შევთავაზოთ ჟურნალები, რომლებიც ჭეშმარიტების შესახებ ამოწმებს
1. რა მიზანს ემსახურება „საგუშაგო კოშკი“ და „გამოიღვიძეთ!“?
1 ჟურნალები „საგუშაგო კოშკი იუწყება იეჰოვას სამეფოს შესახებ“ და „გამოიღვიძეთ!“ კვლავაც ძალიან მნიშვნელოვან როლს ასრულებს სამეფოს შესახებ ქადაგებისა და მოწაფეების მომზადების საქმეში (მათ. 24:14; 28:19, 20). ჩვენ ხალხს სიამოვნებით ვთავაზობთ რეგულარულად ამ ორ დროულ ჟურნალს, როცა მსახურების სხვადასხვა სფეროში ვმონაწილეობთ.
2. რა ცვლილებები შევიდა „საგუშაგო კოშკსა“ და „გამოიღვიძეთ!“-ში და რატომ?
2 წლების განმავლობაში იცვლებოდა ამ ჟურნალების ფორმატი და შინაარსი და შესაბამისად მათი გავრცელების მეთოდებიც. ასეთი ცვლილებები იმ მიზნით ხდებოდა, რომ ეს ჟურნალები უფრო მიმზიდველი და საინტერესო გამხდარიყო, რათა სამეფოს შესახებ ცნობას ადამიანების გულამდე მიეღწია. ყოველივე ეს იმას ემსახურება, რომ „ყველანაირი ადამიანი გადარჩეს და ჭეშმარიტების საფუძვლიანი ცოდნა მიიღოს“ (1 ტიმ. 2:4).
3. როგორ შევთავაზებთ ჟურნალებს მსახურებაში?
3 2006 წლის იანვრიდან ჩვენ სხვადასხვა შეთავაზებას ვიყენებთ „გამოიღვიძეთ!“-ის ყოველთვიური გამოცემის გასავრცელებლად. მსგავსადვე, იანვრიდან ჩვენ სხვადასხვა შეთავაზებას გამოვიყენებთ, როცა მსახურებაში „საგუშაგო კოშკის“ ყოველთვიური ორი ნომრიდან მხოლოდ ერთს გავავრცელებთ. თითოეული ჟურნალის შეთავაზებები „ჩვენი სამეფო მსახურების“ ბოლო გვერდზე იქნება მოცემული. ჩვეულებრივ, დაბეჭდილი იქნება ჟურნალის შესავალი სტატიების შეთავაზებები, მაგრამ დროდადრო იმ სტატიების შეთავაზებებიც იქნება მოცემული, რომლებიც განსაკუთრებით საინტერესოა მკითხველისთვის. დაბეჭდილი შეთავაზებების გამოყენებას ყველაზე ეფექტურად მაშინ შევძლებთ, თუ კარგად გავეცნობით შესათავაზებელ სტატიას, შეთავაზებას საკუთარი სიტყვებით გავაკეთებთ და მას ჩვენს ტერიტორიას შევუსაბამებთ.
4. რატომ შეიძლება იყოს სასარგებლო სხვა შეთავაზებების გამოყენება, გარდა იმისა, რაც მოცემული იქნება „ჩვენს სამეფო მსახურებაში“?
4 მართალია, „ჩვენს სამეფო მსახურებაში“ თითოეული ჟურნალის ორი შეთავაზება იქნება მოცემული, მაგრამ შეგიძლიათ სრულიად განსხვავებული შეთავაზება გამოიყენოთ. ამის ერთ-ერთი მიზეზი შეიძლება ის იყოს, რომ რომელიმე სხვა სტატია შესაძლოა უფრო საინტერესო აღმოჩნდეს თქვენს მხარეში მცხოვრები ხალხისთვის. ან შეიძლება გრძნობ, რომ უფრო უკეთესად გააკეთებ იმ სტატიის შეთავაზებას, რომელიც ყველაზე მეტად მოგეწონა.
5. რა უნდა გააკეთო მანამ, სანამ ჟურნალის შეთავაზებას მოამზადებ?
