზობელი, ბიბლიის შემსწავლელი თუ ის, ვისაც განმეორებით ინახულებ.
5. ახლავე რატომ უნდა შევადგინოთ გეგმა, თუ გვსურს დამხმარე პიონერად მსახურება?
5 დამხმარე პიონერად მსახურება: შეგიძლია უფრო მეტი დრო დაუთმო იეჰოვას აღმატებულობის გაცხადებას და დამხმარე პიონერად იმსახურო მარტში, აპრილსა და მაისში? ამის გასაკეთებლად ალბათ გარკვეული ცვლილებების შეტანა მოგიწევს შენს ყოველდღიურ განრიგში (ეფეს. 5:15—17). დარწმუნებული იყავი, რაც უფრო მეტ ძალისხმევას მოახმარ იეჰოვას მსახურებას, მით უფრო მეტ სიხარულსა და კურთხევებს მიიღებ (იგავ. 10:22). ახლოვდება გახსენების საღამო, ამიტომ თუ გვსურს დამხმარე პიონერად მსახურება, ახლავე უნდა შევადგინოთ გეგმა (იგავ. 21:5).
6. რას ვსწავლობთ 90 წლის დის გამოცდილებიდან, რომელმაც შარშან დამხმარე პიონერად იმსახურა?
6 ერთმა 90 წლის დამ გასულ წელს დამხმარე პიონერად იმსახურა. მან თქვა: „მართალია, ძალიან მიყვარს ბაღში ფუსფუსი, მაგრამ მივხვდი, რომ ახლა სხვა რამე უფრო მნიშვნელოვანი იყო; ამიტომ საყვარელი საქმე გვერდზე გადავდე, სამეფოს ინტერესები პირველ ადგილზე დავაყენე და გადავწყვიტე, მარტის თვეში დამხმარე პიონერად მემსახურა“. იყო ეს და კურთხეული თავისი მონდომებისთვის? ის ამბობს: „უფრო მეტად ვიგრძენი კრებასთან სიახლოვე, რამაც, თავის მხრივ, იეჰოვასთან უფრო დამაახლოვა“. შეგვიძლია ავწონ-დავწონოთ ჩვენი მდგომარეობა და თუ საჭიროა, მსგავსი ცვლილებები შევიტანოთ განრიგში?
7. ძნელია დამხმარე პიონერად მსახურება?
7 თვეში 50 საათის ჩაბარება, რაც დამხმარე პიონერისგან მოითხოვება, შეიძლება არც ისე რთული აღმოჩნდეს, როგორც ფიქრობ. ლოცვით გააანალიზე შენი ყოველდღიური საქმიანობა, შეადგინე განრიგი და შემდეგ, შეიტანე ის შენს თეოკრატიულ კალენდარში. შენზე უკეთ არავინ იცის შენი მდგომარეობა. თუ სუსტი ჯანმრთელობა გაქვს და მალე იღლები, შესაძლოა, შენთვის უმჯობესი იყოს, მსახურებაში ყოველდღე ორი საათი გაატარო. თუ მთელი დღე მუშაობ ან სკოლაში დადიხარ, შეგეძლო საქადაგებლად საღამოობით ან შაბათ-კვირას გასულიყავი.
8. რა დაეხმარა ერთ წყვილს, ემსახურა დამხმარე პიონერად?
8 ბევრი ოჯახი სრული შემადგენლობით მსახურობს დამხმარე პიონერად. გასულ წლებში ერთი წყვილი ორჭოფობდა, დაეწყოთ თუ არა დამხმარე პიონერად მსახურება, რადგან ფიქრობდნენ, რომ მათი მდგომარეობა არ აძლევდა ამის საშუალებას. როგორ მოიქცნენ ისინი? „ლოცვაში ვთხოვეთ იეჰოვას, დაგვხმარებოდა, რათა შეგვესრულებინა ის, რასაც ამდენი ხნის განმავლობაში ვნატრობდით“. კარგი გეგმის წყალობით მათ მიაღწიეს დასახულ მიზანს. ისინი ამბობენ: „ეს შესანიშნავი იყო. ამან დიდი კურთხევები მოგვიტანა ორივეს. ყველას ვურჩევთ, მოსინჯონ დამხმარე პიონერად მსახურება. თუ ჩვენ შევძელით ეს, თქვენც შეძლებთ“.
