ჩვენ ვუზიარებთ სხვებს სამეფოს იმედს

¹ ამ მძიმე ბოლო დღეებში მრავალი ადამიანი უიმედოდ ცხოვრობს (ეფეს. 2:12). სხვები იმედს ამყარებენ მატერიალურ სიმდიდრეზე, ქვეყნიურ მთავრობებზე, თანამედროვე მეცნიერებასა და მრავალ სხვა რამეზე. მართლაც რა ბედნიერები ვართ, რომ გვაქვს მომავლის ნამდვილი იმედი, რომელიც „სანდოა და მტკიცე“ და „ღუზასავით არის ჩვენი სულისთვის“! (ებრ. 6:19).

² ღვთის სამეფოს მმართველობის დროს დედამიწა სამოთხედ გადაიქცევა. საყვარელი ადამიანები, რომლებიც სიკვდილმა წაგვართვა, აღდგებიან (საქ. 24:15). სიღარიბე, უსამართლობა, ავადმყოფობა, სიბერე და სიკვდილი აღარ იქნება (ფსალმ. 9:18; მათ. 12:20, 21; გამოცხ. 21:3, 4). ეს ზოგიერთია იეჰოვას იმ მრავალი დანაპირებიდან, რომლებიც მალე შესრულდება. განსაკუთრებით რომელი დანაპირების შესრულებას ელი?

³ სასიხარულო ცნობის ქადაგება: სამეფოს იმედი სხვებსაც უნდა გავუზიაროთ. ღვთისა და მოყვასის სიყვარული აღგვძრავს, მივბაძოთ იესოს და ‘ღარიბებს სასიხარულო ცნობა ვაუწყოთ, ტყვეებს გათავისუფლების, უსინათლოებს კი მხედველობის დაბრუნების შესახებ ვუქადაგოთ და გავათავისუფლოთ ჩაგრულები’ (ლუკ. 4:18). პავლე მოციქული სასიხარულო ცნობას ქადაგებდა ყველგან, სადაც კი ხალხს ხვდებოდა, იქნებოდა ეს მოედნებზე თუ სხვა ნებისმიერ ადგილას. ის მთლიანად იყო ჩაბმული მსახურებაში (საქ. 18:5). თუ მივბაძავთ მისი გულმოდგინე მსახურების მაგალითს, თავიდან ავიცილებთ ‘ქვეყნიერების საზრუნავსა და სიმდიდრის მაცდუნებელ ძალას’, რაც ჩვენს ქრისტიანულ იმედს შეასუსტებდა (მარ. 4:19).

⁴ ჩვენი სამეფოს იმედი მაშინაც არ ქრება, როდესაც ხალხისგან გულგრილ დამოკიდებულებას ვხვდებით, როცა ისინი არცთუ ისე დიდ ინტერესს ავლენენ სამეფოს ცნობისადმი ან როდესაც აშკარად გვეწინააღმდეგებიან. ჩვენ „მტკიცედ და უყოყმანოდ განვაგრძობთ ჩვენი იმედის სახალხოდ გაცხადებას“ (ებრ. 10:23). ჩვენ არ ‘გვრცხვენია სასიხარულო ცნობის გამო’ (რომ. 1:16). ჩვენმა დაჯერებულობამ და გულმოდგინებამ შესაძლოა ზოგი საბოლოოდ მოსასმენად აღძრას.

⁵ მართალია ქადაგების დროს მსოფლიო მდგომარეობის გაუარესებაზეც ვამახვილებთ ყურადღებას, რითაც ბიბლიური წინასწარმეტყველება სრულდება, მაგრამ ეს იმას არ ნიშნავს, რომ ჩვენ პესიმისტურ ცნობას ვქადაგებთ. პირიქით, ჩვენი ქადაგების მთავარი თემა არის სამეფოს იმედი — სასიხარულო ცნობა ღვთის სამეფოს შესახებ. მოდი ეს სასიხარულო ცნობა მთელი დაჯერებულობითა და გულმოდგინებით ვიქადაგოთ, „რათა აღსასრულამდე სრულად ვიყოთ დარწმუნებული იმედში“! (ებრ. 6:11).