5 როგორ შეგიძლია შეთავაზების მომზადება: პირველ რიგში საფუძვლიანად უნდა გაეცნო იმ სტატიას, რომლის შეთავაზებასაც აპირებ. შეიძლება ყოველთვის ვერ შეძლო ჟურნალის ყველა სტატიის წაკითხვა, სანამ მას მსახურებაში გაავრცელებ, მაგრამ შენ მთელი ენთუზიაზმითა და გულმოდგინებით უნდა შესთავაზო შენ მიერ შერჩეული სტატია. ამას კი მხოლოდ მაშინ შეძლებ, თუ კარგად გაეცნობი სტატიას.
6. როგორ შეგვიძლია საკუთარი შეთავაზებების მომზადება?
6 გარდა ამისა, არ დაიზეპირო შენ მიერ მომზადებული შეთავაზება და საჭიროების შემთხვევაში მზად იყავი, რომ შეცვალო ის. საუბრის დასაწყებად შეგიძლია დასვა ინტერესის აღმძვრელი კითხვა, რომელსაც სტატიაში ეცემა პასუხი. მიმართე ღვთის სიტყვას, რომელსაც აქვს იმის ძალა, რომ ადამიანების გულს შეეხოს (ებრ. 4:12). შეარჩიე შესაფერისი მუხლი, რომელიც მიესადაგება შენ მიერ წამოჭრილ თემას. სასურველია, რომ ეს იყოს სტატიაში ციტირებული ან მითითებული მუხლი. დაფიქრდი, როგორ დააკავშირებ მუხლს სტატიასთან.
7. როგორ შეგვიძლია შეთავაზებების გაუმჯობესება?
7 გამოიყენე ყოველი შესაძლებლობა: შეთავაზება მხოლოდ იმ შემთხვევაში იქნება ეფექტური, თუ მას გამოიყენებ. კრებასთან ერთად მიიღე მონაწილეობა ჟურნალებით მსახურებაში, რომელიც შაბათობით ტარდება. ჟურნალები შესთავაზე მას, ვინც ადრეც იღებდა ლიტერატურას. ყოველთვის შესთავაზე ჟურნალები ბიბლიის შემსწავლელებს და მათ, ვინც განმეორებითი მონახულების დროს შეიძლება სახლში დაგხვდეს. შენ შეგიძლია დაუტოვო ჟურნალები მათ, ვისაც გამოელაპარაკე საყიდლებზე ყოფნისას, მგზავრობისას ან მაშინ, როცა ექიმს ელოდებოდი. ეცადე, რომ მთელი თვის განმავლობაში უფრო და უფრო გააუმჯობესო შეთავაზებები.
8. რატომ არის „საგუშაგო კოშკი“ და „გამოიღვიძეთ!“ უნიკალური ჟურნალები?
8 „საგუშაგო კოშკი“ და „გამოიღვიძეთ!“ უნიკალური ჟურნალებია. ისინი განადიდებენ იეჰოვას, როგორც სამყაროს უზენაეს მმართველს (საქ. 4:24). ისინი ანუგეშებენ ადამიანებს ღვთის სამეფოს შესახებ სასიხარულო ცნობით და მათ იესო ქრისტესადმი რწმენას უნერგავენ (მათ. 24:14; საქ. 10:43). გარდა ამისა, ისინი თვალყურს ადევნებენ მსოფლიოში მიმდინარე მოვლენებს, რითაც ბიბლიური წინასწარმეტყველებები სრულდება (მათ. 25:13). მოდი ყოველი შესაძლებლობა გამოვიყენოთ „საგუშაგო კოშკისა“ და „გამოიღვიძეთ!“-ის გასავრცელებლად, რათა დავეხმაროთ ჩვენს ტერიტორიაზე მცხოვრებ ხალხს, რომ მათ მაქსიმალური სარგებელი მოუტანოს ამ ჟურნალებმა.
9. როგორ შეგვიძლია საფუძველი ჩავუყაროთ განმეორებით მონახულებას?
9 თუ ვინმეს ჟურნალს დაუტოვებ ან სულიერ საკითხზე მეგობრულად გაესაუბრები, მზად იყავი, რომ წამოჭრა კითხვა ან თქვა მისთვის საინტერესო რამ, რითაც საფუძველს ჩაუყრი განმეორებით მონახულებას. თუ გულმოდგინედ ვთესავთ ჭეშმარიტების მარცვალს, შეგვიძლია დარწმუნებული ვიყოთ, რომ იეჰოვა გაუხსნის გულებს მათ, ვისაც გულწრფელად სურთ, გაიცნონ ის და ემსახურონ მას (1 კორ. 3:6).