9. რაზე შეგეძლოთ გემსჯელათ მომავალ ოჯახურ შესწავლაზე გაზაფხულის თვეებთან დაკავშირებით?
9 კარგი იქნებოდა, მომავალ ოჯახურ შესწავლაზე გემსჯელათ, თუ როგორ შეგეძლოთ, გემსახურათ დამხმარე პიონერებად გაზაფხულის თვეებში. თუ ყველა ვერ იმსახურებდით დამხმარე პიონერებად, იქნებ ოჯახის ერთ წევრს მაინც დახმარებოდით ამ მხრივ და გეთანამშრომლათ მასთან. თუ ესეც შეუძლებელი იქნება, მიზნად დაისახეთ, უფრო მეტი დრო დაუთმოთ მსახურებას ამ განსაკუთრებულ თვეებში.
10. რატომ უნდა ვესაუბროთ სხვებს იმაზე, რომ გვსურს, დამხმარე პიონერად მსახურება ამ განსაკუთრებულ თვეებში?
10 დაეხმარეთ ერთმანეთს: გულმოდგინება გადამდებია. კრების სხვა წევრებსაც უთხარი, რომ დამხმარე პიონერად მსახურებას აპირებ. ამან შეიძლება სხვებიც აღძრას ამ სახის მსახურებისკენ. გარდა ამისა, სხვებთან საუბარი კიდევ იმიტომ არის კარგი, რომ მათ, ვისაც გამოცდილება აქვს მსახურების ამ სფეროში, შეიძლება ისეთი რჩევები მოგცენ, რომლებიც დაგეხმარება საქმეების მოგვარებაში, პრაქტიკული განრიგის შედგენასა და მიზნის მიღწევაში (იგავ. 15:22). თუ შეგიძლია დამხმარე პიონერად მსახურება, ეცადე, რომ ის მაუწყებლებიც აღძრა ამ სიხარულის მომტანი მსახურებისკენ, ვისაც ამის შესაძლებლობა აქვს.
11. როგორ შეუძლიათ უხუცესებს, აღძრან სხვები იმისკენ, რომ დამხმარე პიონერებად იმსახურონ გაზაფხულის თვეებში?
11 ბევრი უხუცესი საჭირო ცვლილებებს ახდენს, რათა მონაწილეობა მიიღოს ამ განსაკუთრებულ მსახურებაში (ებრ. 13:7). კრებებისთვის ეს ნამდვილად დიდი გამხნევებაა! თავიანთი საუბრებით უხუცესები კრების წევრებს სტიმულს აძლევენ. რამდენიმე გამამხნევებელი სიტყვა და პრაქტიკული რჩევა შეიძლება სწორედ ის საჭირო ბიძგი აღმოჩნდეს, რაც სხვას დამხმარე პიონერად მსახურებას დააწყებინებდა. სამსახურებრივმა ზედამხედველმა შეიძლება ორგანიზება გაუწიოს სამქადაგებლო მსახურების დამატებით შეხვედრებს, რათა ყველამ შეძლოს ჯგუფურ ქადაგებაში მონაწილეობის მიღება. ეს შეხვედრები შეიძლება დაიგეგმოს სკოლის დამთავრებისა თუ სამუშაო საათების დასრულების შემდეგ. მათ შესახებ კრებაში რეგულარულად გაკეთდება განცხადება. სამსახურებრივი ზედამხედველი იმასაც მიაქცევს ყურადღებას, რომ ყველას ჰქონდეს თავისი უბანი და ლიტერატურა.
12. რისი გაკეთება შეგიძლია, თუ დამხმარე პიონერად მსახურება არ გიხერხდება?
12 თუ მდგომარეობა ხელს არ გიწყობს, რომ დამხმარე პიონერად იმსახურო, შეგიძლია გაამხნევო ისინი, ვინც ჩაბმულია ამ მსახურებაში და ილოცო მათთვის (იგავ. 25:11; კოლ. 4:12). შეიძლება მოახერხო და კვირის განმავლობაში კიდევ ერთი დღე გამოყო მათთან მსახურებისთვის ან უფრო მეტხანს იმსახურო მათთან ერთად.
13. რა მიზანი აქვთ იეჰოვას მოწმეებს საქართველოში და რა წვლილის შეტანა შეუძლია თქვენს კრებას ამაში?
13 მიზანი — 2000 დამხმარე პიონერი აპრილში: საქართველოში დამხმარე პიონერების უმაღლესი რიცხვი 2006 წლის აპრილში იყო 1807. ამიტომ, ჩვენი მიზანია, რომ აპრილის თვეში 2000 დამხმარე პიონერი გვყავდეს. ჩვენ შევძლებთ ამ მიზნის მიღწევას, თუ კრების ყოველი მეექვსე მაუწყებელი დამხმარე პიონერად იმსახურებს. თავისთავად ცხადია, რომ ზოგ კრებაში უფრო მეტ მაუწყებელს ექნება დამხმარე პიონერად მსახურების შესაძლებლობა. უმეტესი კრებებისთვის ამ მიზნის მიღწევა სავსებით რეალური იქნება. წარმოიდგინეთ, რა დიდ სიხარულს მოგიტანთ და რა დადებითად აისახება ეს თქვენი კრების სამქადაგებლო საქმიანობაზე!
14. რატომ არის აპრილი ხელსაყრელი თვე დამხმარე პიონერად მსახურებისთვის?
14 რატომ არის აპრილი ხელსაყრელი თვე დამხმარე პიონერად მსახურებისთვის? გახსენების საღამო თვის დასაწყისში აღინიშნება, რაც იმის კარგ შესაძლებლობას მოგვცემს, რომ განმეორებით მოვინახულოთ ყველა ის დაინტერესებული, ვინც გახსენების საღამოს დაესწრება. მონახულებისას ჩვენ მათ ჟურნალებს შევთავაზებთ და მიზნად გვექნება, რომ ერთ-ერთი შემდგომი მონახულების დროს დავუტოვოთ წიგნი „რას გვასწავლის ბიბლია?“ და შესწავლა დავიწყოთ. როგორც ვხედავთ, აპრილში დამხმარე პიონერად მსახურება ფართო გზას გვიხსნის ბიბლიის შესწავლების დასაწყებად. ამ დროს დღე იზრდება, ამინდიც შედარებით თბილია. გარდა ამისა, აპრილში ხუთი კვირაა, რაც უფრო გაუადვილებს დამხმარე პიონერად მსახურებას მათ, ვინც მუშაობს ან სწავლობს.
15. რატომ უნდა მოვახმაროთ მთელი ძალისხმევა იმას, რომ მაქსიმალურად აქტიურად ჩავებათ მსახურებაში მარტში, აპრილსა და მაისში?
15 ჩვენ ყოველ წელს აღვნიშნავთ იესო ქრისტეს სიკვდილის გახსენების საღამოს და ყოველი ასეთი საღამოს აღნიშვნა კიდევ ერთი წლით გვაახლოებს ქვეყნიერების აღსასრულთან. დარჩენილი დრო, რომელიც ჩვენი დიდებული ღვთის შესახებ საქადაგებლად უნდა გამოვიყენოთ, მცირდება (1 კორ. 7:29). გახსენების საღამოს აღნიშვნის პერიოდში ჩვენ ზეციერი მამის განდიდების შესანიშნავი შესაძლებლობა გვეძლევა, და თუ ამ ძვირფას შესაძლებლობას ხელიდან გავუშვებთ, ის დრო შეიძლება დაკარგული აღმოჩნდეს. ამიტომ, მოდი ახლავე მოვემზადოთ, რათა ყველაფერი გავაკეთოთ იმისთვის, რომ მარტის, აპრილისა და მაისის თვეებში ყველგან ვაუწყოთ იეჰოვას აღმატებულობის შესახებ!
[ჩარჩო 4 გვერდზე]
გვეყოლება 2000 დამხმარე პიონერი აპრილში?
◼ აწონ-დაწონე შენი მდგომარეობა.
◼ ოჯახთან ერთად იმსჯელეთ თქვენს მიზნებზე.
◼ დაელაპარაკე სხვებს შენი გეგმების შესახებ.